Epanọ Whọ Sae rọ Jọ Emamọ Ogbẹnyusu

KỌ ẸBẸBẸ jọ o te owhẹ no oke jọ nọ who je ro roro nọ ohwo ọvo ọ riẹ nọ o bi fiobọhọ kẹ owhẹ hẹ? “Oke obẹbẹ nọ o rẹ bẹ ẹria” ma rrọ na. (2 Tim. 3:1) Fikiere ebẹbẹ jọ e sai te omai nọ udu u re ro bru omai, ẹsejọ ma ve bi roro nọ ma gbe wo ohwo ho. Rekọ ahwo jọ a sai fiobọhọ kẹ omai nọ ebẹbẹ i te te omai. Ebaibol ọ ta nọ emamọ egbẹnyusu a re fiobọhọ kẹ omai evaọ “oke idhọvẹ.”—Itẹ 17:17.

EPANỌ EMAMỌ EGBẸNYUSU A SAI RO FIOBỌHỌ KẸ OMAI

Egbẹnyusu Pọl ukọ na jọ nọ e jẹ hai lele iei kpohọ erẹ usi uwoma a fiobọhọ kẹe. (Kọl. 4:7-11) Okenọ a fi Pọl họ uwou-odi evaọ obọ Rom, egbẹnyusu riẹ họ ahwo nọ a fiobọhọ kẹe ru eware jọ nọ ọ sai ru hu fikinọ ọ rrọ uwou-odi. Wọhọ oriruo, Epafrodaitọs ọ rehọ eware nọ inievo obọ Filipai a zọhọ ze ro se Pọl evaọ uwou-odi. (Fil. 4:18) Tikikọs ọ rehọ ileta jọ nọ Pọl o kere ro se ikoko jọ. (Kọl. 4:7) O make rọnọ Pọl ọ jọ uwou-odi na, egbẹnyusu riẹ a fiobọhọ kẹe nọ ọ gbẹ jẹ sai ro ru iruo nọ Ọghẹnẹ ọ kẹ riẹ. Kọ ẹvẹ whọ sae rọ jọ emamọ ogbẹnyusu?

Eware nọ e via kẹ inievo jọ no i dhesẹ nọ u fo re ma jọ emamọ ogbẹnyusu nọ o re dikihẹ kẹ ogbẹnyusu riẹ. Oniọvo-ọmọtẹ jọ nọ a re se Elisabet nọ ọ be rria obọ Spain o wo emamọ ogbẹnyusu nọ o fiobọhọ kẹe. Okenọ oni Elisabet o wo ẹyao ekansa, ogbẹnyusu riẹ na ọ jẹ hai kere eme no Ebaibol ze vi sei evaọ ifonu riẹ rọ tuduhọ iẹe awọ. Elisabet ọ ta nọ: “Ememe nọ ọ jẹ hai kere se omẹ na i je fiobọhọ kẹ omẹ kru udu ga no ẹdẹ te ẹdẹ. Mẹ tẹ ruẹ nọ me gine wo ohwo nọ o bi fiobọhọ kẹ omẹ.”—Itẹ 18:24.

Ma te bi fiobọhọ kẹ inievo na re a sai kpohọ ewuhrẹ je kpohọ usi uwoma, ma te kẹle ohwohwo gaga. Kọ whọ sae daoma wọ oniọvo jọ nọ ọ kpako no kpohọ ewuhrẹ hayo usi uwoma? Who te ru ere, whọ sae tuduhọ iẹe awọ yọ ọ te tuduhọ owhẹ awọ re. (Rom 1:12) Rekọ u wo inievo jọ nọ a be sai no uwou ze he. Kọ ẹvẹ ma sai ro dhesẹ kẹ inievo itieye na inọ mai yọ emamọ egbẹnyusu rai?

FIOBỌHỌ KẸ INIEVO NỌ E BE SAI NO UWOU ZE HE

Inievo jọ a rẹ sai no uwou ze kpobọ Ọgwa Uvie kpohọ ewuhrẹ hẹ fiki ẹyao hayo fiki eware efa jọ. U wo oniọvo-ọmọzae jọ nọ a re se David nọ ọ jẹ mọ ẹyao ekansa. Emerae ezeza gbọ a siwi rie. Oke yena kpobi, ifonu ọye avọ aye riẹ nọ a re se Lidia a jẹ hai ro thuru kugbe ewuhrẹ.

Kọ ẹvẹ egbẹnyusu rai nọ e rrọ ukoko na a ro fiobọhọ kẹ ae? Oke kpobi nọ a te ku ewuhrẹ họ no, inievo jọ nọ i kpohọ ewuhrẹ na evaọ obọ Ọgwa Uvie a rẹ ruẹ nọ a lele David avọ aye riẹ ta ẹme evaọ ifonu nọ a ro thuru kugbe ewuhrẹ na. Yọ otẹrọnọ David avọ aye riẹ a kẹ uyo evaọ ewuhrẹ na, nọ a te kuhọ no, inievo na a re vi uwou se ai ro yere ae rọkẹ iyo nọ a kẹ. Enana kpobi e tẹ so ẹe ze nọ David avọ aye riẹ a rọ riẹ nọ a thọrọ inievo na ẹro ho.

Kọ ma gbẹ daoma fiobọhọ kẹ inievo nọ e be sai no uwou ze he re a sae ta usi uwoma? Ma tẹ siọ emeware jọ nọ ma hai ti ru ba, ma sai wo uvẹ nọ ma re ro fiobọhọ kẹ inievo itieye na. (Itẹ 3:27) Whọ sai fi oke họ nọ whẹ avọ oniọvo nọ ọ be sai no uwou ze he na wha re ro kere ileta se ahwo rọ ta usi uwoma kẹ ae hayo rọ ifonu ta usi uwoma. Inievo itieye na a sae rọ ifonu thuru kugbe ewuhrẹ nọ a re ru taure a te ti kpohọ usi uwoma. David avọ aye riẹ a jẹ hai thuru kugbe inievo na, yọ o jẹ were ae gaga. David ọ ta nọ, “Nọ a te bi ru ewuhrẹ usi uwoma ota, ẹmẹme nọ a rẹ ta gbe olẹ nọ a rẹ lẹ nọ ma tẹ rọ ifonu thuru kugbe inievo na, u je ru omai kru udu ga.” Oware ofa họ, ẹsejọ nọ o tẹ lọhọ, whọ sae hae wha ohwo nọ who bi wuhrẹ Ebaibol kpobọ uwou oniọvo nọ ọ be sai no uwou ze he re whọ jọ etẹe wuhrẹ iẹe. Rekọ whọ rẹ vuẹ oniọvo na tao.

Nọ ma tẹ be hae nya kẹle inievo nọ e be sai no uwou ze he, nọ ma jẹ be ruẹ emamọ uruemu nọ a wo, ma te kẹle ae gaga. Ma rehọ iẹe nọ whẹ avọ oniọvo otiọye na wha rrọ usi uwoma, ọ tẹ be nabe rọ onaa ta ẹme no Ebaibol ze jẹ tae ruọ ohwo na oma. Oke yena, eva oniọvo na e vẹ te were owhẹ vi epaọ ọsosuọ. Whọ vẹ te kẹle iẹe gaga. Nọ whọ tẹ be hai fiobọhọ kẹ inievo na re a sae ta usi uwoma je ru eware efa evaọ ukoko na, whọ sae rọ ere wo egbẹnyusu efa.—2 Kọr. 6:13.

Oke jọ o jariẹ nọ Taitọs ọ jọ kugbe Pọl fiki ebẹbẹ nọ i te Pọl. (2 Kọr. 7:5-7) Oware nọ ma bi wuhrẹ no etẹe ze na họ, orọnikọ ẹmeunu mai ọvo ma rẹ rọ sasa inievo mai oma ha. Rekọ nọ a tẹ tubẹ ruẹ omai nọ ma rrọ kugbe ae ọvo dede je bi ru onọ ma sai ru kẹ ae, yọ edhere jọ nọ ma rẹ rọ sasa ae oma.—1 Jọn 3:18.

JỌ EMAMỌ OGBẸNYUSU NỌ A TE BI KPOKPO INIEVO NA

Inievo mai nọ e rrọ obọ Russia a be daoma gaga keme a bi fiobọhọ kẹ ohwohwo nọ a bi kpokpo ae na. Ere a fiobọhọ kẹ oniọvo mai jọ nọ a re se Sergey avọ aye riẹ Tatyana. Ipolisi a nyaziọ uwou rai, a tẹ jẹ kiẹ uwou na. A tẹ wọ ae vrẹ nyae nọ ae enọ. Aye riẹ a kaki siobọno kpo. Sergey ọ ta nọ: “Nọ aye mẹ ọ nwani te obọ uwou no, oniọvo-ọmọtẹ jọ ọ tẹ nyaziọ obọ uwou mai, ozọ u mu rie dede he. Inievo efa a tẹ nyaze re. Aikpobi a te fiobọhọ kẹ omai ruẹrẹ eware mai họ keme ipolisi a kiẹ uwou na fihọ whọhọ whọhọ no vẹre.”

Sergey ọ ta re nọ: “Oria Ebaibol jọ nọ ọ rẹ were omẹ gaga họ Itẹ 17:17. Etẹe na ọ ta nọ: ‘Emamọ ogbẹnyusu o re dhesẹ uyoyou ẹsikpobi ọ tẹ jẹ rrọ oniọvo nọ a yẹ fiki oke idhọvẹ.’ Mẹ riẹ ẹme nọ ọ rrọ etẹe anwẹdẹ. Rekọ anwẹnọ a bi ro kpokpo omẹ na, mẹ mae rọ ruẹ nọ ẹme nọ etẹe ọ ta na ginọ uzẹme. Jihova ọ be rọ egbẹnyusu mẹ dikihẹ kẹ omẹ, ozọ u bi mu ai hi.”a

Ebẹbẹ nọ i re te omai ẹsejọ e rẹ tubẹ ga vi enọ i te omai no. Fikiere ma gwọlọ emamọ egbẹnyusu nọ a re dikihẹ kẹ omai. Yọ uye ulogbo na u te muhọ no, ẹsiẹe o te mae rọ tubẹ gwọlọ nọ egbẹnyusu mai a re dikihẹ kẹ omai. Fikiere joma daoma jọ emamọ ogbẹnyusu rọkẹ inievo mai enẹna.—1 Pita 4:7, 8.