“Jihova Ọ Siọ Omẹ Ba Ẹdẹvo Ho”

ỌSẸGBONI MẸ A SE EGAGỌ ỌGHẸNẸ GBOJA

Ọsẹgboni mẹ yọ ahwo nọ a wọ egagọ Katọlik họ uzou vẹre. Rekọ nọ a jẹ jọ Ebaibol ruẹ nọ odẹ Ọghẹnẹ họ Jihova, a te ti kurẹriẹ ruọ ukoko Isẹri Jihova. A rọ ukoko na zaro ho. Ọsẹ mẹ ekapenta, yọ ọ jẹ hae kare emema Jesu. Rekọ nọ o ti kurẹriẹ no, ọ tẹ rọ onaa yena nọ o wo na fiobọhọ evaọ ukoko na. Uwou-ehru ma jẹ rria. Ọsẹ mẹ ọ tẹ nabi ku eware fihọ uwou nọ o jọ edhe-obotọ na, o te ru ei fihọ epanọ Ọgwa Uvie ọ rẹ jọ. Yọ ọye ọ jọ Ọgwa Uvie ọsosuọ evaọ iwhre Manila nọ a re se San Juan del Monte. Manila họ okpẹwho nọ osu Philippines ọ rrọ.

A yẹ omẹ evaọ ukpe 1952. Ọsẹgboni mẹ a jẹ hai wuhrẹ omẹ Ebaibol. Yọ ere a je wuhrẹ inievo-emezae ene mẹ gbe erọ emetẹ esa mai. Aikpobi na a vi omẹ. Nọ mẹ be rro ze na, ọsẹ mẹ ọ jẹ hae vuẹ omẹ nọ me se uzou ọvo evaọ Ebaibol kẹdẹ kẹdẹ. Ọsẹ mẹ ọ rọ ebe ukoko na buobu wuhrẹ omẹ. Ẹsejọ ọsẹgboni mẹ a jẹ hai zizie esẹro ọnyawariẹ gbe inievo nọ a vi no obọ uwou ogha ze ziọ uwou mai te rria. Eme nọ inievo nana a jẹ hae vuẹ omai nọ a tẹ kpahe omai, e jẹ hai fiobọhọ kẹ omai kpobi evaọ uwou na. Yọ eva e jẹ hae were omai gaga. O tẹ so ẹe ze nọ ma ro se iruo Uvie na gboja gaga.

Fikinọ ọsẹgboni mẹ a jẹ gọ Jihova ziezi, me wuhrẹ emamọ eware buobu mi ai. Uwhremu na, oni mẹ ọ tẹ jẹ mọ gaga, o te ti whu. Mẹ avọ ọsẹ mẹ ma te mu ọkobaro oke-kpobi họ evaọ 1971. Nọ u je te ukpe 1973 nọ mẹ jọ udhukpe, ọsẹ mẹ o te je whu. Mẹ tẹ jọ ọkọkora keme ọsẹgboni mẹ a whu siọ omẹ ba no. Rekọ ẹruore nọ me wo nọ Ebaibol ọ ta ẹme te na “u muẹro jẹ rrọ gaga.” (Hib. 6:19) Kọ oye u ru nọ me ro kru udu ga be gọ Ọghẹnẹ mẹ vrẹ. Nọ ọsẹ mẹ o whu no, u kri hi, a tẹ rọ omẹ mu ọkobaro obọdẹ. A te vi omẹ kpohọ ukoliko jọ nọ u siomano nọ a re se Coron nọ o rrọ ubrotọ Palawan.

OMA O JỌ OMẸ GOLI EVAỌ OBONỌ A VI OMẸ NYA

Ikpe udhegbọvo mẹ jọ okenọ me ro kpobọ Coron. Ẹwho nọ o rovie aro a jọ yẹ omẹ, etẹe mẹ jọ rro te ohwo. Fikiere nọ me te obọ Coron, akpọ o gbe omẹ unu nọ mẹ ruẹ nọ te ikpẹ, te ame, te imoto gbe emẹshini e rrọ ẹwho na tere he. Inievo jọ e jọ ẹwho na. Rekọ ọkobaro ọ jariẹ nọ o re lele omẹ kpohọ usi uwoma ẹsikpobi hi, fikiere ẹsejọ mẹ ọvo usu. Evaọ amara ọsosuọ nọ mẹ rọ jọ obei na, o jẹ da omẹ gaga inọ mẹ nyasiọ inievo mẹ gbe egbẹnyusu mẹ ba no. Aso o te te no, me ve bi rri isi nọ e rrọ ehru na ọvo, yọ irui-oviẹ i bi su no omẹ aro ze. Me te je roro nọ me re dhugbe no iruo na re me zihe kpo.

Ẹsenọ oma o tẹ rrọ omẹ goli, mẹ rẹ ta eva mẹ kpobi kẹ Jihova. Mẹ rẹ kareghẹhọ eme jọ nọ me se evaọ Ebaibol gbe ebe ukoko na. Oria Ebaibol jọ nọ mẹ jẹ hae kareghẹhọ gaga họ Olezi 19:14. Etẹe na o lẹliẹ omẹ ruẹ nọ Jihova ọ te jọ “Utho mẹ gbe Osiwi mẹ” nọ me te bi roro didi kpahe eware nọ o ru no, te uruemu riẹ, gbe eware efa nọ e rẹ were iẹe. Mẹ jọ Uwou-Eroro jọ ruẹ uzoẹme jọ nọ o ta nọ “You Are Never Alone”a nọ u fiobọhọ kẹ omẹ gaga. Esese me je sei. Mẹ tẹ te ruẹ nọ, ẹsenọ mẹ tẹ rrọ goli, o wọhọ ẹsenọ mẹ avọ Jihova ọvo ma rrọ etẹe. Fikiere yọ uvẹ nọ mẹ rẹ rọ lẹ se Jihova ziezi, wuhrẹ Ẹme riẹ, je roro didi.

Nọ me te obọ Coron no, u gbe kri hi, a tẹ rọ omẹ mu ọkpako ukoko. Mẹ ọvo họ ọkpako ukoko nọ ọ jọ obei. Fikiere mẹ họ ohwo nọ ọ jẹ hai ru Isukulu Odibọgba Esuo-Ọghẹnẹ, Ewuhrẹ Odibọgba, Uwuhrẹ Obe Ukoko, gbe Uwuhrẹ Uwou-Eroro. Nọ eware nọ mẹ jẹ hai ru koka koka. Ovuẹ ogbotu nọ a rẹ kẹ koka koka, mẹ ọvona. Fikinọ iruo e vọ omẹ abọ no, me gbe je roro nọ mẹ rrọ goli hi.

Ahwo a je yo usi uwoma gaga evaọ obọ Coron. Ahwo jọ nọ me je wuhrẹ Ebaibol a họ-ame uwhremu na. Rekọ usi uwoma obei o nwane lọhọ tere he. Ẹsejọ re mẹ tẹ te nya te oria nọ mẹ rẹ jọ ta usi uwoma, o rẹ rehọ ubro okpẹdoke soso. Yọ mẹ re riẹ oria nọ me ti kiẹzẹ hẹ nọ me te te obei no. Ma re kpohọ ikoliko esese jọ nyae ta usi uwoma re. Ẹsibuobu okọ ẹjini mẹ rẹ ro nya, yọ ẹkporo o bi fi nọ ma bi bi abade vrẹ na. Yọ orọnikọ mẹ riẹ ame ẹya dede he. Ghelọ ebẹbẹ yena kpobi, Jihova ọ thọ omẹ yọ ọ rẹrote omẹ. Uwhremu na mẹ rọ riẹ nọ kpakọ Jihova ọ jẹ kuvẹ re ebẹbẹ yena i te omẹ re mẹ sae ruẹrẹ oma kpahe kẹ enọ e rro vi eyena evaọ oria ofa nọ a ti vi omẹ kpohọ.

A VI OMẸ KPOBỌ PAPUA NEW GUINEA

Evaọ ukpe 1978, a te vi omẹ kpobọ Papua New Guinea, nọ ọ rrọ ofẹ ẹkpẹlobọ ovatha-ọre Australia. Papua New Guinea ọ rrọ igbigbehru, yọ ọ jẹ te rro te orẹwho nọ a re se Spain. Ahwo nọ a jọ orẹwho na a bu te enwenọ ima esa (3,000,000). Rekọ evẹrẹ nọ a be ta e vrẹ egba eree (800) soso. U gbe omẹ unu. Rekọ eva e were omẹ inọ ahwo buobu a rẹ sae ta ẹvẹrẹ Melanesian Pidgin. A re je sei Tok Pisin.

A te fi omẹ họ ukoko Oyibo evaọ omoke jọ. Ukoko na o jọ Port Moresby. Oye họ ẹwho nọ osu Papua New Guinea ọ jẹ jọ su. Me te ti kpohọ ukoko Tok Pisin jọ. Mẹ tẹ jẹ hai kpohọ eklase nọ a bi jo wuhrẹ ẹvẹrẹ na. Mẹ jẹ hae rọ eme nọ me wuhrẹ evaọ eklase na rọ ta usi uwoma. U te ru nọ mẹ jẹ rọ riẹ ẹvẹrẹ na gaga. U kri hi, mẹ tẹ te rọ ẹvẹrẹ Tok Pisin na kẹ ovuẹ ogbotu. A tẹ rọ omẹ mu ọsẹro okogho, yọ ikoko Tok Pisin nọ e rrọ ibrotọ buobu nọ e rrọ ruaro mẹ te hai rri. Me rẹro oware utioye na ha keme oke yena u ri tube te ukpe ọvo ho nọ me ro kpobọ Papua New Guinea.

Ikoko nọ me je rri i thabọ no ohwohwo gaga. Fikiere mẹ jẹ hai ru ikokohọ okogho buobu yọ mẹ jẹ hai no oria ruọ oria gaga. Evaọ oke ọsosuọ, nọ me te te ẹwho jọ, me re rri rie nọ me wo ohwo ọvo evaọ etẹe hẹ keme ẹvẹrẹ ọfa a be ta, yọ oghẹrẹ nọ a re ru eware evaọ etẹe sa. Yọ u ri kri nọ mẹ rọ rrọ orẹwho na dede he. Mẹ jẹ sae ruọ omoto no ukoko jọ kpohọ ukoko ọfa ha keme idhere na i woma ha, yọ igbehru e vọ oria kpobi. Fikiere arupre mẹ jẹ hai ro enwenọ koka koka. Ẹsejọ irupre esese mẹ rẹ ro yọ e rẹ nwani woma tere he, yọ ẹsejọ mẹ ọvo họ ohwo nọ a rẹ wọ. Fikiere ozọ o jẹ hai mu omẹ gaga wọhọ epanọ ozọ u re mu omẹ nọ mẹ tẹ rrọ okọ na.

Ahwo nọ a wo ifonu a bu tere he. Fikiere ileta mẹ jẹ hai kere vi se ikoko na inọ mẹ be nyaze. Ẹsibuobu me re te obei no, yọ ileta nọ me kere se inievo na inọ mẹ be nyaze i ri te obei he. Me ve mu inievo nọ e rrọ ẹwho na họ ẹgwọlọ. Oke kpobi nọ mẹ tẹ ruẹ inievo na no, a re dede omẹ rehọ sasasa. Mẹ vẹ ruẹ nọ onya nọ mẹ be nya na kpobi uvrẹvru hu. Jihova o ru eware buobu kẹ omẹ, o tẹ whae ze nọ mẹ rọ kẹle Jihova gaga.

Nọ me te ukoliko jọ nọ a re se Bougainville, ẹdẹ ọsosuọ nọ me ro kpohọ ewuhrẹ evaọ etẹe, ọzae-avọ-aye jọ a tẹ nyabru omẹ ze. Ovao rai o rrọ ohwohwẹ. A tẹ nọ omẹ nọ, “Kọ who vuhu omai?” Mẹ tẹ kareghẹhọ nọ mẹ ta usi uwoma kẹ ae okenọ mẹ rọ kaki te obọ Port Moresby. Me mu Ebaibol họ ewuhrẹ kugbe ae no vẹre. Mẹ tẹ te ta kẹ oniọvo-ọmọzae jọ nọ ọ hai wuhrẹ ae. Okenọ a rọ nyabru omẹ ze na yọ aimava na a họ-ame no. Onana yọ oghale jọ nọ u te omẹ evaọ ikpe esa nọ mẹ rọ jọ Papua New Guinea na.

EPANỌ ME RO WO AYE

Taure me te ti no Coron evaọ ukpe 1978, mẹ ruẹ oniọvo-ọmọtẹ jọ nọ a re se Adel. O wo erru gaga, yọ o re fiobọhọ kẹ ahwo gaga. Ọkobaro oke-kpobi ọ jọ, yọ o wo emọ ivẹ nọ ọ be yọrọ. Edẹ rai Samuel avọ Shirley. Yọ ọ be rẹrote oni riẹ nọ ọ kpako no re. Evaọ amara Asoi 1981, me te zihe kpobọ Philippines. Mẹ tẹ rehọ Adel. Mẹ tẹ jọ ọkobaro oke-kpobi. Ọyomariẹ yọ ọkobaro oke-kpobi no vẹre. Ma te je ru iruo nọ ma rẹ rọ rẹrote uviuwou mai.

Dede nọ me wo uviuwou no, evaọ ukpe 1983, a tẹ wariẹ rọ omẹ mu ọkobaro obọdẹ. A tẹ ta nọ ukoliko Linapacan nọ ọ rrọ ubrotọ Palawan mẹ te jọ. Mẹ avọ uviuwou mẹ kpobi ma tẹ kwa kpohọ obei. Osẹri Jihova ọvo ọ jọ obei he, u te no omai no. Oni aye mẹ o te ti whu nọ enwenọ ukpe ọvo o vrẹ no. Rekọ ma gbe je ru iruo na vrẹ, yọ u fiobọhọ kẹ omai nọ ma gbe je ro roro iei ga hrọ họ. Ma te ti wo ahwo buobu nọ ma je wuhrẹ Ebaibol evaọ Linapacan, yọ a jẹ daoma gaga. U te epanọ ma rọ ruẹ nọ u fo nọ ma re wo Ọgwa Uvie ọsese jọ nọ ma rẹ hai jo ru ewuhrẹ. Mai ọvo ma tẹ bọ ọjọ. Nọ ma jọ ẹwho na te ikpe esa no, ahwo nọ a ziọ Emu Owọwọ Olori na a bu te udhusoi-gbikpe (110) soso. Ibuobu rai a tẹ te họ-ame uwhremu na nọ ma no ẹwho na no.

Nọ u te ukpe 1986, a te vi omẹ kpohọ ukoliko Culion. Emoti e vọ ẹwho na. Uwhremu na a tẹ rọ aye mẹ mu ọkobaro obọdẹ. Oke ọsosuọ, ozọ u je mu omai re ma nyae ta usi uwoma kẹ ahwo nọ a be mọ oti na keme ẹyao na o re vo. Inievo nọ e rrọ ẹwho na a tẹ vuẹ omai nọ ma bru udu hu keme a kẹ ahwo na imu no, fikiere ẹyao rai na ọ rẹ gbẹ kaki vo ruọ omọfa ha. Ahwo otiọye na jọ a jẹ hae ziọ ewuhrẹ evaọ uwou oniọvo-ọmọtẹ jọ. Ẹmẹrera na, ozọ u te ti no omai ẹro. Ma tẹ jẹ ta usi uwoma kẹ ae ziezi re a riẹ ẹruore nọ ma wo keme a bi rri omarai nọ ohwo ọvo o se rai gbe ohwo ho, makọ Ọghẹnẹ dede. Rekọ nọ a yo usi uwoma na no, eva e tẹ jẹ were ae inọ ẹdẹ jọ, oma rai o te wariẹ jọ ziezi. Eva e jẹ were omai gaga re.—Luk 5:12, 13.

Ma ru oware jọ nọ u ru nọ obọ Culion o rọ reria emọ mai oma. Ma ta kẹ inievo-emetẹ ivẹ jọ nọ e rrọ izoge evaọ obọ Coron inọ a nyaze ti lele omai jọ obọ Culion re emọ mai a sai wo emamọ egbẹnyusu. Usi uwoma o jẹ were emọ mai gbe emetẹ ivẹ nọ a jọ kugbe omai na gaga. A je wuhrẹ emọ buobu Ebaibol, yọ mẹ avọ aye mẹ ma bi wuhrẹ esẹgbini emọ na. U tube te epanọ ma je ro wuhrẹ iviuwou nọ i bu te ikpegbọvo soso. Ahwo buobu nọ ma je wuhrẹ a jẹ daoma gaga. Ere ma rọ rehọ ukoko mu evaọ etẹe.

Evaọ oke ọsosuọ, mẹ ọvo họ ọkpako ukoko nọ ọ jariẹ. Fikiere uwou ogha o tẹ vuẹ omẹ nọ mẹ hai ru ewuhrẹ kẹ iwhowho-uvie eree nọ e jọ Culion. A tẹ jẹ vuẹ omẹ nọ mẹ hai ru ewuhrẹ kẹ iwhowho-uvie izii nọ e jọ iwhre nọ a re se Marily. O rẹ rehọ euwa esa re whọ tẹ te ruọ okọ te iwhre na. Nọ mẹ avọ uviuwou mẹ ma tẹ jọ etẹe ru ewuhrẹ no, ma vẹ nya kpohọ iwhre jọ nọ a re se Halsey nyai wuhrẹ ahwo Ebaibol. Ma rẹ nya euwa buobu, yọ edhere na ọ rrọ igbigbehru.

Ahwo a te ti kurẹriẹ gaga evaọ iwhre Marily gbe Halsey na. Ma tẹ te bọ Ọgwa Uvie fihọ iwhre ivẹ na. Ahwo nọ a kurẹriẹ evaọ iwhre na gbe amọfa nọ ukoko na o were, a rehọ eware buobu ze nọ ma rọ bọ Egwa Uvie na, yọ a ru iruo gaga re. Ere o via re evaọ obọ Linapacan. Ọgwa Uvie nọ ma bọ fihọ Marily na o rẹ sae gba ahwo nọ a bu te egba ivẹ (200). Yọ a sai tube ru ei re ahwo nọ a bu viere a jariẹ. Fikiere ma jẹ hae jọ etẹe ru ikokohọ esese.

ME WERI, MẸ JỌ GOLI, REKỌ EVA E WARIẸ WERE OMẸ

Evaọ ukpe 1993, a tẹ rọ omẹ mu ọsẹro okogho evaọ Philippines. Oke yena yọ emọ mai a gbẹ rrọ emaha ha. Nọ u je te ukpe 2000, a te zizie omẹ kpohọ Isukulu Ewuhrẹ Odibọgba re a wuhrẹ omẹ epanọ mẹ sae rọ jọ owuhrẹ evaọ isukulu na. Me je roro nọ me te ohwo nọ ọ rẹ jọ owuhrẹ isukulu na ha. Rekọ aye mẹ ọ tuduhọ omẹ awọ. Ọ vuẹ omẹ nọ Jihova ọ te kẹ omẹ ẹgba nọ me ti ro ru iruo na dede nọ me ri ru iruo itieye na ẹdẹvo ho. (Fil. 4:13) Aye mẹ ọ rẹ sae ginẹ ta nọ Jihova o ti fiobọhọ kẹ omẹ ru iruo na keme Jihova o je fiobọhọ kẹe ru iruo Uvie na dede nọ ọ jẹ mọ.

Evaọ ukpe 2006 nọ me je wuhrẹ inievo jọ evaọ isukulu ukoko na, aye mẹ o te wo ẹyao jọ nọ a re se Parkinson. Akpọ o gbe omai unu gaga. Mẹ tẹ vuẹ aye mẹ nọ mẹ rẹ dhugbẹ siọ iruo na ba re mẹ sae rẹrotei. Aye mẹ ọ tẹ ta kẹ omẹ nọ, “Whọ daezọ họ. Thakpe gwọlọ edọktọ nọ ọ sai siwi ẹyao mẹ na. Mẹ riẹ nọ Jihova o ti fiobọhọ kẹ omai nọ ma te sai ro ru iruo na.” Evaọ ikpe ezeza nọ i lele i rie, aye mẹ o je ru iruo Jihova vrẹ, yọ o je bru enu hu. U te epanọ ọ gbẹ jẹ sae rọ nya ha. Akpala nọ a re ro ghelie ohwo nọ ọ be sae nya ha a je ro ghelie iei. Yọ ere ọ jẹ hai ro kpohọ usi uwoma. Ẹyao na ọ ga te epanọ ọ gbẹ jẹ sae rọ ta emamọ ẹme he. Rekọ ọ rẹ daoma kẹ umuyo jọ nọ o te kpohọ ewuhrẹ. Inievo na a jẹ hai kere ẹme vi se aye mẹ ro yere iei kẹ epanọ o bi ro thihakọ bẹsenọ o ti ro whu evaọ ukpe 2013. Ikpe ọgba mẹ avọ aye mẹ ma jọ kugbe. Ọ jọ emamọ aye gaga, yọ o kru egagọ Ọghẹnẹ ga. Fikiere nọ o whu no, mẹ tẹ jọ goli, yọ me je roro iei gaga.

Okenọ aye mẹ ọ jọ akpọ, ọ gwọlọ nọ mẹ rẹ siọ iruo na ba ha. Fikiere mẹ ruabọhọ iruo na nọ ọ maki whu no. U ru nọ mẹ gbẹ jọ ọkọkora ha. Nọ umuo ukpe 2014 rite 2017, ukoko u te vi omẹ nyai rri ikoko ẹvẹrẹ Tagalog nọ e jọ erẹwho nọ a jẹ hae jọ rọwo nọ Isẹri Jihova a ta usi uwoma ha. A te ti je vi omẹ nyai rri ikoko Tagalog nọ e jọ Taiwan, United States, gbe Canada. Evaọ ukpe 2019, me te je wuhrẹ inievo nọ i kpohọ Isukulu Rọkẹ Etausiuwoma Uvie Na evaọ ẹvẹrẹ Oyibo. A ru isukulu na evaọ India gbe Thailand. Iruo nana nọ me je ru na e jẹ were omẹ gaga. Iruo e tẹ vọ omẹ abọ nọ me bi ru evaọ ukoko na, eva e rẹ were omẹ wo umuo ho.

JIHOVA O FIOBỌHỌ KẸ OMẸ EVAỌ ORIA KPOBI NỌ MẸ NYA

Nọ me te te oria nọ a vi omẹ kpohọ, nọ oke o be nya na, inievo nọ e rrọ etẹe a vẹ dhẹ ruọ omẹ oma no. Fikiere nọ a te bi dhe omẹ kpohọ oria ofa, o rẹ da omẹ gaga. Rekọ mẹ jẹ hae rẹroso Jihova inọ o ti ru nọ oria nọ mẹ be nya o te jẹ rọ reria omẹ oma. Jihova o gine fiobọhọ kẹ omẹ gaga. O tẹ so ẹe ze nọ mẹ jẹ sae rọ rehọ eva mẹ kpobi ru iruo efa kpobi nọ a kẹ omẹ. Ma be ta ẹme na, ọkobaro obọdẹ mẹ rrọ evaọ Philippines. U ri kri nọ mẹ rọ nyaziọ ukoko nọ mẹ rrọ enẹna ha, rekọ o nwane reria omẹ oma no. Inievo na a zihe ruọ uviuwou mẹ no. A bi fiobọhọ kẹ omẹ gaga. Yọ eva e were omẹ inọ emọ aye mẹ Samuel avọ Shirley a se egagọ Jihova gboja wọhọ epanọ oni rai o se egagọ Jihova gboja.—3 Jọn 4.

Ebẹbẹ buobu i te omẹ no evaọ akpọ. Ọjọ họ, ẹyao nọ ọ lahiẹ aye oyoyou mẹ na bẹsenọ o ro whu. Yọ me kpohọ eria nọ me ri te ẹdẹvo ho, fikiere mẹ jẹ hae daoma nwene lele oghẹrẹ nọ etẹe ọ rrọ. Ghelọ ebẹbẹ na kpobi, mẹ ruẹ nọ Jihova “o thabọ no omai omomọvo ho.” (Iruẹru 17:27) Obọ Jihova “o kpẹre hrọ họ” nọ ọ gbẹ sai ro fiobọhọ kẹ idibo riẹ jẹ kẹ ae ẹgba ha. (Aiz. 59:1) O re fiobọhọ kẹ ae o tẹ make rọnọ oria nọ a rrọ u siomano. Jihova họ Utho mẹ. Ọ rrọ kugbe omẹ no anwọ emaha mẹ ze rite inẹnẹ na. Eva e were omẹ gaga inọ Jihova ọ siọ omẹ ba ẹdẹvo ho.