Ohwo Kpobi Ọ Gwọlọ Yeri Emamọ Uzuazọ
Ẹvẹ whọ gwọlọ nọ uzuazọ ra o rẹ jọ evaọ obaro? Ababọ avro, whọ gwọlọ nọ whẹ avọ ahwo uviuwou ra wha re yeri emamọ uzuazọ, wereva, wo omokpokpọ, jẹ rria dhedhẹ avọ ufuoma. Yọ ere ahwo buobu a gwọlọ re.
Rekọ u mu ahwo buobu ẹro ho inọ a te sai yeri oghẹrẹ uzuazọ nọ a ginẹ gwọlọ. A be ruẹ ikpehre eware buobu nọ e be via idudhe, wọhọ okpẹyao COVID-19 na. Ẹyao na o kpomahọ ahwo buobu, o wha uvuhu ze je kpe ahwo buobu no. Fiki onana, a roro nọ eware e te sai woma evaọ obaro ho.
Fiki eware nana nọ e be via na, ahwo a tẹ be gwọlọ epanọ a rẹ rọ riẹ oware nọ a re ru re uzuazọ rai o ruẹsi woma. Ahwo jọ a fievahọ otatha inọ oye o te kpọ ae re a riẹ oware nọ a re ru evaọ uzuazọ. Amọfa a re kpohọ isukulu ikpehru jẹ daoma fe keme a roro nọ ere a sai ro yeri uzuazọ evawere je wo ufuoma. Yọ amọfa a re je roro nọ a sai yeri emamọ uzuazọ nọ a tẹ rrọ emamọ ahwo.
Kọ eware nana e sai gine ru nọ who re ro yeri oghẹrẹ uzuazọ nọ whọ gwọlọ? Re whọ sae riẹ uyo onọ na, u fo nọ whọ rẹ kake riẹ iyo enọ nana:
Ẹvẹ ohwo ọ sai ro yeri emamọ uzuazọ?
Kọ isukulu gbe ugho i re ru ohwo yeri emamọ uzuazọ?
Kọ o gwọlọ nọ ohwo ọ rẹ jọ emamọ ohwo re ọ sai yeri emamọ uzuazọ?
Eme o rẹ sai fiobọhọ kẹ omai yeri emamọ uzuazọ?
Uvitha Uwou-Eroro nana u ti fiobọhọ kẹ owhẹ riẹ iyo enọ nana.