Ividio ọ Jehovah’s Witnesses—Organized to Share the Good News

O vrẹ ikpe 100 no nọ a ro koko Isẹri Jihova họ re a whowho emamọ usi na. Ma be rọ evẹrẹ udhusoi buobu evaọ ekwotọ nọ i bu vrẹ 230 whowho ovuẹ nana nọ o mae nya kẹre no evaọ akpọ na. (Mat. 24:14) Fikieme ewhowho emamọ usi na u je wuzou? Ẹvẹ a be sae rọ jọ akpọ na soso whowho iei? A jọ ividio na Jehovah’s Witnesses—Organized to Share the Good News kẹ uyo enọ yena ẹkwoma edhesẹ gbe ẹtakpahe abọ sa-sa ọrọ iruo akpọ-soso mai. Who te rri ividio na no, roro kpahe enọ obotọ na.

Ẹvẹ ividio nana u ro ru owhẹ wo otoriẹ gbe edẹro viere no kẹ (1) oma nọ ukoko Jihova o be dawo re a sae ta usiuwoma na? (2 Tim. 4:2) (2) iviuwou Ebẹtẹle nọ e rrọ akpọ na soso? (3) uwuhrẹ nọ a be kẹ imishọnare gbe esẹro? (2 Tim. 2:2) (4) epanọ u wuzou te re a rehọ isase oria Ebaibol jọ ro mu okpẹdẹ na họ gbe omaruẹrẹ kpahe kẹ iwuhrẹ ukoko koka koka? (Iruẹru 17:11) (5) irere nọ i re no ekpohọ iwuhrẹ mai ze? (Hib. 10:24, 25) (6) eghale nọ i ti te owhẹ nọ a tẹ wariẹ ru otọakpọ na họ Aparadase no? (Aiz. 11:9) (7) uvẹ-ọghọ nọ who wo nọ who bi ro w’obọ evaọ iruo ivuẹvu nọ e be nyaharo na?—Jọn 4:35.

Ividio nana yọ obọdẹ okwakwa nọ u bi fi obọ họ kẹ enọ i wo isiuru kpahe ovuẹ Uvie na nọ a be rọ riẹ iruo nọ Isẹri Jihova a bi ru evaọ akpọ-soso. (8) Oke vẹ ma rẹ sai ro fi ividio na họ dhesẹ kẹ emọ-uwuhrẹ Ebaibol, imoni mai gbe amọfa? (9) Oware uwoma vẹ o wọ ahwo nọ who dhesẹ i rie kẹ ru hayo ta?

Nọ ma bi roro kpahe eware nọ Jihova ọ be rọ ẹkwoma ukoko riẹ rugba na, oma o rẹ wọ omai ta ọkpọ eme ọso-ilezi na: “Iruo ibuobu ra nọ who ru, O Ọnowo ỌGHẸNẸ mẹ, iruo igbenu who ru kẹ omai; a sai dhesẹ ovo kẹ owhẹ hẹ.” (Ol. 40:5) Joma rehọ ividio nana fi obọ họ kẹ amọfa wo edẹro kẹ Jihova gbe ukoko riẹ.