Iku Uzuazọ Jesu—Epanọ A ro Ru Ividio Na

Oware jọ nọ Isẹri Jihova a je rẹro riẹ gaga evaọ ukpe nana họ, Ividio 1 ọrọ Iku Uzuazọ Jesu na. Ma be ta ẹme na, ima ahwo buobu a rri ividio na no. Yọ ividio nana ikpegberee a ti ru, ọnana họ ọrọ ọsosuọ! Ẹvẹ inievo mai a bi tube ru iruo te re a sai ru ividio nana, kọ ẹvẹ who ro fiobọhọ kẹ inievo nana no?

Epanọ A rọ Rẹrote Ahwo nọ I Ru Edrama na gbe Enọ I Vidio Riẹ

Evaọ uwou-ogha Australasia nọ a jọ vidio edrama na, ahwo nọ a bu te oware wọhọ udhuvẹ-gbikpe hayo tube bu te udhone ae a rẹ jariẹ nọ a te bi vidio abọ ọvuọvo.a Inievo jọ e rẹ jẹ jariẹ nọ e rẹ rọ emu uvo, emu owọwọ gbe eware nọ a re ro kru agba ga kẹ inievo nọ i wo abọ-sasa evaọ iruo na. A rẹ jiroro emu nọ a te kẹ inievo na no oke lelehie taure ẹdẹ na o te ti te. Oniọvo-ọmọtẹ nọ a re se Esther nọ ọ rrọ ẹko-iruo emu othere ọ ta nọ: “Ma rẹ dẹ eware nọ ma re ro there emu na mi ehreki sa-sa re ma sae dẹ eware nọ i woma ziezi evaọ unuigho nọ u kpotọ. Yọ ẹsikpobi ma re nwene emu na re ma ruẹ nọ a ku emu kufiẹ hẹ.” Nọ a tẹ ghale iẹe, emu nọ a rẹ kẹ omomọvo kẹdẹ kẹdẹ ọ ghare te oware wọhọ edọla ene (4 U.S. dollars).

U te no emu nọ inievo nọ i bi ru iruo na a gwọlọ no, o gwọlọ nọ a rẹ thọ ae re. Thọ ae no eme? Evaọ obọ Australia nọ a be jọ ru ividio na, uvo ọ rẹ rro ziezi, yọ ẹrrorro uvo na ọ rẹ jọ gaga ẹsejọ. Re uvo na ọ siọ ae ba emu ga hrọ, oma o vẹ jẹ siọ inievo na ba ẹlọhọ, u wo inievo jọ nọ e rẹ bọ iwou etapolini jẹ ruẹrẹ eria nọ i re dhẹ ziezi họ nọ inievo na i re kpohọ no oke te oke. A vẹ jẹ ruẹrẹ eware wọhọ esasa gbe ame họ kẹ inievo na, gbe idẹ nọ a re ro wholo re ẹrrorro uvo na o siọ ae ba ẹmahe. Brọda Kevin nọ ọ be jọ ẹko-iruo audio/video ru iruo ọ ta nọ: “Inievo nana buobu nọ e be ruẹrẹ eria idhedhẹ na họ na yọ inievo nọ e be rria Ebẹtẹle he, nọ e rẹ nyaze ti ru iruo. A bi ru iruo nana gbe iruo efa buobu avọ evawere. O gbẹ rrọ obọ nọ inievo nana a bi fihọ họ, ma hae sai ru iruo na ha.”

Oghẹrẹ nọ A ro Vidio Abọ Edrama na jọ Evaọ Eria nọ E Rrọ Ebẹtẹle He

U wo eria jọ evaọ edrama na nọ a rẹ sae jọ uwou-ogha na vidio ho, te oria nọ a re jo vidio edrama nọ ọ rrọ Ebẹtẹle hayo istudio. Evaọ eria itieye na, a re vidio edrama na evaọ oria nọ o rrọ uwou-ogha na ha. Nọ a tẹ gwọlọ vidio iku anwae nọ a kere fihọ Ebaibol na, ahwo nọ a bi ru edrama na te enọ i bi vidio riẹ a re kpohọ eria nọ i thabọ keme iwhaya ẹlẹtriki, hayo idhere ikota, hayo iwou oke mai na e jariẹ evaọ oke anwae he. Te iwu nọ a ti kuhọ ro ru edrama na, eware efa nọ a ti ro ru ei, gbe ekwakwa nọ a ti ro vidio riẹ, a re koko ae họ, a vẹ rọ imoto fa ae kpohọ oria nọ a te jọ ru ividio na jẹ sẹro rai ziezi. Taure a te ti muhọ evidio, inievo-emezae nọ i bi fiobọhọ kẹ inievo nọ e be rẹrote iruo na a rẹ ruẹ nọ ejẹnẹretọ, ame nọ a rẹ da, gbe eria nọ a re jo kpiri awọ e riẹ no. Inievo nọ i ti ru edrama na gbe enọ e te rekọdo riẹ a rẹ rria iwou inievo nọ e kẹle etẹe, imiwou esese nọ a wọ lele oma ze, hayo ehọtẹle.

Re a rekọdo ividio evaọ eria nọ e rrọ Ebẹtẹle he yọ okolo iruo ho. O rẹ rehọ oke, o rẹ rehọ igho buobu, yọ o rẹ lẹliẹ oma rrọ ohwo kpobi nọ o ru iruo na. Fikiere evaọ ukpe 2023, Utu Ẹruorote na u te kuenu nọ jọ a dẹ etẹlẹvishọno ologbo jọ nọ ọ ghare te edọla ima ivẹ gbe ubro (2.5 million U.S dollars). A rẹ rọ etẹlẹvishọno nana dhesẹ oghẹrẹ ividio sa-sa, o vẹ wọhọ nọ ohwo nọ o bi ru edrama na ọ rrọ oria nọ a bi dhesẹ evaọ ividio na. Iwoho riẹ i re vẹ gaga, yọ a rẹ sai tube nwene elo ividio na, o vẹ jọ wọhọ ẹsenọ ohwo nọ o bi ru edrama na evaọ uwou ọ rrọ obọ otafe. Etẹlẹvishọno nana nọ a dẹ na u ru nọ ma gbẹ be rọ raha igho nyae rekọdo ividio evaọ eria sa-sa ha. Oniọvo jọ nọ a re se Darren nọ ọ rrọ Ogbẹgwae Uwou Ogha Australasia ọ ta nọ: “Re a rọ etẹlẹvishọno ologbo nana ru ividio, u re ru nọ iruo na e gbẹ rọ bẹ inievo nọ a bi ro ru edrama na no ho, yọ inievo nọ e be rekọdo edrama na a sae wariẹ rekọdo eria nọ i kiehọ te he unuẹse nọ a gwọlọ. Wọhọ oriruo, otẹrọnọ obọ otafe ma be jọ vidio, whọ tẹ gwọlọ rekọdo ọre nọ o bi kiediwi, omoke nọ whọ rẹ rọ rekọdo riẹ re ọre na o te ti kiediwi u tulo ho. Rekọ whọ tẹ be rọ etẹlẹvishọno ologbo na rọ rekọdo riẹ, whọ rẹ sai ru etẹlẹvishọno na wọhọ ẹsenọ ọre o bi kiediwi unuẹse buobu bẹsenọ whọ rẹ rekọdo onọ u kiehọ owhẹ oma.”

“O Jọ Omẹ Oma nọ Me Ru Okpoware Ovo Ho”

Re ma sai ru abọ sa-sa edrama Iku Jesu na, inievo nọ i bu te egba buobu a re ro ru edrama na, gbe inievo nọ i tube bu vi ere nọ e rẹ rekọdo ividio na. Ẹvẹ inievo nana a rri oma nọ ukoko na o be dawo re a sae rẹrote ai evaọ iruo na?

Oniọvo nọ a re se Amber ọ be rria obọ Melbourne, oria nọ o rọ ikilomita egba ihrẹ (700) gbọ thabọ no Ebẹtẹle. O no ugbo obei na ze fiki iruo edrama na. Ọ ta nọ: “No anwọ oke nọ arupre mai o ro nwrotọ, oghẹrẹ nọ inievo Ebẹtẹle na a be rọ rẹrote omẹ, a rẹ ruẹ unu gbiku riẹ hẹ. Inievo Ebẹtẹle buobu a zizie omẹ inọ mẹ ziọ obọ uwou rai te re emu hayo da iti. Nọ ma kpohọ oria nọ ma bi jo ru edrama na, inievo na kpobi a jẹ riẹ omẹ ru ziezi, mẹ ruẹ nọ a gine you omẹ. Eghale nọ i te omẹ no evaọ erẹ na i bu wumuo ho. O jọ omẹ oma nọ me ru okpoware ovo vievie he!”

Oniọvo nọ a re se Derek ọ rrọ usu inievo nọ i bi ru ividio na. Ọ ta nọ: “No emuhọ iruo na ze, inievo nọ e rrọ eko-iruo buobu i fiobọhọ kẹ omai. Iruo nọ inievo na a bi ru nọ a be rọ rehọ oke rai, ekwakwa rai, gbe ẹgba rai fiobọhọ evaọ edrama nana, o da omẹ ẹro fia. U no rai eva ze inọ a re ru iruo na, a rrọ wowou, a te je bi fiobọhọ kẹ omai gaga. O rrọ vevẹ nọ Jihova ọ be ghale inievo nana, ọ tẹ jẹ be ghale omai re. Mẹ riẹ nọ orọnikọ oware nọ u ti no iruo na ze oye ọvo Jihova o re rri hi, rekọ te oghẹrẹ nọ ma bi ro ru iruo na.”

Ma bi yere owhai rọkẹ igho nọ wha bi ro ru unevaze, te unevaze nọ wha bi ru evaọ donate.jw.org nọ ma be sai ro ru ividio nana.