ERIA EBAIBOL NỌ A RU VẸ
Itẹ 17:17—“Emamọ Ogbẹnyusu O re Dhesẹ Uyoyou Ẹsikpobi”
“Emamọ ogbẹnyusu o re dhesẹ uyoyou ẹsikpobi[,] ọ tẹ jẹ rrọ oniọvo nọ a yẹ fiki oke idhọvẹ.”—Itẹ 17:17, Efafa Akpọ Ọkpokpọ.
“Ogbẹnyusu ọ rọ rọkẹ eyowo ẹsikpobi, rekọ oniọvo ọ rẹ ruẹ uye oniọvo.”—Itẹ 17:17, Ebaibol Ẹri Na.
Otofa Eme nọ E Rrọ Itẹ 17:17
Emamọ egbẹnyusu a re fievahọ ohwohwo. Wọhọ epanọ emọ nọ ọsẹgboni a yẹ a rẹ jọ kpekpekpe na, ere emamọ egbẹnyusu a rẹ jọ kpekpekpe je fiobọhọ kẹ ohwohwo, maero kọ evaọ oke uye.
“Emamọ ogbẹnyusu o re dhesẹ uyoyou ẹsikpobi.” A rẹ jẹ fa ẹme nana inọ “egbẹnyusu a re dhesẹ uyoyou nọ a wo kẹ ohwohwo ẹsikpobi.” Ẹme Hibru nọ a fa uyoyou evaọ etenẹ na orọnikọ yọ uyoyou igbenu gheghe he. Uyoyou nana yọ uyoyou nọ o kare oriobọ, yọ ohwo o re ru oware jọ ro dhesẹ iẹe. (1 Ahwo Kọrint 13:4-7) Egbẹnyusu nọ i wo oghẹrẹ uyoyou nana a rẹ talamu ohwohwo nọ a te wo ẹbẹbẹ hayo nọ oware jọ o tẹ be gwọlọ raha usu rai. Ofariẹ, a rẹ rọvrẹ ohwohwo no eva ze. (Itẹ 10:12) Yọ emamọ egbẹnyusu a rẹ re ohwohwo ihri hi nọ eware i te bi woma kẹ ọjọ. Ukpoye, a re lele ohwohwo ghọghọ.—Ahwo Rom 12:15.
“Emamọ ogbẹnyusu . . . [yọ] oniọvo nọ a yẹ fiki oke idhọvẹ.” A jọ etenẹ rehọ emamọ ogbẹnyusu dhesẹ oniọvo. Emọ nọ ọsẹgboni a yẹ a re you ohwohwo gaga. Fikiere nọ ma tẹ dawo ẹgba mai kpobi re ma fiobọhọ kẹ ogbẹnyusu mai nọ ọ rrọ uye, yọ ma bi ru wọhọ epanọ oniọvo o re ru. Ofariẹ, ebẹbẹ i re ru nọ usu nọ o rrọ udevie emamọ egbẹnyusu u re ro whrehe he. Ukpoye, a re you ohwohwo jẹ rọ adhẹẹ kẹ ohwohwo vi epaọ ọsosuọ, yọ onana o rẹ lẹliẹ usu rai ga.
Eme nọ E Wariẹ Itẹ 17:17 Họ
Whọ rẹ jọ obe Itẹ ruẹ eme areghẹ buobu. A kere eme na kpẹkpẹe yọ e rẹ lẹliẹ ohwo roro didi. Solomọn ovie na họ ọnọ o kere eware nọ e mai bu evaọ obe na. Wọhọ epanọ a re kere eme-ọketa evaọ Hibru, ere o kere eme riẹ. Ẹsejọ ọ rẹ rọ eware ivẹ wawo ohwohwo, yọ ẹsejọ ọ rẹ ta kpahe eware ivẹ nọ i wo ohẹriẹ ro fi ẹgba họ ẹme riẹ. Oriruo jọ nọ a sai ro dhesẹ eware ivẹ nọ a rọ wawo ohwohwo họ Itẹ 17:17. Eme nọ e rrọ abọ avivẹ na i fi ẹgba họ abọ ọsosuọ na. Yọ oriruo jọ nọ a sai ro dhesẹ eware nọ i wo ohẹriẹ họ Itẹ 18:24. Ebaibol na ọ jọ etẹe ta nọ, “U wo egbẹnyusu jọ nọ e ruẹrẹ oma kpahe inọ a rẹ guọghọ ohwohwo fihọ otọ, rekọ u wo ogbẹnyusu jọ nọ ọ rẹ kẹle ohwo vi oniọvo.”
O sae jọ nọ oke nọ Solomọn o je kere obe Itẹ 17:17 na, o je roro kpahe usu okpekpe nọ o jọ udevie ọsẹ riẹ Devidi avọ Jonatan ọmọzae Sọl. (1 Samuẹle 13:16; 18:1; 19:1-3; 20:30-34, 41, 42; 23:16-18) Dede nọ ọsẹgboni ọvona o yẹ Devidi avọ Jonatan he, a kpekpe vi inievo. U no Jonatan eva ze inọ ọ rẹ thọ Devidi o tẹ make rọnọ o re whu dede.a
Oghẹrẹ nọ A Fa Itẹ 17:17 Evaọ Ebaibol Efa
“Ogbẹnyusu o re dhesẹ uyoyou ẹsikpobi, yọ o re zihe ruọ oniọvo evaọ oke uye.”—The Bible in Basic English.
“Ogbẹnyusu yọ ogbẹnyusu ẹsikpobi, yọ oniọvo nọ a yẹ rọkẹ idhọvẹ.”—The Moffatt Translation of the Bible.
“Ogbẹnyusu o re dhesẹ nọ ọye yọ ogbẹnyusu ẹsikpobi—a yẹ oniọvo otiọye kẹ oke uye.”—The Complete Jewish Study Bible.
Rri ividio ọkpẹkpẹe nana re whọ ruẹ eware nọ e rrọ obe Itẹ.
a Se uzoẹme na “A ‘Zihe Ruọ Egbẹnyusu Ekpekpe.’”