UZOẸME UWUHRẸ 5
OLE AVỌ 108 Uyoyou Ọghẹnẹ O rẹ Hiẹ Hẹ
Irere nọ I bi Te Omai Fikinọ Jihova O You Omai
“Kristi Jesu ọ ziọ akpọ na ti siwi erahaizi.”—1 TIM. 1:15.
OWARE NỌ A JARIẸ TA KPAHE
Irere nọ i bi te omai fikinọ Jesu o whu kẹ omai, gbe oware nọ ma re ru ro dhesẹ nọ oware nọ Jihova o ru kẹ omai na o da omai ẹro fia.
1. Eme ma rẹ hai ru kpahe uwhu Jesu na re eva mai e sae were Jihova?
MA REHỌ iẹe nọ whọ kẹ ohwo jọ nọ who you gaga emamọ oware jọ. Oware na u woma wo umuo ho, yọ whọ riẹ nọ u ti fiobọhọ kẹe gaga. Who je ti rri hi, whọ tẹ ruẹ nọ ọ rehọ oware na o te fi ei họ eva ẹkpẹti jọ, ọ tẹ kare iẹe fihọ obei ọvo. Kọ o gbẹ te kẹ owhẹ uye gaga? Rekọ otẹrọnọ, nọ ohwo na o mi owhẹ okẹ na, o te yere owhẹ ziezi jẹ be rehọ iẹe ru oware nọ whọ rọ fiki riẹ kẹe oware na, eva e rẹ were owhẹ gaga. Kọ eme ma be gwọlọ ta na? Jihova o vi Ọmọ riẹ ze ti whu kẹ omai. Nọ Jihova ọ tẹ ruẹ nọ oware yena nọ o ru kẹ omai na o were omai gaga, yọ ma riẹ nọ fikinọ o you omai jabọ nọ o ro vi Ọmọ riẹ na ze ti whu kẹ omai, eva e rẹ were iẹe gaga!—Jọn 3:16; Rom 5:7, 8.
2. Eme ma te ta kpahe evaọ uzoẹme nana?
2 Nọ oke o be nya na, ẹsejọhọ oghẹrẹ nọ ma bi ru o sae wọhọ ẹsenọ ma gbẹ be daezọ idhe ẹtanigbo na ha. O vẹ te wọhọ ẹsenọ ma mi Ọghẹnẹ emamọ okẹ yena nọ ọ kẹ omai na, ma te fi ei họ eva ẹkpẹti re ma gbẹ ruẹ e riẹ hẹ. Re o gbẹ jọ ere he, u fo re ma hai roro kpahe oware nọ Ọghẹnẹ gbe Jesu Kristi a ru kẹ omai na ẹsikpobi. Kọ ẹvẹ ma sai ro ru ere? Oye ma be te ta ẹme kpahe evaọ uzoẹme nana. Ma te jọ uzoẹme nana ta kpahe irere nọ ma bi wo enẹna gbe enọ ma ti wo evaọ obaro fikinọ Jesu o whu kẹ omai. Ma te jẹ ta kpahe oware nọ ma re ru evaọ etoke Ekareghẹhọ nana, ro dhesẹ nọ oware nọ Jihova o ru kẹ omai na o ginẹ da omai ẹro fia.
IRERE NỌ MA BI WO ENẸNA
3. Erere vẹ jọ ma bi wo enẹna fikinọ Jesu o whu kẹ omai?
3 Ma bi wo irere buobu no uwhu Jesu ze enẹna. Erere jọ nọ ma bi wo fiki uwhu Jesu họ Jihova ọ be rọ izieraha mai vrẹ omai. Orọnikọ ọ be rọvrẹ omai fikinọ ọ gbẹ rọvrẹ omai hi oware jọ o rẹ via kẹe he. Rekọ fiki ohrọ mai nọ o be re iẹe jabọ nọ ọ jẹ be rọvrẹ omai. Oware nana o were odibo Jihova jọ te epanọ ọ rọ rehọ iẹe so ole inọ: “Keme who woma, O Jihova, yọ whọ ruẹrẹ oma kpahe re whọ rọvrẹ.”—Ol. 86:5; 103:3, 10-13.
4. Fikieme Jihova o ro vi Ọmọ riẹ ze ti whu kẹ omai? (Luk 5:32; 1 Timoti 1:15)
4 Ahwo jọ a re roro nọ Jihova ọ sae rọ izieraha rai vrẹ rai hi. Uzẹme riẹ họ, ohwo ọvo evaọ usu mai na ọ sae ta nọ o te ohwo nọ Jihova ọ rẹ rọvrẹ hẹ. Oyejabọ Pọl ukọ na ọ rọ ta nọ ọyomariẹ dede o “te ọnọ a re se ukọ họ.” Ghele na ọ ta nọ: “Fiki uwowou ulogbo Ọghẹnẹ mẹ rọ rrọ ohwo nọ mẹ rrọ na.” (1 Kọr. 15:9, 10) Nọ ma te kurẹriẹ, Jihova ọ rẹ rọvrẹ omai. Fikieme Jihova ọ jẹ be rọvrẹ omai? Orọnọ fiki oware jọ nọ ma bi ru kẹe he. Rekọ fikinọ o you omai. Who te bi roro nọ Jihova ọ sae rọvrẹ owhẹ hẹ, kareghẹhọ nọ orọnikọ ahwo nọ a rẹ raha uzi hi Jihova o vi Jesu ze ti whu kẹ hẹ, rekọ erahaizi nọ i kurẹriẹ.—Se Luk 5:32; 1 Timoti 1:15.
5. Fikieme mai ohwo ọvo ọ gbẹ sae ta nọ epanọ ma daoma te jabọ Jihova ọ be rọ re omai ohrọ họ?
5 Jọ mai ohwo ọvo o roro nọ fikinọ ọ gọ Jihova ikpe buobu no, oyena u te epanọ Jihova ọ jẹ rọvrẹ riẹ hẹ. Ma riẹ nọ eva e be were Jihova inọ ma gọ riẹ rite inẹnẹ. (Hib. 6:10) Rekọ Ọmọ riẹ nọ o vi ze ti whu kẹ omai na yọ okẹ ọvọvẹ, orọnikọ osa iruo nọ ma ru kẹe no ho. Fikiere ma te bi roro nọ epanọ ma daoma te na, u fo nọ Jihova ọ rẹ re omai ohrọ, o wọhọ ẹsenọ ma be ta nọ fiki mai Jesu o ro whu hu. Oke riẹ gheghe ọ raha.—Je rri Ahwo Galesha 2:21.
6. Fikieme Pọl o je ro kru oma ga evaọ iruo Jihova?
6 Pọl ọ riẹ nọ orọnọ epanọ ọ daoma te Ọghẹnẹ ọ rẹ rọ re iẹe ohrọ họ. Kọ fikieme ọ jẹ rọ daoma gaga evaọ iruo Jihova? Orọnikọ re o dhesẹ kẹ Jihova nọ o te ohwo nọ ọ rẹ rọ iruthọ riẹ vrẹ hẹ, rekọ re o dhesẹ nọ oware nọ Jihova o ru nọ o ro vi Ọmọ riẹ ze ti whu na o da riẹ ẹro. (Ẹf. 3:7) Oware ovona o be lẹliẹ omai kru oma ga evaọ egagọ Jihova na. Orọnikọ ma bi ru ei re ọ riẹ nọ ma te ahwo nọ ọ rẹ re ohrọ họ, rekọ ma gwọlọ dhesẹ kẹe nọ ọghọ nọ o ru nọ o ro vi Ọmọ riẹ ze ti whu kẹ omai na o da omai ẹro fia.
7. Erere vẹ ọfa ma bi wo enẹna fikinọ Jesu o whu kẹ omai? (Ahwo Rom 5:1; Jemis 2:23)
7 Erere ọfa jọ nọ o bi te omai fiki uwhu Jesu họ, u ru nọ ma be sai ro go kẹle Jihova gaga.a Ma jọ uzoẹme nọ o vrẹ na ta nọ okenọ a yẹ omai ze, ma jọ egbẹnyusu Ọghẹnẹ hẹ. Rekọ fikinọ Jesu o whu kẹ omai, ma be “reawere udhedhẹ kugbe Ọghẹnẹ.” Fikiere ma sai go kẹle iẹe.—Se Ahwo Rom 5:1; Jemis 2:23.
8. Fikieme eva e be rọ were omai gaga inọ ma be sae lẹ se Jihova?
8 Joma ta ẹme kpahe oware jọ nọ ma be re erere riẹ fikinọ Jihova ọ kẹ omai uvẹ nọ ma re ro go kẹle iẹe. Oye họ olẹ. Orọnọ olẹ nọ ma kokohọ oria ovo lẹ ọvo Jihova o re yo ho, rekọ te enọ ma jọ ọvuọ oria riẹ lẹ. Olẹ u re ru udu te omai otọ. Rekọ olẹ yọ oware nọ ma re ru re udu u te omai otọ ọvo ho. O rẹ lẹliẹ omai kẹle Ọghẹnẹ gaga. (Ol. 65:2; Jem. 4:8; 1 Jọn 5:14) Okenọ Jesu ọ jọ otọakpọ, kẹse kẹse ọ jẹ hae lẹ se Jihova keme ọ riẹ nọ Jihova ọ be gaviezọ kẹ olẹ riẹ, yọ ẹlẹlẹ nọ ọ be hae lẹ na o te lẹliẹe kẹle Ọsẹ riẹ gaga. (Luk 5:16) Eva e were omai gaga inọ uwhu Jesu u ru nọ ma rọ rrọ egbẹnyusu Jihova, ma tẹ be sae lẹ sei.
IRERE NỌ I TI TE OMAI EVAỌ OBARO
9. Irere vẹ i ti te idibo Ọghẹnẹ evaọ obaro fiki Jesu nọ o whu kẹ omai?
9 Irere vẹ i ti te idibo Jihova evaọ obaro fiki uwhu Jesu na? A ti wo uzuazọ ebẹdẹ bẹdẹ. Ahwo buobu a re roro nọ oware utioye o te via ẹdẹ ọvo ho, keme u kri akpọ no nọ ahwo a bi ro whu. Rekọ nọ Ọghẹnẹ ọ ma ohwo-akpọ, iroro nọ ọ rọ mae họ re ọ rria bẹdẹ bẹdẹ. Adamu ọ gbẹ raha uzi hi, ohwo ọvo ọ hai ti roro nọ uzuazọ ebẹdẹ bẹdẹ yọ okpoware jọ nọ ma rẹ sai wo ho ho. Epanọ uzuazọ ebẹdẹ bẹdẹ o wọhọ okpoware jọ nọ a rẹ sai wo ho na, ere osa nọ Jihova ọ hwa re ma sai woi o rro te re, keme Ọmọ ọvo riẹ nọ o you gaga na o vi ze ti whu kẹ omai.—Rom 8:32.
10. Eme Ileleikristi nọ a rọ ẹzi wholo na a bi rẹro riẹ, kọ eme igodẹ efa na a bi rẹro riẹ?
10 Dede nọ obaro ma ti jo wo uzuazọ ebẹdẹ bẹdẹ, Jihova ọ gwọlọ nọ ma hai roro kpahe iẹe enẹna. Ileleikristi nọ a rọ ẹzi wholo na, a rẹ sai rẹro okenọ a ti ro kpobọ odhiwu re a lele Kristi su otọakpọ na. (Evia. 20:6) Enọ a bi se igodẹ efa na, a sai rẹro okenọ a te rọ rria aparadase evaọ otọakpọ na. Oke yena edada gbe uweri e te gbẹ jọ họ. (Evia. 21:3, 4) Kọ usu igodẹ efa nọ i ti wo uzuazọ ebẹdẹ bẹdẹ evaọ otọakpọ na whọ rrọ? O tẹ rrọ ere, riẹ nọ osa nana yọ omoware evere nọ a bi ro whrehe ohwo oviẹ hẹ. Oware nọ Ọghẹnẹ ọ rọ fiki riẹ ma ohwo-akpọ ọye. Eva nọ e te were ahwo nọ a te rria otọakpọ na, a rẹ ruẹ unu gbiku riẹ hẹ.
11-12. Emamọ eware vẹ ma bi rẹro rai evaọ aparadase nọ ọ be tha na? (Rri iwoho na re.)
11 Dai roro kpahe epanọ oma o te were owhẹ te okenọ whọ te jọ aparadase evaọ otọakpọ na. Who ti gbe roro nọ ẹdẹ jọ whọ te mọ hayo who ti whu hu. (Aiz. 25:8; 33:24) Jihova o ti ru emamọ eware kpobi nọ whọ gwọlọ kẹ owhẹ. Kọ eware vẹ whọ te gwọlọ ru oke yena? Kọ oghẹrẹ nọ a re ku eware, hayo oghẹrẹ nọ emama Ọghẹnẹ e rrọ? Binikọ, ikporakporo hayo oghẹrẹ nọ a rẹ drọ eware? Ma riẹ nọ ẹsejọhọ a te gwọlọ ahwo nọ a rẹ drọ eplane uwou gbe ahwo nọ e rẹ bọ iwou, te enọ e rẹ kọ eware. Yọ a te gwọlọ ahwo nọ i re ru eware jọ kẹ ahwo nana. A te gwọlọ ahwo nọ i re there ẹbẹ, ahwo nọ e rẹ ruẹrẹ eware nọ e raha, ahwo nọ i re ku oghoghẹrẹ ekwakwa nọ a re ro ru iruo, te enọ e rẹ rẹrote ighẹ re oria o sae jọ wowoma. (Aiz. 35:1; 65:21) Yọ fikinọ ma ti whu hu na, oke o te jariẹ lelele kẹ owhẹ nọ whọ sai ro wuhrẹ oware kpobi nọ whọ gwọlọ wuhrẹ.
12 Eva e te were omai kẹhẹ nọ ma ti dede ahwo nọ a kpare ze. (Iruẹru 24:15) Roro kpahe epanọ oma o te were owhẹ te okenọ whọ te romatotọ rri emama Ọghẹnẹ buobu, o vẹ te lẹliẹ owhẹ riẹ eware buobu kpahe Jihova nọ whọ riẹ vẹre he. (Ol. 104:24; Aiz. 11:9) Yọ, mai woma na, udu u gbe ti brukpe owhẹ vievie he inọ who ru oware jọ nọ o be dha Jihova eva, keme oware ovo o te gbẹ thọ owhẹ obọ họ. Kọ nọ eghale nọ e rẹ vrẹ ohwo fiki “omaweromẹ ubroke ọrọ uzioraha”? (Hib. 11:25) Ma rẹ kuvẹ re oware utioye o via kẹ omai vievie he. Ma rẹ dawo oma mai kpobi re eghale nana i te omai obọ. Yọ ẹdẹ jọ aparadase nọ ma bi dhe ẹme riẹ ẹtẹta na ọ te ginẹ jọ akpọ na, ma vẹ te rọ ibiaro ivẹ mai na ruẹ e riẹ. Jihova o gbe you omai te epanọ o ro vi Ọmọ riẹ ze ti whu kẹ omai hi, enana kpobi nọ ma be ta na, ma hae te ta ae he.
Eware vẹ e te mae lẹliẹ eva were owhẹ evaọ aparadase na? (Rri edhe-ẹme avọ 11-12)
DHESẸ NỌ OWARE NỌ JIHOVA O RU KẸ OWHẸ O DA OWHẸ ẸRO FIA
13. Eme o re dhesẹ nọ oware nọ Jihova o ru nọ o ro vi Ọmọ riẹ ze ti whu kẹ omai na o da omai ẹro? (2 Ahwo Kọrint 6:1)
13 Ẹvẹ ma re ro dhesẹ nọ oware nọ Jihova o ru nọ o ro vi Ọmọ riẹ ze ti whu kẹ omai na o da omai ẹro fia? Ma rẹ rọ ajọwha gọ Jihova, iruo riẹ e rẹ mae jọ omai oja evaọ uzuazọ mai. (Mat. 6:33) Ere u gine fo nọ o rẹ jọ, keme Jesu o whu “re enọ e rrọ uzuazọ a gbẹ rria kẹ omobọ rai hi, rekọ rọkẹ ọnọ o whu kẹ ae nọ a kpare ze.” (2 Kọr. 5:15) Ma te bi ru ere u re dhesẹ nọ ma riẹ oware nọ Jihova ọ rọ fiki riẹ dhesẹ uwowou ulogbo yena kẹ omai.—Se 2 Ahwo Kọrint 6:1.
14. Eme u re dhesẹ nọ ma fievahọ Jihova?
14 Oware ofa nọ u re dhesẹ nọ oware nọ Jihova o ru kẹ omai na o da omai ẹro họ, ma re ru oware nọ ọ ta, avọ eva nọ ma fihọ iẹe inọ ma te ru oware nọ ọ gwọlọ, eware e te riẹ nya kẹ omai. Kọ eme u re dhesẹ nọ ma fievahọ iẹe? Ma tẹ gwọlọ ru oware jọ, ma re roro kpahe oghẹrẹ nọ Jihova o ti rri oware na. Ma rehọ iẹe nọ, ma gwọlọ kpohọ isukulu ilogbo, hayo ma be jiroro oghẹrẹ iruo nọ ma re ru. Ma rẹ nọ omamai nọ, ‘Kọ eme Jihova ọ gwọlọ nọ me ru?’ (1 Kọr. 10:31; 2 Kọr. 5:7) Ma te ru oware nọ u dhesẹ nọ ma fievahọ Jihova, usu mai avọ iẹe o rẹ ga vi epaọ ọsosuọ, yọ ẹrọwọ mai ọ rẹ ga re. Oke yena ẹruore nọ ma wo na u ve ti mu omai ẹro gaga.—Rom 5:3-5; Jem. 2:21, 22.
15. Evaọ ezi Emu Owọwọ na, eme ma re ru ro dhesẹ nọ oware nọ Jihova o ru kẹ omai na o da omai ẹro?
15 Oware ofa jọ o riẹ nọ ma re ru nọ u re dhesẹ nọ oware nọ Jihova o ru kẹ omai na o da omai ẹro. Evaọ ezi Emu Owọwọ na, ma re ru oware nọ u dhesẹ nọ ma rri uwhu Jesu na ruaro. Ma rẹ kaki mu oma họ ẹruẹrẹkpahe re Emu Owọwọ na o gbe vo omai hi, ma ve je zizie amọfa. (1 Tim. 2:4) Yọ okenọ who ti zizie ahwo, vuẹ ae oghẹrẹ nọ Emu Owọwọ na ọ te jọ. A ru ividio ivẹ jọ fihọ jw.org nọ whọ sai dhesẹ kẹ ae. Uzoẹme ọjọ họ, Fikieme Jesu O ro Whu? Ọrọ avọ ivẹ kọ, Ru Ekareghẹhọ Uwhu Jesu. Jọ ekpako ukoko a daoma zizie ahwo nọ a siọ ewuhrẹ gbe usi uwoma ba no. Dai roro epanọ eva e te were Jihova Ọghẹnẹ avọ Jesu gbe ikọ-odhiwu na te, nọ a tẹ ruẹ nọ ogodẹ Ọghẹnẹ jọ nọ o vru o zihe ziọ uthuru na. Ma riẹ nọ ọjọ o te zihe ze, eva e te were omai kpobi re. (Luk 15:4-7) Nọ ma ti kpohọ Emu Owọwọ na, joma daoma yere ahwo nọ a nyaze ti kuomagbe omai, orọnikọ omoma mai ọvo ma re yere he. Ma ve je yere ahwo nọ a re ziọ Emu Owọwọ kẹle kẹle he. Joma dede ai rehọ sasasa.—Rom 12:13.
16. Fikieme ma jẹ daoma kpohọ usi uwoma vi epaọ anwẹdẹ evaọ ezi Emu Owọwọ na?
16 Kọ whọ sai kpohọ usi uwoma vi epaọ anwẹdẹ evaọ ezi Emu Owọwọ na? Who te ru ere u re dhesẹ nọ oware nọ Jihova Ọghẹnẹ avọ Jesu a ru kẹ omai na o da owhẹ ẹro fia. Epanọ ma fiomahọ iruo Jihova te, ere ma te ruẹ eghale riẹ te. Nọ ma jẹ te ruẹ oghẹrẹ nọ ọ be rọ ghale omai evaọ usi uwoma nọ ma be ta na, o vẹ te lẹliẹ omai fievahọ iẹe vi epaọ anwẹdẹ. (1 Kọr. 3:9) U te no ere no, whọ jọ isase Ebaibol ọrọ Emu Owọwọ na o thọrọ owhẹ ẹro ho. Hai se eria Ebaibol nọ a fihọ inọ ma se evaọ obe Ẹkiẹriwo Ikereakere na Kẹdẹ Kẹdẹ na, hayo enọ e rrọ omobe nọ ma re ro ru uwuhrẹ udevie-oka na. Whọ sae tubẹ rọ eria Ebaibol yena ru uwuhrẹ omobọ ra dede.
17. Eme o rẹ lẹliẹ eva mai were Jihova? (Rri ẹkpẹti na “Epanọ Ma re ro Dhesẹ nọ Oware nọ Jihova O Ru O Da Omai Ẹro.”)
17 Uzẹme riẹ họ, nọ eware e tẹ rrọ oghẹrẹ jọ kẹ owhẹ, whọ sai ti ru eware nọ ma ta ẹme te evaọ uzoẹme nana kpobi hi. Rekọ kareghẹhọ nọ Jihova ọ rẹ rehọ onọ who ru wawo onọ omọfa o ru hu. Ọ riẹ epanọ who you rie te. Yọ eva e rẹ were iẹe nọ ọ tẹ ruẹ nọ who rri uwhu Ọmọ riẹ na ruaro.—1 Sam. 16:7; Mak 12:41-44.
18. Ẹvẹ ma sai ro dhesẹ kẹ Jihova avọ Jesu nọ oware nọ a ru na o da omai ẹro?
18 Ogbẹrọ Jesu nọ o whu kẹ omai hi, a hae te rọ izieraha mai vrẹ omai hi. Ma hae te jọ egbẹnyusu Jihova gbe he, yọ ma hae sai wo ẹruore uzuazọ ebẹdẹ bẹdẹ hẹ. Fikiere joma hai ru oware nọ u dhesẹ nọ eva e be were omai gaga inọ Jihova o you omai, o te vi Ọmọ riẹ ze ti whu kẹ omai re eghale nana kpobi e sai te omai obọ. (1 Jọn 4:19) Oye ovo gbe he, joma hai ru oware nọ o rẹ lẹliẹ Jesu omariẹ riẹ nọ uwhu nọ o whu kẹ omai na, ma rri rie ghaghae.—Jọn 15:13.
OLE AVỌ 154 Uyoyou O rẹ Jọ Bẹdẹ