Eme Ebaibol na Ọ Ta Kpahe Imava nọ E re Rọo Ho nọ A rẹ Rria Kugbe?

Uyo nọ Ebaibol na ọ kẹ

Ebaibol na ọ ta nọ oreva Ọghẹnẹ họ, re ahwo kpobi a “siomano ọfariẹ-ogbe.” (1 Ahwo Tẹsalonika 4:3) Ebaibol na o dhesẹ nọ, “ọfariẹ-ogbe” u kugbe ẹnwae-obro, ọzae avọ ọzae hayo aye avọ aye nọ a rẹ wezẹ kugbe, gbe ọzae avọ aye nọ a re rọo ho nọ a rẹ wezẹ kugbe.

• Fikieme u ro wuzou evaọ aro Ọghẹnẹ re ọzae-avọ-aye a rọo taure a tẹ te rria kugbe?

• Kọ ẹvẹ kpahe imava nọ e re rọo ho nọ a rẹ rria kugbe fikinọ a gwọlọ riẹ sọ a gine fo ohwohwo?

• Eme ọzae-avọ-aye a re ru re orọo rai o jọ ziezi?

Fikieme u ro wuzou evaọ aro Ọghẹnẹ re ọzae-avọ-aye a rọo taure a tẹ te rria kugbe?

• Ọghẹnẹ họ ọnọ ọ to orọo họ. Ọghẹnẹ họ ọnọ ọ to orọo họ evaọ okenọ o ku ọzae avọ aye ọsosuọ na kugbe. (Emuhọ 2:22-24) Ọghẹnẹ ọ gwọlọ nọ ọzae avọ aye a rẹ rọo no taure a tẹ te rria kugbe.

• Ọghẹnẹ ọ riẹ oware nọ o mai woma kẹ ohwo-akpọ. Ọghẹnẹ o ru orọo evaọ oghẹrẹ nọ ọzae-avọ-aye a rẹ rọ rria kugbe ohwohwo bẹdẹ bẹdẹ. Onana o rẹ wha erere se ae jẹ thọ ahwo uviuwou na kpobi. Joma rehọ oriruo jọ ro dhesẹ iẹe. Wọhọ epanọ ọwena nọ o ku oware o re fi obe họ lele iei nọ u re dhesẹ epanọ a rẹ rọ whẹe họ na, ere Ọghẹnẹ nọ ọ to orọo họ ọ kẹ omai izi sa-sa nọ ma re koko re orọo mai o sae jọ ziezi. Izi Ọghẹnẹ nana i re fiobọhọ kẹ ohwo kpobi nọ o koko i rai.​—Aizaya 48:17, 18.

  

• Ebẹbẹ sa-sa e sai noi ze nọ imava nọ e re rọo ho a tẹ be wezẹ kugbe. Wọhọ oriruo, o sae wha udihọ nọ ohwo o rẹro riẹ hẹ ze, ọjọ ọ sae wha ẹyao fihọ ọdekọ oma, yọ o sae jẹ wha awaọruọ ọgaga ze.a

• Ọghẹnẹ ọ ma ọzae-avọ-aye evaọ oghẹrẹ nọ a re ro yẹ ọmọ, yọ re onana o sae lọhọ a rẹ wezẹ kugbe tao. Ọghẹnẹ o rri uzuazọ ghaghae gaga, yọ uvẹ ọmọ-oyẹ yọ obọdẹ okẹ nọ u no obọ Ọghẹnẹ ze. Fikiere ma re ru lele ọruẹrẹfihotọ orọo nọ Ọghẹnẹ ọ to họ na, keme ere ma re ro dhesẹ nọ ma be rọ ọghọ kẹ obọdẹ okẹ nana.​—Ahwo Hibru 13:4.

Kọ ẹvẹ kpahe imava nọ e re rọo ho nọ a rẹ rria kugbe fikinọ a gwọlọ riẹ sọ a gine fo ohwohwo?

Orọnikọ nọ ọzae avọ aye nọ a re rọo ho a tẹ wezẹ kugbe fikinọ a gwọlọ riẹ sọ aimava na a “gine fo ohwohwo,” ẹsiẹe orọo rai o rẹ tọ họ. Ukpoye, orọo rai o rẹ jọ ziezi nọ aimava na a tẹ gbaemu nọ a rẹ talamu ohwohwo je ru eware kugbe re a sai ku ebẹbẹ rai họ.b Orọo u re ru nọ imava na a rẹ rọ talamu ohwohwo ziezi.​—Matiu 19:6.

Eme ọzae-avọ-aye a re ru re orọo rai o jọ ziezi?

Ebẹbẹ e rrọ orọo kpobi keme mai ahwo-akpọ ma gba ha. Ghele na, ọzae-avọ-aye a sae were eva ziezi evaọ orọo rai nọ a tẹ be hai ru lele ehrẹ Ebaibol ẹsikpobi. Ehrẹ Ebaibol jọ họ:

• Hae rọ ẹgwọlọ ọzae hayo aye ra rọ karo.​—1 Ahwo Kọrint 7:3-5; Ahwo Filipai 2:3, 4.

• Wha hai dhesẹ uyoyou gbe adhẹẹ kẹ ohwohwo.​—Ahwo Ẹfisọs 5:25, 33.

• Hai roro te re whọ tẹ te ta ẹme.​—Itẹ 12:18.

• Hai thihakọ, jẹ kake rọvrẹ ohwohwo.​—Ahwo Kọlọsi 3:13, 14.