Abọ Avọ 2: Eru Ebe-Iwuhrẹ Ebaibol nọ E rẹ Nyaharo
Oma Oruẹrẹ Kpahe kẹ Eru Uwuhrẹ Na
1 Re ohwo o wuhrẹ ziezi evaọ obe-uwuhrẹ Ebaibol o kẹre vi ẹme nọ ọ rẹ ta kpahe oria nọ a bi wuhrẹ na gbe ikereakere nọ a fodẹ na nọ o re se ọvo. O gwọlọ nọ ma re wuhrẹ ọmọ-uwuhrẹ na evaọ edhere nọ o re duobọte udu riẹ. Onana o gwọlọ oma oruẹrẹ kpahe ziezi avọ ọmọ-uwuhrẹ na nọ ma re wohọ iroro.—Itẹ 15:28.
2 Epanọ A rẹ rọ Ruẹrẹ Oma Kpahe: Rehọ olẹ nọ whọ rẹ lẹ se Jihova kpahe ọmọ-uwuhrẹ na avọ ẹgwọlọ riẹ ro muhọ. Lẹ Jihova re o fi obọ họ kẹ owhẹ rọ eme na nyate udu ọmọ-uwuhrẹ na. (Kọl. 1:9, 10) Re whọ sai wo otoriẹ uzoẹme na ziezi, rehọ omoke jọ roro kpahe uzoẹme nọ o rrọ uzou hayo uwuhrẹ nọ wha bi ti wuhrẹ na, izoẹme-esese na, gbe eware efa kpobi nọ e rẹ sai fi obọ họ. Nọ oma ra nọ, ‘Eme họ uzedhe ẹjiroro uzoẹme na?’ Onana u ti fi obọ họ kẹ owhẹ tọ ẹro vi uzedhe igogo-eme na nọ who bi ru uwuhrẹ na.
3 Rọ oma totọ kiẹ ẹme na no edhe-ẹme te edhe-ẹme. Vuhu iyo enọ na mu, kpoka họ igogo-eme gbe ihie-eme nọ i wuzou na ọvo. Dhesẹ epanọ ikereakere nọ a fodẹ na i ro wobọ kpahe igogo-eme nọ e rrọ edhe-ẹme na, jẹ salọ enọ who ti se evaọ etoke uwuhrẹ na. Who te kere eme fihọ akotọ obe na nọ a kere oware ovo fihọ ha na o sai fi obọ họ kẹ owhẹ. Ọmọ-uwuhrẹ na o re vuhumu ziezi inọ oware nọ o bi wuhrẹ na Ẹme Ọghẹnẹ u no ze.—1 Tẹs. 2:13.
4 Ru Uwuhrẹ na Kiehọ Ẹgwọlọ Ohwo Na: Ofariẹ, ru uwuhrẹ na re u kiehọ ẹgwọlọ ọmọ-uwuhrẹ na. Daoma kaki roro kpahe enọ nọ ọ be te nọ gbe igogo-eme nọ o bi ti wo otoriẹ rai hi hayo nọ e te jọ bẹbẹ re o te wo otoriẹ rai. Nọ oma ra nọ: ‘Eme u fo nọ o re wo otoriẹ riẹ hayo ru iruo kpahe re ọ sai wo ẹnyaharo abọ-ẹzi? Ẹvẹ mẹ sae rọ rehọ eme na nyate udu riẹ?’ Who ve ru uwuhrẹ na lele ere. Evaọ ẹsejọ, whọ sae ruẹ oware nọ u je fo re whọ ruẹrẹ ọtadhesẹ jọ họ, epanọ who re ro ru ẹme vẹ, hayo enọ sa-sa re i fi obọ họ kẹ ọmọ-uwuhrẹ na wo otoriẹ ẹme hayo ikere jọ. (Neh. 8:8) Rekọ whaha eme efa nọ i wobọ kpahe uzoẹme na tere he nọ who re fiba ae. Ọkiẹriwo ọkpẹkpẹe nọ who re ru evaọ obọ ekuhọ uwuhrẹ na u ti fi obọ họ kẹe kareghẹhọ igogo eme na.
5 Ẹvẹ oghọghọ nọ ma re wo o rẹ rro te nọ ahwo ọkpokpọ a tẹ mọ ibi ẹrẹreokie rọ kẹ oruaro Jihova! (Fil. 1:11) Re ma sae fi obọ họ kẹ ae nyate ute yena, ruẹrẹ oma kpahe ziezi evaọ oke kpobi nọ whọ tẹ gwọlọ ru obe-uwuhrẹ Ebaibol.