Whaha Eware Nana nọ Who te bi Wuhrẹ Ebaibol Kugbe Ohwo

Whọ Ta Ẹme Bu Hrọ Họ: Who roro nọ eware na kpobi who re ru vẹ hẹ. Jesu ọ jẹ rehọ enọ fiobọhọ kẹ ahwo roro jẹ kẹ uyo kẹ omarai. (Mt 17:24-27) Enọ i re ru uwuhrẹ na jọ sasasa je fiobọhọ kẹ owhẹ riẹ oware nọ ọmọ uwuhrẹ ra ọ riẹ gbe ẹrọwọ riẹ. (be 253-254 ¶3-4) Whọ tẹ nọ onọ, wo odiri re whọ hẹrẹ bẹsenọ ọmọ-uwuhrẹ na ọ rẹ kẹ uyo na. Nọ ọmọ-uwuhrẹ na ọ tẹ za uyo na thọ, ukpenọ whọ rẹ nwane kẹe uyo ogbagba na, nọe enọ efa nọ i re fiobọhọ kẹe kẹ uyo na. (be 238 ¶1-2) Ta ẹme evaọ edhere nọ ọmọ-uwuhrẹ na ọ sae ro wo otoriẹ oware okpokpọ nọ who bi wuhrẹ iẹe na.—be 230 ¶4.

Who Ru Ei Reghe No Ho: Whọ ta eme kpobi nọ whọ riẹ kpahe oware nọ wha bi wuhrẹ na ha. (Jọ 16:12) Tẹrovi igogo eme nọ e rrọ edhe-ẹme na ọvo. (be 226-227 ¶4-5) Who te bi ru eme na vẹ vrẹta, ọmọ-uwuhrẹ na o ti reghe no, o ti gbe kru ẹme ọvo dhobọ họ o tẹ make rọ nọ eme na e were dede. (be 235 ¶3) Nọ ọmọ-uwuhrẹ na ọ tẹ nwani wo otoriẹ igogo eme na no, kpohọ edhe-ẹme ọfa.

Thakpinọ O Wuhrẹ Obe na Re: Ma rẹ daoma wuhrẹ ahwo evaọ oghẹrẹ nọ u re ro duobọ te ai udu orọnikọ thakpinọ ma wuhrẹ obe na re he. (Luk 24:32) Dhesẹ ẹgba nọ Ẹme Ọghẹnẹ o wo ẹkwoma igogo eria ikere na ọvo nọ whọ rẹ tẹrovi. (2Kọ 10:4; Hib 4:12; be 144 ¶1-3) Kẹ iriruo gbe etadhesẹ elọlọhọ. (be 245-246 ¶2-4) Hai roro kpahe eware jọ nọ e be kẹ ọmọ-uwuhrẹ na uye gbe enọ ọ rọwo re whọ sae kpọ ewuhrẹ na rri ofẹ yena. Nọ enọ itiena: “Ẹvẹ eware nọ whọ jọ etenẹ wuhrẹ na e rrọ owhẹ oma?” “Eme onana u wuhrẹ omai kpahe Jihova?” “Irere vẹ who roro nọ e rẹ sai te omai nọ ma te fi ohrẹ nana họ iruo?”—be 238-239 ¶3-5; 259 ¶2.