Ividio Ọkpokpọ nọ Ma re ro Mu Ebe-Iwuhrẹ Họ

Ahwo buobu a bi rri ividio ọkpẹkpẹe jọ nọ ma fihọ Oria Evuẹ jw.org na nọ uzoẹme riẹ o ta nọ: Fikieme Who re ro Wuhrẹ Ebaibol Na? A ru ividio na evaọ oghẹrẹ nọ ahwo nọ a rri rie a sae rọ jẹ uwuhrẹ Ebaibol ọvọvẹ rehọ. Whọ tẹ gwọlọ rri ividio na, kpohọ oria “Yare Uwuhrẹ Ebaibol” nọ o rrọ obotọ “Oria Ọsosuọ” na, hayo whọ sae rehọ okwakwa itanẹte ra ro rri ẹkpẹti nọ o rrọ obotọ evaọ uke emebe-evẹvẹ ekpokpọ mai na. Joma ta kpahe epanọ ma sae rọ rehọ ividio na ta usiuwoma.

• Who te zihe bru ohwo, whọ sae ta kẹe nọ: “Iviena jọ me dhesẹ ividio ọkpẹkpẹe jọ kẹ owhẹ nọ o ta kpahe epanọ whọ sae rọ jọ Ebaibol duku iyo enọ jọ nọ who wo.” Otẹrọnọ ọ rọwo, jọ ifonu ra hayo ekọmputa riẹ dhesẹ ividio na kẹe.

• Otẹrọnọ whọ kẹ ohwo jọ omobe-ovẹvẹ mai na jọ evaọ usiuwoma ẹgbede hayo orọ oke-gheghe, dhesẹ ẹkpẹti nọ o rrọ obotọ uke omobe-ovẹvẹ na kẹ ohwo na, jẹ ta kẹe re ọ rehọ okwakwa itanẹte riẹ ro rri rie. Otẹrọnọ ma wo ividio na evaọ ẹvẹrẹ nọ a ro kere omobe-ovẹvẹ na, ẹkpẹti na ọ rẹ rehọ ohwo na kpohọ ividio na ovavo evaọ Oria Evuẹ mai na. Fikiere whọ sae rehọ ifonu hayo ekọmputa ọsese ro kporo iei kẹ ohwo na okioke yena.

• Ta kẹ ahwo nọ wha gbẹ rrọ iruo, ibe emọ-isukulu ra, gbe amọfa kpahe ividio na, re whọ jẹ nọ ae sọ whọ sai dhesẹ iẹe kẹ ae. Hayo whọ sae jọ e-mail vi oghẹrẹ nọ a sai ro kpohọ oria ividio na kẹ ae, re a rri rie.

Nọ ma tẹ be daoma rehọ ividio nana rọ ta usiuwoma, ma te sai mu ebe-iwuhrẹ Ebaibol họ, je fi obọ họ kẹ ahwo nọ a wo “eva ezi kẹ uzuazọ ebẹdẹ bẹdẹ.”—Iruẹru 13:48.