UWUHRẸ AVỌ 11

Epanọ Whọ Sai ro Wo Erere No Ebaibol na Ze Ziezi

Onọ A Printi

Kọ u wo iruo jọ nọ whọ jẹ gwọlọ ru ẹdẹ jọ nọ who roro nọ e rro vi owhẹ abọ? Re iruo na e sae dina lọhọ kẹ owhẹ, ẹsejọhọ whọ ghale rai kpohọ amabọ sa-sa. Epọvo na Ebaibol na nọ a re se o rrọ re. Whọ sae nọ inọ, ‘Diẹse me re jo muhọ?’ Evaọ uwuhrẹ nana, ma te ta kpahe emeware jọ nọ e rẹ sae lẹliẹ Ebaibol na were owhẹ ese.

1. Fikieme u ro fo re ma se Ebaibol na ẹsikpobi?

Ohwo nọ o re se Ebaibol na hayo “uzi Jihova” ẹsikpobi o re wo evawere yọ eware i re woma kẹe. (Se Olezi 1:1-3.) Re who muhọ, daoma hae rọ umutho iminiti jọ se oria jọ evaọ Ebaibol na kẹdẹ kẹdẹ. Epanọ whọ daoma riẹ Ẹme Ọghẹnẹ te, ere Ebaibol na ọ te were owhẹ ese te re.

2. Eme o ti fiobọhọ kẹ owhẹ wo erere ziezi nọ who te bi se Ebaibol na?

Re ma sai wo erere ziezi evaọ okenọ ma te bi se Ebaibol na, o gwọlọ nọ ma rẹ dina dhizu, ma ve roro kpahe oware nọ ma bi se na. U fo nọ ma re se Ebaibol na je “roro didi kpahe iẹe.” (Joshua 1:8, ẹme-obotọ) Nọ who bi se Ebaibol na, nọ omara enọ wọhọ: ‘Eme oria nana u wuhrẹ omẹ kpahe Jihova Ọghẹnẹ? Ẹvẹ mẹ sai ro fi oware nana họ iruo evaọ uzuazọ mẹ? Ẹvẹ mẹ sae rọ rehọ oria Ebaibol nana fiobọhọ kẹ amọfa?’

3. Ẹvẹ whọ sae rọ ruẹ oke nọ who re ro se Ebaibol na?

Kọ o be hae jọ bẹbẹ kẹ owhẹ re whọ ruẹ oke nọ who re ro se Ebaibol na? Ere o be hae jọ kẹ omai ahwo buobu re. Daoma hae “rehọ oke [ra] ruiruo evaọ edhere nọ ọ mai woma.” (Ahwo Ẹfisọs 5:16) Whọ sai ru ere nọ who te fi ugogo oke jọ họ nọ who re ro se Ebaibol na kẹdẹ kẹdẹ. Irioke ahwo jọ a fihọ nọ a re ro se Ebaibol na. Amọfa a re se Ebaibol na evaọ uvo, ẹsejọhọ nọ a tẹ rrọ ibreki. Yọ amọfa jọ a re ru ere evaọ aso taure a te ti kiẹzẹ. Oke vẹ o te mai kiehọ kẹ owhẹ?

GBE WUHRẸ EWARE EFA

Wuhrẹ epanọ Ebaibol na ọ sae rọ were owhẹ oma ese vi epaọ anwẹdẹ. Ruẹ epanọ whọ sae rọ ruẹrẹ oma kpahe ziezi, re who wo erere no uwuhrẹ Ebaibol nana ze.

Iwoho: Ọmọzae nọ ọ be daoma re ọ re oghẹrẹ emu jọ evaọ etoke sa-sa. 1. Ọmọzae na ọ be rọ emu na zaharo. 2. Ọmọzae na nọ ọ be re emu na evaọ oke ofa. 3. Ọmọzae na nọ ọ be re emu na avọ evawere nọ ọ kpako vi epanọ ọ jọ vẹre no. — Wọhọ epanọ ma rẹ daoma re ma sae re emu nọ ma re te re ẹdẹvo ho na, ere ọvona ma rẹ daoma re Ebaibol na ọ were omai ese

4. Wuhrẹ epanọ Ebaibol na ọ sae rọ were owhẹ oma ese

O rẹ sae jọ bẹbẹ re ohwo o mu Ebaibol na họ ese. Rekọ, ma rẹ sae daoma re ma “wo isiuru” nọ ma re ro ru ere, wọhọ epanọ ohwo o re wuhrẹ epanọ ọ rẹ re emu nọ ọ re te re ẹdẹvo ho na. Se 1 Pita 2:2, kẹsena wha vẹ ta ẹme kpahe onọ nana:

Kọ who roro nọ whọ tẹ be hai se Ebaibol na kẹdẹ kẹdẹ, o te lẹliẹe were owhẹ ese je ru nọ whọ te rọ gwọlọ sei ẹsikpobi?

Kporo IVIDIO na re whọ ruẹ epanọ Ebaibol na nọ a re se o ro mu ahwo jọ họ ẹwere. Kẹsena wha vẹ ta ẹme kpahe enọ nọ e rrọ obotọ na.

IVIDIO: Izoge nọ I bi Wuhrẹ Epanọ A re ro You Jihova (5:33)

Evaọ ividio na, ebẹbẹ vẹ izoge na a fi kparobọ?
Eme o fiobọhọ kẹ ae nọ a be sai ro se Ebaibol na wọhọ epanọ a gba riẹ mu nọ a re ru?
Eme a ru re Ebaibol na ọ sae were ae oma ese ziezi?

Eware nọ whọ rẹ sai ru ro mu Ebaibol na họ ese:

Salọ efafa Ebaibol nọ ọ rrọ gbagba, nọ a fa lele oghẹrẹ nọ ahwo a be ta ẹme enẹna. Dawo Efafa Akpọ Ọkpokpọ na otẹrọnọ ọ rrọ evaọ ẹvẹrẹ ra.
Rọ eria Ebaibol nọ e rẹ were owhẹ gaga ro muhọ. Re whọ ruẹ eria itienana jọ, rri echate na “Mu Ebaibol na Họ Ese.”
Hai kere oria nọ who se no fihotọ. Rehọ echate “Kere Oria nọ Who Se No Evaọ Ebaibol Ra Fihotọ” nọ ọ rrọ obe nana ro ru ei.
Jọ JW Library^® app se Ebaibol na. Whọ sai fi ei họ ifonu ra hayo okwakwa utioye ofa, re whọ jariẹ se hayo gaviezọ kẹ Ebaibol na evaọ oria kpobi nọ whọ rrọ.
Hai rri oria eme-ofiba nọ e rrọ Efafa Akpọ Ọkpokpọ na. Eware jọ nọ e rrọ oria nana họ emapo, echate, gbe otofa eme Ebaibol nọ i ti ru isase na were owhẹ ziezi.

5. Hae ruẹrẹ oma kpahe kẹ uwuhrẹ Ebaibol ra

Se Olezi 119:34, kẹsena wha vẹ ta ẹme kpahe onọ nana:

Fikieme u ro woma re whọ hae lẹ taure who te ti se Ebaibol na hayo ruẹrẹ oma kpahe kẹ uwuhrẹ ra?

Eme who re ru re whọ sai wo erere evaọ uwuhrẹ kpobi? Nọ whọ tẹ be ruẹrẹ oma kpahe kẹ uwuhrẹ jọ evaọ obe nana, daoma ru eware nọ e rrọ obotọ na:

Se idhe-eme nọ i mu uwuhrẹ na họ.
Rovie eria Ebaibol na re who se ai, jẹ daoma riẹ oware nọ e ta kpahe uzoẹme na.
Kpoka họ ugogo eme hayo uhie-eme nọ e kẹ uyo enọ ọvuọvo; onana u ti fiobọhọ kẹ owhẹ evaọ okenọ owuhrẹ ra o ti wuhrẹ kugbe owhẹ.

Iwoho: Aye nọ ọ be ruẹrẹ oma kpahe kẹ uwuhrẹ Ebaibol riẹ. A. O bi se ẹwẹ-obe ọsosuọ uwuhrẹ na. B. O bi se eria Ebaibol nọ a fodẹ na. C. O bi kpoka họ ugogo eme gbe uhie-eme jọ evaọ uwuhrẹ na.

Kọ whọ riẹ?

Isẹri Jihova a rọ efafa Ebaibol sa-sa ro wuhrẹ Ebaibol na no. Rekọ, Ebaibol Efafa Akpọ Ọkpokpọ ọrọ Ikereakere Efuafo Na ọ mae were omai keme ọ rrọ gbagba, ọ rrọ vevẹ, yọ odẹ Ọghẹnẹ ọ rrọ eva riẹ.—Rri uzoẹme itanẹte na “Kọ Isẹri Jihova A Wo Ebaibol Obọrai?”

AHWO JỌ A RẸ TA NỌ: “Re a wuhrẹ Ebaibol na yọ okolo iruo ho. Me wo uvẹ hayo oma nọ me re ro wuhrẹ Ebaibol na ha.”

Ẹvẹ who roro?

EME WHO WUHRẸ NO?

Re whọ sai wo erere no Ebaibol na ze ziezi, fi oke jọ họ nọ who re ro sei, lẹ se Jihova re whọ sai wo otoriẹ oware nọ who bi ti se, jẹ ruẹrẹ oma kpahe ziezi kẹ uwuhrẹ Ebaibol ra nana.