Enọ Ahwo Nọ A S’ebe

Amono a te kpare ze otọakpọ na, kọ oghẹrẹ vẹ a ti ro bruoziẹ rai?

A jọ Ebaibol na kẹ uyo enọ yena.

Iruẹru Ikọ 24:15 ọ ta nọ “ẹkparomatha enọ i kiẹrẹe gbe enọ i kiẹrẹe he ọ te jọ.” Ahwo nọ a kiẹrẹe na yọ enọ i je yoẹme kẹ Jihova evaọ oke nọ a rọ jọ uzuazọ, yọ a kere edẹ rai fihọ obe uzuazọ na. (Mal. 3:16) Rekọ ahwo nọ a kiẹrẹe he na họ enọ e sae gọ Jihova taure a te ti whu hu. Ejọ rai họ enọ uvẹ nọ a rẹ rọ riẹ Jihova ziezi u rovie kẹ hẹ. Fikiere a ri kere edẹ rai fihọ obe uzuazọ na ha.

Jesu ọ jọ obe Jọn 5:28, 29 ta kpahe itu ahwo ivẹ nọ a jọ obe Iruẹru Ikọ 24:15 fodẹ na. Ọ ta nọ “enọ i ru eware iwoma a ti wo ẹkparomatha uzuazọ, enọ i ru eware iyoma kọ ẹkparomatha ẹdhoguo.” Ahwo nọ a kiẹrẹe na họ enọ i ru eware iwoma taure a te ti whu. Fikiere, a ti wo ẹkparomatha uzuazọ keme a kere edẹ rai fihọ obe uzuazọ na no. Rekọ ahwo nọ a kiẹrẹe he na yọ enọ i je ru eware iyoma taure a te ti whu. Yọ a te kpare ae ze re a rehọ ae guẹdhọ. A ri kere edẹ ahwo nana fihọ obe uzuazọ na ha. Fikiere nọ a tẹ kpare ai ze, a ti wuhrẹ ai kpahe Jihova, yọ a ti muẹrohọ ai sọ a bi ru oware nọ Ọghẹnẹ ọ gwọlọ. Nọ a je yoẹme, Jihova o ve ti kere edẹ rai fihọ obe uzuazọ na.

Eviavia 20:12, 13 o fodẹ oware jọ nọ ahwo nọ a te kpare ze na kpobi a re ru hrọ. O ta nọ a re ru “eware nọ a kere fihọ iko-ebe na.” Koyehọ a re koko izi ekpokpọ nọ Jihova o ti fihọ evaọ akpọ ọkpokpọ na. Enọ e rọwo koko izi na ha, Jihova o ti kpe ai no.—Aiz. 65:20.

A tẹ jẹ jọ obe Daniẹl 12:2 ruẹaro nọ ahwo jọ nọ e be wezẹ hayo nọ i whu no na, a te rọwo ae ze re a wo “uzuazọ ebẹdẹ bẹdẹ, efa rọkẹ ẹpoviẹ gbe ọjẹfiẹ ebẹdẹ bẹdẹ.” Oria ikere nana ọ be ta kpahe oware nọ o te via nọ Esuo Odu-Ikpe na o te kuhọ no. Ahwo jọ nọ a kpare ze a ti wo “uzuazọ ebẹdẹ bẹdẹ,” efa kọ “ọjẹfiẹ ebẹdẹ bẹdẹ” koyehọ a te raha ae no bẹdẹ bẹdẹ.—Evia. 20:15; 21:3, 4.

Ma rehọ oriruo itu ahwo ivẹ nọ a be kwa no orẹwho rai kpohọ orẹwho ọfa ro dhesẹ oware nọ o te via kẹ eko ahwo ivẹ nọ a te kpare ze na. A kẹ utu ọsosuọ obe-udu nọ a re ro ru iruo evaọ orẹwho nọ a kwa kpohọ na. Rekọ utu odekọ kọ obe-udu nọ a sae rọ rria obei emedẹ jọ ọvo. Ahwo okiẹrẹe na a wọhọ utu ahwo nọ a kẹ obe-udu nọ a re ro ru iruo na. Enọ i kiẹrẹe he na kọ enọ a kẹ obe-udu nọ a rẹ rọ rria emedẹ jọ ọvo na. Re a sae kẹ ai uvẹ nọ a rẹ rọ rria orẹwho na ribri, o gwọlọ nọ a rẹ jọ emamọ ahwo. Epọvo na, re ahwo nọ a kiẹrẹe he na a sae rria akpọ ọkpokpọ na bẹdẹ bẹdẹ, a re koko izi Jihova je ru oware kpobi nọ u dhesẹ nọ a te ahwo nọ a rẹ rria emamọ akpọ yena. Te ohwo o wo obe-udu nọ o rẹ lẹliẹe ru iruo hayo onọ o rẹ lẹliẹe rria emedẹ jọ ọvo, eware nọ ohwo na o bi ru eye e rẹ whae ze nọ a rẹ rọ kẹe uvẹ re ọ gbẹ jọ orẹwho nọ ọ kwa kpohọ na. Ere ọvona, re ahwo nọ a kpare ze na kpobi a sae rria aparadase na bẹdẹ bẹdẹ, aikpobi a re wo emamọ uruemu je koko izi Jihova hrọ.

Dede nọ Jihova yọ Ọghẹnẹ nọ ọ rẹ re ohrọ gaga, oziẹ nọ o kiẹrẹe o re bru. (Izie. 32:4; Ol. 33:5) O you ahwo-akpọ, fikiere ọ te kpare enọ i kiẹrẹe gbe enọ i kiẹrẹe he ze. Rekọ oyena u dhesẹ nọ ọ te kẹ ahwo uvẹ re a ru epanọ u je rai hi. Ahwo nọ a you rie je koko izi riẹ ọvo ọ te kuvẹ nọ a rria akpọ ọkpokpọ na.