Daoma Wuhrẹ Oware Kpobi nọ O Sai Fiobọhọ kẹ Owhẹ

Ẹsejọ nọ ma tẹ gwọlọ wuhrẹ Ẹme Ọghẹnẹ, ma rẹ nwane riẹ nọ oware utiona gbe utiona me ti wuhrẹ no etenẹ na ze. Rekọ joma rri otọ mu re ma gbe gbolaro kẹ eware efa nọ Jihova ọ be jọ etẹe na wuhrẹ omai hi. Kọ eme ma re ru re ma sai wuhrẹ eware efa no oria nọ ma bi se ze?

Lẹ re Ọghẹnẹ ọ kẹ owhẹ areghẹ. Lẹ se Jihova inọ jọ o fiobọhọ kẹ owhẹ wuhrẹ oware jọ nọ ọ gwọlọ inọ whọ riẹ okioke yena. (Jem. 1:5) Who du roro nọ oware nọ whọ jọ oria nọ who bi se na wuhrẹ no anwẹdẹ na ọvo whọ sae jariẹ wuhrẹ hẹ.—Itẹ 3:5, 6.

Kẹ Ẹme Ọghẹnẹ uvẹ re ọ jọ omara ru iruo. “Ẹme Ọghẹnẹ ọ rrọ uzuazọ.” (Hib. 4:12) Fikinọ “ẹme” Ọghẹnẹ ọ rrọ uzuazọ, ẹsejọ o rẹ rọ oghẹrẹ jọ te omai udu nọ ma te wuhrẹ iẹe nẹnẹ. Ẹsejọ oghẹrẹ nọ u ti ro te omai udu odẹnotha sa. Re o sai te omai udu ziezi, ma rẹ gbaemu nọ ma gwọlọ wuhrẹ eware efa noi ze.

Jọ eware kpobi nọ Jihova o bi wuhrẹ owhẹ e were owhẹ. Ma te bi wuhrẹ Ẹme Ọghẹnẹ, o wọhọ ẹsenọ ma rrọ “ehaa emuọriọ nọ a jọ there obọdẹ emu.” (Aiz. 25:6) Ma du ta ha inọ ọyena ọ te were omẹ hẹ, fikiere mẹ be re iẹe he. Nọ ma gbẹ jẹ ejọ siọ ejọ ba ha, aikpobi e te kẹ omai erere, yọ eware nọ Ọghẹnẹ o bi wuhrẹ omai e te were omai gaga.