Oware nọ Ẹmo gbe Ozighi I gbe bi ro Kuhọ Họ

UZIORAHA

Ọghẹnẹ ọ ma Adamu avọ Ivi evaọ uwoho riẹ. (Emuhọ 1:27) Onana u dhesẹ nọ a sae rọ aro kele Ọghẹnẹ rria dhedhẹ kugbe ohwohwo je dhesẹ uyoyou. (1 Ahwo Kọrint 14:33; 1 Jọn 4:8) Rekọ Adamu avọ Ivi a ghẹmeeyo kẹ Ọghẹnẹ, a tẹ raha uzi. Fiki onana, mai kpobi ma tẹ reuku uzioraha gbe uwhu. (Ahwo Rom 5:12) Uzioraha nọ ma reuku riẹ na o rẹ lẹliẹ omai wo ekpehre iroro, jẹ lẹliẹ ahwo ru ozighi.—Emuhọ 6:5; Mak 7:21, 22.

EGỌMETI AHWO-AKPỌ

Ọghẹnẹ ọ ma omai re ma su omobọ mai hi. Ebaibol na ọ ta nọ: “Ohwo-akpọ nọ ọ be nya onya o wo ogaga nọ ọ rẹ rọ tubẹ kpọ ithihi riẹ dede he.” (Jerimaya 10:23) Fiki onana, egọmeti ahwo-akpọ a sai si ẹmo gbe ozighi notọ riẹriẹriẹ hẹ.

SETAN AVỌ IZI IMUOMU NA

Ebaibol na ọ ta nọ “akpọ na soso ọ rrọ otọ ogaga omuomu na.” (1 Jọn 5:19) “Omuomu na” họ Setan Ẹdhọ na, yọ ojihẹ ọ rrọ. (Jọn 8:44) Setan avọ izi imuomu na họ enọ i bi fi iroro ẹmo gbe ozighi họ ahwo udu.—Eviavia 12:9, 12.