Eware Ihrẹ nọ I re Ru Isase Ebaibol Kẹ Erere

“Orọnikọ Ebaibol na yọ obe nọ ahwo a mai wo n’otọ avọ otọ ze ọvo ho, rekọ rite odẹ notha oye họ obe nọ ahwo a be mae gwọlọ evaọ usu ebe kpobi kukpe kukpe.”—OBE-USI NỌ A RE SE TIME.

“Me re se Ebaibol na ẹsejọ, rekọ mẹ ruẹ nọ o rrọ obe nọ u re fou ehoo gaga.”—KEITH, ỌGBA-ILE JỌ NỌ A RIẸ GAGA EVAỌ ENGLAND.

U GBUNU gaga inọ ahwo buobu a wo Ebaibol rekọ o wọhọ nọ a bi sei tere he. Dede na, amọfa jọ a riẹ nọ a bi se Ebaibol na je rri eware nọ a se ghaghae. Wọhọ oriruo, aye jọ nọ a re se Nancy ọ ta nọ: “Anwẹnọ me bi ro se Ebaibol na kohiohiẹ kohiohiẹ je roro kpahe eware nọ mẹ jariẹ se, mẹ ruẹ nọ mẹ be sae rẹriẹ ovao dhe oware kpobi nọ mẹ nyaku evaọ okpẹdẹ na. Isase ikẹdẹ kẹdẹ nana u fi obọ họ kẹ omẹ gaga no fi ọkora kparobọ vi eware efa kpobi nọ mẹ dawo no anwọ ikpe ọgba gbisoi nọ i kpemu na.”

O tẹ make rọnọ who ri ti se Ebaibol na ẹdẹvo dede he, kọ o rrọ oware isiuru kẹ owhẹ inọ Ebaibol na o fi obọ họ kẹ ahwo jọ no? O tẹ rọnọ whọ be hai se Ebaibol na no vẹre, kọ whọ gwọlọ wo erere ologbo no isase ra ze? O tẹ rrọ ere, dawo eware ihrẹ nọ ma be te fodẹ evaọ uzoẹme nana.

Oware 1​—Rọ uvi ẹjiroro sei

◼ Whọ rẹ sai se Ebaibol na wọhọ obe uwoma jọ gheghe hayo obe nọ o rrọ ọgbahọ kẹ owhẹ nọ who re se hayo wọhọ obe nọ whọ gwọlọ se sọ whọ sae jariẹ ruẹ ọkpọvio jọ evaọ akpọ ukpokpoma nana. Dede na, whọ te mai wo erere nọ who te sei avọ ẹjiroro inọ whọ gwọlọ wuhrẹ uzẹme na kpahe Ọghẹnẹ. U te no ere no, who ti wo irere buobu otẹrọnọ ẹjiroro ra họ epanọ whọ rẹ rọ riẹ oghẹrẹ nọ ovuẹ Ebaibol na o sai ro kpomahọ uzuazọ ra.

Ikereakere na i fi ẹgba họ epanọ u wuzou te re ma se Ebaibol na avọ emamọ ẹjiroro ẹkwoma Ebaibol na nọ o ro dhesẹ ughẹgbe inọ: “Ọjọ ọ tẹrọ oyo ẹme na, ọ gbẹrọ oru hu, ọ rẹ [wọhọ] ohwo nọ ọ be rọ ughẹgbe riwẹ ovao riẹ; keme o ri ovao riẹ no ọ vẹ nyawa, oghẹrẹ epa ohwo nọ ọ rọ o vẹ nwane thọrọ iẹe ẹro. Rekọ ọnọ oriwi e ruọ eva uzi ufuoma nọ o gba kiete na, ọ vẹ yahiẹe, ọ gbẹ jọ ọnọ oyo no othọrọ iẹ ẹro ho, rekọ ọ tẹ rọ oruiruo na, ohwo ọnana o re ti wo oghale eva iruo riẹ.”—Jemis 1:23-25.

Ọzae nọ a rọ kẹ oriruo na o rri oma riẹ evaọ ughẹgbe rekọ o ru inwene nọ o gwọlọ evaọ oma riẹ hẹ. Ẹsejọhọ o rri oma riẹ ugigidi ọvo, hayo o ro riẹ oma ha inọ o re ru enwene nọ o gwọlọ. Epọvo na re, ma ti wo erere no Ebaibol na ze ziezi hi nọ ma te bi sei erueru ọvo hayo nọ ma gbe fi oware nọ ma se họ iruo ho. Evaọ abọdekọ riẹ, ma ti wo uvi evawere nọ ma te bi se Ebaibol na avọ ẹjiroro nọ ma gwọlọ rọ jọ iruẹme na, kẹ eriwo Ọghẹnẹ uvẹ re ọ kpọ iroro gbe owojẹ mai.

Oware 2​—Salọ Ebaibol nọ a fa gbagba

◼ Ẹsejọhọ wha wo Ebaibol sa-sa nọ a fa fihọ ẹvẹrẹ ra. Dede nọ whọ rẹ sai wo erere no efafa Ebaibol kpobi ze, u wo ejọ nọ a rọ ẹvẹrẹ ọgaga hayo eme anwae fa nọ e rẹ bẹ ẹriẹ. (Iruẹru Ikọ Na 4:13) A tubẹ rọ iwuhrẹ jọ nọ i n’otọ ze nwene ovuẹ ogbagba Ebaibol na evaọ efafa jọ. Wọhọ oriruo, efafa jọ e rehọ edẹ-ovao na, “Ọghẹnẹ” hayo “Olori” nwene Jihova nọ o rrọ ugogo odẹ Ọghẹnẹ. Fikiere, nọ whọ tẹ be jiroro efafa ọrọ Ebaibol nọ who re se, gwọlọ onọ a fa gbagba evaọ ẹvẹrẹ nọ ọ lọhọ ese nọ u re siuru ese.

Ima ahwo buobu nọ a bi se Ebaibol na wariẹ akpọ-soso họ a ruẹ no inọ a fa Ebaibol New World Translation gbagba avọ eme elọlọhọ nọ i re siuru ese.a Oriruo ọkpọkuọzae jọ evaọ obọ Bulgaria o kẹ imuẹro onana. A kẹ riẹ Ebaibol New World Translation nọ o kpohọ ewuhrẹ Isẹri Jihova. Ọ ta uwhremu na nọ, “Mẹ be hai se Ebaibol anwọ ikpe buobu, rekọ me ri ti se orọ efafa nọ o lọhọ te enẹ hẹ, nọ u re duobọte ohwo udu.”

Oware 3​—Lẹ

◼ Whọ rẹ sai wo otoriẹ Ebaibol na ziezi nọ whọ tẹ lẹ Ọnọ o wo eme riẹ kẹ obufihọ, wọhọ epanọ ọso-ilezi na o ru nọ ọ ta nọ: “Rovie aro mẹ, re mẹ ruẹ eware urirẹ nọ e rọ eva ra.” (Olezi 119:18) Lẹ se Ọghẹnẹ okekpobi nọ who bi se Ebaibol na, yare iẹe kẹ obufihọ nọ who re ro wo otoriẹ Ẹme riẹ. Whọ rẹ sai je yere iei kẹ okẹ orọ Ebaibol na keme o gbẹ rrọ Ebaibol na ha ma hẹ sae riẹ Ọghẹnẹ hẹ.—Olezi 119:62.

Kọ Ọghẹnẹ ọ rẹ kpahe fihọ ayare otioye na? Roro kpahe oware nọ o via kẹ emetẹ ivẹ jọ nọ oni ọvo o yẹ evaọ Uruguay. A wo otoriẹ oware nọ Ebaibol e ta evaọ obe Daniẹl 2:44 he, fikiere a tẹ lẹ inọ jọ Ọghẹnẹ o vi ohwo jọ ze ti fi obọ họ kẹ ai wo otoriẹ ẹme na. Epanọ emetẹ na a gbe ro rovie Ebaibol na fihọ otọ na, Isẹri Jihova ivẹ jọ a tẹ ziọ uwou rai, je se ugogo oria Ikereakere nọ emetẹ na a nwane lẹ kpahe na, kẹsena a te ru oria na vẹ inọ Uvie Ọghẹnẹ u ti nwene egọmeti ahwo-akpọ.b U mu emetẹ ivẹ na ẹro inọ Ọghẹnẹ ọ kpahe fihọ olẹ rai na.

Oware 4​—Sei kẹdẹ kẹdẹ

◼ Ohwo jọ nọ o re printi ebe ọ ta nọ “ahwo a jẹ dẹ Ebaibol kiti kiti” nọ ozighi ọkparesuọ ọrọ September 11, 2001 na ọ roma via no evaọ obọ America. Okenọ okpẹtu ọ tẹ roma via ọvo ahwo buobu a rẹ rọ gwọlọ se Ebaibol na. Dede na, Ebaibol e ta udu họ omai awọ inọ ma hai sei kẹdẹ kẹdẹ, keme o ta nọ: “Obe uzi onana u re no unu ra ha, rekọ who re se i te aso te uvo, whọ vẹ yọre oma ru epanọ a kere fihọ eva riẹ; re edhere ra o kiehọ kẹ owhẹ wowoma, kẹsena who ve ti wo emamọ obọ okparọ.”—Joshua 1:8.

Re ma sai dhesẹ epanọ isase Ebaibol ikẹse kẹse u wuzou te, joma rehọ oriruo ohwo nọ o wo ẹbẹbẹ ọgba-udu no ẹdẹjọ, ọnọ ọ jiroro nọ no umuo oke yena vrẹ ọ rẹ re emu nọ o kiehọ kẹ oma na ọvo. Kọ emu na o ti fi obọ họ kẹe otẹrọnọ okenọ o wo edada jọ evaọ udu na ọvo ọ rẹ rọ re oghẹrẹ emu otiọye? Ijo. O gwọlọ nọ ọ rẹ re emu nọ o kiehọ oma na ẹsikpobi re o sai fi obọ họ kẹe. Epọvo na re, isase Ebaibol ikẹdẹ kẹdẹ u re fi obọ họ kẹ owhẹ nọ “edhere ra o [je] kiehọ kẹ owhẹ wowoma.”

Oware 5​—Hai nwene onaa isase ra

◼ Re a se Ebaibol no obe Emuhọ rite obe Eviavia othotha o rẹ sai woma ziezi, rekọ ẹsejọhọ whọ te ruẹ inọ idhere efa e riẹ nọ a sai ro sei nọ o rẹ kẹ omawere. Idhere itieye na jọ ena.

Se kpahe ugogo ohwo jọ. Se ebe Ebaibol hayo izou sa-sa nọ e ta kpahe ugogo odibo Ọghẹnẹ jọ, wọhọ oriruo:

• Josẹf: Emuhọ 37-50.

• Rut: Rut 1-3.

• Jesu: Matiu 1-28; Mak 1-16; Luk 1-24; Jọn 1-21.c

Tẹrovi ugogo oware hayo uwuhrẹ jọ. Se eria Ikereakere sa-sa nọ e ta kpahe ugogo oware yena. Wọhọ oriruo, ru ekiakiẹ kpahe olẹ, kẹsena who ve se eme sa-sa nọ Ebaibol e ta kpahe olẹ gbe elẹ sa-sa nọ a kere fihotọ evaọ Ebaibol na.d

Se do via. Whọ sai wo erere ziezi ẹkwoma Ebaibol na nọ who re se do via. (Eviavia 1:3) Uviuwou o sai tube kuomagbe sei do via, a sae ghale oria kẹ omoma rai se unọjọ utọjọ hayo ghale oria eme ahwo sa-sa kẹ oma rai se. Ahwo jọ a rẹ reawere ezọgaviẹ kẹ Ebaibol na nọ a rekọdo fihọ ekwakwa ikporakporo. Aye jọ ọ ta nọ: “O jọ bẹbẹ kẹ omẹ re me mu isase Ebaibol na họ, fikiere ezọgaviẹ kẹ onọ a rekọdo fihọ okwakwa ikporakporo me ro muhọ. Enẹna mẹ ruẹ no inọ isase Ebaibol na e kẹ omaweromẹ viọ obe ikuigbe uwoma jọ gheghe.”

Oware 6​—Roro didi

◼ Ogbohrẹ uzuazọ inẹnẹ gbe eware buobu nọ e be rehọ iroro gbe oke ahwo e be kẹ ahwo uvẹ roma totọ roro didi hi. Dede na, wọhọ epanọ o gwọlọ nọ emu ọ rẹ daruọ oma re ọ tẹ sae jọ oma ruiruo na, ere ọvona o gwọlọ nọ ma re roro didi kpahe oware nọ ma jọ Ebaibol na se re ma tẹ sai wo erere noi ze. Ma re ru onana ẹkwoma oware nọ ma se nọ ma rẹ jọ iroro kiẹriwi jẹ nọ omamai enọ wọhọ: ‘Eme onana u wuhrẹ omẹ kpahe Jihova Ọghẹnẹ? Ẹvẹ onana u ro kpomahọ omẹ? Ẹvẹ mẹ sae rọ rehọ onana fi obọ họ kẹ amọfa?’

Eroro odidi otiọye na o re ru nọ Ẹme Ọghẹnẹ ọ jẹ nya te omai udu, je fiba oghọghọ nọ ma re wo no isase Ẹme Ọghẹnẹ ze. Olezi 119:97 o ta nọ: “O, epanọ me you uzi ra! O rọ eva iroro mẹ kẹdẹ kẹdẹ.” Ọso-ilezi na ọ jẹ rehọ ẹkwoma eroro didi fi Ẹme Ọghẹnẹ họ iroro riẹ kẹdẹ kẹdẹ. Ere oruo u fi obọ họ kẹe wo uyoyou ulogbo kẹ oware nọ o wuhrẹ.

Oware 7​—Gwọlọ obufihọ nọ who re ro wo otoriẹ Ẹme Ọghẹnẹ

◼ Ọghẹnẹ o rẹro mi omai nọ ma rẹ rọ ẹgba obọmai ọvo wo otoriẹ Ẹme riẹ vọvọ họ. Ebaibol na e ta dede inọ “eware jọ e rọ eva [riẹ] gaga nọ e rẹ bẹ-ẹriẹ.” (2 Pita 3:16) Obe Iruẹru Ikọ Na o ta kpahe ohwo obọ Ẹtiopia jọ nọ ọ jẹ sai wo otoriẹ oria jọ Ebaibol na nọ o se he. Ọghẹnẹ o vi odibo Riẹ jọ nyai fi obọ họ kẹe, kẹsena ọzae obọ Ẹtiopia na “ọ tẹ ze ruabọhọ erẹ riẹ avọ oghọghọ.”—Iruẹru Ikọ Na 8:26-39.

Whọ sai wo irere buobu efa no isase Ebaibol ze ẹkwoma obufihọ nọ whọ rẹ yare re whọ sai wo otoriẹ eware nọ who se. Gwọlọ Isẹri Jihova evaọ ẹwho ra hayo kere kpohọ adrẹse nọ o fo evaọ ẹwẹ -obe avọ 4 emagazini nana rọkẹ uwuhrẹ Ebaibol ọvọvẹ.

[Oruvẹ-obotọ]