Rọ Obe Reawere Uzuazọ Bẹdẹ Bẹdẹ! na Ru Ahwo Fi Ẹrọwọ Họ Jihova avọ Jesu

Re emọ-uwuhrẹ Ebaibol a sai ru eva were Ọghẹnẹ, o gwọlọ nọ a re wo ẹrọwọ ọgaga. (Hib 11:6) Ma sai fiobọhọ kẹ ae wo ẹrọwọ ọgaga nọ ma tẹ be rọ obe Reawere Uzuazọ Bẹdẹ Bẹdẹ! na wuhrẹ ae. Obe nana o wo eria Ebaibol nọ i wuzou, obọdẹ oruvẹ, emamọ enọ, ividio nọ i re duobọte ohwo udu, gbe emamọ iwoho. Nọ ma te bi fiobọhọ kẹ emọ-uwuhrẹ Ebaibol wo emamọ usu kugbe Ọghẹnẹ, re a je wo emamọ iruemu Oleleikristi, koyehọ, ma be rehọ ekwakwa nọ e rẹ to ho rọ bọ ẹrọwọ rai ga.—1Kọ 3:12-15.

O rrọ bẹbẹ kẹ ahwo jọ re a rọwo nọ a sae jọ ogbẹnyusu Ọghẹnẹ fikinọ a be ruẹ e riẹ hẹ. Fikiere, ma re fiobọhọ kẹ ae re a riẹ oghẹrẹ ohwo nọ Jihova ọ rrọ re a je fievahọ iẹe.

WHA RRI IVIDIO NA RỌ OBE “REAWERE UZUAZỌ BẸDẸ BẸDẸ!” NA RU AHWO FI ẸRỌWỌ HỌ JIHOVA, KẸSENA WHA VẸ KIYO ENỌ NANA:

• Ẹvẹ ma rọ riẹ nọ oniọvo-ọmọtẹ na ọ ruẹrẹ oma kpahe ziezi kẹ uwuhrẹ na?

• Ẹvẹ ọ rọ rehọ enọ efa fiobọhọ kẹ ọmọ-uwuhrẹ na re ọ ta kpahe oghẹrẹ nọ o rri ẹme nọ ọ rrọ Aizaya 41:10, 13 na?

• Ẹvẹ ma rọ riẹ nọ ividio gbe oria Ebaibol nọ a se na i duobọte ọmọ-uwuhrẹ na udu?

Ahwo buobu a riẹ oware nọ ẹtanigbo na ọ rrọ họ, yọ a rri rie wọhọ okẹ nọ Ọghẹnẹ ọ kẹ rai hi. (Gal 2:20) Fikiere, ma re fiobọhọ kẹ ae re a fi ẹrọwọ họ idhe ẹtanigbo Jesu na.

WHA RRI IVIDIO NA RỌ OBE “REAWERE UZUAZỌ BẸDẸ BẸDẸ!” NA RU AHWO FI ẸRỌWỌ HỌ JESU, KẸSENA WHA VẸ KIYO ENỌ NANA:

• Ẹvẹ ma rọ riẹ nọ oniọvo-ọmọzae na ọ ruẹrẹ oma kpahe ziezi kẹ uwuhrẹ na?

• Oghẹrẹ vẹ ọ rọ rehọ uzoẹme jọ evaọ oria “Kiẹ Kpahe Efa” na ro fiobọhọ kẹ ọmọ-uwuhrẹ na?

• Fikieme olẹ nọ ọmọ-uwuhrẹ na ọ rẹ lẹ u ro wuzou?