Enọ Ahwo Nọ A S’ebe
Eme họ otọ ẹme Jesu na inọ: “Wha du roro nọ mẹ nyaze ti fi udhedhẹ họ otọakpọ na ha”?
Jesu ọ jẹ hai wuhrẹ ahwo epanọ a sae rọ rria dhedhẹ kugbe amọfa. Rekọ ẹdẹ jọ, ọ ta kẹ ikọ riẹ nọ: “Wha du roro nọ mẹ nyaze ti fi udhedhẹ họ otọakpọ na ha; udhedhẹ mẹ nyaze ti fihọ iẹe he, rekọ ọgbọdọ. Mẹ nyaze ti fi ohẹriẹ họ udevie ọmọzae avọ ọsẹ riẹ, udevie ọmọtẹ avọ oni riẹ, gbe udevie aye uwou-orọo avọ oniọrọo riẹ.” (Mat. 10:34, 35) Eme họ otọ ẹme Jesu na?
Orọnikọ Jesu ọ gwọlọ nọ ọ rẹ wha ozighi fihọ udevie inievo ho, rekọ ọ riẹ nọ eware nọ o bi wuhrẹ na e te whae ze nọ ohẹriẹ o te rọ jọ iviuwou jọ. Ọ gwọlọ nọ ahwo kpobi nọ a gwọlọ jọ ilele riẹ jẹ họ-ame a rẹ riẹ nọ ẹsejọhọ ahwo uviuwou rai a te wọso ae nọ a te ru ere. Ẹsejọ o sae tubẹ jọ ọzae hayo aye rai dede. A tẹ be wọso ohwo ere, o rẹ gbẹ lọhọ tere he re ohwo na o ru oware nọ Jesu ọ ta.
Ebaibol ọ ta nọ Ileleikristi a rẹ daoma “lele ahwo kpobi rria dhedhẹ.” (Rom 12:18) Rekọ evaọ ẹsejọ, nọ ohwo o te bi ru eware nọ Jesu o wuhrẹ, o rẹ wọhọ ẹsenọ a fi “ọgbọdọ” họ uviuwou ohwo na. O rẹ jọ ere nọ eware nọ Jesu o wuhrẹ e gbẹ were ahwo nọ i kiọkọ evaọ uwou na ha. O vẹ te whae ze nọ ahwo nọ i kiọkọ evaọ uwou na a rẹ rọ jọ “ewegrẹ” ọnọ o bi kurẹriẹ ziọ ukoko na.—Mat. 10:36.
Ẹsejọ, odawọ u re te inievo nọ ahwo uviuwou rai a rrọ ukoko na ha. Ahwo uviuwou rai a sae gwọlọ nọ a lele ai ru ehaa jọ nọ o no Ebaibol ze he. Koyehọ oniọvo na ọ te jẹ sọ o re ru eva were ahwo uviuwou riẹ hayo o re ru oware nọ Ọghẹnẹ ọ gwọlọ. Kọ ọvẹ ọ te jẹ na? Jesu ọ ta nọ: “Ohwo kpobi nọ o you ọsẹ hayo oni riẹ vi omẹ, o te ọnọ ọ rẹ jọ olele mẹ hẹ.” (Mat. 10:37) Orọnọ Jesu ọ be ta nọ ohwo nọ ọ rrọ olele riẹ o re you ọsẹgboni riẹ ziezi hi hi. Rekọ ẹme nọ ọ be ta na họ, olele riẹ kpobi ọ rẹ riẹ ohwo nọ u fo nọ ọ rẹ mai you. Fikiere nọ ahwo uwou mai a tẹ be gwọlọ nọ ma ru oware nọ Jihova o mukpahe hayo be wọso omai, ma re gbe you rai, rekọ Jihova Ọghẹnẹ ma rẹ mai you.
Uzẹme riẹ họ, o rẹ kẹ ohwo uye gaga nọ ahwo uwou riẹ a tẹ be wọso ẹe. Rekọ u fo re Ileleikristi a hae kareghẹhọ ẹme Jesu jọ. Ọ ta nọ: “Ohwo kpobi nọ ọ rọwo wọ ure-oja riẹ re o lele omẹ hẹ, o te ọnọ ọ rẹ jọ olele mẹ hẹ.” (Mat. 10:38) Ẹme Jesu na o dhesẹ nọ, ahwo uviuwou mai a tẹ be wọso omai, ma re rri rie inọ ẹkẹ ure-oja mai oye. Ma re thihakọ, je rẹro nọ ẹdẹ jọ, ahwo uviuwou mai a te siọ omai ba ẹwọso. A ve ti mu Ebaibol họ ewuhrẹ.—1 Pita 3:1, 2.