Wha Dhesẹ Uyoyou Evaọ Uviuwou Rai

Uyoyou o wọhọ egọmo nọ a rẹ rọ ta oware mu, yọ u re ru nọ okugbe nọ ọ rrọ uviuwou o rẹ rọ jọ kpekpekpe jẹ jọ gaga. Nọ uyoyou o gbẹ rrọ uviuwou hu, o rẹ jọ bẹbẹ re okugbe o jọ uviuwou na. Ẹvẹ ezae, eyae, gbe esẹgbini a sai ro dhesẹ uyoyou evaọ uviuwou rai?

Ọzae nọ ọ rrọ yoyou ọ rẹ rẹrote ẹgwọlọ aye riẹ, o re roro kpahe oghẹrẹ nọ eware e rrọ aye riẹ oma, ọ vẹ jẹ gaviezọ kẹe nọ ọ tẹ ta eriwo riẹ ze. (Ẹf 5:28, 29) Ọ rẹ ruẹ nọ ahwo uviuwou riẹ a wo emu gbe eware itieye na efa nọ a gwọlọ. O re fiobọhọ kẹ ae kruga ziezi evaọ egagọ Jihova. Ọ rẹ jẹ ruẹ nọ a ru Egagọ Uviuwou kẹse kẹse. (1Ti 5:8) Aye nọ ọ rrọ yoyou ọ rẹ romakpotọ kẹ ọzae riẹ, o ve je wo “adhẹẹ odidi” kẹe. (Ẹf 5:22, 33; 1Pi 3:1-6) O gwọlọ nọ ọzae-avọ-aye a rẹ rọvrẹ ohwohwo no eva ze riẹriẹriẹ. (Ẹf 4:32) Esẹgbini nọ e rrọ yoyou a re dhesẹ uyoyou kẹ emọ rai kpobi omomọvo, a ve je wuhrẹ ai re a you Jihova. (Izi 6:6, 7; Ẹf 6:4) Ebẹbẹ jọ vẹ emọ rai a be riẹriẹ ovao dhe evaọ obọ isukulu? Ẹvẹ a be sai ro mugba kẹ otunyẹ ọhwa? Nọ ahwo uviuwou na kpobi a te bi dhesẹ uyoyou kẹ ohwohwo, udu u re te ohwo kpobi otọ.

WHA RRI IVIDIO NA DHESẸ UYOYOU NỌ O RẸ HIẸ HẸ EVAỌ UVIUWOU RA, KẸSENA WHA VẸ KIYO ENỌ NANA:

• 

  Oghẹrẹ vẹ ọzae nọ ọ rrọ yoyou ọ rẹ rọ rẹrote aye riẹ je rri rie ghaghae?

• 

  Oghẹrẹ vẹ aye nọ ọ rrọ yoyou o re ro dhesẹ nọ o wo adhẹẹ odidi kẹ ọzae riẹ?

• 

  Oghẹrẹ vẹ esẹgbini nọ e rrọ yoyou a re ro wuhrẹ emọ rai Ẹme Ọghẹnẹ?