Epanọ Whọ Sae rọ Rehọ Aro Kele Jihova Rọvrẹ Amọfa

1-2. (a) Fikieme o rẹ rọ bẹ omai ẹsejọ re ma rọvrẹ? (b) Eme a ru Sista Denise nọ ọ rọvrẹ ohwo nọ o ru oware na?

KỌ RE whọ rọvrẹ amọfa o rẹ bẹ owhẹ? O rẹ bẹ omai ahwo buobu, maero nọ oware nọ a ru omai na o tẹ da omai gaga. Rekọ ma sae kpairoro vrẹ oware kpobi nọ ohwo o ru omai ma vẹ rọvrẹ riẹ. Joma ta kpahe oware jọ nọ o via kẹ oniọvo-ọmọtẹ mai nọ a re se Denise.a Oware nọ a ru rie nọ ọ rọvrẹ ohwo na o rro gaga. Evaọ ukpe 2017, Denise avọ ahwo uwou riẹ a kpohọ Oria nọ U Wuzou Iruo Isẹri Jihova evaọ akpọ na soso. Evaọ oke nọ a je ro zihe kpo, omoto ọ tẹ va edraeva jọ abọ, omoto na ọ tẹ jamo omoto rai. Nọ a wo asidẹnte na, Denise ọ gbẹ riẹ obonọ ọ rrọ họ. Nọ o ti dhidhi aro vi no, a tẹ te vuẹe nọ emọ riẹ a nwoma gaga. Yọ ọzae riẹ Brian o whu evaọ asidẹnte na. Nọ Denise ọ kareghẹhọ oghẹrẹ nọ o jọ kẹe evaọ oke yena ọ ta nọ: “O da omẹ gaga, yọ mẹ tubẹ riẹ oware nọ me re ru okioke yena ha.” O yo uwhremu na nọ orọnikọ oware jọ o jẹ kẹ edraeva na uye he, hayo kọ o je ru oware jọ nọ o lẹliẹ omoto na vae abọ họ. Oniọvo na ọ tẹ lẹ se Jihova re o fiobọhọ kẹe rọ udu kpotọ.

² A rehọ ẹme na kpohọ okọto, a tẹ rehọ uzi ohwo-okpe kru ọzae nọ ọ jamo rai na. Yọ a te bruoziẹ kpe ohwo fiki uzi utioye na, a rẹ sai fi ei họ uwou-odi. Rekọ nọ a bi gu ẹdhọ na a tẹ vuẹ Sista Denise inọ oware nọ ọ ta ze a ti rri ro bruoziẹ ọzae na. Sista Denise ọ ta nọ: “O tẹ wọhọ ẹsenọ a bẹre omola mẹ rovie, je ku egalọno uwhei fihọ iẹe eva. O tẹ wọhọ omonwa okpokpọ nọ o be jẹ lẹliẹ omẹ roro kpahe asidẹnte yena nọ o raha eware ku omẹ abọ na.” Nọ eka jọ e vrẹ no, Denise o te zihe kpohọ okọto na re ọ ta oware nọ a re ru ọzae nọ ọ wha okpẹtu gbe edada na kpobi ze na. Kọ eme ọ ta? Denise ọ ta kẹ obruoziẹ na nọ, ivie jọ ọ re ohrọ ọzae na.b Nọ oniọvo na o ti ku ẹme riẹ họ no, irui-oviẹ i te je su no obruoziẹ na aro ze. Ọ tẹ ta nọ: “Anwọ ikpe udhegbisoi nọ mẹ rọ rrọ obruoziẹ na, me ri yo ẹme otiọna ẹdẹvo evaọ ekọto ho. Mẹ re ruẹ ohwo nọ a ru thọ nọ ọ be lẹ nọ a re ohrọ ohwo nọ o ru rie oware uyoma na ha. Ohwo ọvo ọ re ta ẹme nọ u dhesẹ nọ o you ohwo otiọye na hayo ọ rọvrẹ riẹ hẹ.”

3. Eme o lẹliẹ Sista Denise rọvrẹ ohwo na?

³ Eme o lẹliẹ Denise sae rọvrẹ ọzae yena? O roro kpahe oghẹrẹ nọ Jihova ọ be rọvrẹ omai. (Mae. 7:18) Nọ ma te rri erọvrẹ nọ Jihova ọ be rọvrẹ omai ruaro, ma te rọvrẹ amọfa re.

4. Eme Jihova ọ gwọlọ nọ ma ru? (Ahwo Ẹfisọs 4:32)

⁴ Jihova ọ gwọlọ nọ ma rọvrẹ amọfa no eva ze wọhọ epanọ ọ be rọvrẹ omai na. (Se Ahwo Ẹfisọs 4:32.) Ọ gwọlọ nọ ma hae rọvrẹ ahwo nọ a ru omai thọ kẹse kẹse. (Ol. 86:5; Luk 17:4) Ma te jọ uzoẹme nana ta kpahe eware esa nọ i ti fiobọhọ kẹ omai rọvrẹ ahwo ziezi, je tube vi epaọ anwẹdẹ.

WHO RU WỌHỌ ẸSENỌ OWARE ỌVO O VIA HA HA

5. Nọ ma te rri ẹme nọ ọ rrọ Itẹ 12:18, ẹvẹ o rẹ da omai te nọ a te ru omai thọ?

⁵ Ẹsejọ ohwo ọ tẹ ta oghẹrẹ ẹme jọ hayo ru omai oghẹrẹ oware jọ o rẹ kẹ omai uye gaga. Yọ o rẹ mae da omai nọ ohwo na ọ tẹ rrọ ogbẹnyusu ọkpekpe mai hayo ohwo uviuwou mai. (Ol. 55:12-14) Evaọ ẹsejọ oware nọ ohwo o ru hayo ta kẹ omai o rẹ da omai ghegheghe wọhọ ẹsenọ a rọ amagha duwu omai. (Se Itẹ 12:18.) Rekọ ẹsejọ ma re ru wọhọ ẹsenọ oware nọ ohwo na o ru na o da omai hi. Ma te ru ere, o rẹ wọhọ ẹsenọ a rọ amagha duwu omai jẹ nyasiọ iẹe ba oria na. Ere re, ma te bi ru wọhọ ẹsenọ oware nọ a ru omai na o da omai hi, o rẹ lẹliẹ omai kpairoro vrẹ oware na ha.

6. Ẹvẹ o rẹ jọ omai oma nọ ohwo jọ o te ru omai thọ?

⁶ Nọ ohwo o te ru omai thọ, eva e sae kake dha omai. Yọ Ebaibol ọ ta dede nọ ma sai mu ofu. Rekọ Ebaibol ọ vẹvẹ omai unu nọ ma mu ofu rifihọ họ. (Ol. 4:4; Ẹf. 4:26) Fikieme? Keme oware nọ o rrọ ohwo udu, oye ọ rẹ gwọlọ ru. Ofu avọ ohwo a rẹ ta ọvo ho. (Jem. 1:20) Eva e sae kake dha omai nọ a te ru omai thọ. Rekọ obọ mai o rrọ sọ ma re mu ofu rifihọ hayo ma rẹ kpairoro vrẹ.

7. Ẹsejọ nọ ohwo o te ru omai oware nọ o da omai, ẹvẹ ma re rri omamai gbe ohwo nọ o ru oware na?

⁷ O rẹ da omai gaga nọ ohwo jọ o te kienyẹ omai, hayo nọ ma tẹ reoja fiki oware nọ a ru omai. Oware utioye na o via kẹ Sista Ann. Ọ ta nọ: “Nọ mẹ jọ ọmaha, ọsẹ mẹ ọ tẹ kwa siọ oni mẹ ba, ọ tẹ rehọ ọmọtẹ jọ nọ a rehọ ze inọ ọ yọrọ omẹ evaọ uwou mai. Me rri rie nọ me gbe wo ohwo ho. Nọ ọmọtẹ na o yẹ emọ kẹ ọsẹ mẹ no, me te rri rie nọ ọsẹ mẹ o gbe rri omẹ fihọ ọmọ riẹ hẹ. Nọ mẹ be rro ze na, me te rri omamẹ nọ a se omẹ gbe ohwo ho.” Oniọvo-ọmọtẹ jọ nọ a re se Georgette ọ ta nọ o da riẹ gaga nọ ọzae riẹ o lele aye ọfa wezẹ. Ọ ta nọ: “Mẹ avọ ọzae mẹ na ma nya usu no emaha ze. Mai imava dede ma je ru ọkobaro. Oware nọ o ru omẹ na o da omẹ gaga.” Oniọvo-ọmọtẹ ọfa nọ a re se Naomi ọ ta nọ: “Me roro ẹdẹvo nọ ọzae mẹ ọ sai ru omẹ oware nọ o rẹ da omẹ te ẹzi hi. Fikiere nọ ọ ta nọ ọ be hae lẹlẹ rri ifoto-ẹbẹba gbe ifimu ọfariẹ-ogbe, o da omẹ gaga. Me rri rie nọ ọ be viẹ omẹ họ anwẹdẹ.”

8. (a) Fodẹ eware nọ e rẹ lẹliẹ omai rọvrẹ amọfa. (b) Irere vẹ i re te omai nọ ma tẹ rọvrẹ ahwo? (Rri ẹkpẹti na “Kọ Otẹrọnọ Ohwo O Ru Omai Oware Uyoma nọ O rẹ Da Omai Ẹsikpobi?”)

⁸ Ma sai ru re ahwo a siọ omai ba eruthọ họ. Rekọ ma sai kru oma mai re ma siọ ofu ba emu. Oware nọ o mai woma nọ ma re ru họ ma rẹ rọvrẹ rai. Fikieme? Keme ma you Jihova, yọ ọye ọ be vuẹ omai nọ ma rọvrẹ amọfa na. Nọ ma gbẹ rọvrẹ ohwo nọ o ru omai thọ họ, ma je gbe bi mu ofu, o sae lẹliẹ omai ru oware ugheghẹ jọ, je tube ru oware nọ o rẹ wha uye se omai. (Itẹ 14:17, 29, 30) Rri ẹme nọ oniọvo-ọmọtẹ nọ a re se Christine ọ ta. Anọ: “Nọ me te bi mu ofu, mẹ rẹ gbẹ sae hwẹ tere he. Yọ mẹ rẹ gbẹ sae re emamọ emu nọ u fo nọ mẹ rẹ re he. Mẹ sae wezẹ ziezi hi. Yọ ẹsibuobu oware na o rẹ lẹliẹ omẹ roro iroro. Yọ o rẹ whae ze nọ me re ro ru eware nọ e rẹ kẹ ọzae mẹ gbe amọfa uye.”

9. Fikieme ma re ro si ofu no eva?

⁹ Nọ ohwo nọ o ru oware nọ o da omai na ọ gbẹ maki wounu hu, ma rẹ sai ru re oware nọ o ru na o gbẹ da omai ga hrọ họ. Eme ma re ru? Sista Georgette nọ ma fodẹ ẹsiẹ na ọ ta nọ: “Nọ orọo mai o make fa no, u kri omojọ re oware nọ ọzae mẹ o ru omẹ na u te ti no omẹ eva. Rekọ nọ me si ei no eva no, o lẹliẹ udu te omẹ otọ.” Nọ ma te si oware nọ a ru omai thọ no eva, oware na o rẹ gbẹ da omai rifihọ họ. Yọ o rẹ lẹliẹ udu te omai otọ, je yeri akpọ mai vrẹ. (Itẹ 11:17) Kinọ oware nọ ohwo na o ru na o gbẹ be kaki no owhẹ eva ha, eme who re ru?

OWARE NỌ WHO RE RU RE WHỌ SIỌ OFU BA EMU

10. Fikieme ma re ro thihakọ omojọ bẹsenọ oware na u re no omai eva? (Rri iwoho na re.)

¹⁰ Kọ eme who re ru nọ oware nọ ohwo o ru owhẹ o gbẹ be kaki no owhẹ eva ha? Whọ sai thihakọ omojọ bẹsenọ oware nọ a ru owhẹ na u re no owhẹ eva. Orọnikọ okioke nọ a ro siwi ohwo nọ ọ nwoma gaga, oma na u re ro kpo ho. Rekọ u re kri omojọ re u te ti kpo ruẹrẹhọ ziezi. Epọvo na re, nọ ohwo o te ru omai oware nọ o da omai gaga, ẹsejọ u re kri omojọ re ma tẹ te sae rọvrẹ ohwo na no eva ze.—Ọtausi. 3:3; 1 Pita 1:22.

11. Ẹvẹ olẹ o sai ro fiobọhọ kẹ omai rọvrẹ amọfa?

¹¹ Lẹ se Jihova re o fiobọhọ kẹ owhẹ sae rọvrẹ ohwo na.c Sista Ann nọ ma ta ẹme te ẹsiẹ na, ọ ta nọ olẹ u fiobọhọ kẹe gaga. Ọ ta nọ: “Mẹ lẹ se Jihova nọ ọ rọ eware nọ ohwo kpobi evaọ uwou mai o ru thọ rọvrẹ riẹ. Nọ mẹ lẹ no, me te kere ileta se ọsẹ mẹ avọ aye ọkpokpọ riẹ inọ mẹ rọvrẹ rai no.” Ann ọ ta nọ o lọhọ kẹe re o ru oware nọ o ru na ha. Rekọ ọ ta nọ: “Mẹ daoma ru ei keme mẹ gwọlọ rọ aro kele Jihova rọvrẹ. Yọ mẹ riẹ nọ ẹsejọhọ nọ mẹ tẹ rọvrẹ ọsẹ mẹ avọ aye riẹ na, o te lẹliẹ ae wuhrẹ kpahe Jihova.”

12. Fikieme u ro fo re ma rọvrẹ amọfa wọhọ epanọ Jihova ọ ta na, ukpenọ ma re ru orọ udu mai? (Itẹ 3:5, 6)

¹² Fievahọ Jihova inọ eware e te riẹ nya nọ who te ru oware nọ ọ ta. Who lele epanọ oware na o da owhẹ te he. (Se Itẹ 3:5, 6.) Jihova ọ riẹ oware nọ o mai woma kẹ omai. (Aiz. 55:8, 9) Jihova ọ sae vuẹ omai nọ ma ru oware nọ o rẹ wha uye se omai hi. Fikiere nọ ọ ta nọ ma rọvrẹ amọfa na, ma riẹ nọ o te wha erere se omai. (Ol. 40:4; Aiz. 48:17, 18) Rekọ nọ ma gbe ru oware nọ Jihova ọ ta ha, ma je bi ru orọ udu mai fikinọ oware na o da omai gaga, o rẹ whae ze nọ ma gbẹ sae rọvrẹ ohwo nọ o ru omai thọ na ha. (Itẹ 14:12; Jeri. 17:9) Sista Naomi nọ ma ta ẹme te ẹsiẹ na ọ ta nọ: “Oke ọsosuọ me roro nọ mẹ riẹ ru nọ me bi ro mu ofu kẹ ọzae mẹ inọ o rri ifoto-ẹbẹba. Me roro nọ mẹ tẹ rọvrẹ riẹ, ọ te wariẹ ru ei, inọ ọ te gbẹ daezọ họ sọ oware na o be da omẹ. Mẹ jọ udu mẹ ta nọ Jihova ọ riẹ nọ oware na o rẹ da ohwo gaga. Fikiere mẹ gbẹ make rọvrẹ riẹ hẹ, ẹme ọ riẹ hẹ. Rekọ mẹ tẹ te ruẹ nọ, dede nọ Jihova ọ riẹ nọ oware na o rẹ ginẹ kẹ ohwo uye, ọ te ta nọ mẹ riẹ ru hu nọ mẹ gbẹ rọvrẹ riẹ hẹ. Jihova ọ riẹ epanọ oware na o be da omẹ te, yọ ọ riẹ nọ u ti kri omojọ re mẹ sai si ei no udu. Ghele na, ọ gwọlọ nọ mẹ rọvrẹ riẹ.”d

RORO KPAHE EWARE IWOMA NỌ OHWO NA O BI RU

13. Wọhọ epanọ Ahwo Rom 12:18-21 o ta, eme u fo nọ ma re ru?

¹³ Nọ ma tẹ rọvrẹ ohwo nọ o ru omai thọ no, ma rẹ daoma re ma gbẹ ta ẹme kpahe oware na ha. Ere ọvo ho, otẹrọnọ ohwo na oniọvo, ma re ru epanọ ma sai ro lele ohwo na riẹ yeri. (Mat. 5:23, 24) U fo re ma si ofu na kpobi no eva mai no. Ma vẹ re ohrọ ohwo na, jẹ rọvrẹ riẹ. (Se Ahwo Rom 12:18-21; 1 Pita 3:9) Kọ ẹvẹ ma sai ro ru ei?

14. Eme ma rẹ daoma ru, kọ fikieme?

¹⁴ Ma rẹ daoma rri ohwo nọ o ru omai thọ na epanọ Jihova o rri rie. Eware iwoma nọ ahwo a bi ru Jihova o re rri. (2 Irv. 16:9; Ol. 130:3) Nọ ma tẹ be gwọlọ iruthọ ahwo, ma rẹ ginẹ ruẹ e rai. Rekọ o jẹ rọnọ eware iwoma ma be gwọlọ evaọ oma rai, ma rẹ ruẹ e rai re. Ma te bi muẹrohọ eware iwoma nọ ahwo a bi ru, ẹsiẹe o te mae lọhọ re ma rọvrẹ rai. Oriruo oniọvo jọ nọ a re se Jarrod o dhesẹ nọ ere o ginẹ rrọ. Ọ ta nọ: “Nọ mẹ tẹ kareghẹhọ eware iwoma buobu nọ ohwo nọ o ru omẹ thọ o ru no, ẹsiẹe o rẹ mae lọhọ re mẹ rọvrẹ riẹ. Keme me re gbe se oware nọ o ru na gbe oware ovo ho.”

15. Nọ ma tẹ rọvrẹ ohwo no, fikieme u ro fo re ma ta kẹ ohwo na nọ ma rọvrẹ riẹ no?

¹⁵ Oware ofa jọ nọ u wuzou gaga nọ ma re ru họ, ma rẹ vuẹ ohwo na nọ ma rọvrẹ riẹ no. Fikieme? Naomi nọ ma ta ẹme te no ẹsejọ na ọ ta nọ: “Nọ ọzae mẹ ọ nọ omẹ sọ mẹ rọvrẹ riẹ no, mẹ jẹ te ta kẹe nọ mẹ rọvrẹ riẹ no. Rekọ ẹme na ọ bẹ omẹ ẹta. U te ru nọ mẹ rọ riẹ nọ mẹ re ginẹ rọvrẹ riẹ no eva ze he. Rekọ nọ oke o be nya na mẹ tẹ ta kẹe nọ mẹ rọvrẹ riẹ no. Nọ mẹ ta ere no, ibiaro i su ọzae mẹ ame. Yọ eva e were riẹ gaga. Anwọ oke yena ze na, mẹ be sai fievahọ iẹe. Yọ mai imava ma wariẹ kẹle ohwohwo gaga no.”

16. Eme who wuhrẹ no ẹme erọvrẹ nọ ma ta na ze?

¹⁶ Jihova ọ gwọlọ nọ ma rọvrẹ amọfa. (Kọl. 3:13) Rekọ o rẹ nwane lọhọ tere ẹsejọ họ. Rekọ ma sae rọvrẹ amọfa. Yọ re ma ru ei, orọnikọ ma rẹ faki ru wọhọ ẹsenọ oware ovo o via ha ha. Ma vẹ jẹ daoma si ẹme na no eva. U je no ere no, ma rẹ daoma roro kpahe emamọ eware nọ ohwo na o bi ru.—Rri ẹkpẹti na “Eware Esa nọ I re Fiobọhọ kẹ Owhẹ Sae Rọvrẹ.”

RORO KPAHE IRERE NỌ MA RE WO NỌ MA TẸ RỌVRẸ AMỌFA

17. Irere vẹ i re te omai nọ ma tẹ rọvrẹ amọfa?

¹⁷ U wo eware buobu nọ e rẹ lẹliẹ omai rọvrẹ amọfa. Joma ta ẹme te ejọ. Orọ ọsosuọ, ma gwọlọ rọ aro kele Ọsẹ mai nọ o wo ohrọ-oriọ gaga na Jihova, je ru oware nọ o rẹ were iẹe. (Luk 6:36) Orọ avọ ivẹ, ma tẹ rọvrẹ ahwo u dhesẹ nọ o were omai nọ Ọghẹnẹ ọ be rọvrẹ omai. (Mat. 6:12) Orọ avọ esa, erọvrẹ u re ru nọ ma gbẹ mọ oghẹrẹ eyao jọ họ. Yọ ma re lele ahwo riẹ yeri.

18-19. Nọ ma tẹ rọvrẹ ohwo, eme o sai noi ze?

¹⁸ Nọ ma tẹ be rọvrẹ ahwo ma sai wo eghale buobu nọ ma rẹro rai hi. Nwanọ ere o via kẹ Denise nọ ma ta ẹme te ẹsiẹ na. Ọ riẹ hẹ inọ edraeva nọ ọ jamo rai na ọ ta nọ o ti kpe oma riẹ no nọ a te gu ẹdhọ na no. Rekọ nọ Denise ọ vuẹe nọ ọ rọvrẹ riẹ no, eva e were riẹ te epanọ ọ rọ ta dede nọ Isẹri Jihova a wuhrẹ iẹe Ebaibol.

¹⁹ Ẹsejọhọ o sae jọ bẹbẹ kẹ omai re ma rọvrẹ ohwo nọ o ru omai thọ. Rekọ irere buobu i re te omai nọ ma tẹ rọvrẹ. (Mat. 5:7) Fikiere, joma daoma gaga re ma hae rọvrẹ amọfa nwane wọhọ epanọ Jihova ọ be rọvrẹ omai na.