Whai Izoge​—Kọ Jihova Họ Emamọ Ogbẹnyusu Ra?

Oghẹrẹ iruemu jọ vẹ whọ gwọlọ nọ ogbẹnyusu ra o re wo? Ẹsejọhọ iruemu wọhọ omaurokpotọ, ẹwo, gbe ọghọruo e rẹ were owhẹ. Jihova o wo iruemu yena kpobi. (Ọny 34:6; Iru 14:17) Ọ rẹ gaviezọ nọ whọ tẹ be lẹ sei. Yọ oke kpobi nọ whọ tẹ gwọlọ obufihọ riẹ o re fiobọhọ kẹ owhẹ. (Ol 18:​19, 35) Ọ rẹ rọvrẹ owhẹ nọ who te ru thọ. (1Jọ 1:9) Jihova họ emamọ Ogbẹnyusu nọ ọ mai woma kpaobọ!

Ẹvẹ whọ sae rọ jọ ogbẹnyusu Jihova? Who re wuhrẹ kpahe Jihova ẹkwoma Ebaibol na nọ who re se. Whọ vẹ jẹ ta eva ra kẹe evaọ olẹ. (Ol 62:8; 142:2) Who re rri eware nọ i wuzou kẹ Jihova ghaghae, wọhọ Ọmọ riẹ, Uvie riẹ, gbe eyaa eware nọ ọ ya nọ o ti ru evao obaro. Vuẹ amọfa kpahe iẹe. (Izi 32:3) Nọ usu ra kugbe Jihova o tẹ rrọ kpekpekpe, ọ te jọ Ogbẹnyusu ra bẹdẹ bẹdẹ.​—Ol 73:​25, 26, 28.

WHA RRI IVIDIO NA WHAI IZOGE​—“WHA DAWO RE WHA RUẸ NỌ JIHOVA O WOMA,” KẸSENA WHA VẸ KIYO ENỌ NANA:

• 

  Ẹvẹ whọ sae rọ ruẹrẹ oma kpahe kẹ omauromudhe gbe ame-ọhọ?

• 

  Oghẹrẹ vẹ inievo ukoko na a sai ro fiobọhọ kẹ owhẹ gọ Jihova?

• 

  Ẹvẹ usi uwoma ota o sai ro ru usu ra kugbe Jihova ga ziezi?

• 

  Uvẹ iruo sa-sa vẹ e sai rovie fihọ kẹ owhẹ evaọ egagọ Jihova?

• Fikieme who ro you Jihova?