“Pọl O Yere Ọghẹnẹ je Kru Udu Ga”

Nọ ukoko nọ o jọ obọ Rom a yo nọ Pọl ọ be nyaze, a te vi inievo nyai zere iei, yọ a nya emaele 40 (ikilomita 64) re a tẹ te ruẹ e riẹ evaọ edhere. Ẹvẹ uyoyou nana nọ a dhesẹ na u kpomahọ Pọl? “Nọ Pọl ọ ruẹ e rai, o te yere Ọghẹnẹ je kru udu ga.” (Iru 28:15) Dede nọ a riẹ Pọl wọhọ ọnọ ọ rẹ bọ ikoko nọ o weze bru ga, evaọ onana nọ ọ rọ jọ uwou-odi na, ọye họ ọnọ a tuduhọ awọ.—2Kọ 13:10.

Nẹnẹ, esẹro okogho a re weze bru ikoko sa-sa re a bọ inievo na ga. Fikinọ ae omarai a wọhọ omai re, ẹsejọ oma o rẹ rọ ae, a rẹ ruawa, yọ udu u re no ai awọ re. Oke ofa nọ ọsẹro okogho avọ aye riẹ a tẹ kpahe ukoko ra, eme whọ sai ru rọ bọ ae ga re wha sae “tuduhọ ohwohwo awọ”?—Rom 1:11, 12.

• 

  Daoma jọ evaọ oke omakugbe kẹ usi uwoma ota. O rẹ tuduhọ ọsẹro okogho na awọ nọ ọ tẹ ruẹ iwhowho-uvie nọ i bi kuomagbei kpohọ usi uwoma evaọ oka nọ ọ rọ rrọ kugbe ukoko na. (1Tẹ 1:2, 3; 2:20) Whọ sae daoma rehọ ọkobaro ubroke evaọ amara iweze riẹ na. Kọ whọ sai lele iei hayo aye riẹ kpohọ usi uwoma hayo wha ọyomariẹ hayo aye riẹ lele oma kpohọ obe uwuhrẹ ra jọ? Eva e rẹ were ai re a lele iwhowho-uvie sa-sa kpohọ usi uwoma, te iwhowho-uvie ekpokpọ hayo enọ i ri wo onaa tere he.

• 

  Ru ai ọghọ. Kọ whọ sae kẹ ai oria nọ a rẹ wezẹ hayo there emu kẹ ai? Onana u re dhesẹ kẹ ai nọ who you i rie avọ aye riẹ. A bi rẹro ikpeware mi omai hi.—Luk 10:38-42.

• 

  Gaviezọ kẹe je fi ohrẹ nọ ọ kẹ owhẹ họ iruo. Uyoyou o rẹ wọ ọsẹro okogho kẹ omai ohrẹ evaọ eware nọ ma be riẹ ru tere he, re ma sai wo ẹnyaharo evaọ egagọ Jihova. Evaọ ẹsejọ ohrẹ na o rẹ jọ gaga. (1Kọ 5:1-5) Eva e rẹ were iẹe nọ ma te bi yoẹme jẹ romakpotọ kẹe.—Hib 13:17.

• 

  Yere ai. Ta kẹ ọsẹro okogho avọ aye riẹ epanọ iruo rai i ro fiobọhọ kẹ owhẹ no. Whọ sai ru ei nọ whọ tẹ rrọ kugbe ai hayo kere iei fihọ omobe kẹ ai.—Kọl 3:15.