Gbiku Eware nọ Who Wuhrẹ kẹ Ahwo

Nọ ma te bi wuhrẹ Ebaibol kẹ omobọ mai, eva e rẹ were omai. Rekọ eva e rẹ were omai viere nọ ma tẹ be vuẹ ahwo emamọ eware nọ ma wuhrẹ. Obe Itẹ 11:25 o ta nọ: “Ohwo kpobi nọ ọ rẹ sasa amọfa oma, a te sasa iẹe oma re.”

Nọ ma tẹ be hai gbiku oware jọ nọ ma wuhrẹ kẹ ahwo, u re ru nọ oware na o gbẹ kake thọrọ omai ẹro ho. Yọ u re ru oware na vẹ omai ẹro viere. Eware nọ ma vuẹ rai na i re fiobọhọ kẹ ae re. Nọ ma tẹ vuẹ amọfa oware nọ ma wuhrẹ u re ru eva were omai.—Iruẹru 20:35.

Dawo iẹe: Evaọ oka notha na, daoma lele ohwo jọ ta ẹme kpahe oware jọ nọ who wuhrẹ evaọ Ebaibol. Ọ sae jọ ohwo uwou ra, ohwo jọ evaọ ukoko nọ whọ rrọ, ohwo nọ wha gbe bi ru iruo, ọmọ isukulu ra, ohwo nọ wha gbẹ rrọ ighẹ, hayo ohwo nọ whọ nyaku evaọ usi uwoma. Nọ whọ te vuẹ ohwo na oware nọ who wuhrẹ na, who sei epanọ o rọ rrọ obe na ha. Rekọ rọ ẹme obọra tae kẹ ohwo na jẹ tae oghẹrẹ nọ u re ro vẹe ẹro.

Kareghẹhọ: Daoma lele ahwo gbiku kpahe oware jọ nọ who wuhrẹ no Ebaibol ze re o tuduhọ ae awọ. Orọnikọ whọ rẹ ta ẹme na wọhọ nọ whẹ ọ mae riẹ hẹ.—1 Kọr. 8:1.