Eme Ebaibol na Ọ Ta Kpahe Usu?

Uyo nọ Ebaibol na ọ kẹ

Imava nọ e be nyusu a re ru eva were ohwohwo, je ru nọ eware e rẹ rọ riẹ nya kẹ ohwohwo re. Emamọ egbẹnyusu a re fiobọhọ kẹ omai riẹ oware ru ziezi je wo emamọ uruemu.—Itẹ 27:17.

Rekọ Ebaibol na o dhesẹ nọ u fo nọ ma rẹ yọroma kẹ oghẹrẹ ahwo nọ ma re lele nyusu. Ọ ta kpahe ebẹbẹ nọ i re noi ze nọ ma te mu usu kugbe ikpehre ahwo. (Itẹ 13:20; 1 Ahwo Kọrint 15:33) Ikpehre egbẹnyusu e rẹ lẹliẹ ohwo ru eware igheghẹ jẹ raha uruemu ezi ohwo.

Ma te jọ uzoẹme nana ta kpahe eware nana

• Ono họ emamọ ogbẹnyusu?

• Iriruo emamọ egbẹnyusu vẹ a ta kpahe evaọ Ebaibol na?

• Kọ ohwo ọ sae jọ ogbẹnyusu Ọghẹnẹ?

• Eria Ebaibol jọ nọ a jọ ta kpahe usu

Ono họ emamọ ogbẹnyusu?

Ebaibol na o wuhrẹ nọ u wo oware jọ nọ u wuzou gaga nọ u fo nọ o rẹ lẹliẹ imava jọ egbẹnyusu ekpekpe orọnikọ fiki eware jọ nọ a re ru kugbe ọvo ho. Wọhọ oriruo, obe Olezi 119:63 ọ ta nọ: “Mẹ yọ ogbẹnyusu ohwo kpobi nọ ọ be dhozọ raa gbe enọ i bi koko ijaje ra.” Muẹrohọ nọ ohwo nọ o kere oria Ebaibol nana ọ ta nọ ahwo nọ a rẹ dhozọ Ọghẹnẹ jẹ be daoma koko izi riẹ, ae o re mu usu kugbe.

Ebaibol na ọ tẹ jẹ ta kpahe iruemu jọ nọ u fo nọ emamọ ogbẹnyusu o re wo. Wọhọ oriruo:

• “Emamọ ogbẹnyusu o re dhesẹ uyoyou ẹsikpobi[,] ọ tẹ jẹ rrọ oniọvo nọ a yẹ fiki oke idhọvẹ.”—Itẹ 17:17.

• “U wo egbẹnyusu jọ nọ e ruẹrẹ oma kpahe inọ a rẹ guọghọ ohwohwo fihọ otọ, rekọ u wo ogbẹnyusu jọ nọ ọ rẹ kẹle ohwo vi oniọvo.”—Itẹ 18:24.

Eria Ebaibol nana i dhesẹ nọ emamọ ogbẹnyusu ọ rẹ talamu ohwo, jọ yoyou, dhesẹ uwowou, je ruọghọ. O re fiobọhọ kẹ ohwo evaọ etoke ebẹbẹ, fikiere a rẹ sai fievahọ iẹe. Yọ emamọ ogbẹnyusu ọ rẹ kpọ owhẹ họ nọ whọ tẹ gwọlọ ru oware jọ nọ u fo ho hayo nọ who te ru oware jọ thọ.—Itẹ 27:6, 9.

Iriruo emamọ egbẹnyusu vẹ a ta kpahe evaọ Ebaibol na?

A jọ Ebaibol na ta kpahe iriruo ahwo jọ nọ a jọ emamọ egbẹnyusu, yọ ahwo nana a no eria sa-sa ze, a jọ unuikpe sa-sa, a wo ọvuọ uruemu ẹwho rai, yọ ejọ i wuzou vi ejọ. Joma ta kpahe iriruo esa jọ.

• Rut avọ Naomi. Rut ọ jọ aye ọmọzae Naomi, rekọ Naomi oniọrọ riẹ ọ rọ ikpe buobu vi ei. Ofariẹ, aimava na a no ẹwho ọvo ze he, fikiere uruemu ẹwho rai u wo ohẹriẹ. Ghele na, aimava na a jọ egbẹnyusu ekpekpe yọ a you ohwohwo.—Rut 1:16.

• Devidi avọ Jonatan. Dede nọ Jonatan ọ rọ oware wọhọ ikpe 30 soso ro vi Devidi, Ebaibol na ọ ta nọ aimava na a “zihe ruọ egbẹnyusu ekpekpe.”—1 Samuẹle 18:1.

• Jesu avọ ikọ riẹ. Jesu họ ọnọ o wuzou ikọ riẹ, yọ ọye ọ jọ owuhrẹ gbe Olori rai. (Jọn 13:13) Dede na, Jesu o rri rai nọ a te ahwo nọ a rẹ jọ egbẹnyusu riẹ hẹ hẹ. Ukpoye Jesu o mu usu okpekpe kugbe ahwo nọ a je lele iwuhrẹ riẹ. Jesu ọ ta nọ: “Me bi se owhai egbẹnyusu, keme mẹ ta eware kpobi nọ me yo mi Ọsẹ mẹ kẹ owhai no.”—Jọn 15:14, 15.

Kọ ohwo ọ sae jọ ogbẹnyusu Ọghẹnẹ?

Ee, ahwo-akpọ a sae jọ egbẹnyusu Ọghẹnẹ. Ebaibol na ọ ta nọ: “O wo usu okpekpe kugbe enọ i kiete.” (Itẹ 3:32) Onana u dhesẹ nọ Ọghẹnẹ o re mu usu kugbe ahwo nọ a wo omaurokpotọ, ahwo nọ a rẹ ta uzẹme jẹ rọ adhẹẹ kẹ amọfa, gbe ahwo nọ a be daoma koko izi riẹ. Wọhọ oriruo, a jọ Ebaibol na se Abraham ogbẹnyusu Ọghẹnẹ.—2 Iruẹru-Ivie 20:7; Aizaya 41:8; Jemis 2:23.