UZOẸME UWUHRẸ 33
OLE AVỌ 4 Jihova Họ Ọsẹro Mẹ
Jọ U Mu Owhẹ Ẹro nọ Jihova O You Owhẹ
“Oyejabọ nọ mẹ rọ rehọ uyoyou nọ o rẹ hiẹ hẹ si owhẹ kẹle omamẹ.”—JERI. 31:3.
OWARE NỌ A JARIẸ TA KPAHE
Oware nọ o jẹ roja re u mu omai ẹro nọ Jihova o you omai, gbe epanọ ma sai ro ru re u mu omai ẹro viere.
1. Fikieme whọ rọ rehọ uzuazọ ra kẹ Jihova? (Rri uwoho na re.)
KỌ WHỌ kareghẹhọ okenọ whọ rọ rehọ uzuazọ ra kẹ Jihova? Who ru ere fikinọ whọ riẹ Jihova ziezi who te je you rie. Whọ ya eyaa kẹe nọ oware kpobi nọ who bi ru, oreva riẹ o te mae jọ owhẹ oja. Yọ whọ ta kẹe nọ whọ te rọ udu ra kpobi, uzuazọ ra kpobi, iroro ra kpobi, gbe ẹgba ra kpobi ro you rie te urere. (Mak 12:30) Anwọ okenọ whọ rọ ya eyaa yena ze, uyoyou nọ who wo kẹ Jihova o be ga ẹgẹga ọvo. Nọ o rrọ ere na, ohwo jọ ọ tẹ nọ owhẹ nọ, “Kọ who gine you Jihova?” Whọ te nwane ta kẹ ohwo na nọ, “Me you Jihova vi ohwo ọfa hayo oware ofa kpobi.”
Kọ whọ kareghẹhọ epanọ who you Jihova te okenọ whọ rọ rehọ uzuazọ ra kẹe jẹ họ-ame? (Rri edhe-ẹme 1)
2-3. Eme Jihova ọ gwọlọ nọ u mu omai ẹro, kọ eme ma te ta ẹme kpahe evaọ uzoẹme nana? (Jerimaya 31:3)
2 Kọ otẹrọnọ ohwo jọ ọ nọ owhẹ nọ, “Kọ u mu owhẹ ẹro nọ Jihova o you owhẹ?” Eme whọ te ta kẹe? Kọ whọ te dina dhizu roro sọ Jihova o you owhẹ re whọ tẹ te kẹe uyo? U wo oniọvo-ọmọtẹ jọ nọ a dhesẹ uyoyou kẹ no emaha ze he. Ọ ta nọ: “Mẹ riẹ nọ me you Jihova. Rekọ ẹsibuobu me re roro nọ, ‘Kọ Jihova o gine you omẹ?’” Kọ eme who re ru re u mu owhẹ ẹro nọ Jihova o you owhẹ?
3 Jihova ọ gwọlọ nọ u mu owhẹ ẹro nọ o gine you owhẹ. (Se Jerimaya 31:3.) Jihova họ ọnọ o si omai ziọ ukoko na re ma kẹle iẹe. Nọ whọ rehọ uzuazọ ra kẹ Jihova jẹ họ-ame no, obọdẹ oghale jọ u te te owhẹ obọ. Oye họ uyoyou Jihova nọ o rẹ hiẹ hẹ. Fikinọ Jihova o wo oghẹrẹ uyoyou utioye kẹ owhẹ na, ọ rẹ nyasiọ owhẹ ba ha, yọ o you owhẹ gaga. Uyoyou yena nọ Jihova o wo kẹ owhẹ gbe idibo riẹ efa kpobi nọ e be gọe ziezi na, u ru nọ o ro rri omai fihọ “okwakwa oghaghae” riẹ. (Mal. 3:17, ẹme-obotọ) U mu Pọl ukọ na ẹro nọ Jihova o you rie. Jihova ọ gwọlọ nọ u mu owhẹ ẹro ere re. Oye o soriẹ nọ Pọl o ro kere nọ: “U mu omẹ ẹro inọ makọ uwhu hayo uzuazọ hayo ikọ-odhiwu hayo egọmeti, hayo eware nọ e rrọ enẹna hayo eware nọ e te tha hayo ogaga hayo ekpehru hayo edidi hayo omama ofa jọ kpobi o rẹ sae hẹriẹ omai no uyoyou Ọghẹnẹ hẹ.” (Rom 8:38, 39) Ma te jọ uzoẹme nana ta ẹme te oware nọ o rọ roja re u mu omai ẹro nọ Jihova o you omai. Ma te jẹ ta ẹme kpahe eware nọ ma re ru re u mu omai ẹro.
OWARE NỌ O RỌ ROJA RE U MU OMAI ẸRO NỌ JIHOVA O YOU OMAI
4. Eme ma re ru re ma gbe kie kẹ ẹghẹ jọ nọ Setan ọ be rọ gwọlọ viẹ omai họ họ?
4 Ma tẹ rọwo nọ Jihova o you omai, Setan ọ te gbẹ sae rọ “iruẹru ẹghẹ” riẹ jọ viẹ omai họ họ. (Ẹf. 6:11) Setan ọ be dawo oghẹrẹ kpobi nọ o re ro ru re ma siọ Jihova ba ẹgọ. Ẹghẹ jọ nọ Setan ọ be gwọlọ rọ viẹ omai họ gaga họ, o bi ru re ma roro nọ Jihova o you omai hi. Kareghẹhọ nọ Setan ọ rẹ gwọlọ oria nọ ọ rẹ rọ ruọ omai oma. Ẹsibuobu ọ rẹ rọ ẹro da okenọ eva e be were omai hi, kọ oke yena ọ rẹ rọ gwọlọ ruọ omai oma. Ẹsejọhọ eva e be were omai hi fiki eware nọ e via kẹ omai oke jọ, hayo fiki ebẹbẹ mai, hayo fikinọ ma be ruawa odẹnotha. (Itẹ 24:10) Setan ọ wọhọ okpohrokpo nọ ọ rẹ gwọlọ arao nọ o wo ẹgba nọ ọ sae rọ thọ omariẹ hẹ re o kpei re no. Ọ tẹ ruẹ nọ eva e be were omai hi, ọ rẹ gwọlọ ru re ma no ere siọ Jihova ba ẹgọ. Rekọ ma te bi ru epanọ u re ro mu omai ẹro ziezi inọ Jihova o you omai, ma ti wo ẹgba nọ ma ti ro “dikihẹ ga wọso” Setan. Ọ te gbẹ sae viẹ omai họ họ.—1 Pita 5:8, 9; Jem. 4:7.
5. Fikieme o rọ roja re u mu omai ẹro nọ Jihova o you omai?
5 U te mu omai ẹro nọ Jihova o you omai, u re si omai kẹle iẹe gaga. Eme ma rọ ta ere? Jihova ọ ma omai evaọ oghẹrẹ nọ ma rẹ rọ gwọlọ you amọfa, ma vẹ jẹ gwọlọ nọ a you omai. Nọ ohwo o te you omai, ma rẹ gwọlọ you ohwo na re. Fikiere u te mu omai ẹro gaga inọ Jihova o you omai, ma te gwọlọ you rie gaga re. (1 Jọn 4:19) Yọ uyoyou nọ ma wo kẹ Jihova u te bi dhe ẹgẹga, Jihova omariẹ o ve ti je you omai vi epaọ anwẹdẹ re. Ebaibol ọ vuẹ omai vevẹ nọ: “Wha si kẹle Ọghẹnẹ, o re ti si kẹle owhai.” (Jem. 4:8) Kọ ẹvẹ ma te sai ro ru re u mu omai ẹro gaga inọ Jihova o you omai?
EME MA RE RU RE U MU OMAI ẸRO INỌ JIHOVA O YOU OMAI?
6. Re o sai mu omai ẹro nọ Jihova o gine you omai, eme ma rẹ lẹ kẹ?
6 Hae lẹ se Jihova ẹsikpobi re o fiobọhọ kẹ owhẹ rọwo nọ o you owhẹ. (Luk 18:1; Rom 12:12) Hae lẹ se Jihova kẹdẹ kẹdẹ inọ o fiobọhọ kẹ owhẹ rri omara epanọ o bi rri owhẹ. Whọ sae tubẹ lẹ kpahe oware nana te unuẹse buobu evaọ okpẹdẹ. Uzẹme riẹ họ, nọ udu ohwo o tẹ be vuẹe nọ Jihova o you rie he, o rẹ lọhọ tere he re u mu ohwo na ẹro nọ Jihova o you rie. Rekọ kareghẹhọ nọ Jihova ọ rro vi udu ra. (1 Jọn 3:19, 20) Ọ riẹ owhẹ lafi. Ọ riẹ owhẹ vi epanọ whọ riẹ omara. Ọ be ruẹ ewoma jọ evaọ omara nọ o sae jọ nọ whẹ omara na dede who bi muẹrohọ họ. (1 Sam. 16:7; 2 Irv. 6:30) Fikiere “ta eva” ra kpobi kẹe. Vuẹe nọ jọ o ru re u mu owhẹ ẹro nọ o you owhẹ. (Ol. 62:8) Nọ whọ be lẹ ere na, who ve ru eware nọ ma bi ti dhunu te evaọ idhe-eme nọ ma ti te na.
7-8. Eme jọ vẹ e rrọ obe Ilezi nọ i dhesẹ nọ Jihova o gine you omai?
7 Rọwo nọ ẹme Jihova uzẹme. Jihova ọ rọ ahwo nọ i kere Ebaibol vuẹ omai oghẹrẹ ohwo nọ ọyomariẹ ọ ginẹ rrọ. Rri emamọ ẹme jọ nọ Devidi ọso-ilezi na o kere kpahe Jihova. Anọ: “Jihova ọ kẹle enọ e rrọ ọkora; o re siwi enọ udu u whrehe.” (Ol. 34:18, ẹme-obotọ) Ẹsejọ nọ whọ tẹ rrọ ọkora, who re roro nọ ohwo ọvo ọ riẹ oware nọ o be kẹ owhẹ uye dẹẹ hẹ. Rekọ Jihova ọ be vuẹ owhẹ nọ who te bi roro ere, riẹ nọ ọ kẹle owhẹ keme ọ riẹ nọ oke nọ whọ mae rọ gwọlọ iẹe oye. Devidi o kere ẹme ọfa jọ. O kere nọ: “Koko irui-oviẹ mẹ họ ukoko oviẹ-arao ra.” (Ol. 56:8) Oware jọ o tẹ be kẹ owhẹ uye, Jihova ọ rẹ riẹ. O you owhẹ, yọ o rẹ dae nọ ọ tẹ ruẹ nọ oware jọ o be kẹ owhẹ uye. Wọhọ oriruo, ohwo ọ tẹ wha ame lele oma kpohọ ẹwọ nọ ame ọ rrọ họ, ọ rẹ gwọlọ nọ makọ ogẹgẹ ame ọvo dede o su kufiẹ hẹ. Ere ọvona re, whọ tẹ be viẹ, o rẹ wọhọ ẹsenọ Jihova o bi koko irui-oviẹ ra họ ukolo jọ. Ọ rẹ gwọlọ nọ makọ ogẹgẹ ọvo dede o su kufiẹ hẹ keme o rri owhẹ ghaghae. Ọso-ilezi na ọ jọ Olezi 139:3 ta kpahe Jihova nọ: “Whọ riẹ oware kpobi nọ me bi ru.” Jihova ọ be ruẹ eware kpobi nọ who bi ru. Rekọ eware iwoma nọ who bi ru ọ rẹ tẹrovi. (Hib. 6:10) Fikieme? Keme ọ riẹ nọ whọ be daoma re who ru oware nọ o rẹ were iẹe. Yọ oware uwoma kpobi nọ who ru o rẹ were iẹe.a
8 Ma te se eme nọ e rẹ sasa ohwo oma evaọ Ebaibol, Jihova ọ be rọ ere vuẹ omai nọ: “Mẹ gwọlọ nọ whọ riẹ nọ me you owhẹ gaga, whọ rrọ ghaghae kẹ omẹ.” Rekọ wọhọ epanọ ma ta ẹsejọ na, Setan ọ gwọlọ nọ who roro nọ Jihova o you owhẹ hẹ. Ọrue o bi gu na. Fikiere nọ whọ tẹ be jọ udu ra vro sọ Jihova o you owhẹ hayo o you owhẹ hẹ, dina fọ re whọ nọ omara nọ: ‘Ono mẹ te rọwo ẹme riẹ evaọ usu imava na, Setan “ọsẹ ọrue” na, manikọ Jihova “Ọghẹnẹ nọ ọ rẹ ta uzẹme” na?’—Jọn 8:44; Ol. 31:5.
9. Eme Jihova ọ ta nọ o ti ru nọ ma te you rie? (Ọnyano 20:5, 6)
9 Hae kareghẹhọ nọ Jihova o you ahwo nọ i you rie. Roro kpahe ẹme nọ Jihova ọ ta kẹ Mosis avọ ahwo Izrẹl. (Se Ọnyano 20:5, 6.) Jihova ọ ya eyaa nọ o ti wo uyoyou nọ o rẹ hiẹ hẹ kẹ ahwo nọ a you rie. Ẹme yena o dhesẹ nọ idibo Jihova a te you rie, ọyomariẹ ọ rẹ se ae ba eyou ho. Jihova yọ Ọghẹnẹ nọ o wo uyoyou nọ o rẹ hiẹ hẹ. (Neh. 1:5) Fikiere ẹsenọ udu ra o tẹ be vuẹ owhẹ nọ Jihova o you owhẹ hẹ, nọ omara nọ, ‘Hẹrẹ tao, me you Jihova? Hẹẹ kọ otẹrọnọ me you Jihova yọ mẹ be daoma ru oware nọ o rẹ were iẹe, eme o gbe you omẹ hẹ? Mẹ riẹ nọ o you omẹ gaga.’ (Dan. 9:4; 1 Kọr. 8:3) Ẹme na họ, otẹrọnọ u mu owhẹ ẹro nọ who you Jihova, eme whọ jẹ be vro sọ o you owhẹ? Riẹ nọ o you owhẹ gaga, yọ ọ te siọ owhẹ ba ha.
10-11. Ẹvẹ Jihova ọ gwọlọ nọ who rri ẹtanigbo na? (Ahwo Galesha 2:20)
10 Hai roro didi kpahe ẹtanigbo na. Idhe ẹtanigbo na họ oware nọ o mae rro nọ Jihova o ru kẹ ahwo-akpọ nọ u dhesẹ nọ o you omai gaga. (Jọn 3:16) Kọ idhe ẹtanigbo na o te owhẹ re? Ee! Kareghẹhọ Pọl ukọ na. Taure o te ti zihe ruọ Oleleikristi, ọ raha izi ilogbo. Yọ ọ maki kurẹriẹ no, eware e gbẹ jẹ thọe obọ ghele fikinọ ọrahauzi ọ rrọ. (Rom 7:24, 25; 1 Tim. 1:12-14) O make rrọ ere na, Pọl o kere nọ ọyomariẹ Jihova o vi Jesu ze ti whu kẹ. (Se Ahwo Galesha 2:20.) Jihova ọye ọ rehọ ẹzi riẹ kpọ Pọl kere ẹme yena. Yọ ma riẹ nọ eme kpobi nọ e rrọ Ebaibol na, a kere ai re ma wuhrẹ no ai ze. (Rom 15:4) Ẹme nọ Pọl o kere na o dhesẹ nọ Jihova ọ gwọlọ nọ who rri ẹtanigbo na fihọ oware nọ o ru kẹ owhẹ, orọnikọ rọkẹ ahwo-akpọ kpobi ọvo ho. Who te bi rri rie ere, u ti mu owhẹ ẹro gaga inọ Jihova o gine you owhẹ omara na.
11 Ma yere Jihova gaga nọ o ro vi Jesu ziọ otọakpọ na ti whu kẹ omai. U te no ewhu nọ Jesu ọ nyaze ti whu no, oware ọfa nọ ọ rọ fiki riẹ nyaze họ, re o wuhrẹ omai epanọ Jihova ọ rrọ. (Jọn 18:37) Oware jọ nọ o wuhrẹ omai họ, epanọ Jihova o you emọ riẹ te.
EPANỌ JESU O RO DHESẸ NỌ JIHOVA O YOU OMAI
12. Fikieme ma rọ rọwo nọ oghẹrẹ nọ Jesu o dhesẹ Jihova na, ere ọ ginẹ rrọ?
12 Okenọ Jesu ọ jọ otọakpọ na, o wuhrẹ ahwo kpahe oghẹrẹ ohwo nọ Jihova ọ rrọ. (Luk 10:22) U wo oware ovo nọ o rẹ lẹliẹ omai vro ẹme nọ Jesu ọ ta kpahe Jihova ha. O rrọ ere keme Jesu ọ rria kugbe Jihova ikpe ima-idu buobu no re ọ tẹ te ziọ otọakpọ. (Kọl. 1:15) Jesu ọ riẹ nọ Ọsẹ riẹ o you rie gaga. Ọ tẹ jẹ ruẹ epanọ Ọsẹ riẹ o ro dhesẹ nọ o you ikọ-odhiwu gbe ahwo-akpọ nọ i bi yoẹme kẹe. Kọ eme Jesu ọ ta re o sai mu ahwo ẹro nọ Ọghẹnẹ o gine you rai?
13. Oghẹrẹ vẹ Jesu ọ gwọlọ nọ ma rri Jihova?
13 Jesu ọ gwọlọ nọ ma riẹ nọ Jihova o you omai. Ma te rri obe Matiu rite obe Jọn, ma rẹ ruẹ nọ Jesu o se Jihova “Ọsẹ” bu vrẹ isia udhoree (160) soso. Nọ ọ tẹ be ta ẹme kẹ ilele riẹ kpahe Jihova, ọ jẹ hai se Jihova nọ “Ọsẹ rai” hayo “Ọsẹ obọ odhiwu rai.” (Mat. 5:16; 6:26) Taure Jesu ọ tẹ te ziọ otọakpọ, idibo Ọghẹnẹ a jẹ hai se Ọghẹnẹ edẹ-ova ilogbo yọ a jẹ hae rọ edẹ-ova itieye na dhesẹ oghẹrẹ nọ Jihova ọ rrọ. Edẹ-ova itieye na jọ họ ‘Erumeru,’ ‘Ọnọ Ọ Mai Kpehru na,’ gbe ‘Ọmemama Oride.’ Rekọ ‘Ọsẹ’ oye Jesu ọ jẹ hae mai se Jihova, orọnikọ edẹ-ova ilogbo jọ họ. Oyena o lẹliẹ omai riẹ nọ Ọghẹnẹ ọ gwọlọ nọ idibo riẹ a kẹle iẹe gaga wọhọ epanọ Ọsẹ oyoyou ọ rẹ kẹle emọ riẹ na. Jesu ọ be rọ ere wuhrẹ omai nọ ma rri Jihova inọ Ọsẹ mai ọ rrọ, yọ o you omai, ọ tẹ jẹ kẹle omai. Ma te ta ẹme kpahe eria ivẹ jọ evaọ Ebaibol nọ Jesu o jo se Jihova Ọsẹ.
14. Eme Jesu ọ ta nọ u dhesẹ nọ Ọsẹ obọ odhiwu mai na o rri omai kpobi na omomọvo ghaghae? (Matiu 10:29-31) (Rri uwoho na re.)
14 Joma kake ta ẹme kpahe ẹme nọ Jesu ọ ta evaọ obe Matiu 10:29-31. (Se Matiu 10:29-31.) Jesu ọ ta ẹme kpahe emevra esese jọ nọ a re se imuedi. Ma riẹ nọ emevra e sai you Jihova ha, yọ a sae gọe he. Ghele na, Ọsẹ mai na o re muẹrohọ emevra yena. Fikiere ọ rẹ riẹ nọ makọ ọvo dede o te kie fihọ otọ. O tẹ rrọ ere, kọ ohwo-akpọ nọ ọ be gọ Jihova ziezi fikinọ o you Jihova, ẹvẹ Jihova o re you rie te! Jesu ọ tẹ jẹ ta kẹ ilele riẹ nọ Jihova “ọ tubẹ riẹ unu ibieto kpobi nọ e rrọ owhai uzou.” Otẹrọnọ Jihova ọ rẹ sai muẹrohọ unu ibieto nọ e rrọ omai uzou, koyehọ o bi gine muẹrohọ ohwo kpobi nọ ọ rrọ olele Jesu, yọ o you rie gaga. Eme yena nọ Jesu ọ ta na i dhesẹ nọ ọ gwọlọ nọ ma riẹ nọ Ọsẹ obọ odhiwu mai na o you omai gaga.
Makọ omuedi ọvo dede, Jihova ọ rehọ e riẹ zaro ho. Jihova ọ rẹ riẹ nọ o te kie fihọ otọ. Otẹrọnọ ọmọvra gheghe ọ ghare riẹ obọ tere, ẹvẹ whẹ nọ whọ be gọe fikinọ who you rie whọ rẹ ghare iẹe obọ te! (Rri edhe-ẹme avọ 14
15. Eme ẹme nọ Jesu ọ ta evaọ obe Jọn 6:44 na u wuhrẹ owhẹ kpahe Ọsẹ obọ odhiwu ra?
15 Joma ta kpahe oria ofa nọ Jesu ọ jọ se Jihova “Ọsẹ.” (Se Jọn 6:44.) Ọsẹ obọ odhiwu ra ọvo o si owhẹ ziọ ukoko na. Koyehọ o ru nọ ukoko na o rọ were owhẹ. Kọ fikieme o ro si owhẹ ziọ ukoko na? Keme na ọ ruẹ nọ who wo emamọ eva. (Iruẹru 13:48) O sae jọ nọ ẹme nọ Jesu ọ ta evaọ obe Jọn 6:44 na, ọ rehọ e riẹ no ẹme jọ nọ ọ rrọ obe Jerimaya ze. Etẹe a rehọ uzoẹme nana no ze na. O ta nọ: “Uyoyou ebẹdẹ bẹdẹ me wo kẹ owhẹ. Oyejabọ nọ mẹ rọ rehọ uyoyou nọ o rẹ hiẹ hẹ si owhẹ kẹle omamẹ.” Ẹme-obotọ riẹ o ta nọ oyejabọ “me gbe bi ro dhesẹ uyoyou nọ o rẹ hiẹ hẹ kẹ owhẹ na.” (Jeri. 31:3, ẹme-obotọ; je rri Hos. 11:4.) Dai roro kpahe otọ ẹme yena. Ọsẹ obọ odhiwu mai nọ o you omai gaga na o gbe bi muẹrohọ emamọ uruemu jọ evaọ omara, ẹsejọhọ who bi tube muẹrohọ iẹe dede he.
16. (a) Ma te rri eme Jesu na, eme ọ be vuẹ omai na, kọ fikieme u je fo re ma rọwo ẹme riẹ? (b) Eme whọ sai ru nọ u re ro mu owhẹ ẹro gaga inọ Jihova họ Ọsẹ nọ mai kpobi ma gwọlọ? (Rri ẹkpẹti na “Ọsẹ nọ Mai Kpobi Ma Gwọlọ.”)
16 Ọsẹ nọ Jesu o se Jihova na, Jesu ọ be rọ ere vuẹ omai nọ: “Jihova Ọsẹ mẹ na, orọnọ mẹ ọvo o wo rie he. Ọsẹ na ọrai re.” Jesu ọ be vuẹ owhẹ nọ Jihova o you owhẹ, yọ whọ rrọ ghaghae kẹe gaga. Fikiere otẹrọnọ ẹsejọ who re roro nọ Jihova o you owhẹ hẹ, dhizu re whọ nọ omara nọ, ‘Kọ u gbe fo nọ mẹ rẹ rọwo ẹme nọ Ọmọ nọ ọ mae riẹ Ọsẹ na ọ be vuẹ omẹ kpahe Ọsẹ na, nọ orọnọ uzẹme ọvo ọ rẹ ta na?’—1 Pita 2:22.
HAI GBE RU EPANỌ U RE RO MU OWHẸ ẸRO NỌ JIHOVA O YOU OWHẸ
17. Eme o jẹ roja re ma hai gbe ru eware nọ u re ro mu omai ẹro nọ Jihova o you omai?
17 Ma rẹ daoma gbe ru eware nọ u re ro mu omai ẹro nọ Jihova o gine you omai. Ma wuhrẹ no nọ ọwegrẹ mai na Setan ọ vọ avọ ẹghẹ, yọ ọ be gwọlọ epa kpobi nọ ma rẹ rọ siọ Jihova ba ẹgọ. Edhere jọ nọ ọ be rọ gwọlọ ru ere họ, o re ru re ma roro nọ Jihova o you omai hi. Rekọ ma du kẹ Setan uvẹ vievie he re ọ viẹ omai họ.—Job 27:5.
18. Eware jọ vẹ who re ru re u mu owhẹ ẹro gaga inọ Jihova o you owhẹ?
18 Re u mu owhẹ ẹro gaga inọ Jihova o you owhẹ, hae lẹ sei inọ o fiobọhọ kẹ owhẹ rri omara epanọ o bi rri owhẹ. Hai je roro didi kpahe eria Ebaibol nọ i dhesẹ nọ Jihova o you owhẹ gaga. Whọ vẹ hae jẹ kareghẹhọ nọ ohwo o te you Jihova, u wo oghẹrẹ ovo nọ Jihova o gbe ro you rie he he. U te no ere no, hai roro kpahe idhe ẹtanigbo na, je rri rie nọ yọ oware nọ Jihova o ru kẹ owhẹ omara na dẹẹ. Hae kareghẹhọ oware nọ Jesu o wuhrẹ owhẹ inọ Jihova yọ Ọsẹ obọ odhiwu ra, whọ vro riẹ vievie he. Who te bi ru eware nana kpobi, ohwo jọ ọ tẹ nọ owhẹ nọ: “Kọ Jihova o gine you owhẹ?” whọ te nwane ta kẹe nọ: “Ee, o you omẹ! Yọ mẹ be dao utho ẹgba mẹ kẹdẹ kẹdẹ re me ru eware nọ i dhesẹ nọ me you rie.”
OLE AVỌ 154 Uyoyou O rẹ Jọ Bẹdẹ
a Whọ tẹ gbẹ gwọlọ ruẹ eria Ebaibol efa nọ i dhesẹ nọ Jihova o you omai, rri obe Eria Ebaibol nọ I re Fiobọhọ kẹ Omai Gọ Jihova, uzoẹme nọ o ta nọ “Ohwo nọ O bi Roro nọ O Fioka Ha.”