Eghale nọ Me Rẹro Rai Hi gbe Eware nọ Me Wuhrẹ Evaọ Iruo Jihova

Oke nọ a je fi Ẹmo Akpọ Avivẹ, ọsẹgboni mẹ a tẹ kwa no obọ Estonia kpobọ Germany, yọ obei a jọ yẹ omẹ. Nọ a yẹ omẹ no, a tẹ jẹ gwọlọ nọ a rẹ kwa kpobọ Canada. Ma tẹ ginẹ kwa kpobọ Canada, yọ ẹwho jọ nọ ọ kẹle Ottawa ma jẹ rria evaọ obei. Uwou nọ ma jẹ rria u tulo ho, yọ erifẹ e jẹ rria ofẹ jọ evaọ uwou na. Oke yena ma yogbe wo umuo ho. Rekọ ma jẹ ruẹ ikehọ nọ ma re kugbe rọ re emu ohiohiẹ.

Ẹdẹ jọ, Isẹri Jihova a tẹ ta usi uwoma kẹ oni mẹ. A te se obe Eviavia 21:3, 4 kẹe. Ẹme nọ a se kẹe na u duobọtei gaga, o te muhọ ẹviẹ. Tei te ọsẹ mẹ a te mu Ebaibol họ ewuhrẹ. Eware nọ a je wuhrẹ na e were rai gaga. U kri hi, a tẹ họ-ame.

Dede nọ ọsẹgboni mẹ a nwane riẹ Oyibo tere he, a se egagọ Jihova gboja. Ọsẹ mẹ o je ru iruo evaọ oria nọ a rẹ jọ ghra oware jọ nọ a re se nickel nọ ọ wọhọ ayọno evaọ ẹwho nọ a re se Sudbury evaọ Ontario. O re ru iruo asohẹrioke ẹsejọ. Ghele na, nọ oke o tẹ ke no evaọ ohiohiẹ Ẹdẹ-Ọmaha, ọ rẹ wha omẹ avọ Sylvia oniọvo-ọmọtẹ mẹ ọrọ ọmaha kpohọ usi uwoma. O rẹ kaki voi hi. Yọ koka koka mai kpobi evaọ uwou na ma re kuomagbe wuhrẹ Uwou-Eroro Na. Eware nọ ọsẹgboni mẹ a wuhrẹ omẹ e lẹliẹ omẹ you Jihova. Fikiere mẹ tẹ rọ uzuazọ mẹ kẹ Jihova jẹ họ-ame evaọ ukpe 1956 nọ mẹ jọ ikpe ikpe. Ọsẹgboni mẹ a you Jihova gaga, yọ oriruo rai o fiobọhọ kẹ omẹ gaga.

Nọ me no ekọleji nwrotọ no, iroro mẹ i te je kpohọ eware akpọ. Me je roro nọ mẹ tẹ ta nọ mẹ rẹ jọ ọkobaro, mẹ te sae kọ okọ nọ me ti ro wo ugho nọ mẹ rẹ rọ ruọ arupre kpohọ erẹwho efa ha. Whaọ oware nọ mẹ be gwọlọ anwọ emaha mẹ ze oye. Me te mu iruo họ ẹgwọlọ, a tẹ rehọ omẹ iruo evaọ oria jọ nọ me re jo kporo ile. Iruo na e were omẹ. Rekọ fikinọ mẹ jẹ hai ru iruo evaọ owọwọ, ewuhrẹ ọ tẹ jẹ hai vo omẹ ẹsibuobu, yọ me je lele ahwo nọ a be gọ Ọghẹnẹ hẹ nya usu. Udu u te je brukpe omẹ, fikiere mẹ tẹ siọ iruo na ba.

Mẹ kwa kpohọ ẹwho nọ a re se Oshawa evaọ Ontario. Obei mẹ jọ riẹ oniọvo jọ nọ a re se Ray Norman, te oniọvo-ọmọtẹ riẹ Lesli, gbe ekobaro efa. Aikpobi na a se omẹ gboma. Nọ mẹ te ruẹ epanọ eva e be were ae te fikinọ a se egagọ Jihova gboja, mẹ tẹ gwọlọ nọ me re ru epọvo na. A jẹ hae vuẹ omẹ nọ mẹ daoma mu ọkobaro họ. Me te gine muhọ evaọ Azie 1966. Eware e jẹ riẹ nya, yọ eva e jẹ were omẹ. Jihova o ru ikpeware buobu kẹ omẹ uwhremu na.

JIHOVA Ọ TẸ GWỌLỌ RỌ OWHẸ RU IRUO JỌ, DAOMA RU EI

Taure me te ti nwrotọ no ekọleji, me fili efọmo no vẹre inọ mẹ gwọlọ ru iruo evaọ Ebẹtẹle nọ ọ rrọ Toronto evaọ Canada. Nọ me ti mu ọkobaro oke-kpobi họ no, a te kere se omẹ nọ mẹ sai kpobọ Ebẹtẹle nyai ru iruo evaọ ikpe ene. Rekọ mẹ jẹ gwọlọ nya ha keme Sista Lesli ọ were omẹ gaga yọ me je roro nọ mẹ tẹ nyavrẹ no, mẹ avọ iẹe ma te gbẹ ruẹ ẹro viere he. Rekọ nọ mẹ lẹ kpahe ẹme na gaga no, mẹ tẹ nya. O da omẹ gaga inọ mẹ nyasiọ Lesli ba.

Oria nọ a rẹ jọ fọrọ eware evaọ Ebẹtẹle me je jo ru iruo. Uwhremu na mẹ tẹ jọ okere-obe evaọ etẹe. Oke yena yọ Lesli ọ rrọ ọkobaro obọdẹ no evaọ obọ Gatineau, evaọ Quebec. Mẹ jẹ hai roro kpahe epanọ eware e rrọ kẹe. Ẹsibuobu mẹ jẹ hai roro nọ mẹ riẹ, mẹ hae dhugbẹ siọ Ebẹtẹle ba ẹnyaze. Rekọ oware nọ me rẹro riẹ hẹ o tẹ via, yọ eva e were omẹ gaga. A zizie oniọvo-ọmọzae Lesli nọ a re se Ray ziọ Ebẹtẹle, mẹ avọ iẹe ma tẹ jọ uwou ọvo. O tẹ whae ze nọ mẹ rọ wariẹ kẹle Lesli vi epaọ ọsosuọ. Mẹ avọ iẹe ma tẹ ruọ orọo evaọ edẹ udhegbihrẹ Ava, 1971. Ẹdẹ yena mẹ rọ gba ikpe ene evaọ Ebẹtẹle.

Ukoko French a fi omẹ avọ aye mẹ họ evaọ obọ Quebec. Nọ ikpe jọ e vrẹ no, a tẹ rọ omẹ mu ọsẹro okogho. Ikpe udhegberee mẹ jọ oke yena. U gbe omẹ unu gaga. Me je rri nọ mẹ maha vi ohwo nọ ọ rẹ jọ ọsẹro okogho. Rekọ ẹme nọ obe Jerimaya 1:7, 8 o ta u fiobọhọ kẹ omẹ. Aye mẹ o wo asidẹnte gaga no, o tẹ whae ze nọ owezẹ o gbẹ rọ kaki su ei hi. Fikiere ma te je roro nọ, ‘Kọ ma te sai ru iruo ọsẹro okogho na?’ Rekọ aye mẹ ọ tẹ ta nọ me du daezọ họ, inọ, “Kọ Jihova ọ tẹ gwọlọ rọ omai ru iruo jọ, ma gbẹ daoma ru ei?” Ere me ro gine mu iruo ọsẹro okogho na họ, yọ ikpe ikpegbihrẹ me ru iruo na.

Iruo ukoko e jẹ hae jọ omẹ wo uvẹ keria kugbe aye mẹ ziezi hi. Rekọ oware nọ o via ẹdẹ jọ o lẹliẹ omẹ nwene obọ. Evaọ Ẹdọvo-Oka jọ, evaọ ohiohiẹ gaga, ohwo jọ o te kporo ẹthẹ mai. Me rovie ẹthẹ na, mẹ ruẹ ohwo ọvo ho. Rekọ mẹ tẹ ruẹ ekete nọ a fi ohọ họ, te ubi-ure, ichizi, ebrẹdi, enwaene, egalase gbe ẹwẹ-obe jọ nọ a kere fihọ nọ, “Rehọ aye ra kpohọ oria jọ nọ ọ foma re wha reakpọ kuoma.” A kere odẹ fihọ iẹe he. Mẹ tẹ vuẹ aye mẹ nọ mẹ be ruẹrẹ oma kpahe kẹ eme nọ me ti ru, inọ ma te sae nya ẹdẹ yena ha. Ọ rọwo, rekọ o dina kẹe uye. Mẹ tẹ keria be ruẹrẹ oma kpahe kẹ eme na. Rekọ mẹ tẹ nọ omamẹ nọ, ‘Kọ mẹ riẹ ru?’ Mẹ tẹ kareghẹhọ ẹme nọ ọ rrọ obe Ahwo Ẹfisọs 5:25, 28. Nọ me roro kpahe ẹme na, mẹ tẹ ruẹ nọ Jihova ọ be jọ etẹe vuẹ omẹ nọ jomẹ daoma ru oware nọ o rẹ lẹliẹ eva were aye mẹ. Mẹ tẹ lẹ, mẹ tẹ ta kẹ aye mẹ nọ, “Ma nya.” Eva e tẹ were iẹe gaga. Oria kpobi o jọ sasasa ẹdẹ yena. Ma tẹ ruọ omoto, ma tẹ dhẹ kpohọ emamọ oria jọ nọ ọ foma evaọ akotọ ethẹ. Ma tẹ rriẹ ohọ fihotọ, ma tẹ keria. Eva e were omai gaga. Rekọ o whaha omẹ ẹme mẹ nọ mẹ rẹ ruẹrẹ oma kpahe kẹ hẹ.

Nọ mẹ jọ ọsẹro okogho na, ma jẹ hai rri ikoko buobu, no obọ British Columbia rite Newfoundland, yọ eva e jẹ were omai. Ma jẹ hai no eria ruọ eria. Nwanọ oware nọ mẹ jẹ gwọlọ evaọ oke emaha mẹ na oye. Mẹ jẹ hae gwọlọ nọ me re kpohọ Isukulu Giliad, rekọ mẹ gwọlọ jọ imishọnare evaọ orẹwho ọfa ha. Mẹ jẹ hai rri imishọnare fihọ ahwo ologbo jọ, yọ mẹ jẹ hai rri omamẹ inọ me te ohwo otiọye he. Ere ọvo ho, ozọ u je mu omẹ inọ mẹ tẹ rrọ imishọnare, a sai vi omẹ kpobọ Africa. Oke yena eyao jọ e jọ obei, yọ a je fi ẹmo re. Oria nọ mẹ jọ na o were omẹ.

UKOKO U VI OMAI KPOBỌ ESTONIA GBE ERẸWHO EFA

Evaọ ukpe 1992, nọ erẹwho Soviet Union e hẹriẹ no, a te ti mu iruo Uvie na họ ziezi evaọ erẹwho yena. Orẹwho otiọye jọ họ Estonia. Ukoko o tẹ vuẹ omai sọ ma sai kpohọ obei re ma jọ imishọnare. Akpọ o gbe omai unu. Ma tẹ lẹ kpahe ẹme na. Ma tẹ wariẹ nọ omamai onọ ẹdẹ na inọ, ‘Jihova ọ tẹ gwọlọ rọ omai ru iruo jọ, kọ ma gbẹ daoma ru ei?’ Ma tẹ rọwo nọ ma te nya. Mẹ tẹ ta nọ, ‘Nọ orọnọ obọ Africa ha na, ma nya.’

Ma tẹ nwani mu ẹvẹrẹ Estonian họ ewuhrẹ. Nọ emerae jọ e te vrẹ no, ukoko o tẹ vuẹ omẹ nọ mẹ jọ ọsẹro okogho. Yọ ikoko udhuvẹ-gbezeza mẹ te hai rri gbe itu jọ evaọ Estonia, Latvia, Lithuania gbe ẹwho nọ a re se Kaliningrad evaọ obọ Russia. Fikiere ma te mu ẹvẹrẹ Latvian, Lithuanian, gbe Russian họ ewuhrẹ. O nwane lọhọ tere he. Rekọ inievo na a fiobọhọ kẹ omai keme a ruẹ nọ ma be daoma wuhrẹ ẹvẹrẹ na. Evaọ 1999, a te fi uwou ogha họ Estonia. Ukoko o tẹ rọ omẹ mu re mẹ jọ ogbẹgwae uwou ogha na. Inievo efa nọ e jọ ogbẹgwae uwou ogha na họ, Brọda Toomas Edur, Lembit Reile, gbe Tommi Kauko.

Uwhremu na ma tẹ te riẹ inievo buobu nọ egọmeti ọ fa kpobọ Siberia oke jọ. Dede nọ a fi rai họ uwou-odi jẹ lahiẹ ae, a tẹ jẹ wha ae siọ ahwo uviuwou rai ba, a thihakọ yọ a jọ ọkọkora ha. A jẹ rọ ajọwha ta usi uwoma na. Emamọ oriruo rai o lẹliẹ omai ta nọ ma re thihakọ re nọ ebẹbẹ i te te omai, yọ ma re ru ọkọkora ha.

Iruo ukoko e jẹ hae jọ omai wo uvẹ tere he. Nọ oke o be nya na, aye mẹ Lesli o te wo oghẹrẹ ẹyao jọ nọ a re se fibromyalgia nọ o rẹ lẹliẹ oma rrọ ohwo gaga. Ma kake riẹ hẹ inọ o wo ẹyao na. Ma tẹ jẹ gwọlọ epa kpobi nọ ma re ro zihe kpobọ Canada. Ukoko u te zizie omai kpohọ isukulu rọkẹ inievo nọ e rrọ ogbẹgwae uwou ogha avọ eyae rai evaọ obọ Patterson, evaọ New York, obọ U.S.A. Ma je roro nọ ma te sae nya ha fiki oma riẹ na. Nọ ma lẹ kpahe iẹe gaga no, ma tẹ nya. Yọ Jihova o gine fiobọhọ kẹ omai keme nọ ma jọ obei na, a jẹ hae wọe kpobọ ọspito jẹ rẹrotei. Ma tẹ wariẹ mu iruo nọ ma je ru evaọ ukoko na họ.

A VI OMAI KPOBỌ AFRICA

Owọwọ ẹdẹ jọ evaọ 2008, a te se omẹ no obọ ehri ukoko ze. A tẹ nọ omẹ sọ ma sai kpobọ Congo. Oke yena ma gbẹ jọ obọ Estonia. Nọ me yo ẹme na, oma o lọhọ omẹ. A vuẹ omẹ nọ okiokiọ riẹ, mẹ rẹ rọ vuẹ ae sọ ma gwọlọ nya hayo ma gwọlọ nya ha. Mẹ kake vuẹ aye mẹ ẹme na ha, keme mẹ riẹ nọ mẹ tẹ vuẹe, owezẹ u ti gbe su ei aso ẹdẹ yena ha. Rekọ mẹ họ ohwo nọ ọ tubẹ wezẹ aso ẹdẹ yena ha keme mẹ jẹ lẹ ọvo, mẹ jẹ vuẹ Jihova oware nọ o be lẹliẹ ozọ obọ Africa mu omẹ.

Okiokiọ riẹ mẹ tẹ vuẹ aye mẹ ẹme na. Ma tẹ ta nọ, “Nọ orọnọ Jihova ọ gwọlọ nọ ma kpobọ Africa na, kọ ma gbe te obei tao ukpenọ ma rẹ nwane ta nọ ma sae jọ obei he?” Ere ma rọ ruọ arupre kpobọ Congo. Oke yena yọ ma rria Estonia te ikpe ikpegbezeza no. Whọ rẹ jọ uwou ogha nọ ọ rrọ Kinshasa evaọ Congo ruẹ ogege owowoma yọ oria kpobi o rrọ malẹ. Nọ a fi omai họ uwou nọ ma te jọ no, oware jọ nọ aye mẹ ọ kaki fihọ oria evaọ uwou na họ, ekade nọ a kere fihọ nọ, “Jọ eva e were owhẹ evaọ oria kpobi nọ whọ rrọ.” Anwẹnọ ma ro no obọ Canada ekade na ọ rọ riẹe obọ. Nọ ma ruẹ inievo na je mu ahwo Ebaibol họ ewuhrẹ no, iruo imishọnare na e tẹ jẹ lẹliẹ eva were omai gaga. Ukoko u vi omẹ nyai rri iwou ogha nọ e rrọ erẹwho ikpegbesa evaọ Africa. Ma jẹ hae ruẹ epanọ eware e rrọ evaọ erẹwho sa-sa gbe epanọ inievo na a be daoma te. Ozọ Africa u te no omẹ ẹro no. Me yere Jihova inọ o vi omẹ kpobọ Africa.

Inievo obọ Congo a jẹ hae re oghoghẹrẹ eware, te oghẹrẹ emera jọ. Me je roro nọ ma te sae re ae he. Rekọ nọ ma ruẹ nọ inievo na a be re ae yọ oma o be were ae, ma tẹ dawo ae, yọ e were omai unu.

Oke jọ o jariẹ nọ ahwo jọ nọ a jẹ wọso egọmeti a je ru ozighi evaọ ofẹ jọ orẹwho na. A jẹ nwa eyae gbe emaha na oma evaọ iwhre nọ a jẹ nya ro. Ma jẹ rehọ eware se inievo na jẹ tuduhọ ae awọ. Eware e jọ gaga kẹ inievo buobu. Ghele na, a tilẹmu egagọ Jihova, a you Jihova, u te je mu ai ẹro gaga inọ Jihova ọ te kpare ahwo rai nọ a whu no ze. O lẹliẹ omai jẹ nọ omamai sọ ẹrọwọ mai ọ ga te epanọ ma sai ro thihakọ ebẹbẹ itieye na, yọ oriruo rai o ginẹ lẹliẹ ẹrọwọ mai ga. A raha iwou inievo na jọ gbe idhu rai. O lẹliẹ omẹ ruẹ nọ eware akpọ yọ eware ifofe, inọ oware nọ o mai wuzou họ, re ohwo o wo usu okpekpe kugbe Jihova. Inievo na a jẹ hae nwani bruenu hu dede nọ eware e jọ gaga kẹ ae. Mẹ avọ aye mẹ ma tẹ ta nọ ma rẹ daoma thihakọ ebẹbẹ mai makọ ẹyao.

A VI OMAI KPOBỌ ASIA

Oware jọ o via nọ ma rẹro riẹ hẹ. Ukoko o ta nọ ma kpobọ uwou ogha Hong Kong evaọ obọ Asia. Ma roro ẹdẹvo inọ ma ti te obọ Asia ha. Rekọ ma riẹ nọ Jihova o fiobọhọ kẹ omai no evaọ eria kpobi nọ o vi omai nya, fikiere ma gwọlọ nọ ma rẹ nya dede nọ ma riẹ epanọ obei ọ te jọ họ. Ere ma rọ nyasiọ egbẹnyusu mai nọ e rrọ Africa ba evaọ 2013, ma jẹ viẹ dede. Oke yena yọ Africa ọ daruọ omai oma no.

Hong Kong ọ wọhọ obọ Africa nọ ma no ze he. O rovie aro gaga, yọ whọ rẹ jariẹ ruẹ ahwo buobu nọ a no eria avọ eria ze. A rẹ jọ obei ta ẹvẹrẹ Cantonese yọ ẹvẹrẹ na ọ ga wo umuo ho. Inievo na a dede omai rehọ whẹtiẹ whẹtiẹ. Ma te ti mu oghẹrẹ emu rai họ ẹre, yọ e were omai gaga. A te ti mu iruo efa nọ a je ru vẹre he họ eru evaọ uwou ogha nọ ọ jọ obei. Oke yena okolo ugho a rẹ rọ dẹ uwou ho. Fikiere Utu Ẹruorote na o tẹ dhugbẹ zẹ iwou buobu nọ e jọ uwou ogha na no re a rọ ugho riẹ ru oware ofa. U kri hi, evaọ 2015, ukoko u te vi omai kpobọ South Korea. Ẹvẹrẹ Korean nọ a rẹ jọ obei ta ọ ga wo umuo ho. Ma riẹ nọ u ti kri re ma tẹ te riẹ ẹvẹrẹ na. Rekọ eva e jẹ were omai inọ inievo obei a ruẹ nọ ma be riẹe ze ẹmẹrera jẹ be daoma rehọ iẹe lele ahwo ta ẹme.

ME WUHRẸ EWARE BUOBU NO

Eware nọ e via kẹ omẹ no e lẹliẹ omẹ ruẹ nọ re ohwo ọ sai mu usu kugbe inievo efa nọ o te te oria jọ obọ, o lọhọ họ. Rekọ nọ ma tẹ be hae nya kẹle inievo na, ma re gbe kri ohwohwo ẹriẹ hẹ. Mẹ tẹ jẹ ruẹ nọ u wo eware buobu nọ e lẹliẹ omai idibo Jihova kpobi rrọ oghẹrẹ ọvona dede nọ ma nwane rrọ epọvo na dẹẹ hẹ. Yọ fiki oghẹrẹ nọ Jihova ọ ma omai, ma sai mu usu kugbe inievo buobu nọ ma riẹ vẹre he.—2 Kọr. 6:11.

Me wuhrẹ re nọ mẹ rẹ daoma rri amọfa epanọ Jihova o bi rri rai. Yọ eware e tẹ make rrọ oghẹrẹ jọ, me re muẹrohọ eware nọ Jihova o bi ru nọ i dhesẹ nọ o you omẹ, mẹ vẹ jẹ daoma riẹ oware nọ ọ gwọlọ nọ me ru. Ẹsenọ ma tẹ rrọ ọkọkora hayo ma te bi roro nọ inievo na a bi se omai gboma tere he, ma re se eme uduotahawọ nọ egbẹnyusu mai a kere fihọ ekade gbe ileta se omai. Jihova o yo olẹ mai gaga no, o dhesẹ nọ o you omai gaga, yọ ọ kẹ omai ẹgba thihakọ ebẹbẹ je ru iruo riẹ.

Mẹ avọ aye mẹ Lesli ma ruẹ nọ u fo re ma hai ru uvẹ fihọ nọ ma rẹ rọ jọ kugbe o tẹ make rọnọ iruo ukoko e vọ omai obọ. Ma tẹ jẹ ruẹ nọ ẹme jọ ọ tẹ thọ omai unu evaọ ẹvẹrẹ nọ ma bi wuhrẹ, hayo nọ ma te ru oware jọ thọ, u fo re ma rehọ iẹe ru emiehwẹ ukpenọ ma rehọ iẹe mu ofu. Yọ kaso kaso, ma re roro kpahe oware jọ nọ Jihova o ru kẹ omai evaọ ẹdẹ yena je yere iei.

Uzẹme riẹ họ, mẹ jẹ hai roro nọ mẹ te sae jọ imishọnare hayo kpohọ erẹwho efa nyae rria ha. Rekọ Jihova o fiobọhọ kẹ omẹ ru eware nọ me je roro nọ mẹ te sai ru hu, yọ o lẹliẹ eva were omẹ. O rẹ lẹliẹ omẹ kareghẹhọ ẹme nọ Jerimaya ọruẹaro na ọ ta inọ: “Whọ viẹ omẹ họ no, O Jihova.” (Jeri. 20:7) Jihova o ru eware buobu nọ ma rẹro rai hi kẹ omai no, jẹ ghale omai gaga no. Yọ oware nọ mẹ jẹ hae gwọlọ nọ me ti ru nọ mẹ tẹ kpako no na, Jihova o ru nọ me ro ru ei. Ma ruọ arupre kpohọ erẹwho buobu no evaọ eria avọ eria akpọ na nyai rri iwou ogha. Me tube roro nọ me ti te eria itieye he. Aye mẹ o fiobọhọ kẹ omẹ gaga no, o re lele omẹ kpohọ oria kpobi nọ a vi omai nya.

Ẹsikpobi ma rẹ kareghẹhọ nọ Jihova ma bi ru iruo na kẹ yọ ma bi ru ei fikinọ ma you rie. Jihova ọ ghale omai gaga no evaọ iruo riẹ nọ ma bi ru na. Rekọ ma riẹ nọ eghale nọ ma ti wo evaọ obaro nọ ma te rria bẹdẹ bẹdẹ eye e te mae rro. Oke yena, Jihova o ti “rovie obọ” riẹ, o ve ti “ru ẹgwọlọ oware kpobi nọ o rrọ uzuazọ kẹe.”—Ol. 145:16.