Ru Eware nọ E rẹ Wha Evawere Ziọ Uviuwou Ra

Jihova ọ gwọlọ nọ evawere e rẹ jọ uviuwou kpobi. (Ol 127:3-5; Ọt 9:9; 11:9) Rekọ ẹsejọ, ebẹbẹ akpọ gbe ethobọ ahwo jọ evaọ uviuwou na e rẹ sai ru nọ evawere e gbẹ rọ jọ uviuwou hu. Kọ eme omomọvo ọ rẹ sai ru re evawere e sae jọ uwou na ziezi?

U fo nọ ọzae o re tete aye riẹ. (1Pi 3:7) Ọ rẹ daoma hae jọ kugbe aye riẹ. O re rẹro eware nọ aye riẹ ọ rẹ sai ru hu mi ei hi, hayo rẹro nọ o ti ru eware gbagba ẹsikpobi hi. O re yere iei kẹ eware nọ o bi ru kẹ ọyomariẹ gbe ahwo uviuwou na soso. (Kọl 3:15) O re ru eware nọ i dhesẹ nọ o you aye riẹ, ọ vẹ jẹ hai jiri ei.—Itẹ 31:28, 31.

Aye ọ rẹ tha ọzae riẹ uke. (Itẹ 31:12) Ọ rẹ romakpotọ kẹe je ru oware nọ ọ ta. (Kọl 3:18) Ọ rẹ rọ unu kpotọ ta ẹme kẹe jẹ ta ẹme ezi riẹ evaọ emu riẹ.—Itẹ 31:26.

Esẹgbini a rẹ daoma hae jọ kugbe emọ rai ziezi. (Izi 6:6, 7) A rẹ hae ta kẹ emọ rai nọ a you rai. (Mt 3:17) Nọ a tẹ be whọku emọ rai, a re ru ere avọ uyoyou gbe areghẹ.—Ẹf 6:4.

Emọ e rẹ kẹ esẹgbini rai adhẹẹ je yoẹme kẹ ae. (Itẹ 23:22) A rẹ ta eva kẹ ae. Nọ esẹgbini rai a tẹ be kẹ ae ohrẹ, a re yoẹme kẹ ae jẹ kẹ ae adhẹẹ.—Itẹ 19:20.

WHA RRI IVIDIO ODHESẸVIA NA RU OWARE NỌ O RẸ WHA EVAWERE HỌ UWOU RA, KẸSENA WHA VẸ KUYO ONỌ NANA:

Eme omomọvo o ru re evawere e sae jọ uviuwou na ziezi?