Lele Oriruo Ivie Na
“O ve ti kere izi nana họ obe kẹ oma riẹ, . . . o rẹ jọ obọ riẹ, nọ o re se eva edẹ uzuazọ riẹ kpobi.”—IZIEWARIẸ 17:18, 19.
1. Amono Oleleikristi ọ rẹ gwọlọ jọ wọhọ?
ẸSEJỌHỌ whọ sae rọ oma ra dhe ovie hayo ovie-aye he. Oleleikristi ẹrọwọ hayo ọmọ-uwuhrẹ Ebaibol vẹ o re rri oma riẹ wọhọ nnọ o wo udu-esuo ovie, wọhọ Devidi, Josaya, Hẹzikaya, hayo Jehoshafat Ivie iwoma na? Ghele na, u re woma re whọ jọ wọhọ ahwo nana evaọ edhere obọdẹ jọ. Didi edhere? Kọ fikieme u je fo re whọ gwọlọ jọ wọhọ e rai evaọ edhere ọyena?
2, 3. Didi aro Jihova ọ ruẹ kpahe ovie ohwo-akpọ, kọ eme ovie otiọye na o re ru?
2 Evaọ edẹ Mosis, oke krẹkri taure Ọghẹnẹ ọ tẹ te kuvẹ nnọ ovie ohwo-akpọ o su emọ Izrẹl, Ọ ruẹaro nnọ isiuru re a wo ovie e te roma lahwe evaọ udevie ahwo Riẹ. Fikiere, ọ kẹ Mosis ẹgba re o fi ithubro nọ i kie kpahe abọ nana ba ọvọ Uzi na. Enana yọ ithubro hayo ekpọvio kẹ ovie.
3 Ọghẹnẹ ọ ta nọ: “Okenọ owha te otọ nọ ỌNOWO na Ọghẹnẹ rai ọ rọ kẹ owhai na no, . . . whọ te ta nọ, ‘Mẹ rẹ rehọ Ovie mu kẹ oma mẹ, wọhọ epaọ erẹwho nọ e wariẹ omẹ họ’; wha rehọ ovie ro mu eva udevie rai, ọnọ ỌNOWO na Ọghẹnẹ rai ọ sanọe. . . . Okenọ ọ keria agbara-uvie riẹ no, o ve ti kere izi nana họ obe kẹ oma riẹ, . . . o rẹ jọ obọ riẹ, nọ o re se eva edẹ uzuazọ riẹ kpobi, re o wuhrẹ epanọ ọ rẹ rọ dhẹ ozọ ỌNOWO na Ọghẹnẹ riẹ, re o koko eme uzi onana gbe ijaje enana, o ve ru ai.”—Iziewariẹ 17:14-19.
4. Eme ọ jọ abọjọ ọkpọvio Ọghẹnẹ kẹ ivie na?
4 Ẹhẹ, ovie nọ Jihova ọ te salọ kẹ egegagọ riẹ ọ rẹ rọ obọ riẹ kere eme jọ nọ whọ sae jọ Ebaibol ra ruẹ na fihọ obe kẹ omariẹ. Ovie na o ve se obe nọ o kere na kẹdẹ kẹdẹ, ẹsikpobi. Oyena o jọ oware nọ u re fiobọhọ kareghẹhọ ohwo eme ọvo ho. O jọ ewuhrẹ, yọ u wo erere riẹ. Ovie nọ o re wo ọjẹrehọ Jihova o re ru ewuhrẹ otiọye na re o wo jẹ yọrọ emamọ udu. O tẹ jẹ gwọlọ re o wuhrẹ ikere efuafo eyena re ọ ruẹse jọ ovie obokparọ, ọnọ o wo orimuo.—2 Ivie 22:8-13; Itẹ 1:1-4.
Wuhrẹ Wọhọ Ovie
5. Abọ Ebaibol na vẹ e jariẹ nọ Devidi Ovie na o kere rehọ je se kẹ oma riẹ, kọ ẹvẹ enana e jariẹ oma?
5 Eme who roro nọ a gwọlọ mi Devidi evaọ okenọ o zihe ruọ ovie Izrẹl? O gwọlọ nọ ọ rẹ rehọ obọ riẹ kere ebe isoi ọsosuọ Ebaibol na fihọ obe kẹ oma riẹ (Emuhọ, Ọnyano, Iruo-Izerẹ, Ikelakele, Iziewariẹ). Dai roro epanọ eme na e rẹ nyate iroro gbe udu Devidi te nọ ọ be rehọ ibiaro gbe abọ riẹ ro kere Uzi na fihọ obe na. O wọhọ nọ Mosis họ ọnọ o kere obe Job gbe Olezi avọ 90 gbe 91 na re. Kọ Devidi ọ wariẹ kere enana kẹ oma riẹ re? Ẹsejọhọ o ru ere. Ofariẹ, ẹsejọhọ o wo obe Joshua, Ibruoziẹ, gbe Rut. Fikiere whọ sae ruẹ nọ Devidi Ovie na o wo abọ buobu ọrọ Ebaibol na nọ o re se je roro kpahe. Yọ o sai mu owhẹ ẹro nnọ o ghine ru ere, nọ who te rri eme nọ ọ ta kpahe Uzi Ọghẹnẹ, enọ e rrọ Olezi 19:7-11 na.
6. Ẹvẹ o sai ro mu omai ẹro nnọ Jesu, wọhọ Devidi ọsẹ-ode riẹ, o wo isiuru kpahe Ikereakere na?
6 Devidi Ologbo na—Jesu, Ọmọ Devidi—o lele uruemu ovona. O jọ uruemu Jesu re o kpohọ uwou-egagọ ẹwho na k’oka k’oka. Evaọ etẹe ọ jẹ hae gaviezọ nọ a bi se jẹ t’ẹme kpahe Ikereakere na. U te no ere no dede, okejọ o jariẹ nọ Jesu ọ rọ jọ ẹgbede se no Ẹme Ọghẹnẹ ze jẹ f’otọ ikere na. (Luk 4:16-21) Whọ sae ruẹ nọ ọ riẹ Ikereakere na fiotọ. Dai se ikuigbe Usiuwoma na, re who muẹrohọ unuẹse nọ Jesu ọ ta nọ “a kere nọ” hayo idhere efa nọ ọ rọ riobọhọ igogo eria Ikereakere jọ. Wọhọ oriruo, evaọ Ovuẹ obọ Ugbehru riẹ wọhọ epanọ a kere fihọ Matiu, Jesu ọ wariẹ eme no Ikereakere Hibru na ze asia 21.—Matiu 4:4-10; 7:29; 11:10; 21:13; 26:24, 31; Jọn 6:31, 45; 8:17.
7. Ẹvẹ Jesu o ro wo ohẹriẹ no isu egagọ na?
7 Jesu o lele ohrẹ nọ o rrọ Olezi 1:1-3 na: “O ghale ohwo nọ ọ rẹ nya evaọ edhere ahwo omuomu hu, . . . rekọ awere riẹ ọ rẹ jọ evaọ uzi ỌNOWO; evaọ uzi riẹ ọ jẹ ghọghọ t’aso t’uvo. . . . Koware koware nọ o ru, u re woyei obọ.” Ẹvẹ oyena o wo ohẹriẹ no isu egagọ edẹ riẹ te, enọ e “keria akaba Mosis” rekiyọ a gbabọ kẹ “uzi ỌNOWO” na!—Matiu 23:2-4.
8. Fikieme u gbe ro fioka ha inọ isu egagọ ahwo Ju na a se je wuhrẹ Ebaibol na?
8 Rekọ u re gbe ahwo jọ unu nọ a te se oria jọ nọ o wọhọ ẹsenọ Jesu ọ be ta oyẹlẹ fihọ ewuhrẹ Ebaibol na. Evaọ Jọn 5:39, 40, ma re se ẹme nọ Jesu ọ ta kẹ ejọ evaọ edẹ riẹ inọ: “Wha bi riwi ikerakere na, keme wha roro nọ eva rai, wha je wo uzuazọ ebẹdẹ bẹdẹ; yọ enana họ enọ i se isẹi kẹ omẹ; dede wha rọwo nọ wha re bru omẹ tha ha re wha wo uzuazọ.” Orọnikọ Jesu ọ be rọ eme eyena ta oyẹlẹ fihọ ahwo Ju nọ e be gaviezọ kẹe oma kpahe ewuhrẹ Ikereakere na ha. Ukpoye, ọ jẹ fere ababọ oruọzewọ rai via. A riẹ nọ Ikereakere na e sae kpọ ae kpohọ uzuazọ ebẹdẹ bẹdẹ, rekọ Ikereakere evona nọ a be kiẹ na e hẹ sai je su ai bru Mesaya na, Jesu. Dede na, a se riẹ. Fikiere uwuhrẹ u fiobọhọ kẹ ae he keme a wo udu oruọzewọ họ, a ru uzou gaga.—Iziewariẹ 18:15; Luk 11:52; Jọn 7:47, 48.
9. Didi emamọ oriruo ikọ gbe eruẹaro ọsosuọ na a k’omai?
9 Ẹvẹ onana u wo ohẹriẹ te kpahe ilele Jesu, kugbe ikọ na! A wuhrẹ ‘ikere ẹri na nọ i re ru ohwo wo areghẹ kẹ usiwo.’ (2 Timoti 3:15) Evaọ onana a jọ wọhọ eruẹaro ọsosuọ na enọ e jẹ “guọlọ, jẹ nọ ekpẹ.” Eruẹaro eyena a rri ekiakiẹ yena fihọ onọ a rẹ họrọ wuhrẹ evaọ umutho emerae jọ hayo ukpe ọvo ho. Pita ukọ na ọ ta nọ “a [jẹ] nọ ekpẹ,” maero kpahe Kristi gbe oruaro nọ o rrọ ọkwa riẹ nọ ọ te rọ rehọ esiwo kẹ ahwo-akpọ. Evaọ ileta ọsosuọ riẹ, Pita ọ wariẹ eme no ebe Ebaibol ikpe jọ ze asia 34.—1 Pita 1:10, 11.
10. Fikieme omomọvo mai o je wo isiuru kpahe ewuhrẹ Ebaibol?
10 Fikiere, u re vevẹ, ewuhrẹ Ẹme Ọghẹnẹ o jọ abọjọ iruo ivie Izrẹl anwae. Jesu o lele oriruo nana. Yọ o rrọ abọjọ iruo kẹ enọ i bi ti lele Kristi su wọhọ ivie evaọ obọ odhiwu na re. (Luk 22:28-30; Ahwo Rom 8:17; 2 Timoti 2:12; Eviavia 5:10; 20:6) Oriruo ivie nana o r’oja re nẹnẹ rọkẹ enọ i bi rẹro eghale nọ e te jọ otọakpọ evaọ otọ esuo Uvie na.—Matiu 25:34, 46.
Iruo kẹ Ivie gbe Owhẹ
11. (a) Didi ọza kpahe uwuhrẹ o riẹ kẹ Ileleikristi? (b) Didi enọ i fo nọ ma rẹ nọ oma mai?
11 Ma rẹ sae rehọ udu kpobi tae avọ ẹgba inọ u fo re Oleleikristi uzẹme kpobi ọ kiẹ Ebaibol na kẹ omobọ riẹ. Onana o rrọ oware nọ who re ru evaọ oke ọsosuọ nọ Isẹri Jihova i ro wuhrẹ Ebaibol na kugbe owhẹ ọvo. Mai omomọvo ọ rẹ gbaemu re ma seba ẹjọ wọhọ otujọ evaọ edẹ Pọl ukọ na nọ i gbabọkẹ uwuhrẹ omobọ rai. A wuhrẹ “kpahọ onọ o karo evaọ ẹme Ọghẹnẹ,” wọhọ “uwuhrẹ oboba Kristi.” Dede na, a ruabọhọ ewuhrẹ rai hi fikiere a sae “rọ kpahọ o nọ o gbate” he. (Ahwo Hibru 5:12–6:3) Ma rẹ sae nọ oma mai nọ: ‘Ẹvẹ uwuhrẹ omobọ-ohwo orọ Ẹme Ọghẹnẹ o rrọ omẹ oma, makọ me kuomagbe ukoko Ileleikristi na obọ hayo mẹ riẹe eva evaọ ikpe buobu no? Eva edẹ riẹ, Pọl ọ lẹ inọ Ileleikristi a “nya họ aro evaọ eriariẹ Ọghẹnẹ.” Kọ me bi dhesẹ nọ me wo isiuru evona?’—Ahwo Kọlọsi 1:9, 10.
12. Fikieme uyoyou nọ ohwo o re wo kẹ Ẹme Ọghẹnẹ u je wuzou?
12 Ugogo oware jọ nọ u re fiobọhọ k’owhẹ wo emamọ uruemu uwuhrẹ họ who re wo uyoyou kẹ Ẹme Ọghẹnẹ. Olezi 119:14-16 o riobọhọ uwuhrẹ Ẹme Ọghẹnẹ nọ a re ru ẹsikpobi avọ uvi ẹjiroro wọhọ oware nọ u re fiobọhọ kẹ ohwo wo omawere kpahe iẹe. Oyena o rrọ uzẹme makọ epanọ ma rrọ Ileleikristi kri te no kẹhẹ. Re u fiẹgba họ oyena, kareghẹhọ oriruo Timoti. Dede nọ ọkpako Oleleikristi ọnana ọ jọ “uvi alakpa Kristi Jesu” no anwẹdẹ, Pọl ọ tuduhọ iẹe awọ nọ ọ dawo oma riẹ kpobi re ọ “yọrọ ẹme uzẹme na ziezi.” (2 Timoti 2:3, 15; 1 Timoti 4:15) U re vevẹ, re whọ sae “dawo oma” ra kpobi o gwọlọ ewo emamọ uruemu uwuhrẹ.
13. (a) Ẹvẹ a sai ro wo oke viere kẹ uwuhrẹ Ebaibol? (b) Didi inwene whọ ruẹ nọ whọ sai ru re who wo oke viere kẹ uwuhrẹ?
13 Owojẹ jọ kpohọ ewo emamọ uruemu uwuhrẹ họ oke nọ who re fihọ ẹsikpobi kẹ uwuhrẹ Ebaibol na. Ẹvẹ who bi ru evaọ abọ ọyena? Epanọ uyo oruọzewọ kpobi nọ whọ kẹ o rrọ, kọ who roro nọ who ti wo erere no oke nọ whọ rẹ raha viere kẹ uwuhrẹ omobọ ra ze? Whọ sai bo nọ: ‘Ẹvẹ mẹ sae rọ ruẹrẹ oke họ kẹ uwuhrẹ?’ Whaọ, ahwo jọ a ru oke uwuhrẹ Ebaibol rai theri viere no ẹkwoma ẹkake kpama viere omojọ evaọ ohiohiẹ. A rẹ sai se Ebaibol na evaọ iminiti 15 hayo ru abọ ọfa jọ uwuhrẹ omobọ rai. Wọhọ iroro-ejẹ ofa jọ, kọ ẹvẹ kpahe emenwene nọ who re ru evaọ omaa ẹkpoka ra? Wọhọ oriruo, otẹrọnọ o rrọ uruemu ra re who se obe-usi enwenọ ikẹdẹ kẹdẹ hayo gaviezọ kẹ usi evaọ etehe-ughe evaọ owọwọ, kọ whọ sae kpairoro vrẹ oyena ẹdọvo jọ evaọ ẹkpoka? Whọ sae rehọ ẹdẹ ọyena ro fiba uwuhrẹ Ebaibol ra. Who te kpeze oware wọhọ iminiti 30 nọ whọ jẹ raha fihọ ezọgaviẹ kẹ usi vẹre na kpohọ uwuhrẹ omobọ ra, who re wo vi euwa 25 efa evaọ ẹgbukpe. Dai roro erere nọ who re wo no euwa 25 nọ who re fiba oke ese hayo uwuhrẹ Ebaibol ra ze! Iroro-ejẹ efa ena: Oka n’otha na, kiẹ iruẹru ra riwi evaọ ekuhọ ẹdẹ kpobi. Rri sọ whọ sae ruẹ oware jọ nọ whọ rẹ sai si no re u fiba oke isase gbe uwuhrẹ Ebaibol ra vi ere.—Ahwo Ẹfẹsọs 5:15, 16.
14, 15. (a) Fikieme itee i je wuzou evaọ ẹme ọ isase omobọ ohwo? (b) Itee vẹ a rẹ sai le kpahe isase Ebaibol?
14 Eme o re ru uwuhrẹ lọhọ je siuru k’owhẹ viere? Itee. Uvi itee uwuhrẹ vẹ whọ rẹ sai fihọ? Rọ kẹ ibuobu, ute isiuru ọsosuọ họ re a se Ebaibol na soso duwu. Ẹsejọhọ rite enẹna, who se abọ sa-sa Ebaibol na no yọ who wo erere noi ze no. Kọ whọ sai ru ei wọhọ ọtamuo ra enẹna re who se oma Ebaibol na soso? Ute ọsosuọ ra o sae jọ re who se Usiuwoma ene na, ute avivẹ ra u ve lele iei, wọhọ ese abọ Ikereakere Griki Ileleikristi na nọ o kiọkọ na. Nọ who bi wo evevọwẹ gbe irere nọ i re noi ze no, ute ofa ra o sae jọ isase othotha ọrọ ebe Mosis gbe ebe ikuigbe na rite Ẹsta. Who te se tere no, whọ te ruẹ nọ o rrọ lọlọhọ re a se abọ Ebaibol nọ o kiọkọ na no. Aye jọ, ọnọ o zihe ruọ Oleleikristi evaọ okenọ ọ jọ oware wọhọ ikpe 65, o re kere edẹ nọ o ro muọ Ebaibol na họ ese fihọ ẹwẹ obeva uke Ebaibol riẹ, okiofa o ve kere ẹdẹ nọ o ro sei reno. O se Ebaibol na re te isiasoi no! (Iziewariẹ 32:45-47) Yọ ukpenọ o re se no kọmputa hayo obe nọ a kporo ze, o re se no Ebaibol riẹ dẹẹ ze.
15 Ahwo jọ nọ a nyate ute isase oma Ebaibol na soso no a j’owọ ofa no re a ru uwuhrẹ rai wo ẹvi jẹ kẹ erere viere. Edhere jọ họ ese ebe jọ nọ a salọ taure a te ti se obe Ebaibol ọvuọvo. Evaọ “All Scripture Is Inspired of God and Beneficial” gbe Insight on the Scriptures, ohwo ọ rẹ sae ruẹ obọdẹ evuẹ kpahe oria ikuigbe, oghẹrẹ ekere, gbe irere obe Ebaibol kpobi.a
16. Didi oriruo kpahe ewuhrẹ Ebaibol ma re lele he?
16 Evaọ etoke uwuhrẹ ra, whaha uruemu ibuobu nọ i se omarai egba-eriariẹ Ebaibol. A rẹ rọ oke rai kpobi tẹrovi ibieme na epaọ ẹsenọ Ebaibol na ọ rrọ obe ahwo-akpọ. Ejọ rai e rẹ daoma rọ obe ovuọvo ro dhe utu ahwo jọ hayo a rẹ jọ udu rai roro ẹjiroro gbe otofa nọ ohwo-akpọ nọ o kere obe kpobi o re wo h’iroro. Oware nọ u re no iroro ahwo-akpọ itieye na ze họ a re rri ebe Ebaibol na wọhọ ikuigbe gheghe hayo a re rri rai wọhọ ebe nọ e t’ẹme kpahe enwene egagọ gheghe. Egba-eriariẹ Ebaibol efa a rẹ rọ oma rai kẹ ewuhrẹ ibiẹme Ebaibol na, wọhọ ahwo nọ a re wuhrẹ kpahe oghẹrẹ ibieme ekere Ebaibol na. A rẹ mae rọ oma kẹ ewuhrẹ kpahe oghẹrẹ nọ eme jọ i ro muhọ gbe edhesẹ otofa ibieme Hibru gbe erọ Griki viukpọ otofa ovuẹ Ọghẹnẹ. Kọ who roro nọ ewuhrẹ otiọye na ọ rẹ lẹliẹ ohwo wo ẹrọwọ odidi ọnọ ọ rẹ kẹ ọwhọ?—1 Ahwo Tẹsalonika 2:13.
17. Fikieme ma je rri Ebaibol na wọhọ obe nọ u wo ovuẹ kẹ ahwo kpobi?
17 Kọ eme nọ egba-eriariẹ na a ta e gba? Kọ uzẹme o rrọ inọ obe Ebaibol kpobi u wo ugogo ẹjiroro ọvo hayo inọ u wo utu ahwo ọvo jọ nọ u kie kpahe? (1 Ahwo Kọrint 1:19-21) Uzẹme na họ ebe nọ e rrọ Ẹme Ọghẹnẹ na i wo erere oke krẹkri kẹ ahwo unuikpe gbe otọhotọ-uyerakpọ kpobi. O tẹ make rọnọ omọvo jọ, wọhọ Timoti hayo Taitọs, hayo utu ahwo jọ, wọhọ Ahwo Galesha hayo Ahwo Filipai, a kaki kere obe jọ se, mai kpobi ma re wuhrẹ ebe eyena. I wuzou kẹ omomọvo mai, yọ obe ovo o sai wo izoeme buobu jẹ kẹ utu ahwo buobu erere. Ẹhẹ, ovuẹ Ebaibol na u kie kpahe ahwo oria kpobi, onọ u re fiobọhọ k’omai riẹ oware nọ a rọ fae fihọ evẹrẹ ahwo akpọ na kpobi.—Ahwo Rom 15:4.
Erere k’Owhẹ gbe Amọfa
18. Nọ who bi se Ẹme Ọghẹnẹ na, eme who re roro kpahe?
18 Nọ who bi wuhrẹ na, whọ te ruẹ nọ u wo erere gaga re whọ gwọlọ wo otoriẹ Ebaibol na jẹ daoma ruẹ epanọ eme nọ e riẹ eva e rọ jẹhọ ohwohwo. (Itẹ 2:3-5; 4:7) Oware nọ Jihova ọ rọ Ẹme riẹ ferevia u w’obọ kpekpekpe kugbe ẹjiroro riẹ. Fikiere, nọ who bi se na, gba eme gbe ohrẹ Ebaibol na kugbe ẹjiroro riẹ. Whọ rẹ sai roro kpahe epanọ oware nọ o via, ẹjiroro, hayo eruẹaruẹ jọ u ro w’obọ kpahe ẹjiroro Jihova. Nọ oma ra nọ: ‘Eme onana o ta k’omẹ kpahe Jihova? Didi obọ u wo kpahe ẹjiroro Ọghẹnẹ nọ Uvie riẹ o be wha haro na?’ Whọ sai je roro kpahe onana: ‘Ẹvẹ mẹ sae rọ rehọ ovuẹ nana ruiruo? Kọ mẹ sae rehọ iẹe wuhrẹ ahwo hayo rehọ iẹe kẹ amọfa ohrẹ no Ikereakere na ze?’—Joshua 1:8.
19. Ono o re wo erere nọ whọ be rọ eware nọ who wuhrẹ gbiku kẹ amọfa na? Ru ẹme na vẹ.
19 Eroro kpahe amọfa o rẹ kẹ erere evaọ edhere ọfa re. Okenọ who bi se je wuhrẹ Ebaibol na, who ti wuhrẹ eware ekpokpọ je wo eriariẹ ekpokpọ. Daoma ku enana gbe ẹmeọta ọbọga kugbe ahwo uviuwou ra gbe amọfa. Who te ru ere evaọ oke nọ u kiehọ gbe evaọ edhere owowa, ẹmeọta otiọye na ọ te kẹ erere. Ọwhọ nọ whọ te rọ t’eme nọ who wuhrẹ no hayo eware isiuru nọ whọ ruẹ no o te lẹliẹ eme na nyate idu amọfa viere. Maero, o te jọ erere k’owhẹ re. Evaọ edhere vẹ? Ewena-ewuhrẹ e ta nọ ohwo ọ rẹ kareghẹhọ oware nọ o wuhrẹ hayo onọ o se viere otẹrọnọ o fi rie họ iruo hayo wariẹ oware na, wọhọ oriruo nọ ọ te rehọ iẹe gbiku kẹ amọfa nọ o gbẹ rrọ okpokpọ evaọ iroro riẹ na.b
20. Fikieme o jẹ rrọ erere re a dhe Ebaibol na esese?
20 Oke kpobi nọ who se obe Ebaibol jọ soso re, ababọ avro whọ rẹ ruẹ oware okpokpọ jọ. Eria nọ whọ kaki se vrẹ ehruehru ọvo i ti gb’owhẹ unu. I ti v’owhẹ ẹro viere. Onana u re dhesẹ k’owhẹ nọ onana yọ obe ohwo-akpọ jọ gheghe he, rekọ ukpoye inọ ebe Ebaibol na yọ efe nọ o fo nọ who re wuhrẹ ẹsikpobi je wo erere no ze. Kareghẹhọ nọ, ovie kpobi, wọhọ oriruo Devidi, o re ‘sei eva edẹ uzuazọ riẹ kpobi.’
21. Didi erere whọ rẹ sai rẹro riẹ no efiba uwuhrẹ ra orọ Ẹme Ọghẹnẹ ze?
21 Ẹhẹ, enọ e rehọ oke re a wuhrẹ Ebaibol na didi a re wo erere buobu. A re wo efe gbe orimuo abọ-ẹzi. Usu rai kugbe Ọghẹnẹ o rẹ ga viere, woma viere. A rẹ jẹ jọ ahwo nọ a wo erere kẹ ahwo uviuwou rai, kẹ inievo nọ e rrọ ukoko Ileleikristi na, jẹ rọ kẹ enọ i ri zihe ruọ egegagọ Jihova ha.—Ahwo Rom 10:9-14; 1 Timoti 4:16.
[Oruvẹ-obotọ]
a Isẹri Jihova họ enọ i kporo ebe nana nọ i re fiobọhọ evaọ ewuhrẹ na yọ e rrọ evẹrẹ buobu.
b Rri Uwou-Eroro Na ọrọ August 15, 1993 (ọrọ Oyibo), ẹwẹ-obe avọ 13-14.
Kọ Whọ Kareghẹhọ?
• Eme o gwọlọ nọ ivie Izrẹl a re ru?
• Didi oriruo Jesu gbe ikọ na a kẹ kpahe uwuhrẹ Ebaibol?
• Didi inwene whọ rẹ sai ru re who ru oke uwuhrẹ ra theri viere?
• Didi iroro who re ro mu uwuhrẹ Ẹme Ọghẹnẹ họ?
[Ẹkpẹti nọ o rrọ ẹwẹ-obe avọ 13]
“Evaọ Abọ Mai”
“Ma tẹ gwọlọ . . . udhesẹ-ẹme kẹ Ebaibol na, oria nọ o mai woma nọ ma re kpohọ họ Itanẹte na. Rekọ ma tẹ gwọlọ se Ebaibol na, wuhrẹ iẹe, roro kpahe iẹe, ma re kru rie họ evaọ abọ mai se, keme ere ọvo o rẹ rọ nyate omai iroro gbe idu.”—Gertrude Himmelfarb, ọnọ ọ jọ profẹsọ ologbo evaọ City University, New York vẹrẹ.