Epanọ A Sae rọ Fa Eme Okokohọ Ubrotọ 2020 “Hae Ghọghọ Ẹsikpobi”! Na

Evaọ amara Ahrẹ gbe Aria 2020, inievo mai evaọ akpọ na soso a ti rri okokohọ ubrotọ ọvona evaọ oke ọvona, yọ onana họ orọ ọsosuọ nọ o te rọ via enẹ. Onana o te gwọlọ nọ a fa eme okokohọ na fihọ evẹrẹ nọ i bu vi egba isoi (500) soso. Re a sae ma omaa oware utionana je ru ei re, u fo nọ o rẹ rehọ te ẹgbukpe hayo tubẹ vrẹ ere dede. Rekọ fiki okpẹyao coronavirus nọ ọ rrọ otọ na, inievo nọ e te fa eme okokohọ ubrotọ 2020 “Hae Ghọghọ Ẹsikpobi”! na, a wo te emerae ene he nọ a re ro ru iruo nana re.

Ẹko-iruo Translation Services avọ Global Purchasing nọ e rrọ obọ oria nọ u wuzou iruẹru Isẹri Jihova a fiobọhọ gaga evaọ iruo ilogbo nana nọ e rrọ otọ na. Ẹko-iruo Translation Services a ruẹ nọ itu efafa buobu a gwọlọ ekwakwa nọ a re ro ru iruo nana, maero kọ emamọ emaekrofonu nọ a re ro rekọdo eme gbe ividio na. Ẹko-iruo Global Purchasing a te ru epanọ a rẹ rọ dẹ emaekrofonu nọ i bu te odu ọvo (1,000), a ve je vi ai kpohọ eria sa-sa nọ i bu te enwenọ egba ivẹ (200).

Re a gbẹ raha ugho bu ga hrọ họ, a tẹ dẹ emaekrofonu na buobu ẹsiẹvo je vi ai kpohọ oria ọvo jọ. Kẹsena a tẹ jọ etẹe ru re a vi ai kpohọ eria sa-sa nọ efefafa na a rrọ evaọ akpọ na soso. Fikinọ a dẹ rai buobu na, emaekrofonu ọvuọvo ọ tẹ rrọ oware wọhọ ₦65,000, yọ unuigho yena u kpotọ vi ẹsenọ a hae te dẹ ae ọvuọvo.

Amara Ane gbe Asoi ọrọ 2020 ẹko-iruo Global Purchasing ọ rọ dẹ emaekrofonu na je vi ai kpohọ eria sa-sa na. Yọ evaọ oke yena, ekọmpene buobu i gbe je ru iruo tere he fiki okpẹyao nọ ọ rrọ otọ na. Ghelọ oyena, evaọ obọ ekuhọ amara Asoi yọ emaekrofonu na gbe ekwakwa efa i te iwou efafa nọ e rrọ Ebẹtẹle he, iwou ogha, gbe eria efa nọ a be jọ ru iruo efafa obọ no.

Brọda Jay Swinney nọ ọ be rẹrote ẹko-iruo Global Purchasing ọ ta nọ: “Evaọ etoke nana, eko-iruo sa-sa evaọ Ebẹtẹle gbe ekọmpene sa-sa i ru iruo kugbe ziezi. Ẹzi Jihova o ru nọ ma sai ro ru iruo nana vẹrẹ vẹrẹ jẹ dẹ eware nọ inievo mai a gwọlọ re a ro ru iruo na, yọ ma raha ugho bu ga hrọ họ.”

Brọda Nicholas Ahladis nọ o bi ru iruo evaọ ẹko-iruo Translation Services ọ ta nọ: “Nọ ekwakwa nana i te efefafa nọ a ta kẹ nọ a no uwou ze he obọ, eva e were e rai gaga. Keme dede nọ a jẹ sai kuomagbe ibe efefafa rai evaọ oke yena ha, a sai ru iruo kugbe ai nọ a rọ fa eme, edrama, gbe ile na fihọ evẹrẹ nọ i bu vi egba isoi (500).”

Ekwakwa nana nọ ma dẹ na yọ ovo jọ gheghe evaọ iruo buobu nọ ma ru re ma sai ru okokohọ ubrotọ 2020 nọ uzoẹme riẹ o ta nọ “Hae Ghọghọ Ẹsikpobi”! na. Azọhọ unevaze ra nọ whọ be hai ru evaọ donate.jw.org evaọ itanẹte gbe evaọ idhere efa, ma sae rọ ruẹ ugho rọ dẹ eware nana nọ e roja na.