Epanọ Ma Sai ro Fiobọhọ kẹ Ahwo nọ A Riẹ Obe Ese Tere He

1. Oghẹrẹ ahwo vẹ ma rẹ sae nyaku evaọ usiuwoma?

¹ Ma rẹ sae nyaku ahwo nọ a riẹ obe ese tere he evaọ usiuwoma nọ i wo isiuru kpahe ẹme Ọghẹnẹ, rekọ oma o rẹ vo ae nọ ma tẹ kẹ ae Ebaibol hayo ebe mai efa nọ a se. O te nwani kiehọ họ re ma rehọ obe Ebaibol Wuhrẹ na mu uwuhrẹ họ kugbe ahwo otiọye na. Ẹvẹ ma sai ro fiobọhọ kẹ ae wuhrẹ Ebaibol na? Ma kiẹ iwhowho-uvie nọ i wo onaa ziezi riwi evaọ erẹwho nọ i bu vi 20 kpahe oware nọ a re ru nọ a tẹ nyaku ahwo otiọye na. Eware jọ nọ a fodẹ e rrọ obotọ na.

2. Ebe vẹ ma sai ro wuhrẹ ohwo nọ ọ riẹ obe ese tere he?

² Otẹrọnọ ọmọ-uwuhrẹ Ebaibol na ọ riẹ obe ese tere he hayo ọ riẹ ese vievie he, whọ sae rọ ibroshọ Gaviezọ kẹ Ọghẹnẹ hayo Gaviezọ kẹ Ọghẹnẹ re Whọ Rria Bẹdẹ Bẹdẹ ro muhọ kugbei. Ọkobaro jọ evaọ obọ America o re dhesẹ ibroshọ ivẹ na kẹ ohwo na re ọ salọ onọ ọ gwọlọ nọ a ro wuhrẹ iẹe. Uwou ogha obọ Kenya o niyẹrẹ nọ a rọ ibroshọ nana fiobọhọ kẹ ahwo buobu no evaọ ẹkwotọ rai keme evaọ Africa, iku a rẹ mai gbe orọnikọ enọ gbe iyo a re ro wuhrẹ hẹ. Dede nọ ma rẹ sae rehọ enọ gbe iyo ro wuhrẹ ohwo nọ ọ riẹ obe ese ziezi, o rẹ sae jọ bẹbẹ kẹ ohwo nọ ọ riẹ obe ese tere he. Otẹrọnọ ohwo na ọ rẹ sai se omojọ, iwhowho-uvie buobu a rẹ rehọ ibroshọ Emamọ Usi nọ U No Obọ Ọghẹnẹ Ze!, Whọ Rẹ Sae Jọ Ogbẹnyusu Ọghẹnẹ!, hayo Obe Ikuigbe Ebaibol Mẹ na ro mu uwuhrẹ họ kugbei.

3. Eme ma rẹ riẹ kpahe ahwo nọ a riẹ obe ese he nọ o rẹ sai fiobọhọ kẹ omai wuhrẹ ai?

³ Jiri Ei kẹ Omodawọ Riẹ: Oma o rẹ sae vo ohwo nọ ọ riẹ obe ese he, yọ u re tube ru ei roro nọ o fioka ha. Oware ọsosuọ nọ who re ru họ, who re jiri ei kẹ omodawo riẹ re uwuhrẹ na o ruọ ẹe oma. Ahwo buobu nọ a riẹ obe ese he a re kru oware ẹriẹ hẹ nọ a te wuhrẹ ai. Daoma rọ adhẹẹ nọ o te ohwo na kẹe. (1 Pita 3:15) Nọ whọ tẹ be hae ta kẹe nọ ọ be daoma, u ti ru ei wo ọwhọ nọ o re ro wuhrẹ haro. Fikiere hai jiri ei kẹse kẹse kẹ omodawọ riẹ.

4. Ẹvẹ ma sae rọ tuduhọ emọ-uwuhrẹ Ebaibol mai nọ e riẹ obe ese he awọ re a ruẹrẹ oma kpahe kẹ uwuhrẹ na?

⁴ O tẹ make rọnọ ọmọ-uwuhrẹ na ọ riẹ obe ese tere he, tuduhọ iẹe awọ re ọ hae ruẹrẹ oria nọ wha ti wuhrẹ na kpahe. Iwhowho-uvie jọ evaọ obọ South Africa a rẹ ta kẹ emọ-uwuhrẹ rai re a vuẹ oniọvo hayo ogbẹnyusu rai nọ ọ riẹ obe ese re o se oria na kẹ ae. Owhowho-uvie jọ evaọ obọ Britain ọ rẹ rehọ obe riẹ kẹ emọ-uwuhrẹ Ebaibol riẹ nọ a te mu uwuhrẹ na họ obọ, re a ruẹ nọ usi nọ a re si họ otọ uyo enọ na u re fiobọhọ kẹ ae kiyo na lọlọhọ. Oniọvo-ọmọzae jọ evaọ obọ India ọ rẹ ta kẹ emọ-uwuhrẹ Ebaibol riẹ re a rri ifoto oria nọ a ti wuhrẹ oke ofa, re a je roro kpahe ae.

5. Ẹvẹ ma sai ro dhesẹ ithihakọ evaọ etoke uwuhrẹ na?

⁵ Wo Ithihakọ: Obe kpobi nọ who bi wuhrẹ kugbe ohwo kẹhẹ, oware nọ o mai wuzou họ, epanọ who re ro fiobọhọ kẹe wo otoriẹ oware nọ who bi wuhrẹ iẹe na. Nọ who te bi mu uwuhrẹ na họ obọ, rọ iminiti 10 hayo 15 ọvo ru ei. Who wuhrẹ iẹe eware bu hrọ họ, umutho idhe-eme jọ ọvo i te. Otẹrọnọ o re se kpẹlẹ kpẹlẹ, thihakọ bẹsenọ o re se re no. Nọ oke o be nyaharo na, ọ te riẹ obe ese. Oware jọ nọ u re fiobọhọ kẹe họ, nọ whọ tẹ nwani mu uwuhrẹ na họ no, zizie ei re ọ hae ziọ iwuhrẹ ukoko na.

6. Ẹvẹ ma sai ro fiobọhọ kẹ ohwo nọ ọ riẹ obe ese he?

⁶ Nọ ọmọ-uwuhrẹ Ebaibol ọ tẹ riẹ obe ese ziezi no, ẹnyaharo riẹ ọ rẹ kpata gaga. (Ol. 1:1-3) Iwhowho-uvie buobu a rẹ rehọ obe ọ How to Read and Write na ro fiobọhọ kẹ emọ-uwuhrẹ Ebaibol rai ẹsikpobi nọ a te wuhrẹ kuhọ no. Otẹrọnọ ọmọ-uwuhrẹ Ebaibol na o bi roro nọ ọ be daoma ha, whọ rẹ sae kareghẹhọ iẹe eme jọ nọ ọ jẹ sai se vẹre he nọ o bi se enẹna. Tuduhọ iẹe awọ nọ Jihova ọ te ghale omodawọ riẹ, jẹ ta kẹe rẹ ọ hai fi ei họ olẹ ẹsikpobi. (Itẹ 16:3; 1 Jọn 5:14, 15) Iwhowho-uvie jọ evaọ obọ Britain a rẹ tuduhọ emọ-uwuhrẹ Ebaibol rai awọ re a fi itee nọ a rẹ sae le t’obọ họ kẹ oma rai, wọhọ oriruo, a rẹ sae ta kẹ ae re a daoma riẹ ibieme na uzuzou, salọ eria Ebaibol jọ nọ e rrọ lọlọhọ nọ a re se, kẹsena a vẹ daoma se ebe mai jọ nọ eme rai e ga tere he. Re ma sai fiobọhọ kẹ ohwo nọ ọ riẹ obe ese he, o gwọlọ nọ ma rẹ daoma ru re obe-use o were iẹe, orọnikọ ma re wuhrẹ iẹe epanọ a re se obe ọvo ho.

7. Fikieme ma rẹ rọ daoma wuhrẹ kugbe ahwo nọ e riẹ obe ese he?

⁷ Jihova o re rri ohwo ọvo vo ho o tẹ make rọnọ o kpohọ isukulu hu. (Job 34:19) Udu na Jihova o re riwi. (1 Irv. 28:9) Fikiere daoma wuhrẹ ẹme Ọghẹnẹ kugbe ahwo nọ e riẹ obe ese he. Ebe sa-sa e riẹ nọ whọ sai ro mu obe-uwuhrẹ họ kugbe ai. Nọ oke o be nyaharo na, whọ sai nwene kpohọ obe Ebaibol Wuhrẹ na re ọ sae riẹ igogo iwuhrẹ nọ e rrọ Ebaibol na.