Enọ I Bi Se Ebe Mai A Nọ Inọ . . .

Kọ Ọghẹnẹ o wo emuhọ?

▪ Ebaibol e ta nọ Ọghẹnẹ o wo emuhọ họ. Ọghẹnẹ ọ rrọ no ebẹdẹ ze. O tẹ make rọnọ o rrọ bẹbẹ re ma wo otoriẹ ẹme na inọ Ọghẹnẹ o wo emuhọ gbe ekuhọ họ, ma rẹ nwane rọ fikiọ ere ọvo vro riẹ hẹ.

Kọ o ginẹ rrọ oware iroro re ma rẹro nọ ma rẹ sae riẹ idhere Ọghẹnẹ kpobi fiotọ? Pọl ukọ na ọ ta nọ: “O! Wha ri edidi efe, gbe areghẹ, gbe ẹriẹ Ọghẹnẹ! Epanọ izieibro riẹ idhere te, gbe epanọ a sae riẹ idhere riẹ hẹ!” (Ahwo Rom 11:33) Ma rẹ sai wo otoriẹ orọ edidi areghẹ gbe eriariẹ Ọghẹnẹ fiotọ họ, wọhọ epanọ ọmọboba ọ rẹ sai wo otoriẹ eware kpobi kpahe ọsẹ hayo oni riẹ hẹ na. Dede nọ epanọ areghẹ gbe ohrọ-oriọ Ọghẹnẹ e rrọ oghẹrẹsa te oye Pọl ọ jẹ ta kpahe, eme riẹ na i dhesẹ inọ u wo eware jọ kpahe Jihova Ọghẹnẹ gbe iruẹru riẹ nọ i diwi vi epanọ ma sai ro wo otoriẹ rai. Uzẹme na inọ Ọghẹnẹ o wo emuhọ gbe ekuhọ họ yọ ovo jọ. Dede na, ma sai fi eva họ eware nọ Ebaibol na e ta kpahe Ọghẹnẹ riẹriẹriẹ. Jesu Kristi ọ ta kpahe ikere efuafo na nọ: “Ẹme ra uzẹme.”—Jọn 17:17.

Mosis ọ lẹ se Jihova nọ: “Whọ rrọ no ebẹdẹ ze, yọ whọ te jọ rite ebẹdẹ.” (Olezi 90:2, The Holy Bible, New Century Version) Mosis ọ jọ etenẹ dhesẹ nọ Ọghẹnẹ ọ rrọ ribri evaọ idhere ivẹ. Ojọ họ, rite ebẹdẹ. Jihova họ “ọnọ ọ rẹ jọ bẹdẹ bẹdẹ.” (Eviavia 4:10) Koyehọ, Ọghẹnẹ ọ rẹ jọ ribri. Orọ avivẹ họ, ọ rrọ no ebẹdẹ ze. Koyehọ a ma Ọghẹnẹ hẹ, u wo ẹdẹ nọ o ro muhọ họ.

O rrọ bẹbẹ kẹ ibuobu mai re ma wo otoriẹ oware nọ ma rẹ ruẹ hẹ. Dede na, ẹsejọ ma rẹ nyaku eware jọ nọ e rẹ bẹ ẹriẹ rekinọ ma rẹ jẹrehọ, wọhọ oriruo, epanọ a re kele inọmba kpemu kparo. Ekele inọmba u wo oba ha. Kọ ma gbẹ sae rehọ oriruo nana wo ẹmẹvo ọrọ uzuazọ Ọnọma na?

Fikiere o nwani fo inọ Ọghẹnẹ ọvo o wo odẹ-ovao oghẹrẹsa na “ovie nọ ọrọ anwọ ọgbọ [hayo, ebẹdẹ] ze.” (1 Timoti 1:17) Dai roro iei: Jesu Kristi, ima ijẹle buobu nọ e rrọ obọ odhiwu, gbe ahwo-akpọ kpobi a wo emuhọ keme a ma rai. (Ahwo Kọlọsi 1:15, 16) O rrọ ere kẹ Ọghẹnẹ hẹ. Ikẹ-isio inọ a ma Ọghẹnẹ o rẹ wha enọ ifofe nọ i re wo oba ha ze kpahe ohwo nọ ọ ma riẹ, nọ u re su omai kpohọ onọ ovona. Jihova ọvo ọ rrọ “no ebẹdẹ bẹdẹ ze.”—Olezi 90:2, The New American Bible.

Dede na, u fo re whọ kareghẹhọ nọ uzẹme na inọ Ọghẹnẹ o wo emuhọ gbe ekuhọ họ o rrọ oware a-ta-ma-yo ọvo ho. Ma te muẹrohọ olẹ Mosis na ziezi, ma rẹ ruẹ inọ uzẹme na inọ Ọghẹnẹ ọ rrọ bẹdẹ bẹdẹ o kẹ imuẹro orọ eyaa uzuazọ ebẹdẹ bẹdẹ nọ ọ yaa kẹ omai. Wo ohẹriẹ no uzuazọ mai ahwo-akpọ nọ o rẹ tọ họ, a dhesẹ Ọghẹnẹ wọhọ “oria adhẹzọ mai no ige kpobi ze.” Wọhọ Ọsẹ oyoyou, Jihova ọ rrọ no anwae ze, ọ rrọ kẹ omai nẹnẹ, yọ ọ te jọ kẹ omai no ebẹdẹ rite ebẹdẹ. Ajọ otoriẹ uwoma nana o kẹ owhẹ omosasọ!—Olezi 90:1.