Whaha Uruemu Omara Ọvo nọ Who re Roro Kpahe
NỌ WHO te rri akpọ na nẹnẹ, whọ rẹ ruẹ nọ ahwo jọ a re rri omarai nọ a te ahwo nọ a rẹ kẹ obọdẹ iruo hayo ọkwa jọ. Yọ a rẹ gwọlọ nọ amọfa a ru eware jọ kẹ ae. A tẹ maki wo eware buobu no, a rẹ gbẹ gwọlọ nọ a kẹ ae efa kugbe. A gwọlọ nọ omọfa o re wo ho. Ahwo nọ a wo uruemu nana a wo edẹro ho. Uruemu nana nọ o rrọ akpọ na titi na yọ oware nọ Ebaibol ọ ta no vẹre inọ o te via evaọ edẹ urere nana.—2 Tim. 3:2.
Orọnọ nẹnẹ oware nana u muhọ họ. U muhọ no oke Adamu avọ Ivi ze. Aimava na a roro nọ a te ahwo nọ a rẹ jiroro oware nọ u woma gbe onọ u yoma kẹ omarai. Oye o so uye fihotọ kẹ omai kpobi na. Ikpe buobu nọ i lele i rie, Uzaya ovie Juda o rri omariẹ nọ o te ohwo nọ ọ rẹ mahe insẹnse evaọ etẹmpol. Rekọ o roro thọ gaga. (2 Irv. 26:18, 19) Yọ ahwo Farisi avọ Sadusi omarai a je roro nọ fikinọ a no uyẹ Abraham ze, a ghare Ọghẹnẹ obọ vi ahwo nọ i kiọkọ.—Mat. 3:9.
Ahwo omorro gbe ahwo nọ a re roro kpahe omobọ rai ọvo a da akpọ na fia. Nọ ma gbe rri omamai mu hu, ma sai wo ekpehre uruemu rai na. (Gal. 5:26) Ma ve ti rri omamai nọ ma te ahwo nọ a rẹ kẹ ọkwa hayo obọdẹ iruo jọ. Kọ ẹvẹ ma sae rọ whaha uruemu nana? Joma kake ta kpahe oghẹrẹ nọ Jihova o rri uruemu nana. Ma ti wuhrẹ eware ivẹ jọ no Ebaibol ze nọ u ti fiobọhọ kẹ omai riẹ oghẹrẹ nọ o rri rie.
Oware kpobi nọ Jihova ọ ta nọ a kẹ omai oye a rẹ kẹ omai. Joma kẹ iriruo jọ ro ru ẹme na vẹ.
Evaọ uviuwou, Ọghẹnẹ ọ gwọlọ nọ aye ọ kẹ ọzae riẹ adhẹẹ, ọzae o ve je you aye riẹ. (Ẹf. 5:33) Yọ u fo nọ ọzae-avọ-aye a re wo isiuru kẹ ohwohwo orọnọ omọfa jọ họ. (1 Kọr. 7:3) Yọ Ebaibol ọ ta re nọ emọ a rẹ rọ ọghọ kẹ ọsẹgboni rai. Esẹgbini a ve je you emọ rai, jẹ rẹrote ae ziezi.—2 Kọr. 12:14; Ẹf. 6:2.
Evaọ ukoko na re, ma ruẹ nọ ekpako na a bi ru iruo gaga. Yọ Ebaibol ọ ta nọ ma kẹ ae adhẹẹ. (1 Tẹs. 5:12) Rekọ o make rrọ ere na, ekpako na a wo udu nọ a rẹ rọ ta họ inievo na obọ họ.—1 Pita 5:2, 3.
Ọghẹnẹ ọ ta nọ ahwo egọmeti a wo udu nọ a re ro mi ahwo osa-uzou. Yọ ọ ta re nọ ma kẹ enọ i bi su na adhẹẹ.—Rom 13:1, 6, 7.
• Fikinọ Jihova o you omai ọ be kẹ omai eware buobu nọ u fo nọ ọ hae kẹ omai hi. Nọ orọnọ ma reuku uzioraha na, ewhu ọvo u fo nọ ma re whu. (Rom 6:23) Rekọ Jihova ọ be kẹ omai emamọ eware buobu fiki uyoyou riẹ nọ o rẹ hiẹ hẹ na. (Ol. 103:10, 11) Emamọ oware kpobi nọ u te omai obọ, Jihova ọye ọ rehọ e riẹ kẹ omai fiki uwowou ulogbo riẹ, orọnọ fikinọ ma te ahwo nọ a rẹ kẹ oware utioye he.—Rom 12:6-8; Ẹf. 2:8.
OWARE NỌ U RE FIOBỌHỌ KẸ OMAI NỌ MA GBE WO OMORRO HO
Who rri omara oghẹrẹ nọ ahwo buobu evaọ akpọ na a bi rri omarai hi. Ẹsejọ ma re roro nọ mai u fo nọ a rẹ kẹ oware jọ. Yọ ẹsejọ ma rẹ riẹ nọ ma mu omorro họ ewo no ho. Jesu ọ kẹ oriruo jọ ro dhesẹ nọ iroro itieye e sae ruọ omai udu. Ọ ta kpahe ahwo nọ a rehọ iruo nọ a wha osa dinariọs kẹ. Yọ orọnọ oke ọvona a ro mu iruo na họ họ. Ejọ i muhọ evaọ ohiohiẹ, ejọ evaọ uvo gbagbagba. Yọ efa dede auwa ọvuọvo a ru iruo. Enọ e kaki mu iruo họ na a te je roro nọ ugho rai o te mai bu fikinọ ae a mai ru iruo. (Mat. 20:1-16) Jesu ọ be rehọ oriruo nana wuhrẹ ilele riẹ inọ, jọ onọ Ọghẹnẹ ọ kẹ rai o da ae ẹro.
Ezae nọ i ru iruo okpẹdoke soso na a roro nọ ae u fo nọ ugho rai o rẹ mai bu
Who du ta nọ u fo nọ a rẹ kẹ owhẹ oware jọ họ, rekọ a tẹ kẹ owhẹ, yere ohwo na. (1 Tẹs. 5:18) Rọ aro kele Pọl ukọ na. Pọl o wo udu nọ ọ hae rọ ta kẹ inievo obọ Kọrint re a kẹe igho hayo eware efa, rekọ o ru ere he. (1 Kọr. 9:11-14) Otẹrọnọ ohwo jọ o ru omai ọghọ ma re yere iei. Orọnikọ ma rẹ ta kẹ ahwo nọ u fo re a kẹ omai oware jọ họ.
Pọl ukọ na ọ ta nọ jọ a kẹe ugho hayo eware efa ha
Wo omaurokpotọ. Nọ ohwo o te bi rri omariẹ ruaro gaga, o rẹ lẹliẹe roro nọ ọye u fo nọ a rẹ mae kẹ eware bu o tẹ make rọnọ o wo ọjọ no. Rekọ nọ o te wo omaurokpotọ, u re ru nọ o gbe roro ekpehre iroro yena ha.
Omaurokpotọ Daniẹl u ru nọ ọ rọ jọ ghaghae kẹ Jihova
Daniẹl ọruẹaro na ọ jọ ohwo nọ o wo omaurokpotọ gaga. Yọ u fo nọ ma rẹ rọ aro kele iei. Emamọ uviuwou Daniẹl o no ze, o te je wo erru. Yọ o wo eriariẹ gaga, ọ tẹ jẹ riẹ epanọ a re ru eware buobu. Eware nana e hae sae lẹliẹe ta nọ u fo nọ amọfa a rẹ gbodibo kẹe. Hayo ọ hae sae ta nọ ọye u fo nọ a rẹ kẹ oghẹrẹ ọkwa jọ. (Dan. 1:3, 4, 19, 20) Rekọ Daniẹl o rri omariẹ ere he, ọ romakpotọ. Oyena u te ru nọ Jihova o ro you rie gaga.—Dan. 2:30; 10:11, 12.
Joma daoma gaga re ma siọ omorro ba eru. Ma rri omamai nọ ma woma vi amọfa ha. Ukpoye, jọ oware kpobi nọ Jihova ọ kẹ omai o da omai ẹro, re eva e hae were omai. Keme fiki uwowou ulogbo riẹ jabọ ọ be rọ kẹ omai eware na kpobi na.