“Wha Sẹro Iroro Rai, Wha Hai Rou!”

1. Eme Jesu ọ ta kẹ ilele riẹ kpahe oke nọ a te rọ raha akpọ na, kọ eme ọ ta kẹ ae nọ a hai ru?

EMEDẸ jọ i kiọkọ re Jesu o te ti whu, ilele ene riẹ jọ a nọ riẹ nọ: “Eme ọ te jọ oka . . . orọ oke urere uyero-akpọ na?” (Mat. 24:3) O wọhọ nọ ilele Jesu a je roro kpahe epanọ a te rọ riẹ, nọ oke nọ a te rọ raha Jerusalẹm avọ etẹmpol na o te te no. Jesu ọ vuẹ rai eware nọ e te via nọ oke yena o te te. Ere ọvo ho, ọ vuẹ rai eware nọ e te via nọ “oke urere uyero-akpọ na” o te te no, yọ oke yena ma rrọ na. Rekọ Jesu ọ vuẹ rai ẹme jọ kpahe uzedhe oke nọ Ọghẹnẹ ọ te rọ raha akpọ na. Ọ ta nọ: “Kpahe ẹdẹ yena hayo auwa na, ohwo ọvo ọ riẹ riẹ hẹ, makọ ikọ-odhiwu hayo Ọmọ na dede, rekọ Ọsẹ na ọ riẹ riẹ.” Kẹsena ọ tẹ ta kẹ ae nọ jọ a “jaja aro vi ẹsikpobi,” re a jẹ “ruabọhọ erou.”—Mak 13:32-37.

2. Fikieme o rọ roja inọ Ileleikristi nọ e jọ Jerusalẹm a re muẹrohotọ?

² O roja gaga inọ Ileleikristi nọ e jọ ahwo Ju a re muẹrohotọ keme ere a te sai ro siwi uzuazọ rai. Jesu ọ vuẹ rai epanọ a te rọ riẹ, nọ oke nọ a te rọ raha Jerusalẹm avọ etẹmpol na o te te no. Ọ ta kẹ ae nọ: “Wha tẹ ruẹ Jerusalẹm nọ egbaẹmo e wariẹ họ, wha riẹ nọ ọraha riẹ ọ kẹle no.” Ọ vuẹ rai nọ a tẹ ruẹ oware utioye na, jọ a “mu obọ igbehru na họ ẹdhẹ kpohọ.” (Luk 21:20, 21) Ahwo nọ a ginẹ dhẹ no Jerusalẹm wọhọ epanọ Jesu ọ ta na, a zọ evaọ oke nọ ahwo Rom a raha Jerusalẹm.

3. Eme ma te ta kpahe evaọ uzoẹme nana?

³ O roja gaga inọ mai omamai ma re muẹrohotọ re jẹ sẹro iroro mai keme oke urere uyero-akpọ omuomu nana ma rrọ na. Ma te ta kpahe oware nọ u fo nọ ma re ru gbe onọ ma re ru hu nọ ma tẹ ruẹ oghẹrẹ eware jọ nọ e be via. Ma te jẹ ta kpahe epanọ ma sai ro muẹrohọ omamai ziezi gbe oware nọ u fo nọ ma re ru enẹna nọ orọnọ oke nọ u kiọkọ u gbe tulo ho na.

JOMA MUẸROHỌ EWARE NỌ E RRỌ AKPỌ VIA

4. Fikieme u ro fo re ma muẹrohọ sọ eware nọ e rrọ akpọ via i bi ru eruẹaruẹ Ebaibol gba?

⁴ Ma rẹ gwọlọ muẹrohọ eware nọ e rrọ akpọ via re ma ruẹ epanọ i bi ro ru eruẹaruẹ Ebaibol gba. Yọ u gine fo re ma ru ere. Ẹvẹ ma rọ riẹ? Jesu ọ fodẹ oghoghẹrẹ eware nọ e te via nọ o te lẹliẹ omai riẹ nọ oke nọ Ọghẹnẹ ọ te rọ raha akpọ na o kẹle no. (Mat. 24:3-14) Pita ukọ na omariẹ ọ ta nọ u fo re ma hai muẹrohọ epanọ eruẹaruẹ nọ e rrọ Ẹme Ọghẹnẹ i bi ro rugba keme o rẹ lẹliẹ ẹrọwọ mai ga. (2 Pita 1:19-21) Yọ who te se obe urere Ebaibol na, ẹme nọ o mu rie họ họ: “Eware nọ Jesu Kristi o dhesẹ via, nọ Ọghẹnẹ o rovie via kẹe, re o dhesẹ kẹ erigbo riẹ eware nọ e te via hrọ kẹle na.” (Evia. 1:1) Enana kpobi e wha riẹ ze nọ ma rẹ rọ gwọlọ muẹrohọ eware nọ e rrọ akpọ via na re ma ruẹ sọ eruẹaruẹ Ebaibol i bi rugba na. Yọ ma rẹ gwọlọ ta eware nọ ma muẹrohọ kẹ inievo mai.

5. Eme u fo nọ ma rẹ whaha, kọ eme u fo nọ ma re ru? (Rri iwoho na re.)

⁵ Nọ ma tẹ be ta ẹme kpahe oghẹrẹ nọ eware nọ e be via i bi ro ru eruẹaruẹ Ebaibol gba, ma rẹ yọroma re ma gbẹ ta ọrọ obọmai fihọ iẹe he. Fikieme? Keme ma tẹ ta oghẹrẹ ẹme jọ, inievo ukoko na a gbe ti wo iroro evo ho, kọ ọvuọ ọriẹ a be te ta. Ma rehọ iẹe nọ isu egọmeti jọ a jẹ ta kpahe ozighi jọ nọ ọ rrọ otọ gbe epanọ a ti ro ku ei họ re udhedhẹ gbe omofọwẹ o jariẹ. Ma te yo ẹme otiọye, ma du nwane ta nọ eruẹaruẹ nọ e rrọ obe 1 Ahwo Tẹsalonika 5:3 na eye i bi rugba na ha. Rekọ ma rẹ daoma riẹ oware nọ ukoko na o ta kpahe oware yena kẹle na. Ma tẹ be hai kru ẹme nọ ukoko o ta họ obọ, jẹ rehọ iẹe lele inievo mai ta ẹme, mai kpobi ma te jọ “okugbe ọvo evaọ . . . eriwo” mai.—1 Kọr. 1:10; 4:6.

6. Eme ma wuhrẹ no ẹme nọ ọ rrọ obe 2 Pita 3:11-13 na ze?

⁶ Se 2 Pita 3:11-13. Pita ukọ na ọ ta oware nọ u fo nọ ma re ru nọ ma te bi rri epanọ eruẹaruẹ Ebaibol i bi ro rugba. Ọ ta nọ ma “hẹrẹ ọzino ẹdẹ Jihova je . . . woi họ iroro ẹsikpobi.” Fikieme? Orọnikọ re ma sae riẹ “ẹdẹ gbe auwa” nọ ẹmo Amagidọn o ti ro fi ze he. Rekọ ma rẹ hai roro kpahe iẹe re ma sai “wo uruemu ọrẹri je wobọ evaọ iruẹru omarọkẹ Ọghẹnẹ” keme oke nọ u kiọkọ u gbe tulo ho. (Mat. 24:36; Luk 12:40) Ẹme na họ, ma rẹ daoma wo uruemu nọ o rẹ were Ọghẹnẹ, ma ve je kruga ziezi evaọ ukoko na re ma dhesẹ nọ ma gine you Jihova. Rekọ re ma sai ru ere, u fo nọ ma rẹ hai muẹrohọ omamai.

ẸVẸ MA SAI RO MUẸROHỌ OMAMAI?

7. Eme u re dhesẹ nọ ma bi muẹrohọ omamai? (Luk 21:34)

⁷ Orọnikọ eware nọ e rrọ akpọ via ọvo Jesu ọ ta kẹ ilele riẹ nọ a muẹrohọ họ. Ọ ta kẹ ae nọ a muẹrohọ omarai re. Ma te rri ẹme nọ ọ rrọ obe Luk 21:34, ma rẹ ruẹ ẹme yena vevẹ. (Sei.) Jesu ọ jọ etẹe ta nọ: “Wha yọroma.” Re ma sai ru epanọ Jesu ọ ta na, ma re muẹrohọ oware kpobi nọ o rẹ sae raha usu mai avọ Jihova, ma vẹ daoma kẹnoma kẹe. Ma te bi ru ere, Jihova Ọghẹnẹ o ti gbe you omai ẹsikpobi.—Itẹ 22:3; Jud 20, 21.

8. Ohrẹ vẹ Pọl ukọ na ọ kẹ Ileleikristi?

⁸ Pọl ukọ na ọ vuẹ Ileleikristi nọ jọ a hae muẹrohọ omarai. Ọ vuẹ Ileleikristi obọ Ẹfisọs nọ: “Wha fiẹrohotọ ziezi re wha ruẹ nọ oghẹrẹ nọ wha be nya o rrọ wọhọ igheghẹ hẹ rekọ wọhọ ahwo nọ a wo areghẹ.” (Ẹf. 5:15, 16) Ẹdhọ ọ be gwọlọ oghẹrẹ kpobi nọ ọ rẹ rọ raha usu mai avọ Jihova. Oyejabọ Ebaibol ọ rọ vuẹ omai nọ ma “gbẹ hae daoma wo otoriẹ oware nọ oreva Jihova o rrọ.” Ma te bi ru ere, Ẹdhọ ọ tẹ maki ru kẹhẹ, ma ti kie kẹe he.—Ẹf. 5:17.

9. Ẹvẹ ma sae rọ riẹ oreva Jihova evaọ oware kpobi nọ ma bi ru?

⁹ Orọnikọ oware kpobi nọ o rẹ sae raha usu mai avọ Jihova, a nwane jọ Ebaibol ta kpahe gbiae he. Ẹsejọ oghẹrẹ oware jọ o sae roma lahwe, yọ Ebaibol o jie uzi ọvo kpahe iẹe he. Re ma sai ru oware nọ u fo, ma rẹ “daoma wo otoriẹ oware nọ oreva Jihova o rrọ.” Yọ re ma sae riẹe, ma rẹ hai se Ebaibol je roro didi kpahe eware nọ ma se. O rẹ jọ oware nọ ma be hai ru no anwẹdẹ. Ma tẹ be hai ru ere, ma te riẹ oreva Jihova ziezi, jẹ rọ ẹmẹrera wo “iroro Kristi.” Kẹsena ma vẹ te jọ “ahwo nọ a wo areghẹ.” Ma vẹ te riẹ oware nọ ma re ru makọ oke nọ ma tẹ be jiroro kpahe oware nọ Ebaibol o jie uzi ọvo kpahe he. (1 Kọr. 2:14-16) U wo eware jọ nọ ma riẹ nọ i woma ha, rekọ efa jọ, whọ rẹ kake riẹ nọ i yoma ha. Joma ta kpahe ejọ.

10. Oghẹrẹ eware jọ vẹ ma rẹ daoma whaha?

¹⁰ U wo eware jọ nọ ma riẹ vevẹ nọ e rẹ dha Jihova eva. Ejọ rai họ, idi-eda thomawa, emu nọ a rẹ re vrẹta, eme edada, eme ọfariẹ-ogbe, ifimu ozighi avọ erọ ọfariẹ-ogbe, gbe eware itieye na efa. (Ol. 101:3) Ẹdhọ yọ ọwegrẹ mai, yọ ọ rẹ gwọlọ rọ oghẹrẹ kpobi ruọ omai oma re ọ sae raha usu mai avọ Jihova. (1 Pita 5:8) Setan o wo ẹghẹ gaga. Ma gbe rri otọ mu hu, ọ sai ru nọ ma re ro mu ikpehre iruemu jọ họ ewo ẹmẹrera. Ejọ rai họ, ọrue-ọta, ihri-eriọ, uvou-uthei, omukpahe, omorro, hayo ẹgo nọ a re fi họ eva. (Gal. 5:19-21) Ma te muẹrohọ nọ ma be gwọlọ wo uruemu utioye na jọ, joma daoma siobọnoi ababọ oke oraha. Ma gbe ru ere, o te dowọ muotọ, o vẹ te wha uye se omai.—Jem. 1:14, 15.

11. Ma gbe rri otọ mu hu, eme o rẹ sae via kẹ omai, kọ fikieme ma rẹ rọ kẹnoma kẹ ahwo nọ a bi koko izi Jihova ha?

¹¹ Oware jọ nọ o rẹ sae raha usu mai avọ Jihova nọ ma rẹ kaki muẹrohọ họ họ ekpehre usu. Wọhọ oriruo, ma rehọ iẹe nọ whẹ avọ ohwo jọ nọ ọ rrọ ukoko na ha wha bi ru iruo evaọ oria ovona. Fikinọ whọ gwọlọ nọ a rọ emamọ ubiẹro rri Isẹri Jihova, whọ tẹ be hai lele ohwo na yeri ziezi je fiobọhọ kẹe. Ẹsenọ ọ tẹ vuẹ owhẹ nọ whẹ avọ iẹe wha re emu kugbe evaọ obọ iruo, whọ rẹ rọwo kẹe. Ẹmẹrera na, u te ti zihe ruọ oware ẹsikpobi no. Yọ ẹsejọ nọ wha tẹ be ta ẹme, ọ rẹ ta eme ọfariẹ-ogbe, rekọ whọ rẹ kpahe ẹme ọvo fihọ iẹe he. Nọ oke o be nyaharo na, eme ọfariẹ-ogbe nọ ọ rẹ ta na e tẹ te reria owhẹ oma no, e gbẹ be kẹ owhẹ uye he. Ẹdẹ jọ ọ tẹ vuẹ owhẹ nọ wha nyae da umudi kugbe nọ wha te ku iruo họ no, whọ tẹ jẹ rọwo kẹe. Ẹmẹrera na, who te ti muẹrohọ nọ oghẹrẹ nọ ọyomariẹ o re rri eware, ere who bi rri eware enẹna. Nọ u te ere no na, oghẹrẹ eware nọ ọ be hai ru, eye who bi ti muhọ eru na. Ẹme nọ ma be ta na họ, u gine fo nọ ma re lele ahwo riẹ yeri jẹ kẹ ae adhẹẹ. Rekọ ma rẹ jẹ kareghẹhọ nọ ma tẹ be hae jọ kugbe oghẹrẹ ahwo jọ ẹsikpobi, uruemu rai o te rọ ẹmẹrera wholo omai. (1 Kọr. 15:33) Ma tẹ be hai muẹrohọ omamai wọhọ epanọ Jesu ọ ta, ma ti ku usu kugbe ahwo nọ a bi koko izi Jihova ha ha. (2 Kọr. 6:15) Ma ti muẹrohọ uye nọ u ti noi ze nọ ma te ku usu kugbe ae, fikiere ma vẹ te kẹnoma.

REHỌ OKE RA RU OWARE NỌ O MAI WOMA

12. Eme Jesu ọ vuẹ ilele riẹ nọ a ru nọ a be hẹrẹ ekuhọ uyero-akpọ na?

¹² Jesu ọ gwọlọ nọ ilele riẹ a rẹ rọ abọ mu oma ha nọ a be hẹrẹ ekuhọ uyero-akpọ na. Ọ kẹ rai obọdẹ iruo nọ a re ru. Ọ vuẹ rai inọ jọ a whowho usi Uvie na “evaọ Jerusalẹm, evaọ Judia soso gbe Sameria, je rite oria nọ o mai thabọ evaọ otọakpọ na.” (Iruẹru 1:6-8) Nọ okolo iruo ho. A tẹ be ginẹ ta usi uwoma ziezi wọhọ epanọ Jesu ọ gwọlọ, yọ u dhesẹ nọ a be rehọ oke rai ru oware nọ o mai woma.

13. Fikieme o jẹ roja re ma rọ oke mai ru eware nọ e mai wuzou? (Ahwo Kọlọsi 4:5)

¹³ Se Ahwo Kọlọsi 4:5. U fo re ma muẹrohọ omamai sọ ma be rọ oke mai ru eware nọ e mai wuzou. Fikieme? Keme “eware nọ a rẹro rai hi” e sae via kẹ omai kpobi. (Ọtausi. 9:11) Oware jọ o sae via dede nọ o rẹ lẹliẹ omai whu uwhu idudhe.

14-15. Eme u re dhesẹ nọ ma be rọ oke mai ru oware nọ ọ mai woma? (Ahwo Hibru 6:11, 12) (Rri uwoho na re.)

¹⁴ Nọ ma tẹ be daoma ru oware nọ o rẹ were Jihova je ru oware nọ o rẹ lẹliẹ usu mai avọ iẹe kpekpe ziezi, yọ u dhesẹ nọ ma be rehọ oke mai ru oware nọ o mai woma. (Jọn 14:21) O gwọlọ nọ ma re ‘dikihẹ ga, ma re no ẹta ha, ma ve je wo eware buobu nọ ma re ru ẹsikpobi evaọ iruo Olori na.’ (1 Kọr. 15:58) Nọ ma tẹ be hai ru ere, te uwhu o ze, te urere uyero-akpọ nana o ze, yọ ma riẹ nọ ma ru oware nọ u fo nọ ma re ru no.—Mat. 24:13; Rom 14:8.

¹⁵ Jesu o gbe bi fiobọhọ kẹ Ileleikristi nẹnẹ re a sae ta usi uwoma Uvie Ọghẹnẹ evaọ akpọ na soso. Jesu ọ be rọ ukoko na wuhrẹ omai. Yọ ukoko na u ru eware sa-sa nọ i re fiobọhọ kẹ omai ta usi uwoma na ziezi. Jesu o bi gine ru ẹkabọ riẹ. (Mat. 28:18-20) Kọ ẹvẹ ma sai ro ru ẹkabọ mai? Ma rẹ rọ ajọwha ta usi uwoma na je wuhrẹ ahwo uzẹme na. Ma rẹ jẹ jaja aro vi re ma whaha oware kpobi nọ o rẹ raha usu mai avọ Jihova bẹsenọ ekuhọ akpọ na o rẹ ze. U te no ere no, ma rẹ jẹ daoma lele ohrẹ nọ o rrọ Ahwo Hibru 6:11, 12 na. (Sei.) Ma te bi ru ere, ẹruore mai na o ti mu omai ẹro ziezi “rite urere.”

16. Eme ma gba riẹ mu nọ ma re ru?

¹⁶ Jihova o fi ẹdẹ gbe auwa nọ ọ te rọ raha akpọ Setan họ no. Nọ ẹdẹ na o te te no, ọ te vae he. Nọ ọ tẹ raha akpọ omuomu nana no, eware efa kpobi nọ ọ ruẹaro rai evaọ Ebaibol i ve ti rugba. Rekọ ẹsejọ, o rẹ jọ omai ẹro nọ ẹdẹ na o bi lehie. Rekọ ẹdẹ Jihova ọ te tha, yọ eme riẹ i “ti rugba evaọ ẹruoke!” (Hab. 2:3) Fikiere, joma gbaemu inọ ma “ti fiẹrohotọ re [ma] riẹ oke nọ Jihova ọ te rọ jowọ.” Ma vẹ jẹ rọ “odiri hẹrẹ Ọghẹnẹ esiwo [mai].”—Mae. 7:7.