Epanọ Ma Sai ro Wo Onaa Ziezi Evaọ Usi Uwoma Ota​—Nọ Whọ tẹ be Jọ Aro Ekamẹra Hayo Ifonu nọ A Fihọ Unuẹthẹ Ta Usi Uwoma

OWARE NỌ U RO WUZOU: Fiki ahwo ugbarugba nọ e vọ oria kpobi, ozọ u bi mu ahwo gaga. Onana u ru nọ ahwo a bi ro fi ekamẹra hayo ifonu họ unuẹthẹ rai, re a sae ruẹ ọrara nọ ọ nyaze unuẹthẹ na je sai lele iei ta ẹme ababọ ẹthẹ rai nọ a re rovie. Fiki onana, ozọ o sae jọ omai ẹro re ma ta usi uwoma kẹ ohwo nọ ma be ruẹ hẹ rekiyọ ọ be ruẹ omai. Eme nọ ma be te ta evaọ obotọ na, i ti fiobọhọ kẹ omai re ma sae ta usi uwoma ududu evaọ unuẹthẹ nọ a fi ekamẹra hayo ifonu họ.

EPANỌ A RE RO RU EI:

• Rẹro nọ ahwo a te gaviezọ. Ahwo buobu nọ a fi ekamẹra hayo ifonu họ unuẹthẹ rai a rẹ gwọlọ gaviezọ kẹ omai

• Kareghẹhọ nọ a ru ekamẹra jọ evaọ oghẹrẹ nọ i re ro muhọ rekọdo taure who te ti kporo ẹthẹ na, yọ whọ tẹ nwane ruọ eva ighẹ na no ohwo nọ o wo uwou na o sai mu owhẹ họ ẹruẹ no jẹ sai yo ẹme nọ whọ be ta

• Nọ ohwo nọ o wo uwou na ọ tẹ kpunu no, ta ẹme kẹ ifonu hayo ekamẹra na wọhọ ẹsenọ whọ be ta ẹme kẹ ohwo na dẹẹ. Ru ovao ra re o jọ ohwohwẹ re whọ jẹ ta ẹme wọhọ ẹkoma ra. Ta ẹme ọvona nọ who wo họ iroro nọ whọ hae ta kẹ ohwo na o hae jọnọ ọ nya lahwe. Otẹrọnọ ekamẹra o rrọ unuẹthẹ na, who go ovao ra kẹle ekamẹra na ga hrọ họ. Yọ otẹrọnọ ohwo nọ o wo uwou na ọ kpunu hu, ifonu na ọ tẹ vuẹ owhẹ nọ whọ vuẹ uwou fihotọ, whọ vuẹ uwou fihotọ hẹrẹ ohwo na ha

• Nọ wha tẹ maki ku ẹme rai họ no, kareghẹhọ nọ ohwo nọ o wo uwou na ọ sae gbẹ ruẹ owhẹ je yo ẹme nọ who bi lele ohwo nọ wha gbẹ rrọ usu ta. Fikiere wha yọroma kẹ oghẹrẹ ẹme nọ wha rẹ ta nọ wha gbẹ rrọ unuẹthẹ na