Epanọ Ma Sai ro Wo Onaa Ziezi Evaọ Usiuwoma Ota​—Eria Sa-Sa Evaọ JW.ORG

OWARE NỌ U RO WUZOU: Ebe kpobi nọ e rrọ evaọ Etehe Iruo Mai e rẹ rehọ ohwo kpohọ jw.org. Ẹjiroro ekade jw.org gbe omobe-ovẹvẹ Diẹse Ma Sae Jọ Ruẹ Iyo Enọ nọ I Wuzou Evaọ Uzuazọ? na họ, re o rehọ ahwo kpohọ oria evuẹ mai. Whọ sae rehọ obe hayo ividio kẹ ohwo nọ whọ tẹ rehọ ifonu jọ jw.org vi obe hayo ividio nọ o rrọ Ẹkpẹti Ekwakwa Ewuhrẹ mai se ohwo, hayo vi oria nọ ọ sae jọ danlodu riẹ sei. Onana o rẹ mai fiobọhọ nọ whọ tẹ be ta usiuwoma kẹ ohwo nọ ọ be jẹ ẹvẹrẹ ọfa. Ofariẹ re, ẹsejọ ahwo a rẹ nọ enọ nọ a kuyo rai fihọ ebe nọ e rrọ Etehe Iruo mai hi. Ma tẹ riẹ epanọ a rẹ rọ nẹ eria sa-sa nọ e rrọ oria evuẹ mai na u re fiobọhọ kẹ omai ta usiuwoma ziezi.

EPANỌ A RE RO RU EI:

• 

  Rọ oria “IWUHRẸ EBAIBOL” na ta usiuwoma. Nọ whọ tẹ be ta usiuwoma kẹ ọsẹgboni nọ ọ gwọlọ riẹ epanọ a sae rọ yọrọ emọ ziezi, kpohọ oria IWUHRẸ EBAIBOL > ORỌO GBE UVIUWOU.

• Rọ oria “EBE GBE EWARE EFA” na ta usiuwoma. Nọ whọ tẹ be jọ obọ isukulu ta usiuwoma yọ whọ gwọlọ dhesẹ ibroshọ Iyo Rọkẹ Enọ 10 nọ Izoge A rẹ Nọ kẹ ọmọ-eklase ra, kpohọ oria EBE GBE EWARE EFA > EBE GBE IBROSHỌ.

• Rọ oria “KPAHE OMAI” na ta usiuwoma. Nọ whọ tẹ be ta usiuwoma kẹ ohwo nọ wha gbẹ rrọ iruo nọ ọ gwọlọ riẹ eware nọ ma rọwo, kpohọ oria KPAHE OMAI > ENỌ NỌ AHWO A RẸ NỌ.

WHA RRI IVIDIO NA ERIA SA-SA EVAỌ JW.ORG, KẸSENA WHỌ VẸ TA KPAHE ORIA NỌ OHWO O RE KPOHỌ RO FIOBỌHỌ KẸ:

• ohwo nọ ọ rọwo nọ Ọghẹnẹ ọ rrọ họ

• ohwo nọ okpẹtu o te oma

• oniọvo nọ ọ siọ ewuhrẹ ba no

• ozihebro ra nọ ọ gwọlọ riẹ epanọ wha be sai ro wo igho ruiruo na

• ohwo nọ ọ rrọ orẹwho ofa nọ ọ gwọlọ jọ oboriẹ kpohọ ewuhrẹ