Jọ U Mu Owhẹ Ẹro nọ Jihova Ọ Rọvrẹ Owhẹ No

1-2. Nọ Jihova ọ tẹ rọvrẹ ọrahauzi nọ o kurẹriẹ no, eme o rẹ via? (Rri uwoho nọ o rrọ uke Uwou-Eroro na re.)

DEVIDI ovie na yọ ohwo nọ udu u brukpe fiki izi nọ ọ raha. (Ol. 40:12; 51:3; ẹme nọ ọ rrọ ehru oria ikereakere na) Ọ raha izi ilogbo jọ. Rekọ nọ o kurẹriẹ no eva ze, Jihova ọ rọvrẹ riẹ. (2 Sam. 12:13) Udu u te Devidi otọ fikinọ ọ riẹ nọ Jihova ọ rọvrẹ riẹ no.—Ol. 32:1.

² Mai omamai, ma tẹ riẹ nọ Jihova ọ rọvrẹ omai no, udu u re te omai otọ, yọ eva e rẹ were omai. Ma riẹ nọ ma tẹ raha uzi, ma je kurẹriẹ no eva ze, jẹ ta izieraha mai kẹ ekpako na, jẹ be daoma re ma gbẹ wariẹ oware na ha, Jihova ọ rẹ rọvrẹ omai, o tẹ make rrọ uzioraha ulogbo dede. Oware nana nọ ma riẹ kpahe Jihova na o rẹ lẹliẹ udu te omai otọ. (Itẹ 28:13; Iruẹru 26:20; 1 Jọn 1:9) Eva e be were omai gaga inọ erọvrẹ Jihova o woma hrọ keme ọ tẹ rọvrẹ owhẹ no, o rẹ wọhọ ẹsenọ whọ tubẹ raha uzi ẹdẹvo ho.—Izik. 33:16.

3-4. Eme o jẹ via kẹ oniọvo-ọmọtẹ jọ nọ ọ họ-ame no, kọ eme ma te ta ẹme kpahe evaọ uzoẹme nana?

³ Ẹsejọ ma re roro nọ Jihova ọ re rọvrẹ omai hi. Ere o jọ kẹ oniọvo-ọmọtẹ jọ nọ a re se Jennifer nọ a yẹ evaọ ukoko na. Okenọ ọ jọ uzoge, o te je ru ikpehre eware. Owọ riẹ jọ o rrọ ukoko na, yọ owọ riẹ jọ o rrọ obọ akpọ. Nọ ikpe buobu e te vrẹ no, o te nwene, ọ tẹ te họ-ame. Ọ ta nọ: “Okenọ mẹ jọ obọ akpọ, me je le efe, me je gbe-ọfariẹ, mẹ jẹ da idi vrẹ oma, yọ mẹ jẹ hai mu ekpehre ofu. Mẹ riẹ nọ mẹ tẹ lẹ se Ọghẹnẹ re ọ rọvrẹ omẹ, me je gine kurẹriẹ, Ọghẹnẹ ọ te rọvrẹ omẹ fiki azẹ Jesu. Rekọ nọ mẹ maki kurẹriẹ no ghele, udu mẹ o gbẹ jẹ vuẹ omẹ nọ Ọghẹnẹ ọ re rọvrẹ omẹ hẹ.”

⁴ Kọ udu o be hai brukpe owhẹ ẹsejọ inọ Ọghẹnẹ ọ re rọ izi nọ whọ raha oke jọ rọvrẹ owhẹ hẹ? Jihova ọ gwọlọ nọ ma riẹ nọ o wo ohrọ-oriọ re udu u je te omai otọ wọhọ epanọ udu u te Devidi otọ na. Ma te jọ uzoẹme nana ta ẹme te oware nọ o rọ roja re ma rọwo nọ Jihova ọ rọvrẹ omai no, gbe oware nọ ma re ru re u gine mu omai ẹro inọ ọ rọvrẹ omai no.

FIKIEME O RỌ ROJA RE MA RỌWO NỌ JIHOVA Ọ RỌVRẸ OMAI NO?

5. Eme Setan ọ gwọlọ nọ ma roro nọ ma tẹ raha uzi? Kẹ oriruo ohwo jọ evaọ Ebaibol.

⁵ Ma tẹ rọwo nọ Jihova ọ rọvrẹ omai no, ma ti gbe kie ruọ ẹta Setan jọ họ. Kareghẹhọ nọ Setan ọ be gwọlọ oghẹrẹ kpobi nọ o re ro gele omai kie no egagọ Jihova. Oware jọ nọ o bi ru re ma siọ Jihova ba ẹgọ họ, o re ru re ma roro nọ Jihova ọ sae rọ izieraha mai vrẹ omai hi. Kareghẹhọ ọzae nọ a si no ukoko evaọ obọ Kọrint oke ẹdẹ fikinọ o gbe-ọfariẹ. (1 Kọr. 5:1, 5, 13) Nọ ọzae na o kurẹriẹ no, inievo ukoko na a jẹ rọvrẹ riẹ hẹ, fikiere a jẹ rọwo dede iei rehọ họ. Yọ oware nọ Ẹdhọ ọ gwọlọ ọye. Ere ọvo ho, Ẹdhọ ọ gwọlọ nọ ọzae nọ o kurẹriẹ na o re rri omariẹ nọ a sae rọvrẹ riẹ hẹ, re “ọkora ọgaga” ọ “dae oma fia,” ọ vẹ nwani no ere siọ Jihova ba ẹgọ. Ẹdhọ ọ re seba ha. Ọ gwọlọ ru re ma siọ Jihova ba ẹgọ. Yọ ọ gbẹ be rọ ẹghẹ yena gbe efa rọ gwọlọ gele omai kie. Rekọ “ma rrọ igbori eghẹ riẹ hẹ.”—2 Kọr. 2:5-11.

6. Nọ ma te kurẹriẹ no izieraha mai no, eme ma rẹ rọwo nọ u re ru udu dhẹ omai?

⁶ U te mu omai ẹro nọ Jihova ọ rọvrẹ omai no, udu u re dhẹ omai. Ohwo ọ tẹ raha uzi, udu u re brukpei. (Ol. 51:17) Yọ ere u fo nọ o rẹ jọ. Udu u te bi brukpe omai fiki oware uyoma nọ ma ru, o sae lẹliẹ omai daoma kurẹriẹ je ru oware nọ u fo. (2 Kọr. 7:10, 11) Rekọ nọ ma tẹ gbẹ be rọ oware nọ ma ru na kpokpo udu mai dede nọ ma kurẹriẹ no, o sai ru nọ ma rẹ rọ siọ Jihova ba ẹgọ. Ma tẹ rọwo nọ Jihova ọ rọvrẹ omai no, udu u re gbe brukpe omai hi. Ma vẹ te sae ginẹ gọ Jihova avọ evawere, ababọ udu nọ u re brukpe omai, yọ oware nọ Jihova ọ gwọlọ oye. (Kọl. 1:10, 11; 2 Tim. 1:3) Kọ eme ma re ru re u mu omai ẹro nọ Jihova ọ rọvrẹ omai no?

EME MA RE RU RE U MU OMAI ẸRO NỌ JIHOVA Ọ RỌVRẸ OMAI NO?

7-8. Oghẹrẹ vẹ Jihova o dhesẹ omariẹ kẹ Mosis, kọ eme o lẹliẹ omai riẹ kpahe oghẹrẹ ohwo nọ Jihova ọ rrọ? (Ọnyano 34:6, 7)

⁷ Roro kpahe oghẹrẹ ohwo nọ Jihova o dhesẹ omariẹ inọ ọ rrọ. Whọ sai roro kpahe ẹme nọ Jihova ọ ta kẹ Mosis evaọ ugbehru Saena.a (Se Ọnyano 34:6, 7.) Nọ Jihova ọ jẹ vuẹ Mosis oghẹrẹ ohwo nọ ọyomariẹ ọ rrọ, u wo eware buobu nọ ọ hae sae vuẹe kpahe omariẹ. Rekọ eme ọ ta kẹ Mosis kpahe omariẹ? Jihova ọ ta kẹe nọ ọyomariẹ yọ “Ọghẹnẹ nọ o wo ohrọ-oriọ gbe ọdawẹ.” Kọ Ọghẹnẹ otiọye na ọ te ta nọ ọ rẹ rọvrẹ odibo riẹ hẹ otẹrọnọ ọ raha uzi yọ o kurẹriẹ no eva ze no? Vievie, ọ sai ru ere he! Ohwo nọ ọ rrọ eva gaga nọ o wo ohrọ-oriọ họ ọye o re ru oware utioye na. Jihova ọ rrọ ere vievie he.

⁸ Ma riẹ nọ Jihova ọ sae ta nọ enẹ mẹ rrọ kpakiyọ ere ọ rrọ họ họ, keme yọ Ọghẹnẹ nọ ọ rẹ ta uzẹme. (Ol. 31:5) Fikiere ma sae rọwo ẹme nọ ọ ta. Whọ tẹ gbẹ be rọ izi nọ whọ raha oke jọ ro kpokpo udu ra, nọ omara nọ: ‘Kọ mẹ ginẹ rọwo nọ Jihova yọ Ọghẹnẹ nọ o wo ohrọ-oriọ gbe ọdawẹ, yọ ọ rẹ rọvrẹ ohwo kpobi nọ ọ raha uzi nọ o kurẹriẹ? O tẹ rrọ ere, kọ u gbe fo re mẹ rọwo nọ ọ rọvrẹ omẹ no?’

9. A tẹ ta nọ Jihova ọ rọvrẹ ohwo no, eme u dhesẹ? (Olezi 32:5)

⁹ Roro kpahe oghẹrẹ nọ ahwo nọ i kere Ebaibol a dhesẹ erọvrẹ Jihova. Ohwo jọ nọ o kere kpahe erọvrẹ Jihova họ Devidi. (Se Olezi 32:5.) Devidi ọ ta kẹ Jihova nọ: “Whọ tẹ rọ izieraha mẹ rọvrẹ omẹ.” Ẹme Hibru nọ a fa inọ “rọvrẹ” na, a rẹ sae rehọ iẹe dhesẹ “epanọ a rẹ wọ oware no otọ,” “epanọ a rẹ wọ oware vrẹ,” hayo “epanọ a rẹ wọ oware.” Koyehọ nọ Jihova ọ rọvrẹ Devidi no, o tẹ wọhọ ẹsenọ ọ wọ izieraha Devidi no otọ, ọ tẹ wọ ae vrẹ. Udu u te dhẹ Devidi. Udu u gbe je brukpei hi fiki oware nọ o ru na. (Ol. 32:2-4) Udu o sai te omai otọ ere re. Nọ ma te gine kurẹriẹ no izieraha mai, u fo nọ udu u re gbe bru omai hi fiki izi nọ ma raha, keme Jihova ọ wọ izieraha na vrẹ no.

10-11. Eme họ otọ ẹme na inọ Jihova ọ ‘ruẹrẹ oma kpahe re ọ rọvrẹ’? (Olezi 86:5)

¹⁰ Se Olezi 86:5. Devidi ọ jọ oria Ebaibol yena ta nọ Jihova ọ “ruẹrẹ oma kpahe re [ọ] rọvrẹ.” Obe jọ nọ a jọ fa otọ eme nọ e rrọ Ebaibol na o ta kpahe ẹme nọ Devidi ọ ta na. O ta kpahe Jihova nọ: “Ọghẹnẹ erọvrẹ [ọ rrọ]. Ẹkoma riẹ oye.” Kọ ẹvẹ erọvrẹ o sae rọ rrọ ẹkoma Jihova? Abọ urere oria Ebaibol yena o vuẹ omai nọ: “Whọ vọ avọ uyoyou nọ o rẹ hiẹ hẹ kẹ enọ i bi bo se owhẹ kpobi.” Ma jọ uzoẹme nọ ọ vrẹ na wuhrẹ nọ fikinọ Jihova o wo uyoyou nọ o rẹ hiẹ hẹ kẹ idibo riẹ nọ e be gọe ziezi, ọ rẹ nyase ae ba ha. Fikinọ Jihova o wo uyoyou nọ o rẹ hiẹ hẹ, odibo riẹ kpobi nọ ọ raha uzi o te kurẹriẹ, Jihova ọ rẹ ‘rọvrẹ riẹ riẹriẹriẹ.’ (Aiz. 55:7, ẹme-obotọ) Otẹrọnọ o be lọhọ kẹ owhẹ hẹ re whọ rọwo nọ Ọghẹnẹ ọ rọvrẹ owhẹ no, whọ sae nọ omara nọ: ‘Kọ u gine mu omẹ ẹro nọ Jihova yọ Ọghẹnẹ nọ o wo erọvrẹ, nọ ọ rẹ rọvrẹ ọrahauzi kpobi nọ o kurẹriẹ nọ ọ lẹ sei kẹ erọvrẹ? O tẹ rrọ ere, kọ u gbe fo re mẹ rọwo nọ ọ rọvrẹ omẹ no nọ orọnọ mẹ lẹ sei inọ ọ rọvrẹ omẹ na?’

¹¹ Oware jọ nọ u re ru udu te omai otọ họ nọ ma tẹ kareghẹhọ nọ Jihova ọ riẹ omai lafi, ọ riẹ nọ mai erahaizi. (Ol. 139:1, 2) Eme efa nọ Devidi ọ ta evaọ obe Ilezi o lẹliẹ omai riẹ ere. Yọ eme yena i re ru nọ ma rẹ rọ ruẹ nọ Jihova ọ be hae rọvrẹ omai.

JỌ OWARE NỌ JIHOVA Ọ BE KAREGHẸHỌ NA O THỌRỌ OWHẸ ẸRO HO

12-13. Eme Olezi 103:14 o ta nọ Jihova ọ be kareghẹhọ, kọ eme oware yena nọ ọ be kareghẹhọ na o rẹ lẹliẹe ru?

¹² Se Olezi 103:14. Devidi ọ ta nọ Jihova ọ “be kareghẹhọ nọ mai yọ ovu.” Ẹme yena nọ Devidi ọ ta na u ru nọ ma rọ riẹ oware ofa jọ nọ o be hae lẹliẹ Jihova rọvrẹ idibo riẹ nọ e raha uzi nọ i kurẹriẹ. Oye họ, ọ rẹ kareghẹhọ nọ mai erahaizi. Ma ti rri ẹme nọ Devidi ọ ta na ziezi re ma sae riẹ otọ ẹme na vevẹ.

¹³ Devidi ọ ta nọ Jihova “ọ riẹ vevẹ oghẹrẹ nọ a rọ ma omai.” Jihova Ọghẹnẹ ọ ma Adamu “rono ẹkpẹ otọ na ze.” Fikiere ọ riẹ nọ Adamu ọ make rrọ gbagba na, u wo eware jọ nọ o re ru re ọ sae gbẹ jọ uzuazọ, ababọ eware yena, ọ sae jọ uzuazọ họ. (Emu. 2:7) Ejọ họ, ọ rẹ re emu, ọ rẹ wezẹ, ọ rẹ jẹ wẹ re. Rekọ nọ Adamu avọ Ivi a raha uzi no, a tẹ ta nọ ohwo-akpọ yọ ovu, orọnọ eware yena ọvo u dhesẹ hẹ. Rekọ u dhesẹ re nọ mai yọ erahaizi keme ma reuku uzioraha mi Adamu avọ Ivi. Fikiere eware e rẹ thọ omai obọ. Orọnọ ẹriẹ ọvo Jihova ọ riẹ nọ mai erahaizi hi. Who te rri ẹme Devidi na, whọ rẹ ruẹ nọ Jihova ọ “be kareghẹhọ” nọ mai erahaizi. Ẹme Hibru nọ a fa ẹme yena no ze o rẹ sai dhesẹ epanọ ohwo o re ru emamọ oware kpahe oware nọ ọ be kareghẹhọ na. Ma sae ta nọ ẹme nọ Devidi ọ be jọ oria Ebaibol yena ta kpobi na họ, Jihova ọ riẹ nọ ma te seba eruthọ họ evaọ ẹsejọ, yọ ma te ruthọ, ma je gine kurẹriẹ no eva ze, ọ rẹ re ohrọ mai, ọ vẹ rọvrẹ omai.—Ol. 78:38, 39.

14. (a) Eme Devidi ọ ta kpahe epanọ Jihova ọ rẹ rọvrẹ omai te? (Olezi 103:12) (b) Ẹvẹ oware nọ o via kẹ Devidi u ro dhesẹ nọ Jihova ọ tẹ rọvrẹ no yọ ọ rọvrẹ no? (Rri ẹkpẹti na “Jihova Ọ tẹ Rọvrẹ Ohwo No, Ọ rẹ Kpairoro Vrẹ Oruthọ Na.”)

¹⁴ Eme ọfa u dhesẹ nọ Jihova ọ rẹ ginẹ rọvrẹ gaga? (Se Olezi 103:12.) Devidi ọ ta nọ Jihova ọ tẹ rọvrẹ omai no, o re fi izieraha mai họ thabọ no omai gaga “wọhọ epanọ ovatha-ọre u thabọ no ukiediwo-ọre na.” Obonọ ọre ọ rẹ va no ze gbe obonọ o re jo kiediwi i thabọ no ohwohwo wo umuo ho. Eme ẹme yena o dhesẹ kpahe oghẹrẹ nọ Jihova o re ru izieraha mai nọ ọ tẹ rọvrẹ omai no? A jọ obe jọ kẹ oriruo jọ nọ u ru ẹme na vẹ. O ta nọ: “Otẹrọnọ enẹ a re si uzioraha ohwo thabọ noi te, koyehọ a rẹ sai gbe tube yo ore uzioraha na dede he, a rẹ gbẹ tubẹ kareghẹhọ nọ ohwo na ọ raha uzi yena ẹdẹ jọ họ.” Whọ riẹ nọ ẹsejọ ohwo o te yo oghẹrẹ ore jọ, o sae lẹliẹe kareghẹhọ oware jọ. Rekọ Jihova ọ tẹ rọvrẹ ohwo no, o rẹ wọhọ ẹsenọ o si makọ ore uzioraha na dede thabọ no ohwo na no re o gbẹ lẹliẹe kareghẹhọ uzioraha na ha re ọ kẹe uye fiki riẹ.—Izik. 18:21, 22; Iruẹru 3:19.

15. Eme ma re ru otẹrọnọ udu u re gbe brukpe omai fiki eware nọ ma ru oke jọ?

¹⁵ Ẹvẹ eme nọ Devidi ọ ta evaọ Olezi avọ 103 na o sae rọ lẹliẹe mu omai ẹro nọ Jihova ọ rọvrẹ omai no? Otẹrọnọ udu u gbe bi brukpe omai fiki izi nọ ma raha oke jọ, ma sae nọ omamai nọ: ‘Kọ oware nọ Jihova ọ be hae kareghẹhọ na, mẹ be kareghẹhọ iẹe ere na? Kọ o be thọrọ omẹ ẹro no inọ Jihova ọ be kareghẹhọ nọ mẹ reuku uzioraha, yọ ọ rẹ rọvrẹ omẹ nọ me te kurẹriẹ? Hayo kọ ogbẹrọnọ oware nọ Jihova ọ kpairoro vrẹ no mẹ be kareghẹhọ na? Kọ iruthọ mẹ nọ Jihova ọ rọvrẹ omẹ no, nọ ọ te gbẹ rọ fiki rai ru omẹ oware ovo ho, eye mẹ be jẹ kareghẹhọ na?’ Jihova o re roro kpahe izi nọ ma raha oke jọ họ, u fo nọ ma roro kpahe ae gbe he. (Ol. 130:3) Ma tẹ rọwo nọ Jihova ọ rehọ izi nọ ma raha oke jọ rọvrẹ omai no, ma te rọvrẹ omobọ mai, ma vẹ te gọ Jihova vrẹ avọ evawere.

16. Kẹ oriruo jọ nọ u dhesẹ nọ ma tẹ be hai roro kpahe eware iyoma nọ ma ru oke jọ, u woma ha. (Rri uwoho na re.)

¹⁶ Ohwo nọ o re roro kpahe izi nọ ọ raha oke jọ ẹsikpobi ọ wọhọ ohwo nọ ọ be dhẹ omoto, rekọ ukpenọ o rri obaro, kọ ughẹgbe nọ a rẹ rọ ruẹ oware nọ o be dhẹ no obemu ze ọvo o bi rri. Ma riẹ nọ u fo re a rri ughẹgbe yena ẹsejọ keme u re ru nọ whọ sae rọ kẹnoma kẹ oware nọ u bi no obemu ze. Rekọ re ohwo na ọ sae dhẹ te obonọ ọ be nya, o re rri obaro. Ere ọvona re, ẹsejọ nọ ma te roro kpahe eware nọ ma ruthọ oke jọ, o sai fiobọhọ kẹ omai keme ma ti wuhrẹ no iruthọ mai ze, yọ ma te daoma re ma gbẹ wariẹ eware yena ha. Rekọ otẹrọnọ ẹsikpobi ma bi roro eware nọ ma ruthọ oke jọ, u ti ru nọ udu o te hai ro brukpe omai, ma gbẹ te sae gọ Jihova ziezi hi. Fikiere joma rri obaro ọvo, re ma gọ Jihova vrẹ. Edhere nọ ma ti jo wo uzuazọ ebẹdẹ bẹdẹ evaọ akpọ ọkpokpọ Ọghẹnẹ ma rrọ na. Nọ ma te te obei no, ma “gbẹ te kareghẹhọ eware anwae” nọ i re kpokpo udu mai hi.—Aiz. 65:17; Itẹ 4:25.

HAI GBE RU EPANỌ U RE RO MU OWHẸ ẸRO NỌ JIHOVA Ọ RỌVRẸ OWHẸ NO

17. Eme o jẹ roja re ma hai ru epanọ u re ro mu omai ẹro nọ Jihova o you omai yọ ọ rọvrẹ omai no?

¹⁷ Ma rẹ hai gbe ru eware nọ u re ro mu omai ẹro nọ Jihova o you omai yọ ọ rọvrẹ omai no. (1 Jọn 3:19, ẹme-obotọ) Fikieme? Keme Setan ọ be seba ha, o bi ru re ma roro nọ Jihova o you omai hi yọ ọ re rọvrẹ omai hi. Ọ maki bi ru kpobi na, epanọ ma rẹ rọ siọ Jihova ba ẹgọ ọvo ọ be gwọlọ. Ma riẹ nọ Setan ọ te gbẹ gwọlọ gele omai no abọ Ọghẹnẹ tube vi epanọ o bi ru nẹnẹ na keme ọ riẹ nọ oke nọ u kiọkọ kẹe u tulo ho. (Evia. 12:12) Rekọ ma kuvẹ re ọ ruẹ abọ lalọ evaọ oria nọ ma rrọ họ.

18. Eme whọ sai ru re u mu owhẹ ẹro nọ Jihova o you owhẹ yọ ọ rọvrẹ owhẹ no?

¹⁸ Who te bi roro nọ Jihova o you owhẹ hẹ, hai ru eware nọ ma wuhrẹ evaọ uzoẹme nọ o vrẹ na. Udu ra u te gbe bi brukpe owhẹ fiki eware nọ who ru oke jọ, hae kareghẹhọ oghẹrẹ nọ Jihova o dhesẹ omariẹ. Hai roro kpahe eme nọ ọ rọ ahwo kere evaọ Ebaibol nọ i dhesẹ oghẹrẹ nọ erọvrẹ riẹ o woma te. Jọ o thọrọ owhẹ ẹro ho inọ Jihova ọ be kareghẹhọ nọ whọ reuku uzioraha, yọ ọ rẹ re ohrọ mai fikinọ ọ riẹ oghẹrẹ nọ ma rrọ. Kareghẹhọ re nọ Jihova ọ tẹ rọvrẹ no, yọ ọ rọvrẹ no. Ma te bi ru eware nana kpobi, ọkpọ ẹme nọ Devidi ọ ta fikinọ u mu rie ẹro nọ Jihova o wo ohrọ-oriọ gaga na, ma te tae re inọ, “Me yere owhẹ Jihova inọ whọ ‘rọ izieraha mẹ rọvrẹ omẹ’!”—Ol. 32:5.