Rehọ Ebaibol na Rri Omara Ziezi Wọhọ Ughẹgbe

Jemis olele na ọ ta nọ Ebaibol na ọ wọhọ ughẹgbe nọ o sai fiobọhọ kẹ omai riẹ oghẹrẹ ohwo nọ ma rọ dẹẹ. (Jem. 1:22-25) Kọ evẹ ma sae rọ rehọ Ebaibol na rri omamai wọhọ ughẹgbe?

Romatotọ sei. Otẹrọnọ ma tẹ rọ ugidi rri ughẹgbe, ma sae ruẹ oware nọ o thọ nọ o rrọ omai oma ha. Ma re roro nọ u woma no. Oware ovona, re ma sae riẹ oghẹrẹ ohwo nọ ma rrọ evaọ obeva dẹẹ, ma rẹ rọ Ẹme Ọghẹnẹ rri omamai ziezi. Koyehọ ma rẹ romatotọ se Ebaibol na.

Rehọ iẹe rri omara orọnọ amọfa ha. Ma te kru ughẹgbe oghẹrẹ jọ, o sae lẹliẹ omai ruẹ omọfa gbe oware nọ u woma ha nọ o rrọ oma riẹ. Ere re, nọ ma te bi se Ebaibol na ma sai roro nọ, ‘Oware nana, ohwo nana o kiekpahe.’ Nọ ma te bi roro nọ amọfa oria nọ ma bi se o ta kpahe, u re ru nọ ma gbẹ ruẹ eware nọ ma bi ru thọ họ. Oyena u re ru nọ ma gbe nwene ekpehre uzuazọ nọ ma bi yeri na ha.

Who du roro nọ whọ sai ru eware kpobi gbagba ha. Nọ ma tẹ be ruẹ epanọ ma yoma te ọvo eva ughẹgbe, o sai ru nọ eva e gbẹ rọ were omai hi. Nọ ma te bi se Ebaibol na, ma du roro nọ ma be daoma ha ha. Yọ ma du roro nọ ma re ru eware kpobi gbagba ha. Keme Jihova o bi rẹro nọ ma rẹ jọ gbagba ha.—Jem. 3:17.