Owuhrẹ Ologbo Oride Mai O Wuhrẹ Omai Eware Buobu No

ỌSẸGBONI MẸ A RỌ EGAGỌ JIHOVA ZAHARO HO

Ubrobọ ukpe 1958 ọsẹgboni mẹ a rọ kwa no Italy kpobọ Kindersley evaọ obọ Saskatchewan ọrọ Canada. Nọ a te obei no u gbe kri hi a te mu Jihova họ ẹgọ. Yọ ma se egagọ Jihova gboja gaga. Evaọ okenọ mẹ gbẹ jọ ọmaha, mai kpobi ma jẹ hai kpohọ usi uwoma no ohiohiẹ rite owọwọ. U tube te epanọ mẹ rẹ rọ ta emiehwẹ ẹsejọ inọ, anwọ okenọ mẹ rọ jọ ikpe eree me ro mu ọkobaro obufihọ họ.

Ọsẹgboni mẹ a wo ugho ho. Rekọ a gbẹ jẹ gọ Jihova ziezi ghele. A tubẹ zẹ eware jọ re a sae gọ Jihova. Evaọ ukpe 1963, ọsẹgboni mẹ a zẹ eware mai buobu re a sai kpohọ okokohọ akpọ-soso nọ a ru evaọ Pasadena, nọ ọ rrọ California, evaọ obọ U.S.A. Nọ ukpe 1972 u te, ma tẹ kwa kpohọ ẹwho nọ a re se Trail nọ ọ rrọ ofẹ nọ a re se British Columbia evaọ Canada. Ma kwa kpohọ obei re ma sae ta usi uwoma kẹ ahwo Italy buobu. Obei na u thabọ te ikilomita odu ọvo (1,000), koyehọ emaele egba ezeza gbe udhe (620). Iruo nọ a rẹ jọ rẹrote ighẹ gbe ifisi ọsẹ mẹ o je ru. U wo oke jọ nọ a jẹ gwọlọ nọ a rẹ kpare ọkwa riẹ kpehru. Rekọ ọsẹ mẹ ọ rọwo ho re ọ sai wo uvẹ gọ Jihova ziezi.

Eva e were omẹ nọ ọsẹgboni mẹ a ru eware nana kpobi re a sae gọ Jihova. Yọ te omẹ te inievo esa mẹ ma bi lele emamọ oriruo rai. Me wuhrẹ obọdẹ oware jọ mi ọsẹgboni mẹ nọ o rẹ thọrọ omẹ ẹro ho. Oye họ, mẹ tẹ rọ iruo Uvie na karo, Jihova ọ te rẹrote omẹ.—Mat. 6:33.

OKENỌ ME RO MU IRUO ODIBỌGBA OKE-KPOBI HỌ

Ukpe 1980 mẹ rọ rehọ aye owowoma mẹ na Debbie. Yọ oke yena, aye mẹ ọ ta nọ u wo iruo jọ nọ ọ gwọlọ nọ o re ru evaọ ukoko na. Mẹ avọ aye mẹ ma gwọlọ nọ iruo odibọgba oke-kpobi na ma re ru. Fikiere nọ mẹ te rehọ aye mẹ no, nọ emerae esa e jẹ vrẹ no, aye mẹ o te mu ọkobaro oke-kpobi họ. Nọ o gba ukpe ọvo no nọ mẹ rọ rehọ aye mẹ, mai imava ma tẹ kwa kpohọ oria nọ a jọ gwọlọ ahwo nọ a rẹ ta usi uwoma. Ahwo nọ a jọ ukoko nọ ma nya na a bu hu. Kọ ere me ro mu ọkobaro oke-kpobi họ re.

Rekọ fikinọ eware e gbẹ jẹ nya epanọ ma roro ho, ma tẹ ta nọ ma rẹ kwa kpohọ obọfa. Rekọ ma ta oware nọ ma gwọlọ ru na kẹ ọsẹro okogho mai. Ọ tẹ vuẹ omai ofẹ nọ ma bi jo ruthọ, rekọ orọnọ o zue ẹme na họ kẹ omai hi. Anọ: “Whai omarai wha be wha ojọ ze re. Eware nọ e be riẹ nya ha wha bi roro kpahe. Wha tẹ be daoma muẹrohọ sọ wha rẹ ruẹ eware iwoma nọ e be via, wha te ruẹ e rai.” Oware nọ u fo nọ ma re ru ọ ta na. (Ol. 141:5) Kọ ere ma ro ru oware nọ ọ vuẹ omai na. Nọ ma ru ei ma tẹ ruẹ nọ inievo nọ ma gbẹ rrọ ukoko na a be daoma gaga. U no rai eva ze nọ a re ru iruo kẹ Jihova. Yọ emaha na omarai re, epọvo na. Enọ ọzae hayo aye rai a rrọ ukoko na ha a be daoma gaga re. Ẹme nọ oniọvo na ọ vuẹ omai na u fiobọhọ kẹ omai gaga. Kọ eware iwoma nọ inievo na a bi ru ma je roro kpahe. Ma tẹ nyasiọ eware nọ e be riẹ nya tere he ba kẹ Jihova re ọ kpọ ae họ. (Mae. 7:7) Oware yena nọ ma ru na u te ru nọ eva i ro mu omai họ ẹwere.

Uwhremu na ma te kpohọ isukulu ekobaro. Yọ orọ ọsosuọ nọ ma ro kpohọ isukulu na oye. Inievo nọ i je wuhrẹ omai evaọ isukulu na a ru iruo ukoko na no evaọ erẹwho efa. Fikiere nọ ma jọ isukulu na, a dhesẹ iwoho rai kẹ omai. Yọ a vuẹ omai ebẹbẹ jọ nọ i te rai evaọ obei gbe epanọ Jihova ọ rọ ghale ae. Iku na e were omai gaga te epanọ ma rọ ta nọ ma re ru iruo imishọnare.

Nọ u te ukpe 1984, mẹ avọ aye mẹ ma tẹ kwa kpobọ Quebec. Ẹvẹrẹ French a rẹ jọ obei ta. Oria nọ ma kwa nya na o rọ ikilomita idu ene (4000) koyehọ emaele idu ivẹ gbe egba ene gbe udhone-gbisoi (2,485) thabọ no British Columbia. Uruemu ẹwho yena avọ obonọ ma no ze epọvo na ha. Yọ orọnọ ẹvẹrẹ nọ a rẹ jọ obei ta ma rẹ ta ha. Fikiere o gwọlọ nọ ma re nwene. Yọ mai tubẹ rro na, ugho o nwane jọ omai obọ tere he. U wo okejọ nọ mẹ avọ aye mẹ ma jẹ hai si isogẹ. Iduku nọ ahwo a vu seba, nọ a kpairoro vrẹ no ma je vu kpozi. Nọ aye mẹ o je there iduku na no, ma vẹ re. Aye mẹ ọ riẹ oghẹrẹ nọ a rẹ rọ iduku there oghoghẹrẹ emu nọ ma rẹ re. Eware e make ga na, eva e jẹ were omai keme Jihova ọ jẹ rẹrote omai.—Ol. 64:10.

Epanọ ma rọ rrọ omomai ẹdẹ jọ na, ohwo jọ o te se omai evaọ ifonu. Ma rẹro use na ha. Ohwo na ọ tẹ vuẹ omai inọ a zizie omai no re ma kpohọ Ebẹtẹle evaọ obọ Canada. Yọ re a te ti se omai use yena, ma fili efọmo Isukulu Giliad. Eva e were omai inọ a se omai kpohọ Ebẹtẹle, rekọ o dina kẹ omai uye fikinọ Isukulu Giliad ma gwọlọ nya. Nọ ma te obọ Ebẹtẹle no, ma tẹ nọ Brọda Kenneth Little nọ ọ rrọ omọvo Ogbẹgwae Uwou Ogha na inọ: “Kọ eme ma ti ru nọ a te se omai nọ ma kpohọ Isukulu Giliad? Keme ma fili efọmo yena no re.” Ọ tẹ ta kẹ omai nọ: “Wha ruawa ha ma ti te etẹe na.”

Nọ oka ọvo o vrẹ no, ma te gine te etẹe na nwane wọhọ epanọ oniọvo na ọ vuẹ omai na, keme a zizie omẹ avọ aye mẹ kẹ Isukulu Giliad. Whaọ obọnana eware ivẹ e rrọ otọ kẹ omai na, sọ ma rẹ jọ Ebẹtẹle hayo ma re kpohọ Isukulu Giliad. Yọ ọvuọvo ma rẹ rehọ. Brọda Little ọ tẹ vuẹ omai nọ: “Ọnọ wha rehọ kpobi u woma. Ọnọ wha rehọ kpobi kẹhẹ, ẹmẹsejọ wha ti roro nọ ọnọ o kiọkọ na wha hae te rehọ. Jihova ọ rẹ ghale ohwo evaọ ivẹ na.” Ma tẹ tubẹ ta nọ Isukulu Giliad ma rẹ nya. Anwọ oke yena ze, ma ruẹ nọ ẹme Brọda Little na uzẹme. Ẹme riẹ na ọ were omai gaga. U te epanọ ma rẹ rọ vuẹ inievo efa ẹme na re otẹrọnọ a kẹ oniọvo jọ iruo ivẹ ẹsiẹvo nọ o jọ gwọlọ ọ rẹ salọ ọvo.

OKENỌ MA JỌ IMISHỌNARE

Eva e were omai gaga inọ a zizie omai kpohọ Isukulu Giliad. Oyena o jọ eklase avọ udhone-gbesa (83), yọ mai ahwo udhegbene (24) ma jọ eklase na. Evaọ obọ Brooklyn orọ New York ma jo kpohọ isukulu na, evaọ amara Ane ukpe 1987. Ahwo nọ a je wuhrẹ omai evaọ isukulu na họ Brọda Ulysses Glass avọ Jack Redford. Emerae isoi nọ ma jọ isukulu na e dhẹ vẹrẹ gaga. Ma nwrotọ evaọ edẹ ezeza amara Azie, ukpe 1987. Ukoko u te vi omẹ avọ aye mẹ gbe John Goode avọ aye riẹ Marie kpobọ Haiti.

No anwọ 1962 ze a ri vi ohwo ọvo nọ o nwrotọ no isukulu Giliad kpobọ Haiti nyai ru iruo imishọnare he. Ukpe yena a ro le imishọnare nọ i kiọkọ no orẹwho na. Nọ ma nwrotọ no isukulu na no, nọ eka ivẹ e jẹ vrẹ no, ma jẹ ruẹ omamai kọ obọ Haiti. Ahwo a bu ukoko nọ ma jọ evaọ obei na ha. Iwhowho-uvie ọgbagbisoi (35) e jọ ukoko na. Obeva obojọ kokodo nọ igbehru e vọ ma jọ jẹ ta usi uwoma. Yọ mai nọ ma nya na ma gbẹ jọ izoge. Yọ ma re nwane riẹ iruo na ziezi hi. Mai ọvo ma jọ imishọnare evaọ obei. Ahwo nọ a jọ obei iyogbe. Yọ ejọ buobu a riẹ epanọ a re se obe he. A jọ ẹwho nọ ma jọ na je ru ozighi fiki ẹme esuo. Ahwo jọ a jẹ gwọlọ mi egọmeti esuo no. Yọ a jẹ mahe eware evaọ edhere. Ofou ọgaga ọ jẹ raha eware re.

Nọ eware nana kpobi e make jẹ via na, eva e jẹ were inievo na gaga. Yọ ma rọ aro kele inievo na. Eware e lọhọ kẹ inievo jọ buobu hu. Rekọ ghele na a be gọ Jihova keme a you rie. Yọ a gbẹ jẹ ta usi uwoma na. U wo oniọvo-ọmọtẹ jọ nọ ọ kpako no nọ ọ riẹ obe ese he. Ghele na, eria Ebaibol nọ ọ riẹ uzuzou i bu te enwenọ udhuhrẹ-gbikpe (150) soso. Eware okpẹtu nọ e jẹ via evaọ ẹwho na i ru nọ ma jẹ rọ gwọlọ nọ ma rẹ gbẹ ta usi uwoma kẹ ahwo inọ Uvie Ọghẹnẹ ọvo u ti ku ebẹbẹ ahwo-akpọ họ. A rẹ ruẹ unu gbiku eva nọ e were omai hi nọ ma ruẹ ahwo nọ ma kaki je wuhrẹ obe nọ a be daoma gaga evaọ ukoko na. Ejọ i zihe ruọ ekobaro oke-kpobi gbe ọkobaro obọdẹ. Efa kọ ekpako ukoko.

Nọ ma jọ obọ Haiti na, mẹ nya ku ọmọzae jọ. Odẹ riẹ Trevọr. Imishọnare ichọche ọ jọ. Yọ mai imava ma ta ẹme kpahe Ebaibol kerọ ibrẹse. Nọ ikpe jọ e te vrẹ no, ohwo jọ o te kere ileta se omẹ. Ma je rovie iei hi kọ ọye. Ọ ta nọ: “Mẹ te họ-ame evaọ okokohọ nọ ma te nya na! Yọ nọ mẹ tẹ họ-ame no, obọ Haiti nọ mẹ jọ je ru imishọnare ichọche na me ti zihe nya re mẹ jọ obei ru ọkobaro obọdẹ.” Yọ avọ aye riẹ a jọ obei ru ọkobaro obọdẹ na ikpe buobu.

A DHE OMAI KPOBỌ EUROPE, UWHREMU NA KỌ OBỌ AFRICA

A rọwo nọ Isẹri Jihova a ta usi uwoma hayo ru eware efa evaọ ukoko na ha evaọ ofẹ jọ Europe. Rekọ ẹmẹrera na a tẹ te kuvẹ. Ukpe 1992 ma ro te obei. Ẹwho nọ a re se Ljubljana evaọ Slovenia ma jọ. Ọ kẹle oria nọ ọsẹgboni mẹ a jọ okenọ a jọ emaha taure a te ti kpobọ Italy. Oke yena yọ a gbe je fi ẹmo evaọ ewho nọ e jọ unuakpọ nọ a je se Yugoslavia vẹre. Uwou ogha nọ o jọ Vienna evaọ Austria, uwou ogha nọ o jọ Zagreb evaọ Croatia, gbe ọnọ ọ jọ Belgrade evaọ Serbia, ae a jẹ rẹrote iruo usi uwoma na evaọ unuakpọ yena soso. Rekọ nọ oke o be nya na, ukoko o tẹ ta nọ jọ orẹwho kpobi nọ o rrọ unuakpọ yena u wo ọvuọ uwou ogha riẹ.

Nọ ukoko o ta ere na, koyehọ ma rẹ daoma wuhrẹ ẹvẹrẹ ọfa, jẹ daoma wuhrẹ oghẹrẹ nọ ahwo a re ru eware evaọ obonọ a vi omai nya na. Ahwo ẹwho na a jẹ hae ta nọ “Jezik je težek.” Otọ riẹ họ, “Ẹvẹrẹ na ọ rrọ gaga.” Yọ ginọ uzẹme, re whọ riẹ ẹvẹrẹ na, ọmọziọ iruo ho. Oma inievo na o jẹ were omai gaga. Keme nọ ukoko o tẹ nwane ta ọvo nọ a siọ oware jọ ba, a se riẹ ba no. Yọ Jihova ọ jẹ ghale ae. Ma ruẹ epanọ Jihova ọ jẹ rọ kpọ eware vi evaọ oke nọ u fo. Nọ ma rri oghẹrẹ nọ Jihova ọ jẹ rọ kpọ ukoko na, ma ruẹ nọ o gine you omai gaga. Evaọ ikpe nọ ma rọ jọ Slovenia na, ma ruẹ nọ eware nọ ukoko na u wuhrẹ omai no vẹre no na i wuzou gaga. Keme eye i fiobọhọ kẹ omai thihakọ ebẹbẹ nọ i te omai. Yọ ma wuhrẹ eware efa evaọ obei re.

Nọ u te ukpe 2000, a te vi omai kpohọ orẹwho jọ evaọ obọ West Africa nọ a re se Côte d’Ivoire. Evaọ Akpegbọvo 2002, a te je fi ẹmo evaọ orẹwho na. Ere ma rọ dhẹ ohrẹ ẹmo kpobọ Sierra Leone. Yọ ẹmo nọ a jọ Sierra Leone je fi o nwani kuhọ obọ. Ikpe ikpegbọvo (11) soso a fi ẹmo na. Re ma dhẹ no Côte d’Ivoire o jọ kekeke. Ovovẹrẹ ma rọ dhẹ, ma sae ruẹrẹ oma kpahe he fiki oghẹrẹ nọ ẹmo na o ro du lahwe. Rekọ eware nọ ma wuhrẹ no i fiobọhọ kẹ omai jẹ gọ Jihova vrẹ avọ evawere.

Evaọ obei, ahwo a jariẹ nọ a gwọlọ nọ ma wuhrẹ ae obe. Fikiere ahwo yena ma tẹrovi. Evaọ oke yena nọ ẹmo ọ rọ jọ otọ na, inievo na a thihakọ gaga. Yọ eva rai e jẹ were omai gaga. Inievo na a wo ugho ho, rekọ a rẹ jọ umutho oware nọ a wo na kẹ amọfa. U wo ẹdẹjọ dede nọ oniọvo-ọmọtẹ jọ o rọ rehọ iwu se aye mẹ Debbie. Aye mẹ ọ jẹ rọwo nọ ọ rẹ rehọ iwu na ha. Rekọ oniọvo na ọ ta nọ: “Nọ a je fi ẹmo na, inievo efa i fiobọhọ kẹ omai. Whaọ obọnana u te okenọ ma re ro fiobọhọ kẹ amọfa no.” Inievo na a jẹ daoma gaga. Yọ ma jẹ rọ aro kele ae ru epọvo na re.

Uwhremu na ma te zihe ziọ Côte d’Ivoire. Rekọ epanọ ma rọ rrọ obei na, ẹsiẹvo na ozighi o te je du lahwe. Kọ ere a rọ rehọ arupre wọ omai vrẹ evaọ Akpegbọvo 2004. Rekọ fiki ugidi na, emekpa jọ nọ ma fi emeware jọ họ ma wha lele oma. Nọ ma te obei, otọ ma kiẹzẹ. Oria nọ ma kiẹzẹ na yọ oria nọ isoja ahwo French a jọ ẹdẹ yena. Nọ oke o jẹ ke no, a tẹ wariẹ wọ omai kpobọ Switzerland. Udevie aso ma ro te uwou ogha nọ o jọ obei. Ghele na, Inievo nọ e rrọ Ogbẹgwae Uwou Ogha avọ eyae rai gbe Inievo nọ a re wuhrẹ ahwo evaọ Isukulu Ewuhrẹ Odibọgba avọ eyae rai a dede omai rehọ ziezi. A kẹ omai emu ọrrorro nọ ma re. A tẹ jẹ kẹ omai oware jọ nọ a rehọ iti ru buobu. Inievo na a daoma kẹhẹ.

A te ti vi omai kpobọ Ghana nọ ma jọ obei tao. Nọ obọ Côte d’Ivoire o ti dhẹ no, a tẹ ta nọ ma zihe. Evaọ oke ozighi na, inievo na a ru eware nọ i dhesẹ nọ a you omai. Yọ oye u ru nọ ẹdhẹdhẹ gbe ẹkwẹkwa na ọ gbẹ yawo omai oma ga hrọ họ. Mẹ avọ aye mẹ ma riẹ nọ evaọ ukoko Jihova ọvo whọ rẹ jọ ruẹ uyoyou utionana. Ma rọ uyoyou na zaro vievie he. Ebẹbẹ i te omai, rekọ ma rehọ e rai wọhọ ẹsenọ a be rehọ ebẹbẹ na wuhrẹ omai eware ekpokpọ. Yọ ma gine wuhrẹ eware ekpokpọ.

OKENỌ MA KPOBỌ MIDDLE EAST

Nọ ukpe 2006 u te, a te kere ileta no obọ Ehri Ukoko se omai. Anọ a kẹ omai iruo efa no, inọ obọ Middle East ma te nya. Eva e were omai gaga. Rekọ ma riẹ nọ o te lọhọ kẹ omai tere he nọ ma te te obei no, keme eware ekpokpọ ma ti wuhrẹ na. Ma ti wuhrẹ oghẹrẹ nọ a re ru eware evaọ ẹwho na gbe oghẹrẹ nọ a rẹ ta ẹvẹrẹ rai. Yọ ebẹbẹ efa i ti te omai re. Ahwo nọ a bi su gbe egagọ a wha ebẹbẹ jọ ze no vẹre nọ e rrọ otọ. Nọ ma nya, eva e were omai gaga ghele, keme dede nọ inievo na kpobi a rrọ ahwo ẹvẹrẹ ọvo ho, udhedhẹ gbe okugbe ọ jọ udevie rai fikinọ a je ru oware nọ ukoko Ọghẹnẹ o ta. Eva inievo na e were omai gaga keme a thihakọ ikpokpoma buobu no. Ahwo uviuwou rai, emọ isukulu rai, ahwo nọ a gbe bi ru iruo, gbe ahwo nọ a gbẹ be rria ighẹ a kpokpo i rai gaga no.

Ma kpohọ okokohọ ologbo obọdẹ jọ evaọ ukpe 2012 evaọ obọ Tel Aviv evaọ Israel. Yọ onana họ orọ ọsosuọ nọ inievo nọ e rrọ ofẹ yena a ro kokohọ ere. Ahwo nọ a jọ okokohọ na a bu gaga. Anwọ Pẹntikọst 33 C.E. ze, ahwo a ri kokohọ bu te ere ẹdẹvo evaọ obei he. Okokohọ yena o rẹ thọrọ omai ẹro ho.

Orẹwho jọ nọ a jọ kuvẹ nọ a ta usi uwoma ha, a vi omai nya. Nọ ma nya, ma wha ebe mai jọ lele oma re ma sae rọ ta usi uwoma. Yọ ma jọ obei kpohọ ikokohọ esese. Isoja i je dikihẹ edhere re a rri sọ ahwo a wha ikpehre eware. Rekọ ozọ u je mu omai hi keme mai avọ umutho inievo nọ e jọ obei, ma jẹ rọ areghẹ nya evaọ ẹwho na fiki ozighi nọ ọ jọ otọ.

MA ZIHE KPOBỌ AFRICA

Nọ ukpe 2013 u te, a tẹ vuẹ omai nọ ma kpohọ uwou ogha nọ o rrọ Kinshasa evaọ Congo. Ẹwho na ọ rro gaga. Yọ fiki ire gbe eware efa nọ Jihova ọ ma nọ e rrọ ẹwho na, ọ jọ wowoma. Rekọ a yogbe gaga, yọ a jẹ jọ obei fi ẹmo gaga. O tẹ whae ze nọ eware buobu nọ a wo e rọ raha no. Nọ a ta nọ obei ma te nya, ma tẹ ta nọ: “O! Ma riẹ Africa, ma be nya.” Rekọ ma riẹ nọ ma ti thihakọ eware buobu evaọ obei keme eria jọ i wo emamọ idhere he, yọ a wo ikpẹ ẹlẹtriki, gbe emamọ ame he. Rekọ nọ ma te obei, ma ruẹ eware nọ i ru eva were omai. Kọ eyena ma je rri, ma gbẹ jẹ daezọ enọ i woma ha na ha. Ma ruẹ epanọ inievo na a be daoma te. Eva e jẹ were ae dede nọ eware e jọ gaga. A rọ usi uwoma na zaharo ho. Nọ eware e make ga na a rẹ daoma kpohọ ewuhrẹ gbe ikokohọ. Ma ruẹ epanọ Jihova o bi ro fiobọhọ re iruo Uvie na e sae nyaharo evaọ obei. Jihova ọ be ghale inievo na gaga. Evaọ ikpe nọ ma rọ jọ obọ Congo na, eva e were omai gaga. Yọ ma wo egbẹnyusu buobu, nọ whọ tẹ ruẹ omai who re roro nọ uwou ovona ma no ze.

Ubrobọ ekuhọ ukpe 2017, a tẹ kẹ omai iruo efa. Anọ obọ South Africa ma te nya. Uwou ogha obei o rro wo umuo ho. Evaọ usu iwou ogha nọ ma jo ru iruo no na, ọye ọ mae rro. Nọ ma te obei, iruo nọ ma ri ru ẹdẹvo ho a kẹ omai. Eware efa ma te wariẹ wuhrẹ na. Rekọ eware nọ ma wuhrẹ no vẹre i fiobọhọ kẹ omai re. Oware jọ nọ o were omai gaga họ, oghẹrẹ nọ inievo na a bi ro thihakọ anwọ ikpe buobu ze na. Yọ eva e were omai gaga inọ inievo nọ e rrọ uwou ogha na ru iruo a bi ru iruo kugbe dhedhẹ. Nọ o make rọnọ oria ovo a no ze he, yọ ovioma ovo a wo ho na, udhedhẹ o rrọ udevie rai. Yọ ma riẹ nọ obọ Jihova o riẹ. Inievo na a be daoma re a wo uruemu okpokpọ nọ Ebaibol ọ ta ẹme te na.

Evaọ ikpe yena kpobi nọ ma bi ro ru iruo na, eria nọ a vi omẹ avọ aye mẹ Debbie nya no i bu no. Ma ru oghoghẹrẹ iruo no. Ma ruẹ re nọ, duọ ẹwho duọ ọvuọ uruemu riẹ. Yọ ma wuhrẹ evẹrẹ jọ nọ ma riẹ vẹre he. Nọ ma je ru iruo na, orọnikọ oke kpobi eware e jẹ riẹ nya ha. Rekọ Jihova o ru eware nọ i dhesẹ nọ ọ rrọ kugbe omai. Keme ọ jẹ rọ ukoko riẹ gbe inievo na fiobọhọ kẹ omai. Jihova o gine you omai! (Ol. 144:2) Ma wuhrẹ eware buobu no evaọ iruo na nọ ma bi ru na. Yọ eware yena i bi fiobọhọ kẹ omai gọ Jihova ziezi.

Eva e were omẹ gaga inọ ọsẹgboni mẹ a kpọ ovao mẹ rri egagọ Jihova. Fikiere mẹ rọ ọsẹgboni mẹ zaharo ho. Makọ atibọlọkọ mẹ na Debbie, mẹ rehọ e riẹ zaharo gbe he, keme ọ daoma kẹ omẹ gaga. Yọ iriruo inievo mai nọ e rrọ akpọ na soso i fiobọhọ kẹ omai re. Eware nọ ma wuhrẹ no na i ri te he. Ma gba riẹ mu no nọ ma re gbe wuhrẹ eware buobu mi Owuhrẹ Ologbo Oride mai na, Jihova.