Wo Evawere Evaọ Ẹme Ọghẹnẹ
EVAWERE o rọ kẹ ohwo nọ “awere riẹ ọ rẹ jọ evaọ uzi ỌNOWO” na. Ohwo otiọye na o re se Ẹme Ọghẹnẹ “t’aso t’uvo.” (Olezi 1:1, 2) Kọ whọ be ruẹ evawere itieye na? Ẹvẹ whọ sai ro ru oghọghọ nọ Ẹme Ọghẹnẹ ọ rẹ k’owhẹ rro viere?
Gaviezọ nọ Jihova Ọ be t’Ẹme
Who se eme na gheghe ọvo ho. Jọ iroro ra ruẹ iyero nọ who bi se kpahe na. Roro kpahe urru ahwo nọ who bi se eme rai na. Nọ who bi se izou emuhọ erọ Ebaibol na, yo epanọ Jihova omariẹ o bi dhesẹ eware nọ o ru ẹmẹrera re ọ ruẹrẹ otọakpọ na họ kẹ ahwo. Gaviezọ nọ ọ be ta kẹ Ọmọ riẹ, Osu Iruo na, inọ oke u te no re a ma ahwo-akpọ ọsosuọ. Jọ udu ra ruẹ oware nọ o via na: Adamu avọ Ivi a wọso, Ọghẹnẹ o bruoziẹ kpe ai, fikiere, o te le ai no Aparadase. (Emuhọ, izou 1-3) Jọ urirẹ riẹ o j’owhẹ oma nọ who se nọ urru jọ u no odhiwu ze nọ u dhesẹ Jesu Kristi wọhọ Ọmọ Ọghẹnẹ, oyoyou na, ọnọ Ọghẹnẹ o vi ze re ọ rọ uzuazọ riẹ kẹ ahwo-akpọ. (Mat. 3:16, 17) Dai roro oware nọ Jọn ukọ na o ru nọ o yo urru Jihova okenọ o whowho nọ: “Ri, mẹ ruẹrẹ eware kpobi ru no.” (Evia. 21:5) Evaọ uzẹme, isase Ẹme Ọghẹnẹ evaọ edhere ọnana yọ oware evawere!
Ruabọhọ isase okerefihotọ ọfuafo na, whọ rẹ te riẹ Jihova wọhọ ohwo oride nọ ọ vọ avọ idudu. Oma o te w’owhẹ re who sikẹle Ọnọ o you omai na, nọ ọ be rehọ ohrọ yeri kugbe omai na, nọ o re fiobọhọ k’omai otẹrọnọ ma gbẹ be romakpotọ dawo ẹgba mai re ma ru oreva riẹ, je bi dhesẹ k’omai kpahe epanọ ma rẹ rọ kparobọ evaọ eware nọ ma bi ru kpobi na.—Jos. 1:8; Ol. 8:1; Aiz. 41:10.
Epanọ whọ raha oke se Ebaibol na te, ere who ti wo evevọwẹ te nọ whọ be rro evaọ eriariẹ kpahe oware nọ oreva Ọghẹnẹ o rọ kẹ owhẹ na. Rekọ evawere na e te rro viere. Nọ isase ra e tẹ k’owhẹ obufihọ nọ whọ gwọlọ re whọ rehọ areghẹ yeri kugbe ebẹbẹ, oma o te j’owhẹ wọhọ ọso-ilezi na ọnọ ọ ta nọ: “[Ekareghẹhọ] ra i gbunu; fikiere ẹzi mẹ o je koko ai.” (Ol. 119:129) Whọ te ghọghọ re nọ whọ be jọ Ikereakere na duku ehri-izi nọ i re fiobọhọ k’owhẹ kpọ iroro ra gbe isiuru ra evaọ edhere Ọghẹnẹ na.—Aiz. 55:8, 9.
Ebaibol na ọ rẹ kẹ ọkpọvio uruemu nọ o rẹ thọ omai no enwoma je dhesẹ edhere nọ o kiehọ k’omai. Nọ ma bi sei na, ma rẹ riẹ nọ Jihova yọ Ọsẹ nọ ọ riẹ ebẹbẹ nọ e rẹ roma via evaọ okenọ ma te kie kẹ isiuru ugboma sebaẹgba. Ọ gwọlọ nọ ma ruẹ uye ebẹbẹ nọ i re no erivo itee uruemu ikpehru riẹ ze he. O you omai yọ ọ gwọlọ re ma reawere edhere uzuazọ nọ o mai woma. Ma te bi se Ẹme riẹ u ti fiobọhọ k’omai wo ovuhumuo vọvọ viere kpahe epanọ oghale riẹ o rro te re ma woi wọhọ Ọghẹnẹ gbe Ọsẹ obọ odhiwu mai.
Se Ebaibol na Kẹdẹ Kẹdẹ
Enẹ ọso-ilezi na ọ ta kpahe ohwo nọ o bi se Ẹme Ọghẹnẹ kẹdẹ kẹdẹ: “Koware koware nọ o ru, u re woyei obọ.” (Ol. 1:3) Ẹhẹ, ghelọ sebaẹgba mai, dede nọ ma be rria uyerakpọ omuomu Setan, yọ ghelọ omodawọ Ẹdhọ re ọ raha omai, isase ẹsikpobi gbe efihiruo oware nọ o rọ Ẹme Ọghẹnẹ u ti ru omai kparobọ evaọ eware kpobi nọ i kpomahọ usu mai kugbe Jihova.
Nọ otunyẹ o bi no uyerakpọ anwae ọnana ze t’omai na, ẹrehọ iroro Ọnọma na, makọ evaọ omoke kakao dede kẹdẹ kẹdẹ, o sae k’omai ẹgba. Awọ jọ Ebaibol na nọ a je kere fihọ obe-usi họ oware nọ ahwo jọ nọ a fihọ uwou-odi fiki ẹrọwọ rai a sai wo t’obọ. A tẹ biẹ ae, se ai fihọ uzou, je roro kpahe ae. Jihova ọ ghale omodawọ rai keme a ru oware nọ uyero rai o kuvẹ kẹ evaọ ẹrehọ eriariẹ rono Ẹme Ọghẹnẹ ze. (Mat. 5:3) Ghele na, ibuobu mai a wo ufuoma nọ u vi oyena gaga. Jo ma roro vievie he inọ owọ ovo Ebaibol nọ a rẹ rehọ ugidi se ẹsiẹvo okpẹdẹ u ti wo okpomahọ igbunu jọ. Rekọ ma ti wo eghale otẹrọnọ ma nwene eware nọ ma rọ karo re ma se abọjọ Ebaibol na kẹdẹ kẹdẹ, roro kpahe iẹe, je fi ei h’iruo evaọ izuazọ mai.
Evaọ uzẹme, ọzadhe ọ rẹ sae jọ kẹ makọ omaa mai nọ o mai woma kpobi dede. Okenọ oyena o tẹ via, ma rẹ rehọ eware nọ e ghinẹ r’oja karo. Wọhọ oriruo, ma rẹ sai keke aro fihọ siọ ame ba ẹda okpẹdẹ jọ soso hayo edẹ ivẹ hẹ. Fikiere, makọ eware nọ ma nyaku kpobi evaọ uzuazọ, ma rẹ rehọ oke jọ rọ rehọ ame uzẹme na sasa oma mai.—Iruẹru 17:11.
Se Ẹme Ọghẹnẹ Kpobi
Kọ who se Ebaibol na n’oka duoka k’omobọ ra no? Ehoo ọ rẹ ruọ ahwo jọ oma re a roro kpahe ese no Emuhọ rite Eviavia. Fikiere, ahwo buobu nọ a gwọlọ nọ a re se Ebaibol na n’oka duoka a rehọ Ikereakere Griki Ileleikristi na ro muhọ ese. Fikieme? Ẹsejọhọ fikinọ o mae lọhọ ai obọ re a ruẹ epanọ ebe Ebaibol nana i ro kie kpahe ae wọhọ ahwo nọ a be gwọlọ nya lele ithihi Kristi. Hayo ẹsejọhọ fikinọ Ikereakere Griki Ileleikristi na e nwane rro ga hrọ evaọ ese tere he—omojọ ọvo o rọ dina rro vi abọvo abane Ebaibol na. Rekọ nọ a se ebe 27 enana re no, a tẹ rẹriẹ ovao ku ebe 39 erọ Ikereakere Hibru na a je mu ai họ ese jẹ reawere rai. Bẹsenọ a ro se Ikereakere Hibru na re no ho yọ a wo omaa isase Ebaibol ẹsikpobi no, fikiere a tẹ ruabọhọ iẹe, jẹ wariẹ se Ikereakere Ileleikristi Griki na, yọ a ri serihọ họ. Rehọ epọvo na ru isase okpẹdẹ Ẹme Ọghẹnẹ fihọ uruemu uzuazọ ra.
Kọ ohwo jọ ọ rọ uviuwou hayo ukoko ra nọ ọ riẹ ese he? Kọ eme whọ gbẹ daoma re who se Ebaibol na kẹ ohwo na ẹsikpobi hi? Who ti wo erere, ọye omariẹ o ti wo erere re nọ o bi roro kpahe eme nọ o yo je fi ai h’iruo evaọ uzuazọ riẹ na.—Evia. 1:3.
Oke o be nyaharo na, whọ sai fi eware obọdẹ jọ kugbe isase Ebaibol ra. Enana jọ e sai ru ovuhumuo ra kẹ epanọ abọ sa-sa Ebaibol na e rọ jẹhọ ohwohwo rro viere. Otẹrọnọ Ebaibol ra o wo eme akotọ, enana e rẹ sae kpọ owhẹ kpohọ evuẹ ikuigbe gbe eme nọ i tho eyena. E sai fiobọhọ k’owhẹ riẹ iyero nọ i su kpohọ ekere ile-ezi sa-sa gbe ileta nọ ikọ Jesu Kristi a kere na. Obe ọ Insight on the Scriptures o rẹ kẹ evuẹ buobu kpahe ahwo, eria, gbe ekwakwa nọ Ebaibol na ọ fodẹ. Omaa-udhesẹ u re si iroro kpohọ orugba eruẹaruẹ Ebaibol, dhesẹ ivie gbe eruẹaro nọ e rria eva etoke ọvona, je dhesẹ oke nọ eware Ebaibol buobu e rọ via.
Nọ who bi roro kpahe eware nọ who wuhrẹ na, who ti wo otoriẹ ẹjiroro nọ iyero jọ e jẹ roma via evaọ udevie ahwo Ọghẹnẹ. Whọ te jẹ riẹ epanọ Jihova o ro yeri kugbe ahwo riẹ ere. Whọ te ruẹ oghẹrẹ nọ Jihova o re rri owojẹ egọmeti, ahwo, gbe omomọvo. Onana o te lẹliẹ owhẹ riẹ kpahe iroro riẹ viere.
Ikuigbe Ebaibol i ti si owhẹ urru viere evaọ okenọ whọ tẹ riẹ eria nọ eware na e jọ via. Udhesẹ-oria orọ ekwotọ Ebaibol i re dhesẹ oghoghẹrẹ ẹkwotọ gbe epanọ i thabọ no ohwohwo te. Wọhọ oriruo, diẹse emọ Izrẹl a jọ fa Abade Ọwawae na vrẹ? Ẹvẹ Ẹkwotọ Eyaa na ọ rro te? Ẹvẹ Jesu ọ nya te nọ o je ru odibọgba otọakpọ riẹ? Didi eware Pọl ukọ na ọ ruẹ evaọ erẹ imishọnare riẹ? Udhesẹ-eria e rẹ kẹ evuẹ nọ i re ru isase ra siuru. Diẹse whọ sai jo duku udhesẹ-eria erọ ekwotọ Ebaibol na? Ejọ e rọ Ebaibol ọ New World Translation of the Holy Scriptures. Ebe Insight na i wo bu te eria udhesẹ-eria 70, yọ u wo udhesẹ-eria eva ekuhọ uko ọsosuọ na. Rehọ Watch Tower Publications Index gwọlọ udhesẹ-eria efa. Otẹrọnọ who wo ebe nana ha, rehọ udhesẹ-eria nọ a kporo fihọ Uwou-Eroro Na ruiruo re i fiobọhọ k’owhẹ evaọ isase Ebaibol ra.
Evaọ Ikereakere Hibru na, Devidi Ovie na o jiri Jihova, ta nọ: “Ẹvẹ iroro ra, e ghare kẹ omẹ te, O Ọghẹnẹ! ẹvẹ [ekele] rai i bu te!” (Ol. 139:17) Evaọ Ikereakere Ileleikristi Griki na, Pọl ukọ na o jiri Jihova keme O “lo eva eva mai, re ọ kẹ elo ẹriẹ oruaro Ọghẹnẹ eva aro Jesu Kristi.” (2 Kọr. 4:6) Ikpe-udhusoi buobu e hẹriẹ okenọ Devidi ọ rọ rria no oke ọ Pọl; ghele na, aimava a wo evawere kpahe Ẹme Ọghẹnẹ. Ere whọ rẹ sai ru re otẹrọnọ whọ rehọ oke se eware kpobi nọ Jihova ọ k’omai no evaọ Ẹme riẹ nọ ọ kẹ ẹgba ze.
[Ẹkpẹti nọ o rrọ ẹwẹ-obe avọ 11]
KPAROBỌ EVAỌ ISASE EBAIBOL EKẸDẸ KẸDẸ
Abọ ologbo jọ ọrọ ewuhrẹ nọ a be jọ Isukulu Odibọgba Esuo-Ọghẹnẹ na kẹ họ omaa isase Ebaibol na. Ma tuduhọ owhẹ awọ nọ whọ jariẹ w’obọ.
A ghale umutho abọjọ Ebaibol na fihọ kẹ isase omobọ ra gbe onọ a te t’ẹme kpahe evaọ isukulu na k’oka k’oka. Onana o te lẹliẹ owhẹ se Ebaibol na soso duwu ẹmẹrera.
Re whọ sai ru isase Ebaibol ekẹdẹ kẹdẹ fihọ abọjọ uzuazọ ra, fi oke jọ họ kẹe—ẹsejọhọ evaọ irioke, evaọ uvo, oke emuọriọ owọwọ, hayo taure who te ti kiẹzẹ. Re who se amabọ riẹ jọ ọvo evaọ oke nọ who ro wo uvẹ evaọ ẹdẹ na o te lẹliẹ owhẹ sei ẹsikpobi hi.
Whọ tẹ rọ ọnọ o wuzou uviuwou, dhesẹ isiuru ra ẹkwoma obufihọ kẹ ahwo uviuwou na re a wo emamọ omaa. Ebaibol nọ uviuwou u re se kugbe ẹsejọ o rẹ sae tuduhọ ahwo uviuwou awọ re a le isase Ebaibol ekẹdẹ kẹdẹ k’oma rai.
Isase Ebaibol ekẹdẹ kẹdẹ o gwọlọ omonyẹ. A yẹ owhẹ avọ isiuru riẹ hẹ. U fo re who wo ‘ẹgwọlọ’ kẹ Ẹme Ọghẹnẹ. (1 Pita 2:2) Nọ who bi wuhrẹ uruemu na, isiuru abọ-ẹzi ra e te rro. Whọ vẹ te ruẹ nọ whọ gwọlọ ru isase ra kẹre viere ẹkwoma ilale omaa obọdẹ isase Ebaibol gbe ewuhrẹ re otoriẹ gbe ovuhumuo ra kẹ efe abọ-ẹzi nọ Jihova ọ rọ k’omai no na o ruẹsi diwi viere.
Nọ who te bi ru isase Ebaibol ra, rehọ oke jọ roro kpahe otofa eware nọ who bi se na—oware nọ o ta k’owhẹ kpahe Jihova, epanọ o sae rọ kẹ uzuazọ ra erere, gbe epanọ whọ sae rọ rehọ iẹe fiobọhọ kẹ amọfa.