Ma Sae Rria Bẹdẹ Bẹdẹ

1. Ma tẹ romatotọ roro kpahe eyaa uzuazọ ebẹdẹ bẹdẹ na, ẹvẹ o te lẹliẹ omai rri Jihova?

JIHOVA ọ ya eyaa nọ ahwo nọ a yoẹme kẹe a ti wo “uzuazọ ebẹdẹ bẹdẹ.” (Rom 6:23) Ma tẹ romatotọ roro kpahe eyaa nana nọ Jihova ọ ya kẹ omai na, o rẹ lẹliẹ omai you rie vi epaọ ọsosuọ. Gine roro iei. Jihova Ọsẹ mai na o you omai te epanọ ọ rọ gwọlọ nọ ma re whu se iẹe ba ha, rekọ ma rẹ rria bẹdẹ bẹdẹ.

2. Eme eyaa uzuazọ ebẹdẹ bẹdẹ na o rẹ lẹliẹ omai ru?

² Eyaa uzuazọ ebẹdẹ bẹdẹ nọ Jihova ọ ya kẹ omai na o rẹ lẹliẹ omai thihakọ ebẹbẹ. O tẹ make rọnọ a gwọlọ kpe omai no fikinọ ma be gọ Jihova, ozọ u re mu omai hi. Fikieme? Oware jọ họ, ma riẹ nọ ma tẹ maki whu dede, Jihova ọ te kpare omai ze, uvẹ u ve ti rovie kẹ omai nọ ma rẹ rọ rria bẹdẹ bẹdẹ. (Jọn 5:28, 29; 1 Kọr. 15:55-58; Hib. 2:15) Ẹvẹ u ro mu omai ẹro ga tere inọ ma te rria bẹdẹ bẹdẹ? Joma ta kpahe eware jọ.

JIHOVA Ọ RRỌ NO EBẸDẸ RITE EBẸDẸ

3. Fikieme u ro mu omai ẹro inọ Jihova ọ sai ru nọ ma rẹ rọ rria bẹdẹ bẹdẹ? (Olezi 102:12, 24, 27)

³ Ma riẹ nọ Jihova ọ sai ru nọ ma rẹ rọ rria bẹdẹ bẹdẹ keme ọye o ru nọ ma rọ rrọ uzuazọ, yọ ọ rrọ no ebẹdẹ rite ebẹdẹ. (Ol. 36:9) Eme nọ eria Ebaibol sa-sa e ta i dhesẹ nọ Jihova o wo emuhọ họ yọ o wo ekuhọ gbe he. Wọhọ oriruo, obe Olezi 90:2 o ta nọ Jihova ọ rrọ “no ebẹdẹ bẹdẹ rite ebẹdẹ bẹdẹ.” Yọ Olezi avọ 102 o ta oghẹrẹ ẹme otiọye na re. (Se Olezi 102:12, 24, 27.) Habakọk ọruẹaro na ọ ta ọkpọ ẹme otiọye na re kpahe Jihova Ọsẹ obọ odhiwu mai na. Ọ ta nọ: “O Jihova, kọ ogbẹrọnọ whọ rrọ bẹdẹ bẹdẹ? O Ọghẹnẹ mẹ, Ọrẹri mẹ, who re whu hu.”—Hab. 1:12.

4. Kọ o rẹ kẹ omai uye nọ ma gbẹ make riẹ oghẹrẹ nọ Ọghẹnẹ o gbe ro wo emuhọ gbe ekuhọ họ? Ru ei vẹ.

⁴ Jihova yọ “Ọghẹnẹ ebẹdẹ bẹdẹ,” o wo emuhọ họ. Kọ o be hai gbe owhẹ unu inọ, kọ ẹvẹ oware utioye na o sae rọ lọhọ? (Aiz. 40:28) O tẹ rrọ ere, riẹ nọ whẹ ọvo o rrọ ere kẹ hẹ. Elaihu ọ ta kpahe Ọghẹnẹ nọ: “A rẹ sae riẹ epanọ ikpe riẹ i bu te he.” (Job 36:26) Rekọ nọ ma gbẹ riẹ oghẹrẹ nọ oware jọ o rrọ họ, nọ u te bi gbe omai unu ọvo, kọ u dhesẹ nọ oware na o ginẹ rrọ ere he? Ijo. Wọhọ oriruo, oghẹrẹ nọ ikpẹ ẹlẹtriki i re ro lo ze u re gbe omai unu keme ma nwane riẹ epanọ o be rọ via dẹẹ hẹ. Kọ oyena o te lẹliẹ omai vro nọ ikpẹ ẹlẹtriki i re lo ho? Ijo. Ere ọvona re, mai ahwo-akpọ, ma re roro nọ, ‘Kọ ẹvẹ o nya nọ Ọghẹnẹ o gbe ro wo emuhọ họ yọ o wo ekuhọ họ?’ Ma riẹ oghẹrẹ nọ o rọ rrọ ere he. Rekọ oyena u dhesẹ hẹ inọ ere Ọghẹnẹ ọ rrọ họ. Ma rẹ sae riẹ otọ oware kpobi kpahe Jihova ha. (Rom 11:33-36) Jihova ọ rrọ no taure a tẹ te ma ehrugbakpọ na, makọ ọre gbe isi nọ e rrọ obehru na. Ọ vuẹ omai nọ “ọye họ Ọnọ ọ rehọ ogaga riẹ ma otọakpọ na.” Ọ rrọ no taure ọ tẹ te “rriẹ idhiwu na fihọ.” (Jeri. 51:15; Iruẹru 17:24) Kọ eme ọfa o lẹliẹ omai riẹ nọ ma sae ginẹ rria bẹdẹ bẹdẹ?

JIHOVA Ọ MA OMAI RE MA RRIA BẸDẸ BẸDẸ

5. O hae jọ nọ Adamu avọ Ivi a yoẹme kẹ Jihova, uvẹ vẹ a hai ti wo?

⁵ Jihova ọ ma eware nọ e rrọ uzuazọ evaọ otọakpọ na re e rria bẹdẹ bẹdẹ hẹ, rekọ ọ ma ohwo-akpọ re ọ rria bẹdẹ bẹdẹ. Ghele na ọ ta kẹ Adamu nọ: “Ure eriariẹ ewoma gbe eyoma na, whọ rẹ jariẹ re vievie he, keme evaọ ẹdẹ nọ whọ re riẹ who ti whu hrọ.” (Emu. 2:17) O hae jọ nọ Adamu avọ Ivi a yoẹme kẹ Jihova, a hai ti whu hu. Yọ nọ oke o be nyaharo na, o wọhọ nọ Jihova ọ hae te kẹ ae uvẹ re a re ubi “ure uzuazọ na.” O hae jọ ere, koyehọ Jihova o kuenu kẹ ae no inọ a te “rria bẹdẹ bẹdẹ.”b—Emu. 3:22.

6-7. (a) Eme ọfa u dhesẹ nọ Jihova ọ ma omai re ma whu hu? (b) Eme whọ te gwọlọ ru evaọ aparadase? (Rri iwoho na.)

⁶ Egbaeriariẹ a kiẹ ku eware nọ i dhesẹ nọ, eware nọ ma be riẹ fihọ ẹvori mai na evaọ edẹ uzuazọ mai kpobi i bu kaka unu eware nọ e rẹ sai ginẹ ruọ ẹvori na ha. O nwane rọwokugbe oware nọ ma be ta na. U te no ere no, evaọ ukpe 2010, obe na Scientific American Mind o ta ẹme jọ kpahe ẹvori na. O ta nọ eware nọ e rẹ sae ruọ ẹvori mai na, a tẹ rehọ ai ru ifimu, ifimu na o re theri te enwenọ euwa ima esa (3,000,000). Koyehọ a re rri rie kri vrẹ ikpe egba esa (300) soso. Whaọ o sae jọ nọ eware nọ e rẹ ruọ ẹvori mai na i bu vrẹ ere dede. Onana u dhesẹ nọ Jihova ọ ma ẹvori mai na oghẹrẹ nọ ma sae rọ riẹ eware buobu evaọ ikpe buobu, orọnọ ikpe udhosa-gbikpe hayo udhone ọvo ho.—Ol. 90:10.

⁷ Jihova ọ ma omai evaọ oghẹrẹ nọ ma rẹ rọ gwọlọ nọ ma rẹ rria bẹdẹ bẹdẹ. Ebaibol ọ ta nọ Ọghẹnẹ o “fi ebẹdẹ bẹdẹ họ udu” ohwo-akpọ. (Ọtausi. 3:11) Onana yọ oware jọ nọ o lẹliẹ omai rri uwhu inọ ọwegrẹ mai. (1 Kọr. 15:26) Wọhọ oriruo, whọ tẹ be mọ, whọ rẹ rọ abọ muoma inọ uwhu o be nyaze o nyaze? Ijo. Ukpoye, who ti kpohọ ọspito, rehọ imu jẹ gwọlọ oghẹrẹ kpobi nọ oma ra u re ro kpo. Yọ ohwo mai o te whu, te ọ who hayo ọ who ho, o rẹ da omai gaga. (Jọn 11:32, 33) Kọ who roro nọ epanọ Jihova o you ohwo-akpọ te na, ọ rẹ ma omai re uzuazọ ebẹdẹ bẹdẹ o hai si omai urru kpakiyọ ọ ma omai re ma rria bẹdẹ bẹdẹ hẹ? Vievie! Eware efa jọ e riẹ nọ e lẹliẹ omai riẹ nọ ma sae ginẹ rria bẹdẹ bẹdẹ. Joma ta kpahe eware jọ nọ Jihova o ru evaọ oke anwae gbe enọ o bi ru nẹnẹ. O te lẹliẹ omai ruẹ nọ Jihova ọ gbẹ gwọlọ nọ ma rẹ rria bẹdẹ bẹdẹ.

JIHOVA O TI RU EYAA RIẸ GBA

8. Eme obe Aizaya 55:11 o ta, nọ u dhesẹ nọ Jihova o ri nwene iroro ho?

⁸ Nọ Adamu avọ Ivi a raha uzi no, o tẹ so ẹe ze nọ emọ rai a bi ro whu. Ghele na, Jihova ọ gbẹ gwọlọ nọ ahwo nọ i yoẹme kẹe a rẹ rria bẹdẹ bẹdẹ. O ri nwene iroro ho. (Se Aizaya 55:11.) Ẹvẹ ma rọ riẹ? Ma riẹ ere keme u wo eme jọ nọ ọ ta gbe eware nọ o ru re ẹjiroro riẹ o sai rugba. Joma ta kpahe ae.

9. Eyaa vẹ Ọghẹnẹ ọ ya kẹ omai? (Daniẹl 12:2, 13)

⁹ Jihova ọ ya eyaa inọ ọ te kpare ahwo nọ a whu no ze, uvẹ u ve ti rovie kẹ ae nọ a rẹ rọ rria bẹdẹ bẹdẹ. (Iruẹru 24:15; Tait. 1:1, 2) Odibo Jihova nọ a re se Job ọ ta ẹme nọ u dhesẹ nọ Jihova ọ ginẹ gwọlọ nọ ọ rẹ kpare ahwo ze. (Job 14:14, 15) Yọ Daniẹl ọruẹaro na omariẹ ọ riẹ nọ Jihova ọ te kpare ahwo nọ a whu no ze, a ve ti wo uvẹ nọ a rẹ rọ rria bẹdẹ bẹdẹ. (Ol. 37:29; se Daniẹl 12:2, 13.) U te no ere no, ahwo Ju evaọ oke Jesu a riẹ nọ ohwo o te bi ru oware nọ o rẹ were Jihova, ọ rẹ sai wo “uzuazọ ebẹdẹ bẹdẹ.” (Luk 10:25; 18:18) Yọ Jesu omariẹ ọ jẹ hai si unu no ẹme ẹkparomatha gbe uzuazọ ebẹdẹ bẹdẹ hẹ. Nọ o whu no, Ọsẹ riẹ ọ kpare riẹ ze.—Mat. 19:29; 22:31, 32; Luk 18:30; Jọn 11:25.

10. Eme ẹkpare nọ a kpare ahwo ze evaọ oke anwae na o lẹliẹ omai riẹ? (Rri uwoho na)

¹⁰ Jihova họ ọnọ ọ kẹ omai uzuazọ yọ o wo ogaga nọ ọ sae rọ kpare ahwo nọ a whu no ze. Ọ kẹ Elaejah ọruẹaro na ogaga nọ ọ rọ kpare ọmọzae aye-uku obọ Zarefat ze. (1 Iv. 17:21-23) Yọ uwhremu na, nọ ọmọ aye obọ Shunẹm jọ o whu, Jihova ọ kẹ Elaesha ogaga nọ ọ rọ kpare iẹe ze. (2 Iv. 4:18-20, 34-37) Ahwo nana gbe amọfa nọ a kpare ze na u dhesẹ nọ Jihova o wo ogaga nọ ọ sae rọ kpare ahwo nọ a whu no ze. Ere ọvo ho, oke nọ Jesu ọ jọ otọakpọ, Jihova ọ kẹ riẹ ogaga nọ ọ rọ kpare ahwo nọ a whu no ze re. (Jọn 11:23-25, 43, 44) Jesu ọ rrọ obọ odhiwu enẹna yọ Jihova ọ kẹ riẹ “udu-esuo kpobi . . . no evaọ odhiwu gbe otọakpọ na.” Fikiere o wo ogaga nọ ọ te rọ kpare ahwo nọ a rrọ “iki ekareghẹhọ kpobi” ze, uvẹ u ve ti rovie kẹ ae nọ a rẹ rọ rria bẹdẹ bẹdẹ.—Mat. 28:18; Jọn 5:25-29.

11. Oghẹrẹ vẹ uwhu Jesu na u ro rovie uvẹ uzuazọ ebẹdẹ bẹdẹ kẹ omai?

¹¹ Ghelọ epanọ Jihova o you Jesu te na, fikieme ọ rọ kẹe uvẹ re o whu uwhu oja? Jesu ọ fodẹ oware nọ o wha riẹ ze. Ọ ta nọ: “Ọghẹnẹ o you akpọ na gaga te epanọ o ro siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” (Jọn 3:16) Uwhu Jesu na o so riẹ ze nọ Ọghẹnẹ ọ be rọ rehọ izieraha mai vrẹ omai, ma vẹ sai je wo uzuazọ ebẹdẹ bẹdẹ. (Mat. 20:28) Pọl ukọ na ọ vuẹ omai epanọ uwhu Jesu na u wuzou te. Ọ ta nọ: “Keme epanọ ọzae ọvo ọ wha uwhu ze na, ere ọvona re ọzae ọvo ọ wha ẹkparomatha enọ i whu no ze. Wọhọ epanọ ahwo kpobi a bi whu fiki Adamu na, ere ọvona re ahwo kpobi a ti wo uzuazọ fiki Kristi.”—1 Kọr. 15:21, 22.

12. Eme Jihova o ru re ọ sae rọ Uvie na ru oreva riẹ gba?

¹² Jesu ọ vuẹ ilele riẹ nọ jọ a lẹ re Uvie Ọghẹnẹ o ze, re oreva Ọghẹnẹ u je rugba evaọ otọakpọ na. (Mat. 6:9, 10) Whaọ, re ma rria bẹdẹ bẹdẹ evaọ otọakpọ na yọ oreva Ọghẹnẹ. Ọghẹnẹ ọ rọ Jesu mu Ovie ọrọ Uvie Mesaya na re oreva riẹ na o sai rugba. Yọ anwọ oke jọ ze na, ọ be salọ ahwo nọ a ti lele Jesu su evaọ Uvie na. Ahwo na a bu te idu udhuhrẹ-gbene (144,000).—Evia. 5:9, 10.

13. Eme Jihova o bi ru, kọ eme ahwo nọ a rrọ abọ Uvie Ọghẹnẹ a bi ru?

¹³ Jihova o bi koko “ogbotu obuobu” ahwo họ, yọ o bi wuhrẹ ae oware nọ a re ru re a sae ruọ Uvie na. (Evia. 7:9, 10; Jem. 2:8) Dede nọ ẹmo-ofio, ozighi gbe omukpahọ o da akpọ na fia, ogbotu obuobu na a you ohwohwo yọ a be gbẹroma ha. A duwu egbọdọ rai zihe ruọ etẹkpẹ no keme a bi lele ohwohwo rria dhedhẹ. (Mae. 4:3) A re fi ẹmo ho. Ukpoye a bi wuhrẹ ahwo re a riẹ Ọghẹnẹ uzẹme na gbe ẹjiroro riẹ, re a sai wo “uvi uzuazọ na.” (1 Tim. 6:19) Fikinọ abọ Uvie Ọghẹnẹ a rrọ, ahwo uviuwou rai a sae wọso ae, yọ eware e sae jọ gaga kẹ ae ẹsejọ. Rekọ Jihova ọ be rẹrote ae. (Mat. 6:25, 30-33; Luk 18:29, 30) Enana kpobi i dhesẹ nọ Uvie Ọghẹnẹ u bi su enẹna, yọ u ti ru nọ ẹjiroro Ọghẹnẹ u ti ro rugba.

AKPỌ Ọ TE WERE KẸHẸ EVAỌ OBARO

14-15. Ẹvẹ Jihova o ti ro ru eyaa nọ ọ ya inọ o ti si uwhu no otọ na gba?

¹⁴ Jesu o bi su evaọ obọ odhiwu, yọ o ti ru nọ eyaa Ọghẹnẹ kpobi i ti ro rugba. (2 Kọr. 1:20) Anwọ ukpe 1914 ze, Jesu o bi ro su evaọ udevie ewegrẹ riẹ. (Ol. 110:1, 2) Kẹle na, Jesu avọ ahwo nọ a ti lele iei su a ti fi kparobọ riẹriẹriẹ, koyehọ a te raha ahwo omuomu no.—Evia. 6:2.

¹⁵ Evaọ oke Esuo Odu-Ikpe Jesu na, a te kpare ahwo nọ a whu no ze. Ukuhọ riẹ ahwo-akpọ kpobi nọ i yoẹme a vẹ te jọ gbagba. Nọ odawọ urere na o jẹ vrẹ no, ahwo kpobi nọ Jihova o kuenu kẹ inọ a kiẹrẹe, “a [vẹ] te rọ otọakpọ na reuku, yọ a te rriae bẹdẹ bẹdẹ.” (Ol. 37:10, 11, 29) “Yọ a ti si uwhu, ọwegrẹ urere na no otọ.” Eva ọvo e te were omai oke yena.—1 Kọr. 15:26.

16. Eme u fo nọ o rẹ mae lẹliẹ omai ru oware nọ o rẹ were Jihova?

¹⁶ Eware nọ ma wuhrẹ no evaọ uzoẹme nana i dhesẹ nọ ẹme nọ Ebaibol ọ ta, oye o lẹliẹ omai riẹ nọ ma te rria bẹdẹ bẹdẹ. Ẹruore nana nọ ma wo na o rẹ lẹliẹ omai ru oware nọ o rẹ were Jihova dede nọ akpọ na o bi dhe eyeyoma. Rekọ oware nọ o rẹ mae lẹliẹ omai ru oware nọ o rẹ were Jihova họ, ma you rie gbe Ọmọ riẹ Jesu Kristi gaga, orọnọ fiki uzuazọ ebẹdẹ bẹdẹ ọvo ho. (2 Kọr. 5:14, 15) Fikinọ ma you rai, ma rẹ ta usi uwoma kẹ ai re a wo ẹruore nọ ma wo na. (Rom 10:13-15) Ma tẹ be jẹ daoma ru ewoma kẹ ahwo, nọ ma gbẹ be gwọlọ ewoma obọmai ọvo ho, ma te jọ egbẹnyusu Jihova bẹdẹ bẹdẹ.—Hib. 13:16.

17. Eme u fo nọ mai kpobi ma rẹ daoma ru enẹna? (Matiu 7:13, 14)

¹⁷ Kọ whọ te jọ usu ahwo nọ a te rria bẹdẹ bẹdẹ? Jihova o rovie uvẹ fihọ kẹ omai kpobi no! Obọnana obọ mai o rrọ. Ma rẹ daoma re ma daji edhere uzuazọ na. (Se Matiu 7:13, 14.) Kinọ ma te rria bẹdẹ bẹdẹ na, ẹvẹ akpọ ọ te jọ evaọ oke yena? Ma te kẹ uyo onọ yena evaọ uzoẹme notha na.