Oghẹrẹ Ohwo Vẹ Mẹ Rrọ Evaọ Aro Jihova?
1. Ẹvẹ Ebaibol na ọ rọ wọhọ ughẹgbe?
1 Ẹvẹ whọ be hai rri ughẹgbe kpekpe te? Mai ahwo buobu ma re rri ughẹgbe kẹdẹ kẹdẹ keme onana u re fiobọhọ kẹ omai ruẹ oria nọ u fo nọ ma rẹ ruẹrẹhọ evaọ oma mai. Ebaibol na ọ wọhọ ughẹgbe. Nọ ma te bi se ẹme Ọghẹnẹ, u re fiobọhọ kẹ omai ruẹ oghẹrẹ ohwo nọ ma ginẹ rrọ evaọ obeva, yọ oye Jihova o re riwi. (1 Sam. 16:7; Jem. 1:22-24) Ẹme Ọghẹnẹ ọ rẹ sae kiẹ “jẹ riẹ ẹjiroro obọ eva.” (Hib. 4:12) Ẹvẹ Ebaibol na nọ ma re se je roro didi kpahe kẹdẹ kẹdẹ u re ro fiobọhọ kẹ omai riẹ iruemu nọ u fo nọ ma re nwene re ma sae jọ uvi etausiuwoma?—Ol. 1:1-3.
2. Ẹvẹ Ebaibol na ọ sai ro fiobọhọ kẹ omai kiẹ omamai riwi?
2 Rehọ Ebaibol na Ruiruo Wọhọ Ughẹgbe: Iku idibo Jihova nọ e rrọ Ebaibol na i ru omai riẹ oghẹrẹ iruemu nọ e rẹ were Jihova. Wọhọ oriruo, Devidi ọ rọ ọwhọ kpare odẹ Ọghẹnẹ kpehru. (1 Sam. 17:45, 46) Aizaya ọ fialoma via ududu re o whowho ẹme Ọghẹnẹ evaọ ẹkwotọ nọ ahwo a jẹ jọ gaviezọ họ. (Aiz. 6:8, 9) Uyoyou udidi nọ Jesu o wo kẹ Ọsẹ obọ odhiwu riẹ o lẹliẹ e riẹ rehọ iruo usiuwoma ota na wọhọ oware omosasọ gbe evawere orọnikọ owha ogbẹgbẹdẹ hẹ. (Jọn 4:34) Ileleikristi ikpe-udhusoi ọsosuọ a jẹ rọ ajọwha ta usiuwoma na, a rẹroso Jihova, jẹ gbaemu nọ a rẹ ruabọhọ iruo na. (Iruẹru 5:41, 42; 2 Kọr. 4:1; 2 Tim. 4:17) Iriruo itieye na nọ ma re roro didi kpahe i re fiobọhọ kẹ omai kiẹ omamai riwi re ma riẹ eria nọ ma sae jọ daoma viere evaọ egagọ Jihova.
3. Fikieme u ro fo nọ ma re ru inwene nọ i fo ababọ okioraha?
3 Ru Inwene nọ I Fo: Nọ ma tẹ jọ ughẹgbe ruẹ eria jọ nọ u fo nọ ma rẹ ruẹrẹhọ yọ ma ru oware ovo kpahe iẹe he, kiyọ ughẹgbe na u w’iruo kẹ omai hi. Ma rẹ yare Jihova re o fiobọhọ kẹ omai ruẹ eria nọ ma be jọ ru te he, re o je fiobọhọ kẹ omai ru inwene nọ i fo. (Ol. 139:23, 24; Luk 11:13) U fo nọ ma re ru inwene ababọ okioraha nọ o tẹ gwọlọ ere, keme oke nọ u kiọkọ u tulo ho yọ uzuazọ ahwo o rrọ ọza.—1 Kọr. 7:29; 1 Tim. 4:16.
4. Ẹvẹ o rẹ jọ kẹ ohwo nọ ọ rehọ ẹme Ọghẹnẹ rri oma riẹ jẹ j’owọ re ọ kpọ eware nọ e thọ vi?
4 Oghẹrẹ nọ ohwo ọ rrọ evaọ obeva oye Jihova o re rri, yọ oye o mai wuzou vi oghẹrẹ nọ ohwo ọ rrọ evaọ okafe. (1 Pita 3:3, 4) Ẹvẹ o rẹ jọ kẹ ohwo nọ ọ rehọ ẹme Ọghẹnẹ rri oma riẹ jẹ j’owọ re ọ kpọ eware nọ e thọ vi? Ọ rẹ “jọ ọnọ oyo no othọrọ iẹ ẹro ho, rekọ ọ tẹ rọ oruiruo na, ohwo ọnana o re ti wo oghale eva iruo riẹ.” (Jem. 1:25) Ẹhẹ, ma ti wo evawere jẹ jọ uvi etausiuwoma keme ma bi dhesẹ “oruaro Ọnowo na” via wọhọ ughẹgbe.—2 Kọr. 3:18.