Kọ O Gwọlọ nọ Ohwo Ọ rẹ Jọ Emamọ Ohwo re Ọ Sai Yeri Emamọ Uzuazọ?

U kri akpọ no nọ ahwo buobu a bi ro roro nọ re ohwo ọ sai yeri emamọ uzuazọ, ọ rẹ jọ emamọ ohwo je wo emamọ uruemu. Wọhọ oriruo, ahwo nọ a be rria ofẹ ovatha-ọre, a rri ẹme nọ ọgba-eriariẹ jọ nọ a re se Confucius (551-479 B.C.E.) ọ ta fihọ ẹme areghẹ. Ọ ta nọ: “Oware nọ whọ gwọlọ nọ a ru kẹ owhẹ hẹ, who ru ei kẹ amọfa ha.”a

OWARE NỌ AHWO BUOBU A SALỌ

Ahwo buobu a gbe bi roro nọ re a sai yeri emamọ uzuazọ, u fo nọ a rẹ jọ emamọ ohwo. A rẹ daoma kẹ amọfa adhẹẹ, dhesẹ emamọ uruemu, ru oware kpobi nọ u fo nọ a re ru, je ru eware nọ a sai ro wo emamọ obruoziẹ-iroro. Aye jọ nọ a re se Linh nọ ọ be rria Vietnam ọ ta nọ: “Notọ avọ otọ ze, mẹ jẹ hai roro nọ mẹ tẹ be hae ta uzẹme je ru eware oruọzewọ, eghale i re te omẹ.”

Aye ọvona nọ ọ be jẹ emu kẹ iyogbe gbe ahwo nọ a wo uwou nọ a rẹ rria ha.

Ahwo jọ a rẹ daoma ru eware iwoma kẹ amọfa fiki egagọ rai. Ọzae jọ nọ a re se Hsu-Yun nọ ọ be rria Taiwan ọ ta nọ, “A wuhrẹ omẹ nọ eware nọ ohwo o ru evaọ oke nọ ọ rọ rrọ uzuazọ, eye i re dhesẹ sọ o ti yeri emamọ uzuazọ hayo ruẹ uye nọ o te whu no.”

EME U NO RIE ZE NO?

Nọ aye na o te uwou no avọ oma nọ o rrọ riẹ no, ọ tẹ wọ ọmọ riẹ, avọ ova nọ o muhọ.

Irere buobu e sai gine te omai nọ ma te ru eware iwoma kẹ amọfa. Rekọ ahwo buobu nọ a rẹ daoma ru eware iwoma kẹ amọfa a rẹ ruẹ nọ, orọnikọ ẹsikpobi ahwo a re ru eware iwoma kẹ ai zihe he. Aye jọ nọ a re se Shiu Ping nọ ọ be rria Hong Kong ọ ta nọ: “Eware nọ e via kẹ omẹ i wuhrẹ omẹ nọ, orọnikọ ẹsikpobi emamọ oware u re noi ze he nọ ohwo ọ tẹ be maki ru oware uwoma. Mẹ jẹ daoma rẹrote uviuwou mẹ je ru oware uwoma. Ghele na, me wo ebẹbẹ evaọ orọo mẹ, yọ ọzae mẹ ọ dhẹ siọ omẹ avọ ọmọzae mẹ ba.”

Ahwo buobu a muẹrohọ no nọ orọnikọ ẹsikpobi egagọ i re fiobọhọ kẹ ohwo jọ emamọ ohwo ho. Aye jọ nọ a re se Etsuko nọ ọ be rria Japan ọ ta nọ: “Me kuomagbe egagọ jọ je zihe ruọ ọnọ o wuzou eware nọ izoge na a re ru evaọ egagọ na. Akpọ o gbe omẹ unu nọ mẹ ruẹ oghẹrẹ nọ ahwo egagọ na a je ro gbe-ofariẹ, họre fiki ọkwa, je tho igho nọ u fo nọ a re ro ru eware evaọ egagọ na.”

“Mẹ jẹ daoma rẹrote uviuwou mẹ je ru oware uwoma. Ghele na, me wo ebẹbẹ evaọ orọo mẹ, yọ ọzae mẹ ọ dhẹ siọ omẹ avọ ọmọzae mẹ ba.”—SHIU PING, HONG KONG

Fikinọ ahwo jọ a kru ga ziezi evaọ egagọ rai jẹ be daoma ru oware uwoma, o rẹ dae wumuo ho nọ oware uyoma o tẹ via kẹe. Ere o jọ kẹ aye jọ nọ a re se Van nọ ọ rrọ ohwo orẹwho Vietnam. Ọ ta nọ: “Kẹdẹ kẹdẹ mẹ jẹ hae dẹ ibi-ire, idodo, gbe emu nọ me re ro dhe idhe kẹ esemọ. Me je rẹro nọ a te ghale omẹ evaọ uzuazọ. Rekọ ghelọ eware iwoma nọ me je ru gbe idhe nọ me je dhe kẹ esemọ evaọ ikpe buobu na, okpẹyao o kie ọzae mẹ. Kẹsena ọmọtẹ mẹ nọ ọ gbẹ maha nọ o je kpohọ isukulu evaọ orẹwho ofa, o te je whu.”

RE OHWO Ọ JỌ EMAMỌ OHWO ỌVO U TE HE

U wuzou re ohwo ọ jọ emamọ ohwo, rekọ onana ọvo o sae lẹliẹ ohwo yeri emamọ uzuazọ họ. Fikieme? Joma ta kpahe oware nọ Ebaibol na ọ ta.

ORỌNIKỌ AHWO KPOBI A BI RU EMAMỌ OWARE HE

“Ọrahauzi ọvo ọ sae raha eware iwoma buobu.”—ỌTAUSIUWOMA NA 9:18.

Whọ tẹ make be daoma ẹsikpobi re whọ jọ emamọ ohwo, eware nọ ahwo nọ a wo uruemu oriobọ a re ru e sae wha ẹbẹbẹ se owhẹ. Wọhọ oriruo, nọ okpẹyao nọ o re vo o te duwu lahwe, ẹsejọhọ who ti lele uzi nọ egọmeti o fihọ inọ ohwo ọ kẹle omọfa ga hrọ họ. Rekọ eme o rẹ sae via otẹrọnọ ahwo jọ a rọwo ru oware nọ egọmeti ọ ta na ha? Aghẹmeeyo rai na o sai ru nọ amọfa nọ a maki koko uzi egọmeti na a re ro wo ẹyao na ghele.

AHWO A SAI RRI OWARE UYOMA WỌHỌ OWARE UWOMA

“U wo edhere jọ nọ o wọhọ nọ u kiehọ evaọ aro ohwo, rekọ evaọ ukuhọ riẹ u re su kpohọ uwhu.”—ITẸ 14:12.

Ma rẹ ruẹ iriruo ahwo buobu nọ a je roro nọ emamọ oware a bi ru, rekọ uwhremu na a tẹ te ruẹ nọ kpakọ ekpehre oware a bi ru na. Nọ ohwo ọ tẹ make rọ emamọ eva ro ru oware, ọ rẹ gbẹ ruẹ uye nọ u no oware na ze ghele.

OHWO ỌVO Ọ RIẸ EPANỌ UZUAZỌ O TE JỌ ODẸNOTHA HA

“Wha riẹ oware nọ o te via kẹ uzuazọ rai odẹnotha ha.”—JEMIS 4:14.

Makọ epanọ ohwo ọ daoma te kẹhẹ re ọ jọ emamọ ohwo, ọ sai whu idudhe. Wọhọ oriruo, evaọ etoke nọ okpẹyao COVID-19 na o ro duwu lahwe, ahwo buobu nọ a je fiobọhọ kẹ enọ e be mọ a whu. Hayo roro kpahe oware nọ o via kẹ aye jọ nọ ọ be rria orẹwho China nọ a re se Liting, nọ ọsẹ riẹ o whu evaọ asidẹnte. Ọ ta nọ: “Mẹ riẹ oware nọ emamọ ohwo otiọna o ro whu hu. Ọsẹ mẹ ọ ga obọ iruo, ọ rẹ romakpotọ, ọ tẹ jẹ rrọ ohwo nọ a re fievahọ. Ọye ọvo họ ohwo nọ o whu evaọ omoto na.”

Wọhọ epanọ ma ruẹ na, dede nọ u wuzou re ohwo ọ jọ emamọ ohwo, onana ọvo o sae lẹliẹ ohwo yeri emamọ uzuazọ họ. Rekọ ẹvẹ ohwo ọ sai ro yeri emamọ uzuazọ enẹna gbe evaọ obaro? Re ma sae kuyo onọ nana, ma gwọlọ oware nọ ma rẹ sai fievahọ nọ ọ rẹ kpọ omai. Yọ o gwọlọ nọ oware na ọ rẹ kiyo enọ mai je fiobọhọ kẹ omai riẹ epanọ ma sai ro yeri emamọ uzuazọ. Diẹse ma sae jọ ruẹ oware nana?

a Whọ tẹ gwọlọ gbẹ riẹ kpahe eware nọ Confucius ọ ta, se uzou avọ 7 obe na, Mankind’s Search for God, edhe-ẹme avọ 31-35, onọ Isẹri Jihova a kere, yọ whọ rẹ ruẹ e riẹ evaọ oria itanẹte mai www.jw.org.