“Nya Evaọ Uzẹme Na”

1. Erere vẹ ma re wo nọ ma tẹ be ta ẹme kpahe epanọ ma rọ riẹ “uzẹme na”?

ẸSEJỌ inievo jọ a rẹ nọ omai nọ: “Ẹvẹ who ro kurẹriẹ ziọ ukoko na?” Ẹsejọhọ a nọ owhẹ onọ yena ẹsibuobu no. Ma tẹ gwọlọ riẹ oniọvo jọ nọ ma riẹ tere he, ma rẹ nọe onọ yena. Ma rẹ gwọlọ nọ inievo na a vuẹ omai epanọ a ro kurẹriẹ ziọ ukoko na. Yọ o rẹ were omai re ma gbiku epanọ eware nọ a bi wuhrẹ omai evaọ ukoko na e were omai te. (Rom 1:11) Onana o rẹ lẹliẹ omai ruẹ nọ uzẹme na nọ ma riẹ na, oware nọ u woma tei o riẹ hẹ. Yọ o rẹ jẹ lẹliẹ omai ta nọ ma rẹ daoma re ma gbẹ hae “nya evaọ uzẹme na,” koyehọ re ma ru oware nọ o rẹ were Jihova ẹsikpobi, ọ vẹ ghale omai.—3 Jọn 4.

2. Eme ma te ta kpahe evaọ uzoẹme nana?

² Ma te jọ uzoẹme nana ta kpahe eware jọ nọ e be lẹliẹ eva were omai inọ ma riẹ uzẹme na. Kẹsena ma vẹ te ta ẹme kpahe eware jọ nọ ma re ru nọ u re dhesẹ nọ uzẹme na nọ ma riẹ na, ma rri rie ghaghae. Uzoẹme nana u ti fiobọhọ kẹ omai ruẹ nọ oware ulogbo Jihova o ru kẹ omai nọ o ro se omai ziọ ukoko riẹ. (Jọn 6:44) Yọ o te jẹ whae ze nọ ma te rọ rehọ ajọwha wuhrẹ amọfa uzẹme na.

OWARE NỌ O LẸLIẸ “UZẸME NA” WERE OMAI GAGA

3. Eme o mae whae ze nọ uzẹme na o rọ were omai gaga?

³ Eware buobu e riẹ nọ e lẹliẹ uzẹme na were omai gaga. Ọrọ ọsosuọ kpobi họ, ma you Jihova Ọghẹnẹ nọ o wuhrẹ omai uzẹme na. Ma jọ Ebaibol wuhrẹ nọ Jihova o wo ẹgba thesiwa, yọ ọye ọ ma odhiwu gbe otọakpọ na. O make rrọ ere na, Jihova yọ emamọ Ọsẹ nọ o you omai gaga jẹ be rẹrote omai. (1 Pita 5:7) Ma tẹ jẹ riẹ nọ Ọghẹnẹ mai na “o wo ohrọ-oriọ gbe ọdawẹ, . . . ọ rẹ kaki mu ofu hu yọ ọ vọ avọ uyoyou nọ o rẹ hiẹ hẹ gbe uzẹme.” (Ọny. 34:6) Jihova ọ tẹ jẹ rrọ Ọghẹnẹ nọ o re bru uvioziẹ. (Aiz. 61:8) O rẹ kẹe uye gaga nọ ma tẹ be ruẹ uye. Ọ gwọlọ nọ o re si ebẹbẹ kpobi nọ e rrọ otọakpọ na no, yọ o ti ru ere nọ oke nọ o fihọ o te te. (Jeri. 29:11) Dai roro epanọ akpọ na o ti woma te oke yena! Kọ eme ma gbe you Jihova Ọsẹ mai na gaga ha?

4-5. Fikieme Pọl ukọ na ọ rọ ta nọ ẹruore ọ wọhọ umuokọ?

⁴ Eme ọfa ọ soriẹ nọ uzẹme na o rọ were omai gaga? Eware nọ ma jọ Ebaibol wuhrẹ i bi fiobọhọ kẹ omai gaga. Wọhọ oriruo, Ebaibol ọ ta kpahe emamọ eware nọ Ọghẹnẹ o ti ru kẹ omai evaọ obaro, onọ o lẹliẹ omai wo ẹruore. Pọl ukọ na o dhesẹ epanọ ẹruore mai na o wuzou te. O kere nọ: “Ẹruore nana nọ ma wo na o wọhọ umuokọ rọkẹ uzuazọ mai, u muẹro jẹ rrọ gaga.” (Hib. 6:19) Wọhọ epanọ umuokọ u re kru okọ dikihẹ oria ovo na, ere ẹruore mai ọ rẹ lẹliẹ omai dikihẹ ga nọ ma te wo ẹbẹbẹ.

⁵ Ma riẹ nọ ẹruore nọ Ileleikristi nọ a rọ ẹzi wholo na a wo ọye Pọl ọ jẹ ta ẹme kpahe. Rekọ ẹme riẹ na o te omai re, mai Ileleikristi nọ i wo ẹruore nọ ma te rria otọakpọ na bẹdẹ bẹdẹ. (Jọn 3:16) Ẹruore nana nọ ma jọ Ebaibol wuhrẹ kpahe na o be lẹliẹ eva were omai.

6-7. Ẹvẹ ẹruore nọ Yvonne o wuhrẹ kpahe u ro fiobọhọ kẹe?

⁶ Joma gbiku oniọvo-ọmọtẹ jọ nọ a re se Yvonne. Orọnọ ukoko na a jo yẹe he. Oke nọ ọ jọ ọmaha, ozọ uwhu o jẹ hai mu ei gaga. Ọ ta nọ, ẹdẹ jọ ọ jọ obe jọ se nọ: “Ohwo ọvo nọ o ti whu ẹdẹ jọ họ, ọ riẹ hẹ.” Ẹsikpobi ọ jẹ hai roro kpahe ẹme yena. Ọ ta nọ: “Ẹsejọ owezẹ u re su omẹ hẹ evaọ aso fiki ẹme na.” Ọ tẹ jẹ jọ udu riẹ roro nọ ‘Otẹrọnọ ma tẹ rria omoke jọ ọvo, ma ve whu no, kọ fikieme Ọghẹnẹ ọ rọ ma omai? Whaọ, mẹ gwọlọ whu hu!’

⁷ Nọ Yvonne ọ rro ze no omojọ, Isẹri Jihova a tẹ ta usi uwoma kẹe. Ọ ta nọ: “Mẹ tẹ te ruẹ nọ ẹruore ọ riẹ inọ mẹ sae rria bẹdẹ bẹdẹ evaọ Aparadase.” Kọ ẹvẹ oware nana nọ o wuhrẹ na u ro fiobọhọ kẹe? Ọ ta nọ: “Udu u te ti te omẹ otọ. Ozọ uwhu u gbe je mu omẹ hẹ. Mẹ tẹ be sae wezẹ ziezi.” Whọ ruẹ? Uzẹme na nọ Yvonne o wuhrẹ na u ru eva were iẹe gaga. Yọ ọ be rọ ọwhọ vuẹ amọfa oware nana nọ o wuhrẹ na.—1 Tim. 4:16.

8-9. (a) Evaọ ohare Jesu jọ, ẹvẹ o dhesẹ oghẹrẹ nọ ọzae jọ o rri okwakwa oghaghae nọ ọ ruẹ? (b) Ẹvẹ who rri eware nọ whọ jọ Ebaibol wuhrẹ na?

⁸ Oware jọ nọ ma jọ Ebaibol wuhrẹ nọ o were omai gaga họ Uvie Ọghẹnẹ. Jesu ọ ta nọ Uvie na ọ wọhọ okwakwa oghaghae nọ a si no. Evaọ Matiu 13:44, ọ ta nọ: “Uvie odhiwu o wọhọ okwakwa-aghae nọ a si no họ udhu, onọ ọzae jọ o duku, o te si ei no; yọ fiki oghọghọ riẹ, ọ tẹ nyae zẹ eware kpobi nọ o wo, ọ tẹ dẹ udhu na.” Who te rri ẹme nọ Jesu ọ ta na, whọ rẹ ruẹ nọ orọnikọ ọzae na ọ jẹ gwọlọ okwakwa oghaghae na ha. Rekọ nọ ọ ruẹ e riẹ, ọ daoma gaga re ọ sai tei obọ. Ọ zẹ eware riẹ kpobi. Fikieme? Ọ riẹ nọ okwakwa na o woma vi eware nọ o wo kpobi.

⁹ Kọ ere who rri eware nọ whọ jọ Ebaibol wuhrẹ na? Ma riẹ nọ ere who rri rai. Oware ovo o rrọ akpọ na nọ u woma te eva nọ e rẹ were omai nọ ma tẹ be gọ Jihova ha. Yọ oye ọvo gbe he, ma ti je wo uzuazọ ebẹdẹ bẹdẹ nọ Uvie Ọghẹnẹ o tẹ ze no. Usu okpekpe nọ ma wo kugbe Jihova u wo erere vi oware kpobi nọ ma kpairoro vrẹ re ma sae gọ Ọghẹnẹ. Oware nọ o be mae lẹliẹ eva were omai họ re ma “ru [Jihova] eva were ziezi.”—Kọl. 1:10.

10-11. Eme o lẹliẹ Michael siọ eware nọ i fo ho nọ o je ru ba?

¹⁰ Mai ahwo buobu, ma siọ eware jọ nọ ma je ru ba re ma sai ru eva were Jihova. Ahwo jọ a no iruo nọ a jẹ jọ hwa ae okposa. Amọfa jọ nọ a je le efe vẹre, a siọ efe ba ele. Yọ efa a siọ eware jọ nọ e were rai gaga nọ a je ru ba nọ a wuhrẹ kpahe Jihova. Michael yọ ohwo jọ nọ o ru ere. Ukoko na a jo yẹe he. Oke nọ ọ jọ uzoge, o wuhrẹ oghẹrẹ nọ a rẹ fa ekareti. Ọ ta nọ: “Mẹ jẹ hai ru eware nọ e rẹ lẹliẹ omẹ wo ẹgba nọ mẹ rẹ rọ họre ẹsikpobi. U te epanọ me je ro rri omamẹ nọ ohwo ọvo ọ sai kpe omẹ hẹ.” Rekọ nọ Michael o mu Ebaibol họ ewuhrẹ, ọ tẹ te riẹ nọ ozighi ọ rẹ dha Jihova eva. (Ol. 11:5) Michael ọ ta nọ: “Ọzae-avọ-aye nọ a je wuhrẹ omẹ Ebaibol na a vuẹ omẹ nọ mẹ siọ ekareti ba ẹfa ha. A jẹ hai wuhrẹ omẹ oware nọ Ebaibol ọ ta ọvo.”

¹¹ Nọ Michael o wuhrẹ te oria, o te ti you Jihova ziezi. Oware jọ nọ u gbe rie unu gaga họ nọ ọ jọ Ebaibol wuhrẹ nọ Jihova ọ rẹ re ohrọ idibo riẹ gaga. Uwhremu na ọ tẹ te ruẹ nọ u fo re ọ siọ ekareti ba. Ọ ta nọ: “Re mẹ siọ ekareti ba, o lọhọ tere he. Rekọ mẹ riẹ nọ mẹ tẹ sae se iẹe ba, o te were Jihova gaga. Yọ mẹ gwọlọ ru oware kpobi nọ mẹ rẹ sai ru re me ru eva were iẹe.” Eware nọ Michael o wuhrẹ evaọ Ebaibol e were riẹ gaga. Yọ o lẹliẹ e riẹ siọ eware nọ i fo ho nọ o je ru ba.—Jem. 1:25.

12-13. Ẹvẹ eware nọ Mayli o wuhrẹ evaọ Ebaibol i ro fiobọhọ kẹe?

¹² Re ma riẹ epanọ eware nọ ma be jọ Ebaibol wuhrẹ i wuzou te, Ebaibol ọ rehọ e rai dhesẹ ukpẹ nọ ọ be jọ ebi lo. (Ol. 119:105; Ẹf. 5:8) Oniọvo-ọmọtẹ jọ nọ a re se Mayli evaọ obọ Azerbaijan o dhesẹ epanọ eware nọ ọ jọ Ebaibol wuhrẹ e were riẹ te. Egagọ ọvona ahwo uviuwou riẹ kpobi a jọ họ. Ọsẹ riẹ ọ jọ ohwo Muslim, oni riẹ ọ tẹ jọ egagọ ahwo Ju. Ọ ta nọ: “Mẹ riẹ nọ Ọghẹnẹ ọ rrọ, rekọ enọ jọ e jọ omẹ udu nọ e jẹ kẹ omẹ uye. Mẹ jẹ hae nọ omamẹ nọ, ‘Fikieme Ọghẹnẹ ọ rọ ma ohwo-akpọ? Kọ Ọghẹnẹ ọ ma omai re ma tẹ ruẹ uye bẹ no, ma ve je kpobọ ehẹle nyae to bẹdẹ bẹdẹ?’ Ahwo a rẹ ta nọ eware nọ e be via na kpobi, ere Ọghẹnẹ ọ gwọlọ nọ e jọ. O tẹ lẹliẹ omẹ jẹ nọ omamẹ nọ, ‘Kọ Ọghẹnẹ ọ gwọlọ nọ ma ruẹ uye ọvo? Kọ o rẹ were iẹe nọ ma tẹ be ruẹ uye?’”

¹³ Mayli ọ jẹ daoma re ọ sae riẹ iyo enọ nana kpobi nọ e jọ udu riẹ na. Uwhremu na, a te ti mu ei Ebaibol họ ewuhrẹ. Nọ o wuhrẹ te oria jọ, o te kurẹriẹ. Ọ ta nọ: “Eware nọ mẹ jọ Ebaibol wuhrẹ i vẹ omẹ ẹro. O wha riẹ ze nọ eva e be rọ were omẹ, udu u te je te omẹ otọ.” Wọhọ Mayli, mai kpobi ma bi jiri Jihova, “Ọnọ o se [omai] no ebi ziọ elo igbunu riẹ.”—1 Pita 2:9.

14. Eme ma re ru nọ o rẹ lẹliẹ uzẹme na were omai gaga? (Rri ẹkpẹti na re “Eware Efa nọ Uzẹme na O Wọhọ.”)

¹⁴ Eware buobu e riẹ nọ e lẹliẹ omai rri uzẹme na ghaghae. Umutho jọ ọvo ma fodẹ na. Ma riẹ nọ whọ riẹ ejọ nọ ma ta ẹme te he. Yọ whọ sae daoma wuhrẹ efa. Uzẹme na o tẹ be were omai gaga, ma te daoma ru eware nọ i dhesẹ nọ uzẹme na o ginẹ were omai.

EPANỌ MA RE RO DHESẸ NỌ UZẸME NA O WERE OMAI GAGA

15. Eme ma re ru nọ u re dhesẹ nọ uzẹme na o were omai gaga?

¹⁵ Oware jọ nọ u re dhesẹ nọ uzẹme na o were omai gaga họ, nọ ma te bi se Ebaibol gbe ebe ukoko na kẹse kẹse. O tẹ make rọnọ ma kri ukoko na no, ma rẹ hae gbẹ daoma se Ebaibol gbe ebe ukoko na ziezi keme ohwo ọvo nọ ọ riẹ eware na kpobi no ọ rrọ họ. Uwou-Eroro ọsosuọ kpobi o ta nọ: “Uzẹme na o wọhọ ododo ọsese nọ ọ rrọ udhude nọ ikpehre ebe i di wariẹ họ jẹ be dina duwu iei. Otẹrọnọ whọ gwọlọ ruẹ e riẹ, who re fiẹrohotọ ziezi. . . . Whọ tẹ gwọlọ woi, who re ruwẹ who ve vi ei. Jọ ododo uzẹme ọvo o da owhẹ ẹro ho. . . . Hai koko ai họ, gbẹ hae gwọlọ efa.” Re ohwo ọ romatotọ wuhrẹ Ebaibol, o nwane lọhọ tere he. Rekọ u fo oware nọ ma rẹ daoma ru keme erere o re noi ze.

16. Ẹvẹ whọ be hai ro wuhrẹ Ebaibol re whọ sae riẹ uzẹme na kokodo? (Itẹ 2:4-6)

¹⁶ Re a se obe hayo romatotọ wuhrẹ oware, u re fou omai ahwo jọ ehoo. Rekọ Jihova ọ vuẹ omai nọ joma gbẹ “gwọlọ” epanọ ma rẹ rọ riẹ uzẹme na kodo viere. (Se Itẹ 2:4-6.) Ma tẹ daoma ru ere, irere buobu i ti te omai. Oniọvo jọ nọ a re se Corey ọ ta nọ o te bi se Ebaibol, o re roro didi kpahe owọ ọvuọvo. Ọ ta nọ: “Me re rri eme-obotọ hayo eme-oruvẹ kpobi nọ e rrọ owọ na, me re se eria Ebaibol kpobi nọ a riobọhọ, mẹ vẹ jẹ kiẹ kpahe eme na ziezi. . . . Onana o be whae ze nọ mẹ be hai ro wuhrẹ eware buobu no eria nọ me bi se ze.” Otẹrọnọ ere ma be hai ru, hayo u wo oghẹrẹ ọfa jọ nọ ma be hai ro ru ei, ma tẹ be hae romatotọ wuhrẹ kpahe Ọghẹnẹ kẹse kẹse, u re dhesẹ nọ uzẹme na o were omai.—Ol. 1:1-3.

17. U te no Ebaibol nọ ma re wuhrẹ no, eme ọfa u fo nọ ma re ru? (Jemis 1:25)

¹⁷ Orọnikọ thakpinọ ma se Ebaibol no họ ẹme na ha. Ma re je ru eware nọ ma se na. Ma te bi ru ere, eva e te were omai. (Se Jemis 1:25.) Ẹvẹ ma sae rọ riẹ sọ ma bi ru eware nọ ma bi wuhrẹ na? Oniọvo jọ ọ ta nọ u fo nọ ma rẹ hae nọ omamai nọ, ‘Ẹvẹ mẹ be daoma ru eware nọ me bi wuhrẹ na te?’ Onana o rẹ lẹliẹ omai riẹ eware nọ ma be riẹ ru gbe eware nọ ma be riẹ ru te he. Pọl ukọ na ọ ta nọ: “Oghẹrẹ kpobi nọ ma wo ẹnyaharo te no kẹhẹ, joma gbẹ hae nyaharo kpatiẹ evaọ edhere ọvona.”—Fil. 3:16.

18. Fikieme u ro fo re ma gbẹ hae “nya evaọ uzẹme na”?

¹⁸ Irere buobu i re te omai nọ ma tẹ be “nya evaọ uzẹme na.” Ma rẹ riẹ eware ru evaọ uzuazọ mai. Ma ve je ru eva were Jihova gbe inievo mai evaọ ukoko na. (Itẹ 27:11; 3 Jọn 4) Yọ oware nọ o mae lẹliẹ uzẹme na were omai kpe no na oye. Fikiere joma hai gbe ru eware nọ i dhesẹ nọ ma rri uzẹme na ghaghae.