Eme Ikokohọ nọ A re “Yo jẹ Ruẹ”

Anwọ ikpe udhozeza-gbikpe (130) gbọ nọ e vrẹ na, Isẹri Jihova evaọ oke mai na a be hai kokohọ kukpe kukpe re a ru ikokohọ ilogbo. Enẹna, evuẹ nọ a rẹ kẹ evaọ ikokohọ na i re bu vrẹ udhuvẹ (40), a ve je kporo ile, ru ekiẹriwo, je dhesẹ ividio. Re ahwo nọ a ziọ ikokohọ na a sai wo erere, eme na i ve je te ae udu, o gwọlọ nọ a re “yo jẹ ruẹ” eware na vevẹ. (Luk 2:20) Eme a be rọ okẹ unevaze ra ru re ohwo kpobi ọ sai wo erere no ikokohọ nana ze ghelọ oria nọ a be rria kẹhẹ?

A rẹ Ruẹrẹ Ekwakwa Ikporakporo gbe Erọ Ividio Họ Lele Oghẹrẹ nọ Oria Okokohọ ỌvuọvO O Rrọ

Istediọmo gbe egwa ilogbo buobu nọ e rrọ erẹwho nọ i rovie aro nẹnẹ i wo ekwakwa ikporakporo gbe erọ ividio evaọ eva rai. Rekọ ẹsibuobu nọ ma tẹ haya eria itieye na kẹ ikokohọ, ma rẹ whẹ ekwakwa ikporakporo gbe erọ ividio obọmai họ. Fikieme? Oniọvo jọ nọ a re se David, nọ o bi ru iruo evaọ ẹko-iruo Broadcasting evaọ obọ ehri ukoko ọ ta nọ: “Eria ikokohọ buobu nọ ma rẹ haya na, a ru rai evaọ oghẹrẹ nọ ogbotu o sae rọ romatotọ gaviezọ kẹ ovuẹ nọ a be kẹ evaọ euwa ezeza gbọ họ. Wọhọ oriruo, evaọ istediọmo nọ a rẹ jọ ru igemu, omoware ikporakporo nọ a sai ro ru owhowhovia ọkpẹkpẹe hayo kporo imile ọvo e rẹ jarai. A rẹ jọ etẹlẹvishọno nọ e rrọ eria yena dhesẹ epanọ a bi ru te evaọ igemu na, eware nọ a be zẹ, hayo wariẹ dhesẹ oware jọ evaọ igemu na. Rekọ ikokohọ mai e rrọ ere he, ma gwọlọ nọ ogbotu na a re rri ividio nọ e rrọ thethei, a ve je yo ẹme kpobi nọ a ta evaọ obọ eplatfọmo na vevẹ.”

Oria okokohọ kpobi o rrọ epọvo na ha, fikiere ma rẹ ruẹrẹ ekwakwa ikporakporo gbe erọ ividio na họ lele oghẹrẹ nọ oria na o rrọ. Ma tẹ nwane riẹ eria nọ a ti jo ru ikokohọ no, eko-iruo Broadcasting nọ e rrọ iwou ogha na a ve mu iruo rai họ. A re rri unu ahwo nọ a te ziọ okokohọ na gbe unu ahwo nọ a rẹ sae gba oria okokohọ na, a vẹ rọ ere riẹ oria nọ ahwo a te keria. Kẹsena inievo na a vẹ ma omaa eria nọ a ti fi ispika gbe etẹlẹvishọno họ, gbe epanọ a te rọ kọnẹte rai kugbe, a ve je kere ekwakwa ikporakporo gbe erọ ividio kpobi nọ oria na o gwọlọ fihotọ, re ohwo kpobi nọ ọ ziọ okokohọ na o ve yo ẹme nọ a te ta jẹ ruẹ ividio na.

Iruo na e rẹ mae tubẹ ga otẹrọnọ evẹrẹ ivẹ hayo evẹrẹ nọ i bu vi ere a ti ro ru okokohọ na. Otẹrọnọ a te fa eme okokohọ na fihọ ẹvẹrẹ ọfa evaọ obọ eplatfọmo, o gwọlọ nọ inievo nọ e be te fa eme na a re yo eme na jẹ ruẹ ividio na, a ve je wo emaekrofonu avọ ekwakwa ikporakporo rai sa nọ ahwo nọ a bi yo ẹvẹrẹ yena a re ro yo ẹme nọ a be fa na. U woma gaga inọ u wo obọdẹ ekwakwa ikporakporo jọ nọ i bi fiobọhọ evaọ onana. I re ru nọ a sai ro kporo ividio nọ ogbotu na soso a rẹ sai rri oke ovona dede nọ a be gaviezọ kẹ ọvuọ ẹvẹrẹ riẹ, o tẹ make rọnọ evẹrẹ na i te eree dede. Brọda David ọ ta nọ: “Re a sai thuru ekwakwa na kpobi kugbe okolo iruo ho, yọ o gwọlọ nọ inievo nọ i bi ru iruo nana a rẹ nabi wuhrẹ ai ziezi.”

Iwou ogha buobu a wo ekwakwa ikporakporo gbe erọ ividio nọ a re ro ru ikokohọ kukpe kukpe. Iwou ogha nọ i wo ekwakwa nana a re ru epanọ a rẹ rọ fa ae kpohọ eria nọ a ti jo ru ikokohọ na unọjọ utọjọ. Kukpe kukpe, ugho nọ uwou ogha nọ o rrọ United States o rẹ rọ fa ekwakwa nana kpohọ ikokohọ ilogbo u bu vi edọla idu egba ivẹ ($200,000).a Ugho nana o maki bu na, u gbe ku vi ugho nọ ma hae rọ dẹ ekwakwa ekpokpọ gbe onọ ma rẹ rọ rẹrote ai. Brọda Steven nọ ọ jẹ rẹrote ofẹ ikporakporo gbe ividio evaọ okokohọ ologbo jọ evaọ Canada ọ ta nọ: “Inievo nọ i ru iruo ikporakporo gbe ividio na kpobi a daoma ziezi re a ruẹ nọ ekwakwa na kpobi, te onọ o mae kawo dede, e gbunu gbọka, a rẹrote ai, ruẹrẹ ae họ ziezi, jẹ kwa ae ruẹrẹhọ fihọ obei, re a sae rehọ ae ru okokohọ ọfa.”

Epanọ Ma re ro Wo Ekwakwa na jẹ Rẹrotei Ai

Re a haya ekwakwa ikporakporo gbe erọ ividio o ghare wumuo ho. U te no ere no, ẹsibuobu enọ a haya i re woma tere he, yọ a rẹ tubẹ rẹrote ai ziezi hi. Oyejabọ nọ ma rẹ rọ dẹ ekwakwa obọmai na. Ma be ta ẹme na, etẹlẹvishọno ologbo nọ ọ kẹre te irula ikpegbezeza je kpehru te irula ikpe ọ ghare te oware wọhọ edọla idu udhegbene ($24,000). Makọ uwhaya emaekrofonu ọvo dede nọ o theri te irula udhuvẹ-gbikpe o ghare te oware wọhọ edọla udhe ($20). Fikiere, inievo nọ e rrọ ẹko-iruo Broadcasting avọ erọ ẹko-iruo edadẹ a rẹ rọ uzou te uzou re a “roro araha na” taure a tẹ te dẹ okwakwa kpobi nọ a gwọlọ dẹ. (Luk 14:28) A rẹ nọ omarai nọ, imabro okwakwa nana u ti fiobọhọ kẹ? Kọ re a dẹ okwakwa nana nọ ma gwọlọ na oye o ginẹ mai woma? Kọ ma wo emamọ eria nọ a te hai fi ei họ? Kọ ma wo inievo nọ e te sae ruẹrẹ iẹe gbe eware nọ a te rọ rẹrotei?

Re ekwakwa ikporakporo gbe ividio na e tọ ziezi, nọ a gbẹ rọ raha igho ukoko na kufiẹ hẹ, ma rẹ ruẹrẹ ekwakwa nana ẹsikpobi. Ma tẹ be wọ ae no oria ruọ oria, ma re fi ai họ eware nọ i wo okpa ziezi re e seba ẹraha. Ma vẹ jẹ hae ruẹrẹ eware nọ a re fi ai họ na, nọ o tẹ gwọlọ ere.

Ikokohọ na E be Lẹliẹ Ahwo Ta Emamọ Ẹme Kpahe Ukoko Jihova, I te je Vẹ Ziezi

Oghẹrẹ nọ ekwakwa ikporakporo gbe erọ ividio i bi ro woma evaọ ikokohọ, o be lẹliẹ ahwo nọ a rrọ Isẹri Jihova ha ta emamọ ẹme kpahe ukoko na. Wọhọ oriruo, evaọ okokohọ ologbo jọ, ohwo jọ nọ o bi ru iruo kẹ ekọmpene ologbo jọ nọ o rẹ niyẹrẹ ọ ta nọ ikporakporo gbe ividio mai i woma gaga. Brọda Jonathan nọ o re fiobọhọ whẹ ekwakwa ikporakporo gbe erọ ividio họ evaọ ikokohọ ilogbo mai ọ ta nọ: “Akpọ o gbe ọzae na unu nọ ọ ruẹ nọ inievo nọ e be whẹ ekwakwa nana họ na yọ ahwo nọ a fialoma via kẹ iruo na orọnikọ a kpohọ obojọ nyai wuhrẹ onaa iruo na ha. Ọ ta nọ ekwakwa nọ inievo na a rehọ ẹdẹ ọvo gbe ubro whẹ họ na, o rẹ rehọ ekọmpene rai edẹ isoi.” Evaọ oria okokohọ ologbo ọfa jọ, ohwo nọ ọ be rẹrote oria na ọ ta nọ, “Ahwo nọ a wo onaa gaga nọ a re ru ile gbe ividio a nyaze etenẹ na no, rekọ mẹ re ruẹ ahwo nọ a riẹ iruo jẹ riẹ eware ru te enẹ ẹdẹvo ho!”

Irere vẹ i te owhẹ no fiki ekwakwa ikporakporo gbe erọ ividio nọ a bi ru fihọ ikokohọ ilogbo mai? Ẹsejọhọ oghẹrẹ nọ o rrọ David nọ ọ rrọ obọ England oma ere o rrọ owhẹ oma re. Ọ ta nọ: “Mẹ kpako te ikpe udhone-gberee (88) no, yọ no emaha ze me bi ro kpohọ ikokohọ ilogbo. Rekọ enẹna mẹ be mae gaviezọ evaọ okokohọ. Fiki emamọ ividio nọ a bi dhesẹ na, okokohọ o gbe bi kri evaọ aro ohwo ho, yọ eware na kpobi e be jọ vevẹ gaga.” Micheal nọ ọ be rria Nigeria ọ ta nọ: “Fikinọ o gbẹ be jọ bẹbẹ kẹ inievo mai re a yo eme nọ a be ta gbe ividio nọ a bi dhesẹ hẹ, a be sae gaviezọ ziezi evaọ etoke okokohọ na soso.”

Nọ who ti kpohọ Okokohọ Ologbo gbe ọrọ Ubrotọ Obọdẹ enukpe nana nọ uzoẹme riẹ o rrọ “Whowho Usi Uwoma Na!” roro kpahe iruo nọ a ru re whọ sai yo eme okokohọ na jẹ ruẹ ividio na vevẹ. Eware nana kpobi e sae lọhọ fiki okẹ unevaze rai, te enọ wha ru evaọ donate.jw.org. Whai kọ idododo.