Onọ Olọlọhọ nọ Ohwo Kpobi Ọ Sae Nọ

Oniọvo jọ nọ a re se Mary avọ ọzae riẹ John,a a be rria orẹwho nọ a sae jọ ta usi uwoma kẹ ahwo Philippines buobu nọ a ziọ ẹwho na te kọ okọ. Okenọ ẹyao COVID-19 na o je vo gaga na, Mary o mu ahwo buobu Ebaibol họ ewuhrẹ, te ahwo orẹwho riẹ, te enọ e rrọ erẹwho efa. Ẹvẹ o ro ru ei?

Mary ọ rẹ nọ ahwo nọ o bi wuhrẹ Ebaibol nọ, “Kọ whọ riẹ ohwo jọ nọ ọ te gwọlọ nọ ma wuhrẹ iẹe Ebaibol?” A te yo nọ Ee, ọ vẹ nọ ae nọ, ‘Kọ whọ sai dhesẹ omẹ kẹ ae re me wuhrẹ ai?’ Oware nana nọ ọ jẹ hai ru na, o wha riẹ ze nọ o ro wo ahwo buobu nọ o re wuhrẹ. Fikieme o rọ rrọ emamọ edhere jọ nọ ma sae rọ riẹ amọfa nọ ma re wuhrẹ? Keme nọ who te bi wuhrẹ ohwo, nọ eware nọ who bi wuhrẹ iẹe na e tẹ were iẹe, ọ rẹ gwọlọ vuẹ ahwo uwou riẹ gbe egbẹnyusu riẹ eware nọ o wuhrẹ no. Kọ ẹvẹ onọ nọ Mary ọ jẹ hae nọ na u ro fiobọhọ kẹe?

Ọmọtẹ jọ nọ a re se Jasmin nọ Mary o je wuhrẹ Ebaibol ọ nọ imane efa sọ a gwọlọ nọ Mary o wuhrẹ ai re, yọ a rọwo. Odẹ ọjọ Kristine. Uwuhrẹ na o were Kristine te epanọ ọ rọ ta kẹ Mary nọ jọ ọ hai wuhrẹ iẹe isiava evaọ oka. Nọ Mary ọ nọe sọ ọ riẹ omọfa nọ ọ sai wuhrẹ, Kristine o te yo nọ, “Ee, me ti dhesẹ egbẹnyusu mẹ jọ kẹ owhẹ re whọ hai wuhrẹ ai.” U kri hi, Kristine o te dhesẹ imane efa nọ e gwọlọ wuhrẹ kẹe. Nọ oke o be nya na, Kristine ọ tẹ jẹ vuẹ egbẹnyusu riẹ efa. Mary o te je mu eyena họ ewuhrẹ. Eyena i te je dhesẹ amọfa kẹe.

Kristine ọ gwọlọ nọ ahwo uwou riẹ nọ e rrọ obọ Philippines a wuhrẹ Ebaibol re. Fikiere ọ tẹ ta kẹ ọmọtẹ riẹ Andrea inọ u ti woma re a wuhrẹ iẹe Ebaibol. Oke ọsosuọ, Andrea ọ ta nọ, ‘Isẹri Jihova yọ emamọ egagọ họ, a rọwo Jesu hu, yọ Ọvọ Anwae na ọvo a rọwo.’ Rekọ nọ a wuhrẹ iẹe ẹdẹ ọsosuọ no, ọ tẹ ruẹ nọ eware nọ ọ jẹ ta kpahe Isẹri Jihova na uzẹme he. Nọ a te bi wuhrẹ, a te dhesẹ oware nọ Ebaibol ọ ta kẹe, ọ rẹ ta nọ, “Otẹrọnọ ere Ebaibol ọ ta, koyehọ ẹme na uzẹme!”

Nọ oke o be nya na, Andrea omariẹ o te je dhesẹ Mary kẹ egbẹnyusu ivẹ riẹ efa gbe ohwo jọ nọ a gbe bi ru iruo. Mary o te je mu eyena họ ewuhrẹ. Yọ Mary ọ riẹ hẹ inọ oniọvo ọsẹ Andrea nọ o tuaro nọ a re se Angela ọ jẹ hae gaviezọ nọ a te bi ru uwuhrẹ na. Ẹdẹ jọ Angela ọ tẹ ta kẹ Andrea inọ jọ ọ vuẹ Mary nọ ọ gwọlọ nọ ọ hai wuhrẹ iẹe. Nọ a mu Angela họ ewuhrẹ no, eware nọ o je wuhrẹ e were riẹ gaga. Evaọ amara ọvuọvo nọ a ro mu uwuhrẹ na họ, o wuhrẹ eria Ebaibol buobu fihọ uzou no. Ọ tẹ jẹ ta nọ ọ gwọlọ nọ a hai wuhrẹ iẹe isiane koka koka! O te ti mu ewuhrẹ họ ẹnya koka koka. Andrea họ ohwo nọ ọ jẹ hai fiobọhọ kẹe re ọ sae jọ ifonu gaviezọ kẹ ewuhrẹ ukoko na.

Nọ Mary ọ ruẹ nọ Joshua ọzae Kristine ọ be hae daoma jariẹ nọ a te bi wuhrẹ Ebaibol, ọ tẹ nọe sọ ọ sae hai kuomagbe ae evaọ uwuhrẹ na. Joshua ọ tẹ ta nọ, “Wha hae ta ze, me bi yo, rekọ whọ nọ omẹ enọ họ. Whọ tẹ nọ omẹ onọ, mẹ te kpama siọ owhai ba.” Rekọ enọ nọ ọyomariẹ ọ nọ evaọ iminiti isoi ọvo i bu vi enọ aye riẹ ọ nọ Mary, yọ ọ gwọlọ nọ a wuhrẹ iẹe re.

Omonọ yena nọ Mary ọ jẹ hae nọ na o lẹliẹ e riẹ wo ahwo buobu nọ o je wuhrẹ Ebaibol. U tube te epanọ ọ rọ vuẹ inievo efa inọ a fiobọhọ kẹe wuhrẹ ahwo jọ. Ahwo nọ Mary o je wuhrẹ evaọ erẹwho ene a bu te ahwo udhegberee.

Jasmin nọ ọ jọ ohwo ọsosuọ nọ o je wuhrẹ ọ họ-ame evaọ amara Ane 2021. Kristine ọ họ-ame evaọ Asoi 2022, yọ o zihe kpobọ Philippines bru ahwo uviuwou riẹ no. Imava efa nọ Kristine o dhesẹ kẹ Mary a họ-ame no re. Nọ Kristine ọ họ-ame no, nọ emerae jọ e jẹ vrẹ no, Angela ọ tẹ họ-ame. Yọ ma be ta ẹme na, ọkobaro oke-kpobi ọ rrọ. Joshua ọzae Kristine avọ ọmọtẹ rai Andrea, gbe amọfa buobu a gbe bi wuhrẹ. Yọ a be nyaharo ziezi evaọ uwuhrẹ rai.

No anwọ okenọ Jesu ọ rọ jọ otọakpọ na ze, ilele riẹ a be raha oke he re a tẹ te ta usi uwoma kẹ imoni rai gbe egbẹnyusu rai. (Jọn 1:41, 42a; Iruẹru 10:24, 27, 48; 16:25-33) Kọ u ti gbe woma re whọ nọ ahwo nọ who bi wuhrẹ sọ a riẹ omọfa nọ ọ te gwọlọ nọ a wuhrẹ iẹe Ebaibol? Ẹsejọhọ omonọ yena ọvo nọ whọ nọ na u ti ru nọ who ti ro wo ahwo buobu nọ who re wuhrẹ.