Duoma Ra Họ Isase

ERAO e sai ru oware nọ who bi ru obọnana ha. Omọvo evaọ imazeza kpobi a ti wuhrẹ re a s’obe he—ẹsibuobu fiki uvẹ nọ a re ro kpohọ isukulu nọ o riẹ hẹ—yọ evaọ usu enọ i wuhrẹ epanọ a re se no, ibuobu a bi ru ere kẹse kẹse he. Ghele na, ona nọ who re ro se obe o rẹ lẹliẹ owhẹ rọ ekwotọ efa kp’erẹ evaọ obe-use, nyaku ahwo nọ izuazọ rai e rẹ sai ru ora woma, je wo eriariẹ nọ i re fiobọhọ k’owhẹ thihakọ awaọruọ uzuazọ.

Ẹgba nọ a re ro s’obe ziezi o re kpomahọ erere nọ ọmoha o re wo no isukulu riẹ ze. Okenọ ọ tẹ be gwọlọ iruo, ẹgba isase riẹ ọ sai kpomahọ oghẹrẹ iruo nọ o ti wo gbe unu euwa nọ o re ruiruo re ọ sae ko unu riẹ. Eyae uwou-orọo nọ i re se ziezi a rẹ sẹro iviuwou rai woma viere evaọ abọ emamọ emuore, ẹfuọ, gbe awhaha ẹyao. Ini-emọ nọ i re se ziezi a rẹ sai je kpomahọ obe-oriẹ emọ rai gaga.

Rekọ, erere nọ ọ mae rro nọ o re no isase ze họ o rẹ sae lẹliẹ owhẹ “ruẹ eriariẹ Ọghẹnẹ na.” (Itẹ 2:5) Ẹgba obe use u w’obọ kugbe idhere buobu nọ ma be rọ gọ Ọghẹnẹ na. A re se Ikereakere na gbe ebe nọ a kporo no Ebaibol ze eva iwuhrẹ ukoko. Oghẹrẹ nọ who bi ro se obe o re kpomahọ ona ra evaọ odibọgba na. Yọ omaruẹrẹhọ kẹ iruẹru enana e gwọlọ isase. Fikiere orro abọ-ẹzi ra o roma hwa uruemu isase ra gaga.

Rehọ Uvẹ na Ruiruo Ziezi

Ahwo jọ nọ a bi wuhrẹ idhere Ọghẹnẹ a riobe tere he. U fo re a wuhrẹ ai isase re a sai ru ẹnyaharo abọ-ẹzi rai vẹrẹ. Hayo a sae gwọlọ obufihọ nọ a rẹ rọ riẹ se viere. Oria nọ ẹgwọlọ ọ rọ, ikoko e rẹ daoma ruẹrẹ eklase ọriẹse-gbe-ekere họ. Idu ahwo buobu a w’erere gaga no ọruẹrẹfihotọ ọnana ze no. Fiki epanọ u wuzou te re a riẹ ese ziezi, ikoko jọ a ruẹrẹ eklase ọriẹse họ lele Isukulu Odibọgba Esuo-Ọghẹnẹ na. Makọ evaọ eria nọ eklase itieye na e rọ họ, ohwo ọ sai ru emamọ ẹnyaharo ẹkwoma oke jọ nọ ọ rẹ gwọlọ kẹdẹ kẹdẹ ro se do via gbe ekpohọ avọ obọ nọ o re wo evaọ isukulu na.

U yoma gaga, ebe ifoto gbe etẹlivisiọne, gbe eware efa, e lẹliẹ ahwo buobu gbabọkẹ isase no. Etẹlivisiọne iriwo gbe obe use ọthobọ ọvo o rẹ sae whaha ẹroharo ona isase ohwo gbe ẹgba nọ o re ro roro vevẹ jẹ riẹme ta ziezi.

‘Ọrigbo nọ o wo ẹrọwọ avọ areghẹ na’ ọ k’omai ebe nọ i re fiobọhọ k’omai wo otoriẹ Ebaibol na. Enana e rẹ k’omai evuẹ eghaghae kpahe eware abọ-ẹzi nọ e r’oja. (Mat. 24:45; 1 Kọr. 2:12, 13) E rẹ jẹ lẹliẹ omai riẹ kpahe eware nọ e be via evaọ akpọ gbe otofa rai, fiobọhọ k’omai riẹ viere kpahe iruẹru akpọ na, je wuhrẹ omai idhere nọ ma re ro thihakọ eware nọ i kpomahọ omai. Maero, e rẹ tẹrovi epanọ ma rẹ rọ gọ Ọghẹnẹ evaọ edhere nọ o fo je wo ọjẹrehọ riẹ. Isase iwoma itieye na i ti fiobọhọ k’owhẹ rro wọhọ ohwo abọ-ẹzi.

Dede na, ẹgba ọriẹse ọvo o nwane rrọ ewoma k’omariẹ hẹ. U fo re a rehọ ona na ruiruo evaọ emamọ edhere. Wọhọ emuọriọ, a rẹ salọ ebe nọ a re se. Fikieme whọ jẹ re emu nọ ọ rẹ k’owhẹ emamọ oware evaọ oma ha hayo onọ o rẹ tubẹ nua owhẹ dede? Epọvo na re, fikieme who je se obe nọ, o tẹ make rọ nọ re who ro le oke haro ọvo, nọ o rẹ sae nua iroro gbe udu ra? Ehri-izi Ebaibol e rẹ jọ ute nọ ma rẹ rọ salọ ebe se. Taure whọ tẹ te jiroro oware nọ who re se, wo ikereakere wọhọ enana họ iroro, Ọtausiwoma Na 12:12, 13; Ahwo Ẹfẹsọs 4:22-24; 5:3, 4; Ahwo Filipai 4:8; Ahwo Kọlọsi 2:8; 1 Jọn 2:15-17, gbe 2 Jọn 10.

Se Avọ Emamọ Ẹjiroro

Epanọ emamọ ẹjiroro isase o wuzou te u re vẹ viere nọ whọ tẹ kiẹ ikuigbe Usiuwoma na riwi. Wọhọ oriruo, evaọ Usiuwoma ọ Matiu, ma ruẹ Jesu nọ ọ be nọ isu egagọ nọ e riẹ fila enọ wọhọ “Wha ri se?” gbe “Wha ri se nọ?” taure ọ tẹ te rehọ Ikereakere na kẹ iyo kẹ enọ ẹghẹ rai. (Mat. 12:3, 5; 19:4; 21:16, 42; 22:31) Oware jọ nọ ma wuhrẹ no onana ze họ ma te wo iroro ethọthọ bi ro ru isase, ma rẹ sai rri ẹme na thọ hayo tube ku ẹjiroro ẹme na kpobi fiẹ dede. Otu Farisi na a je se Ikereakere na keme a roro nọ ẹkwoma rai a ti wo uzuazọ ebẹdẹ bẹdẹ. Osohwa oyena, wọhọ epanọ Jesu o dhesẹ, a rẹ rehọ iẹe kẹ enọ i you Ọghẹnẹ hẹ hẹ nọ e rọwo edhere esiwo Riẹ hẹ. (Jọn 5:39-43) Ẹjiroro otu Farisi na o jọ orọ oriobọ; fikiere, iroro rai buobu e jọ thọthọ.

Uyoyou kẹ Jihova họ iroro nọ e mae rọ fuafo kpobi nọ ma re ro se Ẹme riẹ. Uyoyou utioye na o rẹ w’omai wuhrẹ kpahe oreva Ọghẹnẹ, keme uyoyou “o rẹ ghọghọ eva oware nọ u kiete.” (1 Kọr. 13:6) O tẹ make rọnọ obe-use o jẹ were omai vẹre he, ‘eva kpobi’ nọ ma re ro you Jihova o te w’omai re ma fi iroro mai kpobi họ ewo eriariẹ Ọghẹnẹ. (Mat. 22:37) Uyoyou o rẹ kpare isiuru, yọ isiuru e rẹ lẹliẹ ohwo wuhrẹ.

Roro Kpahe Ovẹrẹ Na

Isase gbe oware ovuhumuo e rẹ nya kugbe ohwohwo. Epanọ who bi tube se obe obọnana, who bi vuhu eme mu jẹ kareghẹhọ otofa rai. Whọ rẹ sai se vẹrẹ viere otẹrọnọ who ru ẹgba oware ovuhumuo ra kẹre. Ukpenọ whọ rẹ fọ re who rri ubiẹme ovuovo, daoma se eme buobu kugbe. Nọ whọ be jọ ona nana nyaharo na, whọ te ruẹ nọ who bi wo otoriẹ eware nọ who bi se viere.

Rekọ nọ who te bi se eme ididi, oware nọ who re wo no omodawọ ra ze o rẹ sai bu viere nọ whọ tẹ rọ edhere ọfa ru ei. Nọ ọ jẹ hrẹ Joshua kpahe isase riẹ ọrọ Ikereakere na, Jihova ọ ta nọ: ‘Obe uzi onana u re no unu ra ha, rekọ whọ rẹ rọ udu totọ sei.’ (Jos. 1:8) A rẹ rọ udu totọ t’ẹme evaọ okenọ ohwo o te bi roro. Fikiere, ubiẹme Hibru nọ a fa ‘rọ udu totọ’ na a rẹ jẹ fae “roro.” (Ol. 63:6; 77:12; 143:5) Okenọ o te bi roro, ohwo o re roro didi; o re dhuoma ha. Ohwo o te bi se avọ iroro o rẹ lẹliẹ Ẹme Ọghẹnẹ kpomahọ iroro gbe udu riẹ viere. Ebaibol na o wo eruẹaruẹ, ohrẹ, itẹ, eme-ọketa, iwhowhovia ẹdhoguo Ọghẹnẹ, eme kpahe ẹjiroro Jihova, gbe iriruo aruakpọ buobu—aikpobi nọ i wo erere kẹ enọ e gwọlọ nya evaọ idhere Jihova. Ẹvẹ u wo erere te re ma se Ebaibol na evaọ edhere nọ o rẹ lẹliẹe kpomahọ iroro gbe udu mai didi!

Wuhrẹ Epanọ A rẹ Kpọ Iroro Mu

Nọ who bi se na, fi oma ra họ uyero kpobi nọ a bi dhesẹ na. Daoma jọ iroro ra ruẹ ahwo na, jẹ jọ iroro ra dhomahọ eware nọ e be via evaọ izuazọ rai. Onana o rẹ jọ lọlọhọ nọ who te bi se ikuigbe wọhọ ọrọ Devidi avọ Goliat, onọ a kere fihọ 1 Samuẹle uzou avọ 17 na. Rekọ makọ eme nọ e rọ Ọnyano gbe Iruo-Izerẹ kpahe ebabọ uwou-udhu na hayo eromuo ọkwa-ozerẹ na i re vẹro viere nọ whọ tẹ jọ iroro ra ruẹ epanọ uwou na o rro te gbe ekwakwa nọ a rọ bọe hayo roro kpahe ore insẹnse na, eka nọ a tọ, gbe erao nọ a rọ ze kẹ idhe emahọ na. Roro kpahe epanọ u re mu urirẹ te re a wha iruẹru ozerẹ haro! (Luk 1:8-10) Who te bi fi iroro gbe ọwhọ ra h’iruo evaọ edhere ọnana u ti fiobọhọ k’owhẹ wo otofa eme nọ who bi se na o vẹ jẹ lẹliẹ owhẹ kareghẹhọ eme nọ who se na.

Dede na, whọ gbẹ yọrọ oma ha, whọ tẹ be gwọlọ se, iroro ra e sae jọ oria ofa. Whọ sae barosa obe na, rekọ iroro ra e nya thabọ no. Kọ who bi kporo ile? Kọ who fi etẹlivisiọne họ? Kọ ahwo uviuwou na a be t’ẹme? O tẹ lọhọ, o rẹ mai woma re ma se obe evaọ oria ofọfọ. Ghele na, awhaha na ọ sai no obeva ze. Ẹsejọhọ who ruiruo gaga evaọ okpẹdẹ na. O, ẹvẹ o rẹ lọhọ te re iruẹru ẹdẹ ọyena e jọ udu ra dhẹ! Uzẹme, u woma re a kiẹ iruẹru ẹdẹ na riwi—rekọ orọnikọ evaọ oke nọ who bi se obe he. Ẹsejọhọ whọ riẹ muhọ avọ iroro ra nọ e rrọ oria ovo, hayo whọ tubẹ rọ olẹ muọ isase ra họ dede. Rekọ nọ who bi se haro na, iroro ra i ve muhọ ẹdhẹ. Wariẹ daoma. Gba oma ra họ re who fi iroro ra họ obe nọ who bi se na. Ẹmẹrera na, whọ te ruẹ ẹnyaharo.

Eme who re ru evaọ okenọ whọ tẹ nyaku ẹme nọ whọ riẹ hẹ? A rẹ jọ evaọ obe na fotọ eme jọ nọ e rọ gaga hayo t’ẹme kpahe ai. Hayo whọ sae rọ eme nọ e wariẹ ubiẹme na họ riẹ otọ riẹ. O gbẹ rọ ere he, otẹrọnọ who wo ofeme, rehọ oke jọ gwọlọ otọ ẹme na, hayo kpoka họ ẹme na re whọ nọ ohwo jọ otofa riẹ ẹsiẹfa. Onana o te lẹliẹ owhẹ riẹ eme buobu je fiba otoriẹ isase ra.

Isase Ogbotu

Nọ Pọl ukọ na ọ ta kẹ Timoti nọ ọ ruabọhọ isase, isase rọkẹ erere amọfa Pọl ọ jẹ ta kpahe dẹẹ. (1 Tim. 4:13) Emamọ isase ogbotu o gwọlọ vi eme nọ a re se no obe ze ọvo. U fo re osisase na o wo otofa eme na gbe otoriẹ ẹjiroro rai. O te ru ere ọvo ọ jẹ sai se eme na liọ ziezi jẹ kpọ uvou riẹ lele otofa eme na. Rekọ onana o gwọlọ emamọ omaruẹrẹhọ gbe ewuhrẹ. Fikiere, Pọl ọ kẹ uduotahawọ nọ: ‘He kuomagbe ogbotu na se ikereakere ẹri na.’ Who ti wo uwuhrẹ oghaghae evaọ ona nana evaọ Isukulu Odibọgba Esuo-Ọghẹnẹ na.

Fi Oke Họ kẹ Isase

“Oma omamọ ohwo o rẹ rehọ ọruẹriọ tha, rekọ ohwo kpobi nọ o re bru okpakpa ọ rẹ te jọ ababọ eware.” (Itẹ 21:5) Ẹvẹ oyena o rọ uzẹme te kpahe isiuru mai re ma se obe! Re ma ruẹ “ọruẹriọ” na, u fo re ma jiroro ziezi re iruẹru efa e siọ oke isase mai ba ẹla ro.

Okevẹ who re ro se? Kọ who re wo erere ẹkwoma isase irioke? Hayo kọ okiofa evaọ okpẹdẹ na whọ rẹ mai muẹrohotọ? Otẹrọnọ whọ rẹ sae ruẹrẹ makọ iminiti 15 hayo 20 họ evaọ okpẹdoke ro ru isase, erere nọ who ti wo o ti gb’owhẹ unu. Usiavẹ na họ eruo riẹ kẹse kẹse.

Fikieme Jihova ọ jẹ salọ nọ o re ru re a kere ẹjiroro ọruaro riẹ fihọ obe? Re ahwo a sai rri Ẹme riẹ nọ a kere na. Onana u re fiobọhọ kẹ ae roro kpahe iruo igbunu Jihova, re a rọ enana gbiku kẹ emọ rai, re a je fi iruẹru Ọghẹnẹ họ ẹvori. (Ol. 78:5-7) Ovuhumuo mai kẹ ọghọruo Jihova evaọ abọ nana ọ rẹ mai dhesẹ oma via evaọ oghẹrẹ nọ ma fi oma mai họ isase Ẹme riẹ nọ ọ rẹ kẹ uzuazọ na.

[Ẹkpẹti nọ o rrọ ẹwẹ-obe avọ 21]

EME WHO RE FIHỌ OMAA ISASE RA?

• Kọ Ebaibol na ọ be karo evaọ isase ra?

• Kọ who bi se emagazini Uwou-Eroro gbe Awake! na kẹse kẹse?

• Kọ who re se ebe ekpokpọ nọ a re ro wuhrẹ Ebaibol nọ e tẹ nwani te owhẹ obọ no?

• Nọ a tẹ k’owhẹ ẹkẹ Odibọgba Uvie Mai ra no, kọ who bi se eme nọ e rọ eva riẹ re i fiobọhọ k’owhẹ evaọ odibọgba ra?

• Bro ebe anwae Isẹri Jihova who se no?

[Uwoho nọ o rrọ ẹwẹ-obe avọ 22]

Oware nọ who se kẹ emọ ra o sai fiobọhọ kpọ uruemu rai

[Uwoho nọ o rrọ ẹwẹ-obe avọ 22]

Uruemu isase ra u re kpomahọ orro abọ-ẹzi ra

[Uwoho nọ o rrọ ẹwẹ-obe avọ 22]

Wuhrẹ re whọ jọ ọnọ ọ rẹ riẹ obe se ziezi evaọ ogbotu

[Uwoho nọ o rrọ ẹwẹ-obe avọ 22]

Hai duoma ra họ isase ogbotu

[Uwoho nọ o rrọ ẹwẹ-obe avọ 24]

Obe use kugbe u re si ahwo uviuwou kugbe