Me Gbe bi Wuhrẹ Eware Buobu Rite Inẹnẹ Na

A yẹ omẹ evaọ ukpe 1927. Evaọ ẹmẹwho jọ nọ ọ kẹle Chicago, evaọ Illinois, ọrọ U.S.A. a jo yẹ omẹ. Emọ isoi ọsẹgboni mẹ a yẹ. Odẹ rai họ, Jetha, Don, mẹ omamẹ, Karl, gbe Joy. Mai kpobi ma gba riẹ mu nọ ma rẹ gọ Jihova no eva mai kpobi ze. Evaọ ukpe 1943, Jetha oniọvo mẹ o ro kpohọ eklase avọ ivẹ ọrọ isukulu Giliad. Nọ u te ukpe 1944, Don o te kpohọ Ebẹtẹle ọrọ Brooklyn evaọ New York. Yọ ukpe 1947, Karl o ro kpohọ Ebẹtẹle. Nọ u je te ukpe 1951, Joy omariẹ o te je kpohọ Ebẹtẹle re. Nọ mẹ ruẹ epanọ inievo mẹ avọ ọsẹgboni mẹ a be daoma te, mẹ tẹ ta nọ me re ru ẹkẹ mẹ re.

EPANỌ MA RO KURẸRIẸ ZIỌ UKOKO NA

Ọsẹgboni mẹ a jẹ hai se Ebaibol gaga. A rọ Ọghẹnẹ ọgọ zaro ho. Yọ a wuhrẹ omai emọ na re inọ ma re you Ọghẹnẹ. Ọsẹ mẹ ọ jọ usu isoja nọ i je fi Ẹmo Akpọ Ọsosuọ evaọ Europe oke yena. Nọ o no ẹmo na ze no, o gbẹ were ieẹ re o kpohọ ichọche he. Eva e were oni mẹ gaga inọ ọsẹ mẹ ọ sai no ẹmo na kpozi. Ọ tẹ ta kẹ ọsẹ mẹ nọ: “Ma kpobọ ichọche epanọ ma jẹ hae nya vẹre na.” Ọsẹ mẹ ọ tẹ ta kẹe nọ: “Me ti su owhai te etẹe. Rekọ mẹ te ruọ eva ha.” Oni mẹ ọ tẹ nọe nọ: “Fikieme?” Ọsẹ mẹ ọ tẹ ta nọ: “Nọ ma je fi ẹmo na, isu egagọ nọ e jọ egagọ evona, ejọ e be lẹ kẹ isoja nọ e rrọ abọ nana avọ ekwakwa ẹmo rai, yọ ejọ e be lẹ kẹ isoja nọ e rrọ abọ obei avọ ekwakwa ẹmo rai. Kọ amono Ọghẹnẹ o ti yo olẹ rai na?”

Ẹdẹ jọ nọ oni mẹ ọ jọ obọ ichọche, Isẹri Jihova a tẹ ta usi uwoma te oria mai. A tẹ kẹ ọsẹ mẹ obe jọ nọ o wo iko ivẹ nọ a jẹ hai ro wuhrẹ ahwo Ebaibol. Uzoẹme riẹ họ Light. A jariẹ ta ẹme kpahe eme nọ e rrọ obe Eviavia. Ebe na e were ọsẹ mẹ. O te mi ai ebe na. Nọ oni mẹ ọ nwane ruẹ ebe na ọvo, o te mu ai họ ese. Ẹdẹ jọ oni mẹ ọ tẹ jọ obe-usi ruẹ nọ a bi zizie ahwo kpobi nọ o were inọ jọ a kpohọ oria jọ nọ a te jọ rọ obe Light na wuhrẹ ahwo Ebaibol. Oni mẹ ọ tẹ ta nọ ọ rẹ nya. Nọ o te etẹe, o je kporo ẹthẹ, ọkpọkuaye jọ o te no uwou ze. Oni mẹ o te dhesẹ obe jọ evaọ usu ivẹ na kẹe, ọ tẹ nọe nọ, “Etenẹ a be jọ wuhrẹ obe nana?” Ọkpọkuaye na ọ tẹ ta nọ, “Ee, etenẹ. Mọmẹ ruọ uwou.” Oka nọ o lele i rie, oni mẹ ọ tẹ wha omai nya. No umuo ẹdẹ yena vrẹ, uwuhrẹ na u gbe je vo omai hi.

Ẹdẹ jọ nọ ma rọ etẹe kpohọ ewuhrẹ, ohwo nọ o je ru ewuhrẹ na o te se omẹ inọ me se obe Olezi 144:15. Etẹe ọ ta nọ ahwo nọ a be gọ Jihova, eva e rẹ were ae. Ẹme na ọ were omẹ gaga. Eria Ebaibol ivẹ efa e ta ẹme nọ ọ were omẹ gaga re. Ọjọ họ 1 Timoti 1:11. Etẹe ọ ta nọ Jihova họ “Ọghẹnẹ evawere na.” Oria Ebaibol ọfa họ Ahwo Ẹfisọs 5:1. A jọ etẹe vuẹ omai nọ ma “rọ aro kele Ọghẹnẹ.” Nọ me rri eware na kpobi, mẹ tẹ ruẹ nọ u fo re eva e were omẹ inọ Ọghẹnẹ nọ ọ ma omẹ na ọ kẹ omẹ uvẹ inọ mẹ gọe, me ve je yere iei rọkẹ uvẹ na. Oware nọ mẹ be daoma ru oye rite inẹnẹ na.

Ukoko nọ ọ mae kẹle omai oke yena, ikilomita ọgbagbivẹ, koyehọ emaele udhe o ro thabọ no omai. Obọ Chicago ukoko na o jọ. Ma jẹ hae daoma kpohọ ewuhrẹ ghele, o maki thabọ na. Me te ti mu Ebaibol họ ẹriẹ gaga. Ẹdẹ jọ, oniọvo mẹ Jetha ọ tẹ kpare obọ, a te sei. Nọ ọ jẹ be kẹ uyo na, mẹ tẹ be jọ udu mẹ roro nọ, ‘Kpakọ mẹ riẹ uyo onọ na. Mẹ riẹ, mẹ hae te kpare obọ.’ Mẹ tẹ jẹ hae ruẹrẹ oma kpahe kẹ ewuhrẹ ziezi jẹ kẹ uyo. Mẹ avọ inievo mẹ ma daoma nyaharo evaọ ukoko na. Mẹ tẹ họ-ame evaọ ukpe 1941.

JIHOVA O WUHRẸ OMẸ EVAỌ IKOKOHỌ ILOGBO NỌ MA NYA

Okokohọ ologbo ukpe 1942 nọ ma nya evaọ Cleveland nọ ọ rrọ Ohio o rẹ thọrọ omẹ ẹro ho. A jọ eria efa evaọ United States nọ i bu vrẹ udhuvẹ-gbikpe rọ ifonu thuru kugbe okokohọ na. Ahwo uwou mai gbe inievo efa buobu ma jẹ rria iwou-owhre kẹle oria nọ a bi jo ru okokohọ na. Oke yena, yọ Ẹmo Akpọ Avivẹ ọ rrọ otọ gidigba. A je kpokpo Isẹri Jihova gaga. Evaọ owọwọ, mẹ tẹ ruẹ inievo-emezae buobu nọ e dhẹ imoto rai fihọ oyena, yọ a rọ ovao imoto rai rri obonọ a rẹ rọ ruọ oria nọ iwou-owhre na e jọ na. Aikpobi na a ta mu no inọ ohwo jọ ọ rẹ jọ eva omoto kpobi. Otẹrọnọ oghẹrẹ ohwo jọ ọ be gwọlọ nyaruọ oyena, aikpobi na a ve lo ikpẹ imoto na fihọ iẹe ovao, ọ rẹ gbẹ ruẹ ude he. A ve mu ọgba imoto na họ ekporo re ahwo nọ i kiọkọ a dhẹ ze. Nọ mẹ ruẹ oware nọ inievo na a ma omaa riẹ na, mẹ tẹ ta nọ, ‘Idibo Jihova a rẹ ruẹrẹ oma kpahe kẹ oware kpobi gaga.’ Fikiere mẹ jẹ wezẹ bru ezọ họ ame. Yọ oware ovo o via gbe he.

Uwhremu na nọ iroro mẹ e dhẹ kpohọ okokohọ yena, mẹ tẹ kareghẹhọ nọ dede nọ ozọ o jariẹ, oni mẹ o je bru udu hu. O fi eva riẹ kpobi họ Jihova gbe ukoko riẹ. Oware yena nọ oni mẹ o ru na o rẹ thọrọ omẹ ẹro vievie he.

Taure ma te ti kpohọ okokohọ yena, yọ oni mẹ o mu ọkobaro oke-kpobi họ no. Fikiere nọ a tẹ be jọ okokohọ na ru ẹme nọ a be jọ ta kpahe iruo odibọgba oke-kpobi, oni mẹ o je fi ozọ hotọ gaga. Nọ ma je no okokohọ na kpo, oni mẹ ọ tẹ ta nọ, “Mẹ gwọlọ nọ mẹ rẹ siọ ọkobaro nọ me bi ru na ba vievie he. Rekọ o te lọhọ tere he re me gbe ru ọkobaro na jẹ rẹrote uwou na ziezi.” Ọ tẹ nọ omai sọ ma sai fiobọhọ kẹe, ma tẹ ta nọ, ‘Ehe!’ Ọ tẹ ghale ọvuọ ubruwou ọvo hayo ivẹ riẹ kẹ omai nọ ma rẹ hai ru fo evaọ uwou na taure ma tẹ te re emu ohiohiẹ. Nọ ma te kpobọ isukulu no, oni mẹ o re rri eria nọ ma ru fo na sọ e rrọ fuafo ziezi, o ve te ti kpohọ usi uwoma. Oni mẹ ọ jẹ hai ru iruo gaga. Avọ ere ghele na, ọ jẹ hae rẹrote omai. Nọ ma te no obọ isukulu ze te re emu uvo gbe okenọ ma te no isukulu kpozi no, oni mẹ ọ rẹ jọ kugbe omai. Ẹsejọ ma te kpozi no, ma re lele iei kpohọ usi uwoma. Ere nọ ma jẹ hai ru na u ru nọ ma rọ riẹ oghẹrẹ nọ ọkobaro oke-kpobi ọ rẹ jọ.

EPANỌ ME RO MU ODIBỌGBA OKE-KPOBI HỌ

Me mu ọkobaro họ okenọ mẹ jọ ikpe ikpegbezeza. Oke yena ọsẹ mẹ o ri kurẹriẹ ziọ ukoko na ha. Rekọ ọ jẹ hae nọ omẹ epanọ eware e be nya kẹ omẹ nọ me bi ru ọkobaro na. Owọwọ ẹdẹ jọ mẹ tẹ ta kẹ ọsẹ mẹ nọ mẹ be gwọlọ ohwo nọ me re wuhrẹ Ebaibol rekọ mẹ re sae ruẹ ohwo no ho. Nọ mẹ jẹ dina dhizu omojọ, mẹ tẹ nọe nọ, “Sẹmẹ, kọ mẹ gbẹ hai wuhrẹ owhẹ Ebaibol?” Nọ o dhizu omojọ, ọ tẹ ta nọ, “Hẹẹ, ma hai wuhrẹ.” Ere me ro mu ọsẹ mẹ họ ewuhrẹ. Ọye họ ohwo ọsosuọ nọ me wuhrẹ Ebaibol. Oware riẹ u woma kẹhẹ!

Obe nọ uzoẹme riẹ o ta nọ “The Truth Shall Make You Free” oye ma je wuhrẹ. Nọ u te oria jọ no, mẹ tẹ ruẹ nọ ọsẹ mẹ nọ me je wuhrẹ na o be whae ze nọ me bi ro wuhrẹ Ebaibol kẹ omamẹ gaga jẹ riẹ ahwo wuhrẹ ziezi. Owọwọ ẹdẹ jọ nọ ma je wuhrẹ, nọ ma je se edhe-ẹme jọ no, ọsẹ mẹ ọ tẹ ta nọ: “Ẹme nọ obe na o ta na o rrọ ziezi. Rekọ ẹvẹ whọ rọ riẹ nọ ẹme nọ obe na o ta na, ere o ginẹ rrọ?” Mẹ re nwane jọ Ebaibol kiẹ kpahe ẹme na ziezi hi. Fikiere mẹ tẹ ta kẹe nọ, “Mẹ te sae ruẹ ẹme ọvo ta kẹ owhẹ obọnana ha. Rekọ ri bọo ẹdẹfa nọ ma ti wuhrẹ, mẹ te gwọlọ uyo onọ na ze.” Ere me ro gine mu eria Ebaibol nọ i dhesẹ nọ oware nọ obe na o ta na uzẹme họ ẹgwọlọ. Mẹ tẹ jẹ hae ruẹrẹ oma kpahe ziezi re ma te ti wuhrẹ. Ere mẹ rọ riẹ epanọ a re ru ekiakiẹ. Mẹ rọ ere riẹ eware buobu, yọ u fiobọhọ kẹ ọsẹ mẹ nyaharo gaga re. O je ru eware nọ o je wuhrẹ. Ọ tẹ te họ-ame evaọ 1952.

ME WUHRẸ EWARE BUOBU NỌ ME KPOBỌ EBẸTẸLE

Me no uwou ọsẹgboni mẹ okenọ mẹ jọ ikpe ikpegbihrẹ. Oniọvo mẹ Jethaa ọ jọ imishọnare. Yọ Don omariẹ o kpobọ Ebẹtẹle no. Iruo nọ a je ru kẹ Jihova na e were rai. Fikiere mẹ tẹ gbaemu nọ me re gbe ru iruo kẹ Jihova. Me te fili efọmo Ebẹtẹle gbe ọrọ Isukulu Giliad. Mẹ tẹ ta nọ onọ Jihova o se omẹ kẹ kpobi, me ve ru ọyena. A te se omẹ kpobọ Ebẹtẹle evaọ ukpe 1946.

Me ru oghoghẹrẹ iruo buobu no evaọ Ebẹtẹle. O soriẹ ze nọ me ro wuhrẹ eware buobu. Mẹ rria Ebẹtẹle te ikpe udhosa gbe ikpegbisoi no. Yọ a wuhrẹ omẹ epanọ a re printi ebe gbe epanọ a re ru eware igho. A te je wuhrẹ omẹ epanọ a rẹ rọ dẹ eware nọ a jọ Ebẹtẹle gwọlọ gbe epanọ a rẹ rọ wọ eware kpohọ eria efa. Onọ o mae rro evaọ usu rai họ, eware buobu nọ mẹ jọ Ebaibol wuhrẹ nọ a te bi se isase okpẹdẹ jẹ kẹ evuẹ nọ a rẹ kẹ evaọ Ebẹtẹle.

Me wuhrẹ oware jọ mi oniọvo mẹ ọmaha nọ a re se Karl. Ukpe 1947 a ro zizie iei ziọ Ebẹtẹle. Ọ riẹ Ebaibol gaga, yọ ọ riẹ epanọ a rẹ rọ Ebaibol wuhrẹ ahwo gaga. U wo oke jọ nọ mẹ rọ nyabru ei nọ o fiobọhọ kẹ omẹ nọ a kẹ omẹ ẹme jọ inọ me ru. Mẹ ta kẹe nọ mẹ kiẹ eware buobu kuku otọ no kpahe ẹme na, rekọ mẹ riẹ onọ mẹ te ta gbe onọ mẹ te nyaseba ha. Ọ tẹ nọ omẹ nọ, “Eme họ uzoẹme ẹme ra na?” Nọ ọ nọ omẹ ere, mẹ tẹ nwane riẹ ẹme nọ ọ be ta na no. Eware nọ i kiekpahe uzoẹme ẹme na ọvo eye me fihọ ẹme na. Oware nọ o wuhrẹ omẹ na o rẹ thọrọ omẹ ẹro ho.

Nọ ohwo o te bi ru iruo Ebẹtẹle, re eva e sae were iẹe ziezi, ọ rẹ jọ ohwo nọ o re kpohọ usi uwoma ziezi. Yọ eghale buobu i re noi ze. Ọjọ ọ riẹ nọ ọ rẹ thọrọ omẹ ẹro ho. Owọwọ ẹdẹ jọ, mẹ avọ oniọvo jọ ma te kpohọ usi uwoma evaọ ofẹ jọ New York City. Ma tẹ nyabru aye jọ nọ a kẹ Uwou-Eroro Na gbe Awake! no vẹre. Ma tẹ ta kẹe nọ, “Owọwọ nana ma be rọ Ẹme Ọghẹnẹ lele ahwo jiroro re a sai wuhrẹ emamọ eware no Ebaibol na ze.” Aye na ọ tẹ ta nọ, “Hẹẹ, otẹrọnọ ẹme Ebaibol wha wha ze, wha ruọ uwou.” Ma se eria Ebaibol buobu nọ e ta ẹme kpahe Uvie Ọghẹnẹ gbe akpọ ọkpokpọ na, ma tẹ jẹ ta ẹme kpahe ae. Eme na e were riẹ gaga keme oka nọ u lele i rie nọ ma zihe, o se egbẹnyusu riẹ ze ti kuomagbei re a yo eme na. Uwhremu na, te aye na te ọzae riẹ a te kurẹriẹ ze te gọ Jihova.

ME WUHRẸ EWARE BUOBU MI AYE MẸ

Ikpe ikpe soso mẹ gwọlọ aye. Uwhremu na mẹ tẹ te ruẹ aye wo. Kọ ẹvẹ mẹ sae rọ ruẹ emamọ aye kerọ aye mẹ na? Mẹ jẹ hae lẹ se Jihova, yọ me je roro kpahe oware nọ mẹ avọ aye nọ me ti wo ma ti ru.

Okokohọ ologbo ukpe 1953 nọ a ru evaọ Yankee Stadium mẹ jọ nyaku oniọvo-ọmọtẹ nọ mẹ rehọ na. Odẹ riẹ Mary Aniol. Tei te oniọvo-ọmọtẹ mẹ Jetha, oke ọvona a ro kpohọ eklase avọ ivẹ Isukulu Gilead. Avọ oniọvo mẹ a gbe je ru iruo imishọnare kugbe. Mary ọ jẹ hai gbiku iruo imishọnare riẹ na kẹ omẹ gaga, te epanọ ọ rọ jọ obọ Caribbean gbe ahwo buobu nọ o wuhrẹ Ebaibol no. Nọ ma be riẹ ohwohwo ze na, ma tẹ ruẹ nọ oghẹrẹ eware evona ma gwọlọ ru evaọ egagọ Jihova. Ma te ti you ohwohwo gaga. Ma tẹ ruọ orọo evaọ Ane 1955. Jihova ọ rọ aye mẹ na ghale omẹ yọ o wo emamọ uruemu nọ a rẹ rọ aro kele. Eware buobu e lẹliẹ omẹ ta ere. Iruo kpobi nọ a kẹ riẹ, o re ru ei avọ evawere. Ọ gobọ iruo. O re fiobọhọ kẹ ahwo gaga. Yọ iruo Uvie na họ oware nọ o mae riẹe oja. (Mat. 6:33) Mẹ jọ ọsẹro okogho ikpe esa, yọ aye mẹ o je fiobọhọ kẹ omẹ. Nọ u te ukpe 1958, a te zizie omẹ avọ aye mẹ kpobọ Ebẹtẹle.

Me wuhrẹ eware buobu mi aye mẹ. Nọ ma ruọ orọo obọ, ma jẹ hai se Ebaibol kugbe. Yọ ma re se awọ Ebaibol nọ i te ikpegbisoi nọ ma te bi se. Nọ ohwo jọ evaọ usu mai o te se oria jọ no, ma vẹ ta eware nọ ma wuhrẹ noi ze gbe epanọ ma sai ro ru eware nọ ma wuhrẹ. Aye mẹ ọ jẹ hae vuẹ omẹ eware buobu nọ o wuhrẹ evaọ Isukulu Giliad gbe enọ o wuhrẹ nọ ọ jọ imishọnare. Eware nọ ọ jẹ hae vuẹ omẹ na o lẹliẹ omẹ riẹ eware buobu. U tube ru nọ evuẹ nọ mẹ rẹ kẹ i ro woma vi epaọ ọsosuọ. Yọ i fiobọhọ kẹ omẹ nọ mẹ jẹ sae rọ tuduhọ inievo-emetẹ awọ ziezi.—Itẹ 25:11.

Aye oyoyou mẹ na o whu siọ omẹ ba evaọ 2013. Me bi rẹro epanọ mẹ te rọ wariẹ ruẹ e riẹ evaọ akpọ ọkpokpọ na. Mẹ gba riẹ mu nọ me re gbe wuhrẹ eware efa je fi eva mẹ kpobi họ Jihova. (Itẹ 3:5, 6) Nọ me te bi roro kpahe eware nọ idibo Jihova a ti ru evaọ akpọ ọkpokpọ na, oma o rẹ sasa omẹ yọ eva e rẹ were omẹ. Mẹ riẹ nọ oke yena, Owuhrẹ Ologbo Oride mai na o ti wuhrẹ omai eware nọ ma riẹ vẹre he, yọ ma te riẹe gaga. Mẹ be sae tubẹ ruẹ unu yere Jihova ha rọkẹ eware nọ o wuhrẹ omẹ no gbe eware iwoma buobu nọ o ru kẹ omẹ no.