Oghẹrẹ nọ A ro Ru Ividio Okokohọ 2020 “Hae Ghọghọ Ẹsikpobi”! Na

Ividio nọ ma be hai rri evaọ okokohọ mai na, i re duobọte omai udu gaga, i re fiobọhọ kẹ omai wo otoriẹ eware nọ ma bi wuhrẹ evaọ Ebaibol na. A jọ okokohọ ubrotọ 2020 “Hae Ghọghọ Ẹsikpobi”! na dhesẹ ividio nọ i bu te udhusoi gbe ikpegbene (114) gbe eme 43 nọ inievo nọ e rrọ Utu Ẹruorote na gbe ahwo nọ a bi fiobọhọ kẹ ae a ru. Ma riẹ nọ whọ riẹ inọ re a ru ividio nana kpobi yọ okolo iruo ho, yọ o rẹ rehọ ugho buobu re. Kọ whọ sae nọ omara no ẹdẹ jọ dede nọ kọ ẹvẹ a sai ru onana kpobi?

Inievo-emezae gbe emetẹ nọ i bu te egba izii (900) evaọ eria sa-sa akpọ na ae a fialoma via, a tẹ jẹ rọ onaa nọ a wo ro ru ividio nana kpobi na. A te ku euwa kpobi nọ a raha ro ru iruo nana kugbe, a raha te enwenọ euwa idu udhusoi (100,000), yọ iruo na e rehọ vrẹ ikpe ivẹ. Ividio auwa soso gbe iminiti ikpegbezeza nọ a ru no Ebaibol ze na nọ uzoẹme riẹ o rrọ Nehemaya: ‘Oghọghọ Jihova Họ Ogaga Ra’ na ọvo ọ rehọ te euwa idu udhosa-gbikpe (70,000) soso.

Wọhọ epanọ whọ riẹ, a raha igho rọ kuọ inievo nọ e fialoma via je ru iruo nana, gbe igho nọ a raha fihọ eware sa-sa nọ a ruẹrẹhọ ro ru ividio na, ekwakwa gbe iwou nọ a bọ hayo ru re a sai ro ru iruo nana.

Oniọvo jọ nọ a re se Jared Gossman nọ o bi ru iruo evaọ Audio/Video Services ọ ta nọ: “Ogbẹgwae Ewuhrẹ ọrọ Utu Ẹruorote na o rẹ daoma gaga ruẹ nọ ahwo nọ a ro ru ividio na e rẹ jọ ahwo nọ a no eria sa-sa ze evaọ akpọ na, onana u bi fiobọhọ dhesẹ via vevẹ nọ mai yọ inievo nọ e rrọ okugbe ọvo evaọ akpọ-soso. Re ma sae nyate utee nana ma wo itu 24 evaọ erẹwho 11 sa-sa nọ i bi wobọ evaọ iruo nana. Yọ re itu nana kpobi e sae wobọ evaọ iruo nana, whọ riẹ nọ o rẹ rehọ ugho, omaa nọ a rẹ nabe ma ziezi, gbe ọruẹrẹfihotọ epanọ iruo na e sae rọ nya kpatiẹ.”

Yọ re a sai ru ividio mai jọ buobu, o rẹ gwọlọ nọ a re ru oghẹrẹ ekwakwa jọ nọ u re kiehọ oghẹrẹ ividio nọ a bi ru na nọ a rẹ sae gha họ jẹ gha no lọlọhọ. Wọhọ oriruo, re a sai ru ividio Nehemaya: ‘Oghọghọ Jihova Họ Ogaga Ra’ na, a bọ eware jọ fihọ istudio Mt. Ebo na kẹle Patterson nọ ọ rrọ New York evaọ U.S.A. Re a ruẹ nọ a raha ugho bu hrọ họ, ghele na a re ru ividio na evaọ oghẹrẹ nọ u re dhesẹ iku oke anwae gbagba, inievo na a ru eware jọ nọ e gbẹdẹ tere he nọ a rẹ sae gha no jẹ gha họ lọlọhọ nọ i tho igbẹhẹ oke anwae Jerusalẹm. Eware nana ọvuọvo nọ a rọ ire ru na i kpehru te irula 20, yọ a rehọ ifomu tamu omarai, a te je gbe oghẹrẹ ọda jọ fihọ ae nọ e rrọ ghraze ghraze nọ u ru rai wọhọ itho. A rẹ sae wọ “igbẹhẹ” nana fihọ oghoghẹrẹ eria sa-sa ro ru eria sa-sa ividio na, onana u fiobọhọ nọ a ro ru umutho igbẹhẹ nọ a ro ru iruo nana. O make rrọ ere na, a raha te oware wọhọ edọla U.S. 100,000 (₦38,354,000.00) ro ku eware nana nọ a ro ru edrama na ọvo.a

Ababọ avro eware nana kpobi nọ ma yo na, u ru nọ iruo nọ a ru rọ ruẹrẹ okokohọ ubrotọ ukpe nana họ o rọ da omai ẹro fia. U mu omai ẹro nọ oma nọ inievo na kpobi a dawo rọ ruẹrẹ okokohọ ukpe nana họ na o te wha ujiro ulogbo se Jihova. Ma bi yere owhai gaga rọkẹ epanọ wha be rọ rehọ eva rai kpobi ro ru unevaze kẹ iruo akpọ-soso na evaọ donate.jw.org gbe idhere efa.