Wuhrẹ Ahwo nọ A Riẹ Obe Ese Tere He
1. Didi use-abọ ma rẹ sae nyaku evaọ usiuwoma ota?
1 Nọ ma te kpohọ usiuwoma ota, ẹsejọ ma rẹ nyaku ahwo nọ a riẹ obe ese tere he, yọ o rẹ sae jọ bẹbẹ re ma wuhrẹ ai uzẹme na. Kọ eme ma rẹ sai ru?
2. Fikieme ma jẹ kẹ ahwo nọ a riẹ obe ese tere he adhẹẹ, kọ ẹvẹ ma sai ro ru ei?
2 Dhesẹ Adhẹẹ Kẹ Ae: Oghẹrẹ nọ udu ohwo o rrọ oye Jihova o re rri, orọnikọ epanọ o kpohọ isukulu te he. (1 Sam. 16:7; Itẹ 21:2) Fikiere, ma re rri ahwo nọ a riẹ obe ese tere he vo ho. Ma te dhesẹ adhẹẹ gbe odiri kẹ ahwo otiọye, ẹsiẹe a te mae gaviezọ k’omai. (1 Pita 3:15) Oyena u re ru nọ ma gbe sikẹ hẹ inọ ọye o re se edhe-ẹme jọ. Nọ ohwo na o bi wo ẹnyaharo evaọ uzẹme nọ o bi wuhrẹ na, o ti wo ọwhọ nọ ọ rẹ rọ daoma wo ẹnyaharo evaọ onaa isase riẹ, re ọ sae rọ ere wo oghọghọ nọ o re ro se Ẹme Ọghẹnẹ k’omobọ riẹ “t’aso t’uvo.”—Ol. 1:2, 3.
3. Idhere vẹ ma sai ro wuhrẹ ahwo nọ a riẹ obe ese tere he?
3 Idhere Sa-sa nọ Ma Sai ro Ru Obe-Uwuhrẹ Ebaibol: Iwoho i re fi obọ họ k’omai wuhrẹ amọfa ziezi, jẹ lẹliẹ ai kareghẹhọ oware nọ a wuhrẹ. Whọ rẹ sae nọ ọmọ-uwuhrẹ oware nọ ọ ruẹ evaọ uwoho nọ o rrọ obe nọ who bi ro wuhrẹ iẹe na. Kẹsena whọ vẹ nọe enọ nọ i re fi obọ họ kẹe riẹ oware nọ uwoho na u dikihẹ kẹ. Se ikere nọ e ta kpahe igogo eware jọ nọ uwoho na u dikihẹ kẹ. Whọ sae jẹ rehọ iwoho na ro ru ọkiẹkpemu uwuhrẹ na. Who re wuhrẹ idhe-eme bu hrọ ẹsiẹvo ho. Fiẹgba họ uzoẹme gbe igogo-eme uwuhrẹ na, jẹ whaha ẹta kpahe eware efa nọ i kiekpahe uwuhrẹ na ha. Se ikere no Ebaibol na ze ovavo, jẹ nọ ọmọ-uwuhrẹ na enọ rọ riẹ sọ o wo otoriẹ oware nọ wha se na. Onana o sai ru ei wo isiuru nọ ọ rẹ rọ daoma wo ẹnyaharo evaọ onaa isase riẹ, re ọ sai se Ebaibol na k’omobọ riẹ.
4. Ẹvẹ ma sai ro fi obọ họ kẹ ọmọ-uwuhrẹ Ebaibol mai wo ẹnyaharo evaọ onaa isase riẹ?
4 Epanọ A Sai ro Wo Ẹnyaharo Isase: Ahwo nọ a riẹ obe ese tere he a sai wo otoriẹ ẹme jẹ kareghẹhọ oware ziezi. Whọ sae tuduhọ ahwo otiọye na awọ re a hae gaviezọ kẹ ahwo nọ a riẹ obe ese ziezi gbe ekasẹte hayo CD ukoko na nọ a kporo ebe mai fihọ na. Ezọ nọ ọ rẹ gaviẹ ziezi kẹ ohwo nọ o bi se na yọ o bi rri lele iei evaọ obe riẹ, jẹ tubẹ wariẹ eme na lele isase na, u re fi obọ họ kẹe wo ẹnyaharo evaọ onaa isase riẹ. Ekpako na a re ru ọruẹrẹfihotọ eklase a riẹ-se jẹ riẹ-kere. Ma tẹ nya lele idhere sa-sa nana, ma te sai fi obọ họ kẹ ahwo nọ a riẹ obe ese tere he re a wo otoriẹ Ẹme Ọghẹnẹ nọ u re ru ai wo esiwo.—2 Tim. 3:15.