Ẹnya Kugbe Ọghẹnẹ—Avọ Irẹro Ebẹdẹ Bẹdẹ

“Odẹ ỌNOWO na Ọghẹnẹ mai ma rẹ rọ nya bẹdẹ bẹdẹ.”—MAEKA 4:5.

1. Fikieme a je se Jihova “Ovie ebẹdẹ bẹdẹ”?

JIHOVA ỌGHẸNẸ o wo emuhọ họ. A ghine sei gbagba inọ “ọnọ ọ rọ no oke anwae ze,” keme o wo emuhọ họ. (Daniẹl 7:9, 13) Jihova ọ te jẹ reawere ebẹdẹ bẹdẹ. Ọye ọvo họ “Ovie ebẹdẹ bẹdẹ!” (Eviavia 10:6; 15:3) Yọ evaọ aro riẹ, ikpe udhusoi e wọhọ “odẹ nọ o kpemu evaọ okenọ o vrẹ no, hayo ohẹrẹ evaọ oke aso.”—Olezi 90:4.

2. (a) Eme họ ẹjiroro Ọghẹnẹ kẹ ahwo-akpọ ẹmeoyo? (b) Eme ma re fi ẹruore gbe ẹjiroro mai họ?

² Nọ Ọkokẹ uzuazọ ọ rọ bẹdẹ na, ọ rẹ sai fi ẹruore uzuazọ ebẹdẹ bẹdẹ evaọ Aparadase họ kẹ imava ọsosuọ na, Adamu avọ Ivi. Rekọ, fiki aghẹmeeyo, Adamu o te ku uvẹ uzuazọ ebẹdẹ bẹdẹ na fiẹ, o te kpeze uzioraha gbe uwhu se emọ riẹ. (Ahwo Rom 5:12) Ghele na, aghẹmeeyo Adamu o bru ẹjiroro ọsosuọ Ọghẹnẹ dhe he. O rọ oreva Jihova inọ ahwo-akpọ ẹmeoyo a rria bẹdẹ bẹdẹ, yọ o ti ru ẹjiroro riẹ gba ababọ ekie. (Aizaya 55:11) Fikiere ẹvẹ o nwani fo te inọ ma fi ẹruore gbe ẹjiroro mai họ egagọ Jihova avọ irẹro ebẹdẹ bẹdẹ. Nọ ma gwọlọ fi “ẹdẹ Ọghẹnẹ” họ iroro kpekpekpe na, u wuzou re ma kareghẹhọ nnọ ute mai họ re ma lele Ọghẹnẹ nya bẹdẹ bẹdẹ.—2 Pita 3:12.

Jihova Ọ j’Owọ Evaọ Ẹruoke Riẹ

3. Ẹvẹ ma rọ riẹ nọ Jihova o wo “oke” kẹ orugba ẹjiroro riẹ?

³ Wọhọ ahwo nọ a bi lele Ọghẹnẹ nya, ma wo isiuru gaga kpahe erugba oreva riẹ. Ma riẹ nọ Jihova họ Okoko-Oke Ologbo na, yọ ma wo evaifihọ nnọ ọ te siọ ẹjiroro riẹ ba erugba ha evaọ ẹruoke riẹ. Wọhọ oriruo, “nọ ẹgbakiete oke na o ze, Ọghẹnẹ o te vi Ọmọ riẹ” ze. (Ahwo Galesha 4:4) A ta kẹ Jọn ukọ na nnọ a fi “oke” họ kẹ orugba eware eruẹaruẹ nọ ọ ruẹ evaọ eka na. (Eviavia 1:1-3) ‘Oke oziẹ-obro iwhuowhu’ o riẹ. (Eviavia 11:18) Bu vi ikpe 1,900 nọ e vrẹ, a kẹ Pọl ukọ na ẹgba ta nọ Ọghẹnẹ “o bru ẹdẹ no, nọ o ti ro guẹdhọ akpọ na avọ ẹrẹreokie.”—Iruẹru 17:31.

4. Ẹvẹ ma rọ riẹ nọ Jihova ọ gwọlọ rehọ uyerakpọ omuomu ọnana t’oba?

⁴ Jihova ọ te rehọ uyerakpọ omuomu ọnana t’oba, keme a be poviẹ odẹ riẹ evaọ akpọ inẹnẹ na. Irumuomu na a rọ bọbọbọ. (Olezi 92:7) Ẹkwoma eme gbe iruẹru rai, a be la Ọghẹnẹ eka, yọ o rẹ dae nọ ọ tẹ ruẹ nọ a be poviẹ je kpokpo idibo riẹ. (Zekaraya 2:8) Agbẹta nọ Jihova ọ rọ jiroro nnọ a te raha ukoko Setan kpobi no kẹle na! Ọghẹnẹ o fi uzedhe ẹdẹ ọraha na họ no, yọ orugba eruẹaruẹ Ebaibol i ru rie vẹ inọ “oke urere” na ma be rria na. (Daniẹl 12:4) Ọ te j’owọ obọnana rọkẹ oghale enọ i you rie kpobi.

5. Ẹvẹ Lọt avọ Habakuk a rri iyero nọ e wariẹ e rai họ?

⁵ Idibo Jihova anwae a je rẹro ekuhọ emuemu. Lọt okiẹrẹe na o je mu “ofu kpahe uzuazọ-ugbegbe otu omuomu” na. (2 Pita 2:7) Fiki iyero nọ e ware riẹ họ, Habakuk ọruẹaro na ọ lẹ nọ: “O ỌNOWO, ẹvẹ me re bo ubo obọufihọ se owhẹ krite, nọ owhẹ ore yo ho? Hayo bo se owhẹ nọ ‘Oja yo’, no who re siwẹ hẹ? Fikieme who je bi ru omẹ ruẹ eware ethọthọ jẹ ruẹ ukpokpoma? Araha avọ ofu ọgaga e rọ aro mẹ; ohọre avọ ẹhẹriẹ e tẹ via.”—Habakuk 1:2, 3.

6. Eme Jihova ọ ta evaọ uyo kẹ olẹ Habakuk, kọ eme ma rẹ sai wuhrẹ no onana ze?

⁶ Jihova ọ tẹ rọ eme enana kuyo kẹ Habakuk: “Keme eruaruẹ na e be hẹrẹ oke rai; o re ti ru ei vẹrẹ—ọrue ọ riẹ hẹ. O tẹ rọ nọ u bi lehie, hẹrẹ iẹe; ọ rẹ seba ẹtha ha, ọ te raha oke he.” (Habakuk 2:3) Fikiere Ọghẹnẹ o te dhesẹ iẹ via nnọ ọ te j’owọ evaọ ‘ẹruoke.’ Dede nọ o te wọhọ nọ u bi lehie, Jihova o ti ru ẹjiroro riẹ gba—ababọ ekie!—2 Pita 3:9.

Ẹgọ Avọ Ọwhọ Ithihakọ

7. Dede nọ Jesu ọ riẹ uzedhe oke nọ ẹdẹ Jihova o te rọ ze he, ẹvẹ ọ rọ wha iruo riẹ haro?

⁷ Kọ ẹriẹ uzedhe oke iruẹru Jihova o r’oja re ma lele Ọghẹnẹ nya avọ ọwhọ? Ijo. Roro kpahe iruiruo jọ. Jesu o wo isiuru gaga kpahe okenọ a te jọ otọakpọ ru oreva Ọghẹnẹ wọhọ epanọ a rọ obọ odhiwu ruẹ na. Evaọ uzẹme, Kristi o wuhrẹ ilele riẹ re a lẹ nọ: “Ọsẹ mai nọ ọ rọ obọ odhiwu, odẹ ra ojọ ọrẹri. Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Matiu 6:9, 10) Dede nọ Jesu ọ riẹ nọ a te kuyo kẹ ayare ọnana, ọ riẹ uzedhe ẹdẹ nọ o te via ha. Evaọ eruẹaruẹ ologbo riẹ kpahe ekuhọ uyerakpọ onana, ọ ta nọ: “Rekọ ẹdẹ ọyena gbe oke oyena ohwo ọvo ọ riẹ hẹ, makọ ikọ nọ e rọ obọ odhiwu, hayo Ọmọ dede, rekọ Ọsẹ na ọvo.” (Matiu 24:36) Nọ Jesu Kristi ọ rọ oviede orugba ẹjiroro Ọghẹnẹ na, o ti w’obọ dẹẹ evaọ ikpakpe ewegrẹ Ọsẹ obọ odhiwu riẹ. Rekọ, okenọ Jesu ọ jọ otọakpọ, ọ tubẹ riẹ okenọ Ọghẹnẹ ọ te rọ j’owọ họ. Kọ oyena u dina ru ei whrehe evaọ egagọ Jihova? Ijo! Nọ a ruẹ Jesu nọ ọ be rehọ ọwhọ ru etẹmpol na fo, “ilele riẹ a te roro epanọ a kere nọ, ‘Oriori uwou ra ọ re omẹ re.’ ” (Jọn 2:17; Olezi 69:9) Jesu o dhomahọ iruo nọ a vi rie ze nọ o ru ziezi, yọ o ru rie avọ ọwhọ ithihakọ. Ọ tẹ jẹ gọ Ọghẹnẹ avọ irẹro ebẹdẹ bẹdẹ.

8, 9. Okenọ ilele na a nọ kpahe ezihetha Uvie na, eme a ta kẹ ai, kọ didi owọ a jẹ?

⁸ Onana o jọ uzẹme re kpahe ilele Kristi. Jesu ọ jọ kugbe ai taure ọ tẹ te nwani kpohọ odhiwu. Ikere na e ta nọ: “Fikiere nọ a je ti kuku, a tẹ nọe nọ, ‘Ọnowo, kọ whọ te jọ oke nana zihe uvie na se Izrẹl?’ ” Wọhọ Olori rai, a gwọlọ nọ Uvie na o ze. Ghele na, Jesu ọ kuyo nọ: “O rọ nọ wha rẹ riẹ oke hayo ezi hi, o nọ Ọsẹ na ọ rọ ogaga obọ riẹ fihọ. Rekọ nọ Ẹzi Ẹri ọ ruọ [owhai] oma no wha re ti wo ogaga nọ wha ti ro se isẹri mẹ eva Jerusalem gbe Judia kpobi te Sameria je rite ọnyaba akpọ na.”—Iruẹru 1:6-8.

⁹ Uvumọ oware o riẹ hẹ nọ u dhesẹ inọ uyo onana o lẹliẹ udu no ilele na awọ. Ukpoye, a rọ ọwhọ ruabọhọ iruo usiuwoma ota na. Evaọ umutho eka jọ ọvo, a tẹ rehọ uwuhrẹ rai vọ Jerusalẹm kpobi no. (Iruẹru 5:28) Yọ evaọ etoke ikpe 30, a ta usiuwoma na kẹre gaga no te epanọ Pọl ọ sae rọ ta nọ a ta usiuwoma na te “enọ a ma kpobi evaọ akpọ na” no. (Ahwo Kọlọsi 1:23) Dede nọ a ‘zihe uvie na se Izrẹl’ wọhọ epanọ ilele na a roro thọthọ na ha, yọ a rehọ e riẹ mu obọ odhiwu evaọ etoke uzuazọ rai hi, a rọ ọwhọ ruabọhọ egagọ Jihova avọ irẹro ebẹdẹ bẹdẹ.

Ẹkiẹriwo Ẹjiroro Mai

10. Nọ ma riẹ okenọ Ọghẹnẹ ọ te rọ raha uyerakpọ Setan he na, eme o rẹ lẹliẹ omai dhesẹ?

¹⁰ Idibo ọgbọna Jihova a bi rẹro ekuhọ uyerakpọ omuomu ọnana re. Rekọ, ugogo ẹjiroro mai họ orọnikọ esiwo mai ruọ akpọ ọkpokpọ eyaa Ọghẹnẹ hẹ. Ma gwọlọ ruẹ orufuọ odẹ Jihova gbe ẹkpare kpehru esuo riẹ. Fiki onana, ma rẹ sae ghọghọ nnọ Ọghẹnẹ ọ te fodẹ ‘ẹdẹ hayo auwa’ ọraha uyerakpọ Setan k’omai hi. Onana o rẹ lẹliẹ omai kẹ imuẹro nnọ ma gwọlọ lele Ọghẹnẹ nya bẹdẹ bẹdẹ fikinọ ma you rie orọnikọ fiki ute ubroke, orọ oriobọ họ.

11, 12. Ẹvẹ a ro se ẹgbakiete Job abọ, kọ ẹvẹ use-abọ oyena u ro kpomahọ omai?

¹¹ Ẹyọrọ ẹgbakiete mai kẹ Ọghẹnẹ u re je fiobọhọ k’omai dhesẹ nọ Ẹdhọ ọ ta thọ okenọ ọ ta nọ Job okiẹrẹe na—gbe ahwo-akpọ kpobi—a be gọ Ọghẹnẹ avọ isuiru oriobọ. Nọ Jihova o dhesẹ odibo riẹ Job no wọhọ ohwo ababọ afuẹwẹ, ọnọ o kiẹrẹe, jẹ be dhozọ Ọghẹnẹ, Setan ọ rọ eva emuemu ta nọ: “Kọ Job ọ be dhozọ Ọghẹnẹ gheghe? Who gbe diogba wariẹ e, gbe uwou riẹ, gbe eware kpobi nọ o woi, evaọ kabọ kabọ? Whọ ghale iruo abọ riẹ, gbe eware kpobi nọ o woi, who te fi ẹvi họ ae evaọ otọ na? Rekọ enẹna riẹ obọ ra ro te eware kpobi nọ o woi, ọ vẹ te jọ iraro ra la owhẹ eka.” (Job 1:8-11) Ẹkwoma ẹgbakiete riẹ nọ o kru evaọ otọ ẹdawọ, Job o dhesẹ ota onana fihọ ọrue.

¹² Nọ ma tẹ yọrọ ẹgbakiete mai re, ma rẹ sai dhesẹ ota Setan inọ ma be gọ Ọghẹnẹ fikinọ ma riẹ nọ erere o ti noi ze kẹle fihọ ọrue. Nọ ma riẹ uzedhe ẹdẹ nọ Ọghẹnẹ ọ te rọ rehọ orukele riẹ bru otu emuemu na ze he na o k’omai uvẹ nọ ma re ro dhesẹ nnọ ma ghine you Jihova jẹ gwọlọ nya evaọ idhere riẹ bẹdẹ bẹdẹ. U re dhesẹ nọ ma be roma kpotọ kẹ Ọghẹnẹ je fievahọ edhere eware iruo riẹ. Ofariẹ, nọ ma riẹ ẹdẹ hayo auwa na ha na u re fiobọhọ k’omai muẹro h’otọ evaọ abọ-ẹzi keme ma riẹ nọ urere na o sae nyaze oke kpobi, wọhọ oji evaọ aso. (Matiu 24:42-44) Nọ ma te bi lele Jihova nya kẹdẹ kẹdẹ, o rẹ lẹliẹ udu riẹ ghọghọ jẹ kẹe ẹme nọ o re yo kẹ Ẹdhọ, ọnọ ọ be poviẹe na.—Itẹ 27:11.

M’Omaa kẹ Ebẹdẹ Bẹdẹ!

13. Eme Ebaibol na o dhesẹ kpahe omaa nọ a rẹ maa kpahe obaro na?

¹³ Ahwo nọ a bi lele Ọghẹnẹ nya a rẹ riẹ nọ o rọ oware areghẹ re a m’omaa ziezi kẹ obaro. Nọ a riẹ ebẹbẹ gbe ọnyaba owho na, ahwo buobu a be daoma rehọ uzoge gbe ẹgba rai ruiruo ziezi enẹna re a sae ruẹ ugho nọ a rẹ rọ kuoma evaọ obaro. Kọ ẹvẹ kpahe obaro abọ-ẹzi mai nọ o mae wuzou? Itẹ 21:5 o ta nọ: “Oma omamọ ohwo o rẹ rehọ ọruẹriọ tha, rekọ ohwo kpobi nọ o re bru okpakpa ọ rẹ te jọ ababọ eware.” Omaa kpohọ obaro avọ irẹro ebẹdẹ bẹdẹ u ghine wo erere. Nọ ma riẹ uzedhe oke nọ ekuhọ uyerakpọ ọnana ọ te rọ ze he na, u fo re ma roro kpahe ẹgwọlọ obaro mai. Rekọ j’oma jọ owowa re ma fi isiuru Ọghẹnẹ haro evaọ uzuazọ mai. Ahwo nọ a kare ẹrọwọ a rẹ sai ku ei họ nnọ re a fi oreva Ọghẹnẹ uruo họ oria ọsosuọ yọ iroro ekpuakpua. Rekọ ere o ghinẹ rọ?

14, 15. (a) Ọtadhesẹ vẹ Jesu ọ ta kpahe omaa kẹ obaro? (b) Fikieme ọdafe evaọ ọtadhesẹ Jesu na o ro wo iroro ekpuakpua?

¹⁴ Jesu ọ kẹ ọtadhesẹ jọ nọ u fielo họ ẹme ọnana. Ọ ta nọ: “Otọ ohwo jọ o tẹ mọ ibi buobu gaga; o te roro evaọ eva riẹ nọ, ‘Eme me re ruẹ, keme me wo oria nọ me re fi ivuẹvu mẹ họ họ?’ Ọ tẹ ta nọ, ‘Ona me re ruẹ, me re wolo iru mẹ no, mẹ vẹ bọ ae ruaro; kọ etẹe me re fi eka gbe ekakọ edekọ họ. Mẹ vẹ ta kẹ amema mẹ nọ, Amema, who wo eware buobu nọ e rọ nọ i re te ikpe buobu; rehọ oma totọ, whọ re, da, whọ ghọghọ.’ Rekọ Ọghẹnẹ ọ tẹ ta kẹ e nọ, ‘Whẹ [ogheghẹ! Aso] ọnana a guọlọ ẹwẹ ra; kọ eware nọ whọ ruẹrẹ kpahe na, ono o re ti wo ai? Whaọ ere [o rẹ jọ kẹ] ọnọ o koko efe kẹ oma riẹ, o fe obọ Ọghẹnẹ hẹ.’ ”—Luk 12:16-21.

¹⁵ Kọ Jesu ọ be ta nọ u du fo re ọdafe na o ruiruo re o wo eware nọ ọ rẹ jọ obaro re he? Ijo, keme Ikereakere na e tuduhọ iruo egaga i ruo. (2 Ahwo Tẹsalọnika 3:10) Oruthọ ọdafe na họ o ru oware nọ u fo re o “fe obọ Ọghẹnẹ” hẹ. Ọ tẹ make reawere efe iwo evaọ ikpe buobu, ukuhọ riẹ ọ hai whu. O wo iroro ekpuakpua, ababọ eroro kpahe ebẹdẹ bẹdẹ.

16. Fikieme ma jẹ sae rọ udu fievahọ Jihova kẹ obaro ufuoma?

¹⁶ Ẹnya lele Jihova avọ irẹro ebẹdẹ bẹdẹ u w’iroro jẹ jọ ribri. Oye họ iroro nọ o mai woma nọ a rẹ maa kẹ obaro. Nọ o rọ ziezi re ma jẹ emamọ iroro kpahe isukulu, iruo, gbe owha-iruo uviuwou na, ma rẹ kareghẹhọ ẹsikpobi nnọ Jihova o re gbabọ kẹ idibo omarokpotọ riẹ hẹ. Devidi ovie na ọ so nọ: “Mẹ jọ ọmaha, enẹna mẹ who uno; dede na mẹ te ruẹ okiẹrẹe nọ a se he, hayo kọ emọ riẹ e jẹ yare re a tẹ re he.” (Olezi 37:25) Jesu omariẹ ọ kẹ imuẹro inọ Ọghẹnẹ ọ te gwọlọ kẹ enọ e rọ Uvie na karo jẹ nya evaọ idhere ikiẹrẹe Jihova.—Matiu 6:33.

17. Ẹvẹ ma rọ riẹ nọ urere na o kẹlino?

¹⁷ Dede nọ ma be gọ Ọghẹnẹ avọ irẹro ebẹdẹ bẹdẹ, a re gbe roro kpahe ẹdẹ Jihova. Orugba eruẹaruẹ Ebaibol e rọ imuẹro ivevẹ ọrọ ẹkẹle ẹdẹ ọyena. Ikpe-udhusoi ọnana ọ ruẹ emo buobu no, eyao, otọ-unuhu, gbe ohọwo, kugbe ekpokpo Ileleikristi uzẹme gbe usiuwoma ota akpọ-soso kpahe Uvie Ọghẹnẹ. Enana kpobi yọ eka oke urere uyerakpọ omuomu ọnana. (Matiu 24:7-14; Luk 21:11) Akpọ na ọ vọ avọ enọ i ‘you oma-obọrai, je you igho, otu oheri avọ omovia, gbe ekaela, enọ i re yo ẹme enọ i yẹ rai hi, ababọ uyere-ọghọ gbe ababọ ẹfuọ, eva egaga, ababọ ekoko eya, enọ e rẹ raha odẹ ahwo, ababọ oma-onyẹ, avọ ofu-ọkpoo, omukpahe ahwo ezi, otu ovivie, avọ uzou-uveghe, otu okpiro, enọ i yowu enu-awere siọ Ọghẹnẹ ba.’ (2 Timoti 3:1-5) Evaọ edẹ ebẹbẹ urere enana, uzuazọ o rẹ bẹbẹ k’omai wọhọ idibo Jihova. Ẹvẹ ma be hẹrẹ ẹdẹ nọ Uvie Jihova u ti hwere emuemu kpobi vrẹ no te! Enẹna, jọ o jọ ọtamuo mai re ma gbe lele Ọghẹnẹ nya avọ irẹro ebẹdẹ bẹdẹ.

Ẹgọ avọ Irẹro Uzuazọ Ebẹdẹ Bẹdẹ

18, 19. Ẹvẹ ma rọ riẹ nọ otu ẹrọwọ oke anwae a jẹ gọ Ọghẹnẹ avọ irẹro ebẹdẹ bẹdẹ?

¹⁸ Nọ ma be nya kugbe Jihova na, jọ ma kareghẹhọ ẹrọwọ Ebẹle, Enọk, Noa, Abraham, gbe Sera. Nọ ọ fodẹ ai no, Pọl o te kere nọ: “Enana kpobi eva orọwọ a je whu, o nọ a ya eya riẹ nọ u te rai obọ họ, rekọ a jọ eva ugbo kpararo ruẹe a je dedie ei, a tẹ jẹ riẹ nọ ae oma rai na, erara, gbe enya-ugbo eva akpọ na.” (Ahwo Hibru 11:13) Ahwo ẹrọwọ enana a jẹ ‘guọlọ emamọ orẹwho nọ u wobọ kugbe odhiwu.’ (Ahwo Hibru 11:16) Evaọ ẹrọwọ, a je rẹro oria nọ o mai woma evaọ otọ esuo Uvie Mesaya Ọghẹnẹ na. O rẹ sai mu omai ẹro inọ Ọghẹnẹ ọ te rehọ uzuazọ ebẹdẹ bẹdẹ hwae osa evaọ oria oyena nọ o mai woma na—Aparadase otọakpọ evaọ otọ esuo Uvie na.—Ahwo Hibru 11:39, 40.

¹⁹ Maeka ọruẹaro na ọ fodẹ ọtamuo ahwo Jihova re a gọ Ọghẹnẹ bẹdẹ bẹdẹ. O kere nọ: “Keme ahwo na kpobi a be nya evaọ ọvuọ odẹ ẹdhọ riẹ, rekọ evaọ odẹ ỌNOWO na Ọghẹnẹ mai ma rẹ rọ nya bẹdẹ bẹdẹ.” (Maeka 4:5) Bọwo oke uwhu riẹ, Maeka ọ rọ ẹrọwọ gọ Jihova. Nọ a tẹ kpare iẹe ziọ akpọ ọkpokpọ na, ababọ avro ọruẹaro na ọ te ruabọhọ onya kugbe Ọghẹnẹ bẹdẹ bẹdẹ. Ẹvẹ onana o rọ emamọ oriruo te k’omai nọ e be rria oke urere na!

20. Eme ọ rẹ jọ ọtamuo mai?

²⁰ Jihova o wo ovuhumuo kẹ uyoyou nọ ma bi dhesẹ kẹ odẹ riẹ. (Ahwo Hibru 6:10) Ọ riẹ nọ o rẹ bẹbẹ k’omai re ma yọrọ ẹgbakiete kẹe evaọ akpọ ọnana nọ Ẹdhọ o bi su na. Dede na “akpọ na avọ urusio riẹ e rẹ te vrẹ,” rekọ “ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:17; 5:19) Avọ obufihọ Jihova, jọ ma tae mu re ma thihakọ edawọ nọ ma be rẹriẹ ovao ku kẹdẹ kẹdẹ. Jọ iroro gbe edhere uzuazọ mai o kpovao rri eghale nọ Ọsẹ oyoyou obọ odhiwu mai ọ yeyaa riẹ. Enana e rẹ sai t’omai obọ otẹrọnọ ma ruabọhọ ẹnya kugbe Ọghẹnẹ avọ irẹro ebẹdẹ bẹdẹ.—Jud 20, 21.

Didi Uyo Whọ Te Kẹ?

◻ Eme họ ẹjiroro Ọghẹnẹ kẹ ahwo-akpọ ẹmeoyo?

◻ Fikieme Jihova ọ gbẹ te j’owọ no ho re ọ raha akpọ ababọ-Ọghẹnẹ ọnana?

◻ Fikieme ababọ ẹriẹ uzedhe oke nọ Ọghẹnẹ ọ te rọ j’owọ o gbẹ lẹliẹ ọwhọ mai kiekpo ho?

◻ Eme họ irere jọ nọ e rọ ẹnya kugbe Ọghẹnẹ avọ irẹro ebẹdẹ bẹdẹ?

[Picture on page 15]

Ẹnya kugbe Ọghẹnẹ o gwọlọ nọ ma rọ ọwhọ gọe wọhọ epanọ ilele ọsosuọ Kristi a ru